شينحۋا اگەنتتىگىنىڭ 11 - ايدىڭ 15 - كۇنى سان - فرانسيسكودان بەرگەن حابارى. جەرگىلىكتى ۋاقىت 11 - ايدىڭ 15 - كۇنى مەملەكەت ٴتوراعاسى شي جينپيڭ امەريكانىڭ سان - فرانسيسكوسىنداعى فيلولي شارۋا قوجالىعىندا امەريكا زۇڭتۇڭى بايدەنمەن ديدارلاسۋ وتكىزدى. ديدارلاسۋ اياقتاعاننان كەيىن، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، سىرتقى ىستەر مينيسترى ۋاڭ ي مەديالارعا جاعدايدى تانىستىردى ٴارى سۇراۋعا جاۋاپ بەردى.
ٴبىرىنشى، بۇگىن ٴتوراعا شي جينپيڭ بايدەن زۇڭتۇڭمەن ديدارلاسۋ وتكىزدى، جۇڭگو مەن امەريكا ەكى ەل جانە حالىقارالىق قوعام بۇعان ايرىقشا نازار اۋداردى. ەكى باسشىنىڭ كەڭەسى قانداي بولدى؟ وسى رەتكى ديدارلاسۋدىڭ قانداي ەرەكشەلىگى بار؟
جاۋاپ: ٴتوراعا شي جينپيڭ بايدەن زۇڭتۇڭنىڭ ۇسىنىسىنا ساي، امەريكاعا كەلىپ ەكى ەل مەملەكەت باسشىلارىنىڭ سان - فرانسيسكوداعى ديدارلاسۋىن وتكىزدى، سونىمەن بىرگە، ۇسىنىس بويىنشا ازيا - تىنىق مۇحيت ەكونوميكالىق سەلبەستىك ۇيىمى باسشىلارىنىڭ بەيرەسمي ماجىلىسىنە قاتىناسادى، جاڭا عانا ەكى ەلدىڭ مەملەكەت باسشىلارى فيلولي شارۋا قوجالىعىندا ديدارلاسىپ، وتە تاماشا، جان - جاقتى، وتە تەرەڭ كەڭەس وتكىزدى. ديدارلاسۋدىڭ 3 ەرەكشەلىگى بار:
بىرىنشىدەن، ستراتەگيالىق سيپاتى. بايدەن زۇڭتۇڭ ٴتوراعا شي جينپيڭگە مەملەكەت باسشىلارىنىڭ ديدارلاسۋىن وتكىزۋدىڭ جەكە ۇسىنىسىن ارنايى جولدادى، بۇل وسى رەتكى APEC كەزىندەگى ەكى جاقتى كەزدەسۋ ورنالاستىرۋىنا ۇقسامايدى. امەريكا جاق مىنانى ەرەكشە ٴبىلدىردى: بۇل جۇڭگو مەن امەريكا اراسىنداعى ٴبىر رەتكى ”باسشىلار ٴماجىلىسى“. بىلايشا ايتقاندا، مەيلى ديدارلاسۋدى ورنالاستىرۋدىڭ دارالىق سيپاتى، جۇڭگو مەن امەريكا ەكى ەلدىڭ جانە حالىقارالىق قوعامنىڭ نازار اۋدارۋ دارەجەسى بولسىن، الدە ديدارلاسۋدىڭ ٴوز ٴمانىنىڭ ماڭىزدىلىعىنان الىپ ايتساق، بۇل ٴبىر رەتكى ستراتەگيالىق مانگە جانە تەرەڭ ىقپالعا يە مەملەكەت باسشىلارى ديدارلاسۋى سانالادى.
