باس بەتكە قايتۋ | 中文 ىلە اقپارات تورابىنا حوش كەلدىڭىزدەر!
ۇزدىك تۇلعالاردىڭ كىسىلىك كەلبەتى مەن رۋحاني كۇش - قۋاتىن ايگىلەيىك
2021-10-12 13:32:40     كورىلىم:رەت كەلۋ قاينارى:ىلە گازەتى  جاۋاپتى رەداكتور:جازيرا بولاتباي قىزى

− اناعۇرلىم مول تاڭداۋلى ادەبيەت - كوركەمونەر تۋىندىلارىن جاراتايىق

ۇزدىك تۇلعالاردىڭ كىسىلىك كەلبەتى مەن رۋحاني كۇش - قۋاتىن ايگىلەيىك

گاۋ مانتاڭ


جۋىردا «مەنىڭ اكەم جياۋ يۇيلۋ» فيلمى تۇتاس ەلىمىزدە قويىلدى، لي ۋەي ەكەۋىمىز وسى فيلمنىڭ سەنارياسىن جازۋعا مىندەتتى بولدىق. جياۋ يۇيلۋ مەن ٴۇشىن ٴارى شىنايى، ٴارى تانىس، ٴارى بەيتانىس تۇلعا. شىنايى بولاتىنى − مەن ەس بىلگەننەن بەرى ۇلكەندەردىڭ اۋزىنان جياۋ يۇيلۋ تۋرالى اڭگىمەنى ۇنەمى ەستىپ ٴوستىم؛ تانىس بولاتىنى − «اۋداندىق پارتكوم شۋجيلەرىنىڭ ۇلگىسى - جياۋ يۇيلۋ» دەگەن كولەمدى وچەرك، 1991 - جىلى جارىققا شىققان «جياۋ يۇيلۋ» فيلمى، ال ودان كەيىنگى تەلە سەريال، تەاتر سياقتى وسى ادەبيەت - كوركەمونەر تۋىندىلارى جياۋ يۇيلۋدىڭ تىرشىلىگىندەگى ىزگى ىستەرىن ماعان بىرتىندەپ ۇعىندىرعاندىقتان، ول ماعان ەجەلدەن تانىس ادام سەكىلدەنەتىن؛ ال بەيتانىس بولاتىنى − ٴوزىمدى تەك سىرتتاي بىلەتىن اداممىن دەپ تۇسىنەتىندىكتەن، ونىڭ جان دۇنيەسىنە شىنايى بويلاي الماي كەلگەندىگىم.

جارتى عاسىردان استام ۋاقىتتا وسى ٴبىر جاقسى ادامدى ارەڭ تانىپ جەتتىم

مەنىڭ جياۋ يۇيلۋ جونىندەگى ەڭ العاشقى ەستەمەلەرىم ٴبىر رەتكى راديو باعدارلاماسى جانە ٴبىر پارشا گازەتپەن بايلانىستى. ول 1966 - جىلى مەنىڭ 11 جاستاعى كەزىم ەدى. وتباسىمىزدا ٴبىر كونە راديو قابىلداعىش بار بولاتىن، سيگنال جاقسى بولماعاندىقتان راديو ۇنەمى ٴۇزىلىپ قالاتىن. ٴبىر كۇنى اكە - شەشەم مەن اعام راديونى الدارىنا قويىپ، ورتالىق حالىق راديو ستانسياسىندا بەرىلگەن «اۋداندىق پارتكوم شۋجيلەرىنىڭ ۇلگىسى - جياۋ يۇيلۋ» دەگەن كولەمدى وچەركتى تىڭداپ جىلاپ وتىر ەكەن. سودان كەيىن شەشەم «حالىق گازەتىنىڭ» ٴبىر نۇسقاسىن ۇيگە الىپ كەلدى، وندا وسى وچەرك تولىق باسىلىپتى. وسى گازەتتىڭ وتباسىمىزدا ۇزاق ۋاقىت ساقتالعانى ٴالى ەسىمدە. ول كەزدە مەن باستاۋىشتىڭ ەكىنشى جىلدىعىنا ەندى شىققام، نەندەي ٴىس بولعانىن دا ٴبىلىپ كەتپەيتىنمىن. ٴار جولى جياۋ يۇيلۋ جونىندە ٴسوز بولعاندا شەشەمنىڭ: «جاقسى كادر، جاقسى ادام ەدى عوي!» دەيتىنى عانا ەسىمدە.

1975 - جىلى 7 - ايدا مەن دالياننىڭ شينجين اۋدانى ۋاۋو گۇڭشىسى چىنديان ۇلكەن اترەتىنە كەلىپ، زيالى جاستىق ٴومىرىمدى باستاپ كەتتىم. قىس كىرىسىمەن جەرگە قاتتى توڭ جۇرەدى ەكەن، ٴبىر توپ جاس جەر كەپەدە قىستى بىرگە وتكىزدىك. ارامىزداعى بىرەۋىنىڭ اكەسى كىتاپحانادا قىزمەت ىستەيتىن، ونىڭ اعاش قوبديشاسى تولعان كىتاپ بولاتىن، توڭكەرىس تاريحى تاقىرىبىنداعى «جەلبىرەگەن قىزىل تۋ»، «ۇشقىننان جالىن قاۋلايدى» دەگەن كىتاپتاردان باستاپ، فرانسيالىق ستەندالدىڭ «قىزىل مەن قارا» كىتاپتارىنا دەيىن ٴبارى - ٴبارى دە تابىلاتىن. ال تاعى ٴبىر كىتاپ قاھارمان تۇلعالار جونىندەگى ماقالالار توپتاماسى بولىپ، وندا جياۋ يۇيلۋ باس كەيىپكەر بولعان «اۋداندىق پارتكوم شۋجيلەرىنىڭ ۇلگىسى - جياۋ يۇيلۋ» دەگەن ۇزاق وچەرك بار بولاتىن.

