«ىزدەنۋ» جۋرنالى باس شۋجي شي جينپيڭنىڭ ماڭىزدى ماقالاسىن جاريالايدى

　　جۇڭگو ۇلگىسىندەگى وسىزامانداندىرۋ − مەملەكەتتى قۇدىرەتتەندىرۋ قۇرىلىسىنىڭ، ۇلتتى گۇلدەندىرۋدىڭ داڭعىل جولى

شينحۋا اگەنتتىگىنىڭ 8 - ايدىڭ 15 - كۇنى بەيجيڭنەن بەرگەن حابارى. 8 - ايدىڭ 16 - كۇنى باسپادان شىعاتىن «ىزدەنۋ» جۋرنالىنىڭ 16 - سانىندا جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭنىڭ «جۇڭگو ۇلگىسىندەگى وسىزامانداندىرۋ − مەملەكەتتى قۇدىرەتتەندىرۋ قۇرىلىسىنىڭ، ۇلتتى گۇلدەندىرۋدىڭ داڭعىل جولى» اتتى ماڭىزدى ماقالاسى جاريالانادى.

ماقالادا بىلاي دەپ باسا دارىپتەلدى: ءبىر ەل وسىزاماندانۋعا بەت الۋدا وسىزاماندانۋدىڭ جالپى زاڭدىلىعىنا بويسۇنۋى، ونان دا ماڭىزدىسى، ءوز ەلىنىڭ ءىس جۇزىندىگىنە ۇيلەسۋى، ءوز ەلىنىڭ ەرەكشەلىگىنە يە بولۋى كەرەك. جۇڭگو ۇلگىسىندەگى وسىزامانداندىرۋدا ءار ەلدىڭ وسىزاماندانۋىنىڭ ورتاق ەرەكشەلىگى دە، اسىرەسە، ءوز ەلىمىزدىڭ جاعدايىن نەگىز ەتكەن ايقىن ەرەكشەلىك تە بار. پارتيا 20 - قۇرىلتايىنىڭ بايانداماسىندا جۇڭگو ۇلگىسىندەگى وسىزامانداندىرۋدىڭ 5 جاقتاعى جۇڭگو ەرەكشەلىگى ايقىن جيناقتالىپ، جۇڭگو ۇلگىسىندەگى وسىزامانداندىرۋدىڭ عىلمي ءمانى تەرەڭ اشىپ كورسەتىلدى. بۇل ءارى نازاريالىق جيناقتاۋ، ءارى امالياتتىق تالاپ، جاپپاي سوتسياليستىك وسىزاماندانعان قۇدىرەتتى ەل قۇرۋعا، جۇڭحۋا ۇلتىنىڭ ۇلى گۇلدەنۋىن جۇزەگە اسىرۋعا داڭعىل جول نۇسقادى.