ەكىنشىدەن، تاريحي سيپاتى. وسى رەتكى ديدارلاسۋ جۇڭگو - امەريكا قارىم - قاتىناسى شەشۋشى كەزەڭدە تۇرعان ۇلكەن ارتقى كورىنىستە وتكىزىلدى. حالىقارالىق قوعام بۇرىنعى ٴارقانداي ۋاقىتتان دا ورنىقتى جۇڭگو - امەريكا قارىم - قاتىناسىن قاجەت ەتىپ وتىر. ٴتوراعا شي جينپيڭ اراعا 6 جىل سالىپ امەريكادا تاعى دا ساپاردا بولدى، ەكى ەل مەملەكەت باسشىلارىنىڭ اراعا ٴبىر جىل سالىپ تاعى دا بەتپە - بەت ديدارلاسۋى جۇڭگو مەن امەريكا مەملەكەت باسشىلارى ديپلوماتياسىنىڭ تاريحي جالعاسىمدىلىعىن جانە ٴداۋىر قۇنىن ايگىلەدى ٴارى ٴتوراعا شي جينپيڭنىڭ بايدەن زۇڭتۇڭمەن تالاي جىلداردان بەرگى قارىم - قاتىناسىنىڭ دا جالعاسۋى بولدى، بۇل جۇڭگو - امەريكا قارىم - قاتىناسى تاريحىندا بەلەستىك ٴمان الادى، بۇگىنگى تاڭداعى حالىقارالىق قارىم - قاتىناستاعى ٴىرى ٴىس بولارى داۋسىز.
ۇشىنشىدەن، جەتەكشىلىك سيپاتى. ديدارلاسۋ 4 ساعاتقا جالعاستى، جالپى بارىستا قوسانجار اۋدارما پايدالانىلدى. ەكى ەلدىڭ مەملەكەت باسشىلارى بەتپە - بەت تەرەڭ پىكىر اۋىستىرىپ، ٴوزارا دۇرىس تانىم ورناتۋ، الاۋىزدىقتى لايىقتى مەڭگەرۋ، تىلدەسۋدى، سەلبەستىكتى ىلگەرىلەتۋ سياقتى ەڭ كورنەكتى ماسەلەلەر جونىندە جەتەكشىلىك سيپاتتى پىكىرلەر ورتاعا قويدى، پالەستينا - يزرايل قاقتىعىسى، ۋكراينا داعدارىسى جانە كليمات وزگەرىسى، جاساندى زەردە سياقتى الەمدىك سىن - سايىستار جونىندە جان - جاقتى پىكىر اۋىستىرىپ، جۇڭگو مەن امەريكا سىندى ەكى ٴىرى ەلدىڭ تاتۋ - ٴتاتتى ٴوتۋىنىڭ دۇرىس جولىن ىشكەرىلەي تالقىلاپ، جۇڭگو مەن امەريكانىڭ بىرگە ارقالايتىن ٴىرى ەلدىك جاۋاپكەرشىلىگىن ونان ارى ايقىنداپ، بولاشاقتى بەتكە العان ”سان - فرانسيسكو كەلەشەكتىك نىساناسىن“ قالىپتاستىرىپ، جۇڭگو - امەريكا قارىم - قاتىناسىنىڭ اقاۋسىز، ورنىقتى، باياندى دامۋىن جۇزەگە اسىرۋعا ايقىن بەتالىس نۇسقاپ، كارتينا جوبالادى.
ەكىنشى، وسى رەتكى مەملەكەت باسشىلارىنىڭ ديدارلاسۋىندا ٴتوراعا شي جينپيڭ جۇڭگو جاقتىڭ قانداي كوزقاراستارى مەن تۇرعىسىن ٴتۇيىندى تۇردە باياندادى؟
جاۋاپ: ەكى ەلدىڭ مەملەكەت باسشىلارى ٴوزارا قۇرمەت ەتكەن رايدا جۇڭگو - امەريكا قارىم - قاتىناسىنا ساياتىن ستراتەگيالىق سيپاتتى، جالپى جاعدايلىق، بەتالىستىق ماسەلەلەر جونىندە، سونداي - اق دۇنيە ٴجۇزىنىڭ بەيبىتشىلىگى مەن دامۋىنا ساياتىن كەلەلى ماسەلەلەر جونىندە پىكىر اۋىستىردى. ٴتوراعا شي جينپيڭ جۇڭگو جاقتىڭ جۇڭگو - امەريكا قارىم - قاتىناسىن ورنىقتى جاقسارتۋ جونىندەگى قۇزىرلى تۇرعىسىن جان - جاقتى باياندادى، ەڭ ماڭىزدىسى، تومەندەگى بىرنەشە جاقتا بەينەلەنەدى:
