شينحۋا اگەنتتىگىنىڭ 9 - ايدىڭ 25 - كۇنى حاڭجوۋدان بەرگەن حابارى (تىلشىلەر ۋاڭ چۇنيان، لين دىرىن، جىڭ مىڭيۇي). دۇنيە جۇزىلىك رەكوردتى جاڭالاپ، اعا جۇلدەگەر بولدى! 9 - ايدىڭ 25 - كۇنى 18 جاستاعى جۇڭگو ساڭلاعى شىڭ ليحاۋ دۇنيە جۇزىلىك رەكوردتى جاڭالاپ، حاڭجوۋ ازيا سپورت جارىسىنىڭ ەرلەردىڭ 10 مەتر ارالىقتان گاز مىلتىقپەن نىسانا اتۋ جارىسىنىڭ جەكەلەر تۇرىندە اعا جۇلدەگەر بولدى. بۇدان سىرت، ول تاعى ساپتاسى دۋ لينشۋ، يۇي حاۋناندارمەن بىرگە ەرلەردىڭ 10 مەتر ارالىقتان گاز مىلتىقپەن نىسانا اتۋ توپتىق جارىسىنىڭ قولا مەدالىن الدى، ٴۇندىستان كومانداسى گاز مىلتىقپەن نىسانا اتۋ توپتىق جارىسىندا دۇنيە جۇزىلىك رەكوردتى جاڭالاپ، وسى تۇردەن التىن مەدال الدى.

ەرلەردىڭ 10 مەتر ارالىقتان گاز مىلتىقپەن نىسانا اتۋ تولىمدىلىق جارىسىندا توكيو وليمپيادا سپورت جارىسىنىڭ كۇمىس مەدالىن العان شىڭ ليحاۋدىڭ بابى جاقسى، قارقىنى دا وتە تەز بولدى، جارىم ساعاتتان استام عانا ۋاقىت جۇمساپ، 60 تال وق اتىپ، 634.5 ٴنومىر ناتيجەسىمەن تولىمدىلىق جارىسىندا ەڭ الدىڭعى ورىنعا جايعاسىپ، وسى جارىستا 7 - ورىندا تۇرعان ساپتاسى دۋ لينشۋمەن بىرگە شەشۋشى جارىسقا ٴتۇستى.

شەشۋشى جارىستىڭ ٴبىرىنشى اينالىمىندا 5 وقتى اتىپ بولعان سوڭ كورەيا ساڭلاعى پاك شيحيون 53.4 ٴنومىر ناتيجەسىمەن ۋاقىتشا ٴبىرىنشى ورىنعا جايعاسقان ەدى، شىڭ ليحاۋ ودان 1.2 ٴنومىر كەم ٴتۇسىپ، 2 - ورىندا تۇردى، وسى ساتتە الاڭداعى كورەرمەن ايرىقشا الاڭداپ تۇرعان بولاتىن. 10 تال وق اتىلعاننان كەيىن شىڭ ليحاۋ 105.3 ٴنومىر ناتيجەمەن پاك شيحيوندى باسىپ وزىپ، 0.4 ٴنومىر الدا تۇرىپ ۋاقىتشا الدىڭعى ورىندى يەلەدى. وسىدان كەيىن شىڭ ليحاۋ الدىڭعى ورىندى بەرمەي ەڭ سوڭىندا اعا جۇلدەگەر بولدى.

پاك شيحيون 251.3 ٴنومىر ناتيجەسىمەن جۇلدەگەرلىكتى مىسە تۇتتى، ٴۇندىستان شەبەرى تومار قولا مەدالدى قانجىعاسىنا بايلادى، تاعى ٴبىر جۇڭگولىق شەبەر دۋ لينشۋ سەگىزىنشى بولدى.

جارىستان كەيىن اقپارات قۇرالدارى تىلشىلەرىنىڭ نازارى نەگىزىنەن شىڭ ليحاۋدىڭ دۇنيە جۇزىلىك رەكوردتى جاڭالاۋداعى اسەرىنە شوعىرلاندى، ٴبىراق ول ”بۇگىن رەكورد جاڭالايمىن دەپ ويلاماعان ەدىم، شىنىندا نەندەي ٴبىر اسەردە بولعان جوقپىن، دۇنيە جۇزىلىك رەكوردتى جاڭالايتىنىمدى بىلگەن جوقپىن“ دەپ قانا جاۋاپ بەردى.

سول كۇنى ٴسال بۇرىن وتكىزىلگەن ەرلەردىڭ 10 مەتر ارالىقتان گاز مىلتىقپەن نىسانا اتۋ توپتىق جارىسىندا پانۋار، پاتير جانە توماردان ۇيىمداسقان ٴۇندىستان كومانداسى 1893.7 ٴنومىر ناتيجەسىمەن دۇنيە جۇزىلىك رەكوردتى جاڭالاپ اعا جۇلدەگەر بولدى، كورەيا كومانداسى 1890.1 ٴنومىر ناتيجەسىمەن كۇمىس مەدال ەنشىلەدى، دۋ لينشۋ، شىڭ ليحاۋ جانە يۇي حاۋنانداردان ۇيىمداسقان جۇڭگو كومانداسى 1888.2 ٴنومىر ناتيجەسىمەن قولا مەدال الدى.

سۋرەتتە: شىڭ ليحاۋ اعا جۇلدەگەر بولعاننان كەيىن كورەرمەنگە قۇرمەت بىلدىرۋدە.

شينحۋا اگەنتتىگىنىڭ ٴتىلشىسى جيا حاۋچىڭ فوتوسى