ماقالادا بىلاي دەپ اتاپ كورسەتىلدى: جۇڭگو ۇلگىسىندەگى وسىزامانداندىرۋدىڭ جۇڭگو ەرەكشەلىگىن تابىستى امالياتقا اينالدىرۋ، ايقىن ەرەكشەلىكتى وزگەشە باسىمدىققا اينالدىرۋ جاپالى قۇلشىنىس جاساۋدى قاجەت ەتەدى. ءبىرىنشى، حالىق سانى وراسان زور كولەمدەگى وسىزامانداندىرۋ. بۇل جۇڭگو ۇلگىسىندەگى وسىزامانداندىرۋدىڭ كورنەكتى ەرەكشەلىگى. جۇڭگودا ءبىر ميلليارد 400 ميلليوننان استام حالىق جاپپاي وسىزاماندانۋعا قادام تاستادى، كولەمى قازىرگى دامىعان ەلدەردىڭ حالىق سانىنىڭ جيىنتىعىنان اسىپ، وسىزامانداندىرۋدىڭ دۇنيە ءجۇزى قاريتاسىن بارىنشا وزگەرتەتىن بولادى. بۇل ادامزات تاريحىنداعى كولەمى ەڭ ۇلكەن وسىزامانداندىرۋ ءارى قيىندىعى ەڭ ۇلكەن وسىزامانداندىرۋ. ءبىز ماسەلەگە وي جۇگىرتكەنىمىزدە، شەشىم جاساعانىمىزدا، ءىس بىتىرگەنىمىزدە، ەڭ اۋەلى، جان سانىنىڭ نەگىزدىك سانى ماسەلەسىن ويلاستىرۋىمىز، ەلىمىزدىڭ قالا، اۋىلداردىڭ وڭىرلىك دامۋ دەڭگەيىندەگى پارىقتىڭ زور بولۋى سياقتى ءىس جۇزىندىكتى ويلاستىرۋىمىز كەرەك، قول جەتپەسكە قول سوزۋعا دا، كونە سۇردەككە جارماسىپ الۋعا دا بولمايدى، تاريحي سابىرلىلىقتى ساقتاپ، ورنىقتىلىق بارىسىندا ىلگەرىلەۋگە، بىرتىندەپ ىلگەرىلەتۋگە، ۇزدىكسىز ىلگەرىلەتۋگە تاباندى بولۋىمىز كەرەك. ەكىنشى، جالپى حالىق بىرگە باييتىن وسىزامانداندىرۋ. بۇل جۇڭگو ۇلگىسىندەگى وسىزامانداندىرۋدىڭ ماندىك ەرەكشەلىگى ءارى باتىستىڭ وسىزاماندانۋىنان پارىقتالاتىن كورنەكتى بەلگى. جوعارى ساپالى دامۋدى ىلگەرىلەتىپ، ”بالكۇلشەنى“ ويداعىداي جاساۋ، ۇلكەن جاساۋمەن بىرگە، ”بالكۇلشەنى“ ونان ارى ويداعىداي ءبولىپ، وسىزامانداندىرۋ قۇرىلىسىنىڭ جەتىستىكتەرىنەن جالپى حالىقتى اناعۇرلىم كوپ، اناعۇرلىم ءادىل يگىلىكتەندىرىپ، ەكى ۇيەككە جىكتەلۋدەن باتىل ساقتانۋ كەرەك. ءۇشىنشى، ماتەريالدىق وركەنيەت پەن رۋحاني وركەنيەتتى ءوزارا سايكەستىرەتىن وسىزامانداندىرۋ. ءارى زاتتىق بايلىق جەتكىلىكتى بولۋ، ءارى رۋحاني بايلىق مول بولۋ، بۇل جۇڭگو ۇلگىسىندەگى وسىزامانداندىرۋدىڭ وسكەلەڭ تالپىنىسى. ەكى جاعىن دا يگەرۋگە، ەكى جاعىن دا مىقتى يگەرۋگە تاباندى بولىپ، زاتتىق وركەنيەت پەن رۋحاني وركەنيەتتىڭ ءوزارا سايكەسۋىن، ءبىرىن - ءبىرى ىلگەرىلەتۋىن جەبەۋ كەرەك. پارمەندى ۇيىستىرۋ قۋاتى مەن جەتەكشىلىك قۋاتى بار سوتسياليستىك يدەولوگيانى ورناتىپ، حالىقتىڭ رۋحاني دۇنيەسىن ۇزدىكسىز بايىتىپ، تۇتاس قوعامنىڭ وركەنيەت دەڭگەيىن جوعارىلاتىپ، ادامنىڭ جان - جاقتى دامۋىن جەبەۋ كەرەك. ءتورتىنشى، ادام مەن تابيعات جاراسىمدى قاتار ءومىر سۇرەتىن وسىزامانداندىرۋ. تابيعاتقا قۇرمەت ەتۋ، تابيعاتقا سايكەسۋ، تابيعاتتى قورعاۋ، ادام مەن تابيعاتتىڭ جاراسىمدى قاتار ءومىر ءسۇرۋىن جەبەۋ − جۇڭگو ۇلگىسىندەگى وسىزامانداندىرۋدىڭ ايقىن ەرەكشەلىگى. تۇنىق سۋ، جاسىل تاۋ − باعالى بايلىق ۇستانىمىن بەرىك ورناتىپ جانە امالياتتا ايگىلەپ، جوعارى ساپالى ەكولوگيالىق ورتا ارقىلى جوعارى ساپالى دامۋعا تىرەك بولۋ كەرەك. بەسىنشى، بەيبىت دامۋ جولىمەن جۇرەتىن وسىزامانداندىرۋ. بەيبىت دامۋعا تاباندى بولىپ، دۇنيە ءجۇزىنىڭ بەيبىتشىلىگى مەن دامۋىن باتىل قورعاۋ بارىسىندا وزىندىك دامۋعا ۇمتىلۋ ءارى وزىندىك دامۋ ارقىلى دۇنيە ءجۇزىنىڭ بەيبىتشىلىگى مەن دامۋىن اناعۇرلىم ويداعىداي قورعاپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋ − جۇڭگو ۇلگىسىندەگى وسىزامانداندىرۋدىڭ كورنەكتى ەرەكشەلىگى. ءبىز بەيبىتشىلىك، دامۋ، سەلبەستىك، تەڭ يگىلىككە كەنەلۋ تۋىن باستان - اياق بيىك ۇستاپ، ءوزارا تيىمدىلىك جەتكىزىپ، تەڭ يگىلىككە كەنەلۋ سىندى ەسىك اشۋ ستراتەگياسىن اتقارىپ، ناعىز كوپ جاقتىلىقتى امالياتتا ايگىلەپ، بۇكىل ادامزاتتىڭ ورتاق قۇندىلىقتارىن اسقاقتاتىپ، ادامزاتتىڭ بەيبىتشىلىگى مەن دامۋىنا اناعۇرلىم زور ۇلەس قوسۋعا قۇلشىنۋىمىز كەرەك.

ماقالادا مىنالار باسا دارىپتەلدى: جاڭا جۇڭگو قۇرىلعاننان، اسىرەسە، رەفورما جاساپ، ەسىك اشقاننان بەرى، ءبىز نەشە ون جىل ۋاقىت جۇمساپ باتىستاعى دامىعان ەلدەردىڭ نەشە ءجۇز جىلدا باسىپ وتكەن ونەركاسىپتەنۋ بارىسىن ورىنداپ، ەكونوميكانىڭ تەز قارقىنمەن دامۋىنىڭ جانە قوعامنىڭ ۇزاق ۋاقىت ورنىقتى بولۋىنىڭ كەرەمەتتەرىن جاراتىپ، جۇڭحۋا ۇلتىنىڭ ۇلى گۇلدەنۋىنە كەڭ بولاشاق اشتىق. اماليات جۇڭگو ۇلگىسىندەگى وسىزامانداندىرۋدىڭ ىسكە اسۋى، ورنىقتى جۇرگىزىلۋى مەملەكەتتى قۇدىرەتتەندىرۋ قۇرىلىسىنىڭ، ۇلتتى گۇلدەندىرۋدىڭ بىردەن - ءبىر دۇرىس جولى ەكەندىگىن دالەلدەدى.