بىرىنشىدەن، دۇرىس تاريحي تالعام جاساۋ كەرەك. جۇڭگو مەن امەريكا ٴتۇبىن قۋعاندا سەرىكتەس پە، الدە قارسىلاس پا؟ ٴوزارا تيىمدىلىك جەتكىزىپ، سەلبەستىك جاساسۋى كەرەك پە، الدە ەگەسۋى، قارسىلاسۋى كەرەك پە؟ بۇل ٴتۇبىرلى سيپات الاتىن ماسەلە، اۋدارۋ سيپاتتى قاتەلىك وتكىزۋگە بولمايدى. ٴتوراعا شي جينپيڭ بىلاي دەپ اتاپ كورسەتتى: تاريح − ەڭ جاقسى وقۋلىق، رەالدىق − ەڭ جاقسى ەس جيدىرۋ ۋكولى. ٴبىز ەكى ەلدىڭ سەرىكتەس بولۋىن، ەكى جاقتىڭ مۇددەسىنە ۇيلەسەتىن سەلبەستىك كەڭەس تارتىبىندە بەلسەنە ارەكەتتەنىپ، حالىقارالىق جانە كوپ جاقتى ورىندا تاماشا ىقپالداستىق ورناتۋىن ٴۇمىت ەتەمىز، وسىلاي بولعاندا جۇڭگو - امەريكا قارىم - قاتىناسىنىڭ بولاشاعى نۇرلى بولادى.
ەكىنشىدەن، تاتۋ - ٴتاتتى ٴوتۋدىڭ دۇرىس جولىن تابۋ كەرەك. ٴتوراعا شي جينپيڭ بىلاي دەپ اتاپ كورسەتتى: جۇڭگو مەن امەريكانىڭ تاريحي مادەنيەتى، قوعامدىق ٴتۇزىمى ۇقسامايدى، ٴبىراق قارىم - قاتىناس جاساماۋىنا بولمايدى، قارسى جاقتى وزگەرتەمىن دەۋ ٴىس جۇزىندىككە جاناسپايدى، قاقتىعىستى، قارسىلاسۋدى ەشكىم دە كوتەرە المايدى. دۇرىس ٴادىس − ٴوزارا قۇرمەت ەتۋگە، بەيبىت قاتار تۇرۋعا، سەلبەستىك جاساسىپ، تەڭ يگىلىككە كەنەلۋگە تاباندى بولۋ. وسى 3 پرينسيپ جارتى عاسىردان بەرگى جۇڭگو - امەريكا قارىم - قاتىناسىنان قورىتىلعان ماڭىزدى تاجىريبە ٴارى تاريحتاعى ٴىرى ەلدەر قاقتىعىىسى، قارسىلاسۋى اكەلگەن تەرەڭ ساباق، بۇل جۇڭگو مەن امەريكا ەكى جاقتىڭ بىرگە قۇلشىنىس جاساۋىنىڭ بەتالىسى بولۋعا ٴتيىس.
ۇشىنشىدەن، سان - فرانسيسكو كەلەشەكتىك نىساناسىن اشۋ كەرەك. ٴتوراعا شي جينپيڭ بيىكتە تۇرىپ الىستى بولجاي وتىرىپ بىلاي دەپ اتاپ كورسەتتى: جۇڭگو مەن امەريكا دۇرىس تانىمدى بىرگە ورناتىپ، الاۋىزدىقتى بىرگە ٴونىمدى مەڭگەرىپ، ٴوزارا تيىمدىلىك جەتكىزۋدى، سەلبەستىك جاساسۋدى بىرگە ىلگەرىلەتىپ، ٴىرى ەلدىك جاۋاپكەرشىلىكتى بىرگە ارقالاپ، گۋمانيتارلىق اۋىس - كۇيىستى بىرگە ىلگەرىلەتۋى كەرەك. وسى ”بەس بىرگە“ جۇڭگو - امەريكا قارىم - قاتىناسىنىڭ ورنىقتى دامۋى ٴۇشىن سومدالعان بەس تىرەككە بارابار، ول جۇڭگو - امەريكا قارىم - قاتىناسىنىڭ كەلەشەكتى بەتكە العان جاڭا كەلەشەكتىك نىساناسىن اشادى.
