قورعاس اۋدانى

ىلە اڭعارىندا ءار مەزگىلدە اشىلعان گۇلدەر ادامدى قىزىقتىرادى

□ انار بۇلت \ شينجياڭ گازەتىنىڭ ءتىلشىسى بارشا تەگىس

5 - ايدىڭ 17 - كۇنى ”ءتورت ماۋسىمداعى شينجياڭعا نازاردىڭ“ ”گۇل تاماشالاي ءجۇرىپ شينجياڭعا كوز جىبەرۋ“ كولەمدى تاقىرىپتىق تىلشىلىك ۇيىرمەسى قورعاس اۋدانىنا كەلدى. قورعاس اۋدان قالاشىعىنا 40 كيلومەتر كەلەتىن جەردەگى مەملەكەتتىك 4A دارەجەلى كورىنىس ءوڭىرى جۇڭحۋا فۋشوۋشان كورىنىس وڭىرىندە تىلشىلىك ۇيىرمەسىندەگىلەر جابايى جەمىس ورمانىندا حوش ءيىسى اڭقىپ، جايقالا اشىلعان گۇلدەردى كوردى، ساياحاتشىلار بىردە شارباق جولدى بويلاپ تاۋ گۇلىن تاماشالاسا، بىردە اينەك شارباق جولدا تۇرىپ گۇلدى اڭعارعا كوز جىبەردى.

قورعاس اۋدانىنداعى جۇڭحۋا فۋشوۋشان كورىنىس وڭىرىندەگى نەشە ءجۇز مىڭ مۋ كەلەتىن تاۋلى القاپتا 400 مىڭ تۇپتەن استام جابايى جەمىس اعاشى بار، مۇنىڭ ىشىندە 200 مىڭ تۇپتەن استامى جابايى ورىك اعاشى. ءار جىلى 4 - ايدان 5 - ايعا دەيىن قارلى تاۋدىڭ ەتەگىندەگى جابايى جەمىس اعاشتارى جامىراي گۇل اشىپ قۇلپىرىپ، جەر - جەردەن اڭساپ كەلگەن ساياحاتشىلاردى وزىنە باۋرايدى. بۇل ارادا كوكتەمدە گۇل تاماشالاپ، جازدا سالقىنداپ، كۇزدە جەمىستەن ءدام تاتىپ، قىستا قاردى قىزىقتاۋعا بولادى.

”تاۋ گۇلدەرى توتەنشە كوركەم، اۋا دا وتە تۇنىق، بۇل جەرگە كەلىپ ساياحاتتاپ جەڭىلدەپ، كوڭىلىم كوتەرىلىپ قالدى“، - دەدى ۋحاندىق ساياحاتشى تاڭ لي.

2022 - جىلى قورعاس اۋدانى 120 ميلليون يۋان قارجى قوسىپ جۇڭحۋا فۋشوۋشان كورىنىس ءوڭىرىنىڭ نەگىزدىك قۇرىلعى قۇرىلىسى نىسانىن باستاپ، 4000 شارشى مەتر كەلەتىن ساياحاتشىلارعا قىزمەت وتەۋ ورتالىعىن، 4000 شارشى مەتر كەلەتىن جالپىلىق قىزمەت وتەۋ ورتالىعىن، 10 مىڭ شارشى مەترلىك كولىك توقتاتۋ الاڭىن جانە كورىنىس ءوڭىرىنىڭ سۋ، ەلەكتر، ورتتەن ساقتانۋ، ءورت ءسوندىرۋ سياقتى قوسالقى قۇرىلعىلارىن جاڭادان سالدى.

ساياحات كاسىبىنىڭ دامۋى جەرگىلىكتى ورىنداعى ەگىنشى - مالشىلاردى ”كوركەمدىك ەكونوميكاسىنىڭ“ پايداسىنا كەنەلتتى. ”كورىنىس ءوڭىرىنىڭ نەگىزدىك قۇرىلعىلارى بارعان سايىن جاقسارىپ، فۋشوۋشانعا كەلىپ گۇل تاماشالايتىن ساياحاتشىلار بارعان سايىن كوبەيدى، مەنىڭ قالتام دا قامپايدى“، - دەدى جۇڭحۋا فۋشوۋشان تاۋىنىڭ ەتەگىندەگى داشيگوۋ اۋىلى تاۋحۋا قىستاعىنىڭ تۇرعىنى اجى تۇرسۇنجان جۇزىنەن كۇلكى ەسىپ. بيىل ونىڭ مالشىلار شاتتىعى ساياجايىن اشقانىنا 9 جىل بولدى، جاقىنعى جىلداردان بەرى، ول مالشىلار شاتتىعى ساياجايىنان جىلىنا 300 مىڭ يۋانعا جۋىق كىرىس كىرگىزدى.

