انار بۇلت \ شينجياڭ گازەتىنىڭ ءتىلشىسى ياۋ گاڭ 5 - ايدىڭ 13 - كۇنى گۋاڭجوۋدان حابارلايدى. 5 - ايدىڭ 13 - كۇنى كەشتە گۋاڭجوۋ قالاسىندا 1800دەن استام كورەرمەن شينجياڭنىڭ ءان - ءبي سالتاناتىن تاماشالادى. سول كۇنى كولەمدى مۋزيكا، ءبي، ولەڭ، سۋرەت قويىلىمى «جەلەگىڭدى اش − شينجياڭ جاقسى جەر» قويىلىمىنىڭ بۇكىل ەلدى ارالاپ قويىلۋى (گۋاڭجوۋ بەكەتى) گۋاڭجوۋ ۇلكەن تەاترحاناسىنىڭ وپەرا زالىندا قويىلدى.

مادەنيەت جانە ساياحات مينيسترلىگى، اۆتونوميالى رايوندىق حالىق ۇكىمەتى بىرلەسىپ تۇلعالاعان وسى تەاتر جۇڭگو شينجياڭىنىڭ حيكاياسىن جان - جاقتى، كوپ ساتىلى، ستەرەولدى تۇردە ويداعىداي بايانداپ، جاڭا داۋىردەگى شينجياڭنىڭ ەكونوميكالىق، قوعامدىق ىستەردە قول جەتكىزگەن وراسان زور تابىستارىن جاندى بەينەلەپ، شينجياڭعا كومەكتەسۋ قىزمەتىنە دەگەن العىستى سەزىمدى شىنايى بەينەلەدى.

ءان - كۇي، ءبي، ەپوس ايتۋ، مۋزيكا اسپابىمەن ورىنداۋ، مۋزيكالىق قىسقا تەاتر، جوعارى عىلىم - تەحنيكا، كوركەمونەرلىك جانە وسى زامان تىنىسىنا باي ساحنالىق اسەمدىك تاسىلدەرى قوسىلىپ، تۇتاس قويىلىمدا شينجياڭداعى ءار ۇلت حالقىنىڭ قىزۋ مەرەيگە تولى سۇيىسپەنشىلىگى ايگىلەنىپ، جاڭا داۋىردە تيانشان الابىندا تۋىلعان شينجياڭنىڭ تاماشا حيكايالارىن تەرەڭ سەزىممەن بەينەلەدى.

”باستابىندا ءان شىرقالىپ، ءبي بيلەندى، سوڭىندا وركەسترمەن سيمفونيا ورىندالدى، تارتىمدى ءان - بيدەن ءلاززات الدىق، ناق مايداندا اسەم مۋزيكا تىڭدادىق، تۇتاس قويىلىمدى شينجياڭنىڭ ءان - ءبي سالتاناتى دەۋگە بولادى“. كورەرمەن گو چياننىڭ ەڭ ۇناتاتىن ءبيى «كۇسان مۋزيكالى ءبيى»، قىزىل مىڭ ءۇيدىڭ قابىرعا سۋرەت ورنەكتەرى ساحنادا تاماشا، ايبىندى ارتقى كورىنىس بولىپ، 11 ءبيشى 10 مەتر بيىكتىكتەگى بولات سورەنىڭ ۇستىندە تۇرىپ، اياقتارىنىڭ ۇشىمەن ءجۇرىپ، بەلدەرىن تولقىپ، الاقاندارىن جۇپتاپ، قولدارىن گۇل فورماسىنا كەلتىردى... ءبي ارەكەتتەرى شيراقى، ءان اۋەنى جاعىمدى بولىپ، تاريحي ماتەريالداردا، قابىرعا سۋرەتتەردە جازىپ، سىزىپ قالدىرىلعان كۇسان كۇيلەرى مەن بيلەرىنە جان بىتكەندەي بولدى.

”تۇتاس قويىلىم باستان - اياق دۋماندى بولدى، ارتيستەر ىسىلعان ءبي شەبەرلىگىمەن، اسقاق ءان اۋەنىمەن وسى مەكەندە تۇرمىس كەشىرىپ جاتقان ءار ۇلت حالقىنىڭ قايراتتانا ورگە تالپىنعان رۋحاني بەت - بەينەسىن ايگىلەدى“، - دەدى كورەرمەن ياڭ چۇنشيا.

قويىلىمنىڭ اتقارۋشى رەجيسسەرى جاسۇر تۇرسۇن تانىستىرىپ بىلاي دەدى: ويىن نومىرلەرى شينجياڭنىڭ جەرگىلىكتى كلاسسيكالىق ۇلتتىق ءان - كۇيلەرىن، ۇلتتىق بيلەردى، شينجياڭ ۇيعۇر مۇقام كوركەمونەرىن، ۇلتتىق ەپوس ايتۋدى، ۇلتتىق مۋزيكا اسپاپتارىمەن ونەر كورسەتۋدى قامتىپ، مۋزيكالىق قىسقا تەاتر سياقتى ەڭ جاڭا كوركەمونەر جەتىستىكتەرىن توعىستىردى.

5 - ايدىڭ 14 - كۇنى «جەلەگىڭدى اش − شينجياڭ جاقسى جەر» گۋاڭجوۋ ۇلكەن تەاترحاناسىندا تاعى ءبىر رەت قويىلادى.