ٴۇشىنشى، وسى رەتكى مەملەكەت باسشىلارىنىڭ ديدارلاسۋى قانداي ورتاق تانىمعا جانە تابىستارعا قول جەتكىزدى؟
جاۋاپ: وسى رەتكى جۇڭگو - امەريكا مەملەكەت باسشىلارى ديدارلاسۋىنىڭ تابىسى جان - جاقتى بولدى، ەكى جاق ٴوزارا قۇرمەت ەتۋ، بەيبىت قاتار تۇرۋ، ٴوزارا تيىمدىلىك جەتكىزۋ نەگىزىندە، ٴار سالاداعى تىلدەسۋدى، سەلبەستىكتى تالقىلاپ، ساياسي ديپلوماتيا، گۋمانيتارلىق اۋىس - كۇيىس، الەمدىك وڭاۋ، اسكەري ىستەر حاۋىپسىزدىگى سياقتى سالالاردا 20 دان استام ورتاق تانىمعا كەلدى. مۇنىڭ ىشىندە ٴبىرسىپىراسى مەملەكەت باسشىلارى ديدارلاسۋىنان بۇرىن پىسىپ - جەتىلىپ تياناقتاندى، ٴبىرسىپىراسى وسى رەتكى ديدارلاسۋدا اقىلداسىلدى. نەگىزىنەن مىنالاردى قامتيدى:
جەتەكشى پرينسيپ جاعىندا، ەكى ەلدىڭ مەملەكەت باسشىلارى ەكى جاقتىڭ ديپلوماتيا جۇمىس توبىنىڭ بالي ارالىنداعى ديدارلاسۋدان بەرى جۇڭگو - امەريكا قارىم - قاتىناسىنىڭ جەتەكشى پرينسيبىن تالقىلاۋداعى قۇلشىنىستارىن جانە قول جەتكىزگەن ورتاق تانىمدارىن قۇپتايدى. ٴوزارا قۇرمەت ەتىپ، بەيبىت قاتار تۇرىپ، بايلانىستى ساقتاپ، قاقتىعىستان ساقتانىپ، «بىرلەسكەن مەملەكەتتەر ۇيىمىنىڭ ۋستاۆىنا» بويسۇنۋدى، ورتاق مۇددەسى بار سالالاردا سەلبەستىك ورىستەتىپ، ەكى جاقتىڭ قارىم - قاتىناسىنداعى باسەكە فاكتورلارىن جاۋاپكەرشىلىكپەن مەڭگەرۋدى باسا دارىپتەيدى. وسى 7 تارماقتى ورتاق تانىم توتەنشە ماڭىزدى، ەكى جاقتىڭ كەلەسى قادامدا ىشكەرىلەي تالقى جۇرگىزۋىنە بەرىك نەگىز قالايدى. ەكى ەلدىڭ مەملەكەت باسشىلارى ەكى جاقتىڭ جۇمىس توپتارىنىڭ وسى جونىندە ۇزدىكسىز تالقى جۇرگىزۋىن قارسى الادى.
تىلدەسۋ - سەلبەستىك جاعىندا، ەكى جاق جوعارى جىكتەگىلەردىڭ بارىس - كەلىسىن كۇشەيتىپ، ساۋدا، ەكونوميكا، فينانس، ەكسپورتقا شەكتەمە قويۋ، ازيا - تىنىق مۇحيت ىستەرى، تەڭىز - مۇحيت، ارميانى كەڭەيتۋدى تىزگىندەۋ جانە قارۋلاردى كەڭەيتۋدەن ساقتانۋ، ديپلوماتيا ساياساتى جوباسى، بىرلەسكەن قىزمەت گرۋپپاسى، مۇگەدەكتەر سياقتى ٴتۇرلى سالالارداعى مەحانيزم سيپاتتى كەڭەستى ىلگەرىلەتۋدى جانە باستاۋدى ۇيعاردى. ەكى جاق «جۇڭگو - امەريكا عىلىم - تەحنيكا سەلبەستىگى كەلىسىمىنە» ۇزدىكسىز قول قويۋ كەڭەسىن باستاۋعا، جۇڭگو مەن امەريكا اۋىل شارۋاشىلىعى بىرلەسكەن كوميتەتىن قايتا ىسكە قوسۋعا قوسىلدى.