2019 - جىلى داشيگوۋ اۋىلى ساۋداگەر شاقىرىپ قارجى ەنگىزۋ ارقىلى ىلە تاۋيۋان مادەنيەت - ساياحات قارجى قوسۋ، دامىتۋ شەكتى سەرىكتەستىگىن قۇردى، سەرىكتەستىك سول جىلى اۋىل - قىستاق كەشەنى نىسانى − تاۋحۋا قىستاعىن جوبالادى، بۇل حالىقتىق تۇسەلحانا، گۇلدى القاپ، جەمىس ورمانى بازاسى، لۇڭكوۋ ەرۋجايى، مادەنيەت جاسامپازدىعى بازاسى سىندى 5 ۇلكەن بولىكتى قامتيدى.

ءبىر تۇتاس جوبالاۋ ارقىلى وسى قىستاقتاعى حالىقتىق تۇسەلحانالاردىڭ بارلىعى حۇيجوۋ ۇلگىسىندەگى قۇرىلىس بەينەسىندە سالىنعان، اق قابىرعالى، قارا كوك قاڭىلتاق كەرپىشتى ۇيلەر داڭعازا ورتادا جانعا تىنىشتىق سيلايدى. داشيگوۋ اۋىلدىق پارتكومنىڭ شۋجيى رىن ي بىلاي دەپ تانىستىردى: تاۋحۋا قىستاعى شاپتول گۇلى، لاۆاندا گۇلى سىندى ابزال بايلىققا سۇيەنىپ، وسى زامانعى اۋىل شارۋاشىلىعى، سەيىل - سەرۋەن، ەرەكشە ساياحات، باۋ - باقشالى الەۋمەتتىك اۋماق ءبىر تۇلعالانعان اۋىل - قىستاق باۋ - باقشا كەشەنىن قالىپتاستىردى.

تاۋحۋا قىستاعى ىلە اڭعارىنداعى ”كوركەمدىك ەكونوميكاسىنىڭ“ ىقشام كورىنىسى. كوكتەمدە ىلەدە ورىك گۇلدەيدى، بۇكىل ەلدىڭ جەر - جەرىنەن كەلگەن ساياحاتشىلار كۇنەس اۋدانىنىڭ نارات، تۇرگەن اۋىلى، قۇلجا قالاسىنىڭ حايتاڭ جولى، قۇلجا اۋدانىنىڭ ورىك باقشاسى سياقتى جەرلەرگە بارىپ، كوركەم كورىنىستى تاماشالاۋمەن بىرگە، باي مازمۇندى، تاماشا كەشىرمەلەردى دە باستان وتكەرەدى. ”1 - مامىر“ دەمالىسى كەزىندە ىلە وبلىسىنا توتە قاراستى اۋدان، قالالارداعى كورىنىس وڭىرلەرى جيىنى 78 ءتۇر بويىنشا 387 رەت ساياحات قيمىلىن وتكىزىپ، كورىنىس وڭىرلەرىندە 121 رەت ادەبيەت - كوركەمونەر ويىندارىن قويدى، باي دا وزگەشە قيمىلدار اناعۇرلىم كوپ ساياحاتشىنى وسىندا ايالداۋعا باۋراپ، قوناعا كەلگەن ساياحاتشىلار سايكەس مەزگىلدەگىدەن ％355.9 ارتتى.

مول ساياحات بايلىعى، اسىرەسە، ءبىرتالاي ۋاقىتقا جالعاساتىن گۇل ماۋسىمى ىلە وبلىسىنىڭ اتاعى مەن ىقپالىن بارىنشا جوعارىلاتتى. كوكتەم مەن جازدىڭ ءولاراسىندا كۇنەس اۋدانىنىڭ ناراتىنداعى اقوزەن جايلاۋىندا جايقالا اشىلعان جارىقگۇل بەينە كوكتەگى گۇل باقشاداي كورىنەدى؛ 6 - ايدا قيال الەمىندەگىدەي لاۆاندا گۇلىنەن حوش ءيىس اڭقيدى؛ 7 - ايدا قارلى تاۋدىڭ ەتەگىندەگى 10 مىڭ مۋلىق قىشى گۇلى جايقالا اشىلادى... كوكتەمنەن جازعا دەيىن ىلە اڭعارىندا ءار مەزگىلدە اشىلعان گۇلدەر ساياحاتشىلاردى قيماس سەزىمگە بولەپ، ەرەكشە قىزىقتىرادى.

”گۇل“ ىلەنىڭ اتى زاتىنا ساي ”حوش ءيىستى تانىسقىسىنا“ اينالدى. وسى كوكتەمدە نارات جايلاۋ مادەنيەت مەرەكەسى مەن ورىك گۇلى مەرەكەسى كەزىندە 220 مىڭ ساياحاتشى (رەت) قابىلدانىپ، ساياحات كىرىسى 120 ميلليون يۋان بولدى؛ ىلە ورىك گۇلى مادەنيەت - ساياحات مەرەكەسى كەزىندە قابىلدانعان ساياحاتشى 150 مىڭ 900گە (رەت) جەتىپ، ساياحات كىرىسى 36 ميلليون 932 مىڭ 400 يۋان بولدى؛ ”1 - مامىر“ دەمالىسىندا ىلە وبلىسىنا توتە قاراستى ورىندار ءبىر ميلليون 991 مىڭ 800 ساياحاتشى (رەت) قابىلداپ، ساياحات كىرىسىن ءبىر ميلليارد 139 ميلليون يۋانعا جەتكىزدى.