ەلىمىز عارىشقا ادام الىپ ۇشۋ ينجەنەرياسىنىڭ ۇشىرۋ مىندەتىندە 30 رەت ۇشىرىپ، 30 رەت ءساتتى بولۋ جۇزەگە اسىرىلدى

شينحۋا اگەنتتىگىنىڭ 10 - ايدىڭ 26 - كۇنى جيۋچۋاننان بەرگەن حابارى (تىلشىلەر لي گولي، حۋاڭ يچىن، ليۋ ي). 10 - ايدىڭ 26 - كۇنى ساعات 11دەن 14 مينۋت وتكەندە، شىنجوۋ 17 - ءنومىرلى عارىشكەرلى الەم كەمەسى تيەلگەن ۇزاق جورىق 2 - ءنومىرلى F ياۋ 17 - ءنومىرلى تاسىمال راكەتاسى جيۋچۋان جاساندى سەرىك ۇشىرۋ ورتالىعىندا وتالدىرىلىپ، ۇشىرىلدى، شامامەن 10مينۋتتان كەيىن، شىنجوۋ 17 - ءنومىرلى عارىشكەرلى الەم كەمەسى راكەتادان ءساتتى اجىراپ، مەجەدەگى وربيتاعا ەندى، عارىشكەرلەر توبىنىڭ جاي - كۇيى جاقسى، ۇشىرۋ تولىق تابىستى بولدى.

الەم كەمەسى وربيتاعا ەنگەننەن كەيىن، الدىن الا بەلگىلەنگەن ءتارتىپ بويىنشا كەڭىستىك بەكەتى قۇراما تۇلعاسىمەن وزدىگىنەن، شاپشاڭ توعىسىپ، ءتۇيىلىسىپ، شىنجوۋ 17 - ءنومىرلى عارىشكەرلەر توبى شىنجوۋ 16 - ءنومىرلى عارىشكەرلەر توبىمەن وربيتادا كەزەك اۋىستىرادى. كەڭىستىك بەكەتىندە قىزمەت ىستەپ، تۇرمىس كەشىرگەن مەزگىلدە، شىنجوۋ 17 - ءنومىرلى عارىشكەرلەر توبى كوپ رەت بولمەدەن شىعۋ قيمىلىن جۇرگىزىپ، ميكرو تارتىلىس نەگىزدىك فيزيكاسى، كەڭىستىك ماتەريالدار عىلىمى، كەڭىستىك تىرشىلىك عىلىمى، عارىش دارىگەرلىگى، عارىش تەحنيكاسى سياقتى سالالارعا ساياتىن زور مولشەردەگى كەڭىستىك عىلمي تاجىريبەسىن (سىناق) جاساپ، بولمە ءىشى - سىرتىنداعى جابدىقتاردى ورناتۋ، سىناقتان وتكىزۋ، كۇتىمدەۋ - جوندەۋ سياقتى مىندەتتەردى ورىندايدى.

بۇل رەتكى مىندەت − ەلىمىز عارىشقا ادام الىپ ۇشۋ ينجەنەرياسىنىڭ كەڭىستىك بەكەتىن پايدالانۋ جانە دامىتۋ ساتىسىنا قادام تاستاعاننان بەرگى 2 - رەتكى ادام الىپ ۇشۋ مىندەتى، ينجەنەريا جوسپارعا الىنىپ اتقارىلعاننان بەرگى 30 - رەتكى ۇشىرۋ مىندەتى، سونداي - اق ۇزاق جورىق جەلىلەس تاسىمال راكەتاسىنىڭ 493 - رەتكى ۇشىرىلۋى.

قازىر كەڭىستىك بەكەتىنىڭ قۇراما تۇلعاسى ءتۇيىلىسۋ وربيتاسىنا ەندى، قىزمەت كۇيى جاقسى بولىپ، شىنجوۋ 17 - ءنومىرلى عارىشكەرلى الەم كەمەسىمەن توعىسىپ ءتۇيىلىسۋ جانە عارىشكەرلەردىڭ كىرىپ جايعاسۋ شارتىن قاناعاتتاندىرا الادى.