گۋمانيتارلىق اۋىس - كۇيىس جاعىندا، ەكى جاق جۇڭگو مەن امەريكا گۋمانيتارلىق اۋىس - كۇيىسىنىڭ ماڭىزدىلىعىن قايتالاي دارىپتەپ، كەلەر جىلى ەرتەرەك ەكى ەل اراسىندا توتە ۇشاتىن كەزەكشى ۇشاقتى بارىنشا كوبەيتىپ، جۇڭگو مەن امەريكانىڭ وقۋ - اعارتۋ سەلبەستىگىندە ٴبىر اۋىزدىلىققا كەلىپ، ٴبىلىم اسىراتىن وقۋشىلاردىڭ كولەمىن ۇلعايتۋعا شابىتتاندىرىپ، مادەنيەت، دەنە تاربيە، جاستار، ونەركاسىپ - ساۋدا سالاسىنداعى اۋىس - كۇيىستى كۇشەيتۋگە قوسىلدى.
الەمدىك باسقارۋ سالاسىندا، ەكى ەلدىڭ مەملەكەت باسشىلارى كەزەكتە جۇڭگو مەن امەريكانىڭ كليمات داعدارىسىنا قۇلشىنا توتەپ بەرۋدى جەدەلدەتۋى كەرەكتىگىن باسا دارىپتەپ، ەكى ەلدىڭ كليمات ەرەكشە ەلشىلەرىنىڭ تاياۋدا وتكىزىلگەن 2020 - جىلدارداعى ەل ٴىشىنىڭ لاستاۋشى زاتتاردى شىعارۋىن ازايتۋ ارەكەتىن قامتىعان بەلسەندى تالقىسىن قارسى الىپ، COP28 قول جەتكىزگەن تابىستارىن بىرگە ىلگەرىلەتىپ، جۇڭگو مەن امەريكا ”كليمات ارەكەتىن كۇشەيتۋ قىزمەت گرۋپپاسىن“ ىسكە قوستى. ەكى جاق تاعى «سەلبەستىكتى كۇشەيتىپ، كليمات داعدارىسىنا توتەپ بەرۋ جونىندەگى نۇرلى مەكەن مالىمدەمەسىن» جاريالادى. ەكى جاق جاساندى زەردە جونىندەگى ۇكىمەت ارالىق تىلدەسۋ مەحانيزمىن ورناتۋعا قوسىلدى.
اسكەري ىستەر حاۋىپسىزدىگى مەن زاڭ اتقارۋ سالاسىندا، ەكى جاق تەڭدىك جانە قۇرمەت ەتۋ نەگىزىندە ەكى ەل ارمياسى جوعارى جىكتەگىلەرىنىڭ تىلدەسۋىن قالپىنا كەلتىرۋگە، جۇڭگو مەن امەريكانىڭ مەملەكەت قورعانىس مينيسترلىگى قىزمەتتىك ديدارلاسۋىن، جۇڭگو مەن امەريكانىڭ تەڭىزدەگى اسكەري ىستەر حاۋىپسىزدىگى كەڭەس مەحانيزمى ٴماجىلىسىن قالپىنا كەلتىرىپ، جۇڭگو مەن امەريكا ەكى ەل ارمياسىنىڭ سوعىس ٴوڭىرى باسشىلار تىلدەسۋىن ورىستەتۋگە قوسىلدى. ەكى جاق جۇڭگو - امەريكا ەسىرتكىگە تيىم سالۋ سەلبەستىگى قىزمەت گرۋپپاسىن قۇرىپ، ەسىرتكىگە تيىم سالۋ سەلبەستىگىن ورىستەتەتىندىگىن جاريالادى.
ەكى ەلدىڭ مەملەكەت باسشىلارى ەكى جاق ۇيىمدارىنىڭ جوعارى جىكتەگىلەردىڭ ٴوزارا ىقپالداستىعىن جانە ٴوزارا ساپارلاۋىن ۇزدىكسىز ساقتاپ، سان - فرانسيسكو ديدارلاسۋىنىڭ جالعاسىمىن تياناقتاندىرۋعا قوسىلدى.
وسى ماڭىزدى ورتاق تانىمدار مەن جەتىستىكتەر جۇڭگو مەن امەريكا اراسىندا كەڭ كولەمدى ورتاق مۇددە بار ەكەندىگىن ىشكەرىلەي ٴتۇسىندىردى ٴارى ٴوزارا پايدا جەتكىزۋ، تەڭ يگىلىككە كەنەلۋ جۇڭگو - امەريكا قارىم - قاتىناسىنىڭ ماندىك ەرەكشەلىگى ەكەندىگىن، تىلدەسۋدىڭ، سەلبەستىكتىڭ جۇڭگو مەن امەريكا ەكى ەلدىڭ بىردەن - ٴبىر دۇرىس تالعامى ەكەندىگىن ىشكەرىلەي دالەلدەدى.
ٴتورتىنشى، وسى رەتكى ديدارلاسۋدا ەكى جاق الاۋىزدىقتى جانە سەزىمتال ماسەلەلەردى اۋىزعا الدى ما، جوق پا، جۇڭگو جاقتىڭ تۇرعىسى مەن پوزيتسياسى قانداي؟
جاۋاپ: ارينە، كوپتەگەن الاۋىزدىقتار جانە سەزىمتال ماسەلەلەر اۋىزعا الىندى. ٴتوراعا شي جينپيڭ بىلاي دەپ باسا دارىپتەدى: جۇڭگو جاق ورنىقتى، اقاۋسىز، باياندى جۇڭگو - امەريكا قارىم - قاتىناسىن ورناتۋعا كۇش سالادى، سونىمەن بىرگە، جۇڭگونىڭ، ٴسوز جوق، قورعايتىن ورىندى مۇددەسى، ٴسوز جوق، قورعايتىن پرينسيپتىك تۇرعىسى، ٴسوز جوق، بۇلجىماي ساقتاۋعا ٴتيىستى قىزىل سىزىق، تومەنگى شەگى بار. ەگەر امەريكا جاق باسەكەلەسۋدى جەلەۋ ەتىپ، جۇڭگونى قورشاي قىسپاققا السا، وندا جۇڭگو ٴوزىنىڭ يەلىك ۇقىعىن، حاۋىپسىزدىك، دامۋ ۇقىق - مۇددەسىن باتىل قورعايدى.
تايۋان ماسەلەسى باستان - اياق جۇڭگو - امەريكا قارىم - قاتىناسىنداعى ەڭ ماڭىزدى، ەڭ سەزىمتال ماسەلە. ٴتوراعا شي جينپيڭ جۇڭگو جاقتىڭ پرينسيپتىك تۇرعىسىن ەگجەي - تەگجەيلى باياندادى. جۇڭگو جاق امەريكا جاقتى ٴبىر جۇڭگو پرينسيبىنە بويسۇنىپ، ”تايۋاندى دەربەستەندىرۋگە“ قارسى تۇرىپ، تايۋاندى قارۋلاندىرۋدى توقتاتىپ، جۇڭگونىڭ ىشكى ىسىنە كيلىگۋدى توقتاتىپ، جۇڭگونىڭ بەيبىت بىرلىككە كەلۋىن قولداۋىن تالاپ ەتتى.
ٴتوراعا شي جينپيڭ ەكونوميكا - ساۋدا، عىلىم - تەحنيكا ماسەلەلەرى جونىندە جۇڭگو جاقتىڭ تۇرعىسىن ايقىنداپ، امەريكا جاقتىڭ ەكونوميكا - ساۋدا، عىلىم - تەحنيكا سالاسىندا جۇڭگونى شاۋجايلاپ، قىسپاققا الۋى ”حاۋىپ - قاتەردى جويعاندىق“ ەمەس، قايتا حاۋىپ - قاتەر تۋدىرعاندىق دەپ اتاپ كورسەتتى. مۇنداي قاتە ادىستەر جانە وسىدان تۋىنداعان جۇڭگو - امەريكا قارىم - قاتىناسىنداعى ايقىنسىزدىق ەڭ ۇلكەن حاۋىپ - قاتەرگە اينالدى. جۇڭگونىڭ عىلىم - تەحنيكاسىن قىسپاققا الۋ دەگەننىڭ ٴوزى جۇڭگونىڭ جوعارى ساپالى دامۋىن شاۋجايلاپ، جۇڭگو حالقىن دامۋ ۇقىق - مۇددەسىنەن ماقرۇم ەتۋ دەگەن ٴسوز، ٴبىز بۇعان استە كونبەيمىز، بۇل استە ىسكە اسپايدى. جۇڭگونىڭ دامىپ، زورايۋىندا قۋاتتى ىشكى قوزعاۋشى كۇش جانە تاريحي لوگيكا بار. ٴارقانداي سىرتقى كۇش بوگەي المايدى. امەريكا جاق جۇڭگو جاق ٴجىتى قاداعالاپ وتىرعان ىستەرگە مۇقيات مامىلە جاساپ، سىڭار جاقتى جازالاۋدى كۇشىنەن قالدىرىپ، جۇڭگو كاسىپورىندارىنا، ٴادىل، تۋرا، كەمسىتپەيتىن ورتا ازىرلەپ بەرۋى كەرەك.
بەسىنشى، سان - فرانسيسكوداعى ديدارلاسۋ كەزەكتەگى جانە بولاشاقتاعى جۇڭگو - امەريكا قارىم - قاتىناسىنا نەندەي ىقپال جاسايدى؟
جاۋاپ: سان - فرانسيسكوداعى ديدارلاسۋ جۇڭگو - امەريكا قاتىناسىندا سەنىمدىلىكتى ارتتىرىپ، كۇماندى سەيىلتەتىن، الاۋىزدىقتاردى مەڭگەرەتىن، سەلبەستىكتى ۇلعايتاتىن ٴبىر رەتكى ماڭىزدى ديدارلاسۋ، سونداي - اق اۋمالى - توكپەلى دۇنيە جۇزىنە تۇراقتىلىق ۇستەپ، ايقىندىلىقتى ارتتىراتىن ماڭىزدى ديدارلاسۋ. ەكى ەل مەملەكەت باسشىلارىنىڭ رول ۇستاپ، جول باستاۋىنىڭ ارقاسىندا جۇڭگو - امەريكا قارىم - قاتىناسى سىندى وسى الىپ كەمەنىڭ تاساداعى قۇزدار مەن قاتەرلى قايراڭداردى بۇزىپ ٴوتىپ، بالي ارالىنان سان - فرانسيسكوعا جەتۋى وڭايعا سوقپادى. دەسەدە سان - فرانسيسكو سوڭعى مارە ەمەس، قايتا جاڭا باستاما بولۋعا ٴتيىس. ٴبىز جۇڭگو مەن امەريكانىڭ ەڭ سوڭىندا تاتۋ - ٴتاتتى ٴوتۋدىڭ دۇرىس جولىن تابۋعا ٴتيىس ەكەندىگىنە ٴارى تابا الاتىندىعىنا، بۇل تاريحتىڭ سوزسىزدىگى، ٴداۋىردىڭ اعىمى، سونداي - اق حالىقتىڭ كۇتەرى ەكەندىگىنە باستان - اياق سەنەمىز. كەلەر جىلى − جۇڭگو - امەريكا ديپلوماتيالىق قارىم - قاتىناس ورناتقاندىعىنىڭ 45 جىلدىعى. ەكى جاق سان - فرانسيسكودان قايتا اتتانىپ، جاڭا كەلەشەكتىك نىسانا سومداپ، جۇڭگو - امەريكا قارىم - قاتىناسىنىڭ ٴتۇپ نەگىزىن ىشكەرىلەي بەكەمدەپ، بەيبىت قاتار تۇرۋدىڭ تىرەگىن قالىپتاستىرىپ، ەكى ەل قارىم - قاتىناسىنىڭ اقاۋسىز، ورنىقتى، باياندى بەتالىسقا قاراي دامۋىن ىلگەرىلەتۋگە ٴتيىس.