تەگىنەن ديحاننان شىققان مەندە اۋىل - قىستاق، شارۋالار جونىندە بەلگىلى اسەر جانە تانىم قالىپتاسا باستادى، جۇمىستان تۇسكەننەن كەيىن اڭگىمە جازۋعا وتىرسام، كوركەمونەرلىك سەزىم پايدا بولاتىن بولدى. وسى كەزدە وسى وچەرككە كەز بولۋىم ماعان كۇشتى تولقىنىس تۋدىردى. جياۋ يۇيلۋدىڭ ىزگى ىستەرى تەگىنەن اسەرلى بولاتىن، ال كولەمدى وچەركتە وزىندىك اڭعار، وزىندىك بەينەلەۋ بار - تىن. «اۋداندىق پارتكوم شۋجيلەرىنىڭ ۇلگىسى - جياۋ يۇيلۋدىڭ» ادەبيلىگى كۇشتى، مازمۇنى كەڭ تىنىستى، كەيىپكەرلەر ديالوگى اسەرلى ەدى. وچەرك مازمۇنىنىڭ بىرنەشە جەرى مەنى ٴتىپتى دە اسەرلەندىرگەن - دى. ٴبىرى، لياڭسۇنجۋاڭدا جياۋ يۇيلۋدىڭ ٴبىر جۇپ سۇيەنىشسىز قارتقا امانداسا بارعانداعىسى. كاريا ودان «كىمسىڭ؟» دەپ سۇراعاندا ول: «مەن ٴسىزدىڭ ۇلىڭىزبىن» دەيدى، كاريانىڭ «قالىڭ قاردا نەگە كەلدىڭ؟» دەگەن سۇراعىنا: «ماۋ جۋشي مەنى سىزگە امانداسۋعا جىبەردى» دەگەندە، اسەرلەنگەنىنەن اجەيدىڭ اۋزىنا ٴسوز تۇسپەي، دىرىلدەگەن قوس قولىمەن جياۋ يۇيلۋدى سيپالاي بەرەدى. كاريا جانارىنا جاس ىركىپ: «ازاتتىقتان ىلگەرى قالىڭ قار باسىپ قالسا دا جەر يەلەرى ٴۇيدىڭ ماياقىسىن قىسايتىن، ۇيدەن قۋىپ شىعارىلعاندا كورىنگەننىڭ ٴۇيىنىڭ دودەگەسىن پانالايتىنمىن، ەلدىڭ سيىر قوراسىنا جاتاتىنمىن» - دەدى، جياۋ يۇيلۋ كاريانى جۇباتا: «بۇگىن ۇقىق ٴوز قولدارىڭىزدا، لانكاۋدىڭ اپاتتان، كەدەيلىكتەن كوز اشپايتىن بەت - بەينەسىن، ٴسوزسىز، وزگەرتە الامىز» - دەگەنى بولسا؛ ەندى ٴبىرى − جياۋ يۇيلۋ وتىرعان ورمە ورىندىق. جياۋ يۇيلۋدىڭ باۋىرى بارعان سايىن قاتتى اۋىرعاندا، اۋىرعانىن باسەيتۋ ٴۇشىن قاتتى نارسەنىڭ ٴبىر ۇشىن ورمە ورىندىقتىڭ ارقالىعىنا، ەندى ٴبىر ۇشىن باۋىرىنا تىرەپ وتىرادى. ۋاقىتتىڭ ۇزارۋىمەن ورمە ورىندىقتىڭ ارقالىعى دا تەسىلىپ قالادى. وچەركتىڭ ەڭ سوڭىندا بۇقارانىڭ جياۋ يۇيلۋدى سوڭعى ساپارعا اتتاندىرىپ سالۋى جازىلعان، بۇل دا قاراپايىم دا اسەرلى بولىپ كوزىڭە جاس الدىرادى. وسى كەزدە مەن كىشكەنە كەزىمدە شەشەمنىڭ اۋزىنان تاستامايتىن: «ول ٴبىر جاقسى ادام» دەگەنىن ٴسوزىن تولىق ٴتۇسىندىم.

جياۋ يۇيلۋدى قايتا جازۋداعى تىڭ بايقاۋ، جاڭا تۇرعى

بۇل كۇندەرى جياۋ يۇيلۋمەن «تۇڭعىش تانىسقانىما» جارىم عاسىردان استى، ونىمەن بەتپە - بەت كەلىپ، جياۋ يۇيلۋ رۋحىن بەينەلەيتىن كينو سەنارياسىن جازامىن دەپ ويلاعان ەمەسپىن. قايتا پىسىقتادىم، تىڭ بايقاۋلارىم دا بولدى.

جياۋ يۇيلۋدىڭ قىزى جياۋ شوۋيۇن قالىڭ ٴبىر توپ ماتەريال مەن ٴبىر كىتاپ بەردى. مۇنداعى مازمۇنداردىڭ دەنىن ونىڭ اناسى شۇي جۇنيا بەرىپتى، شىنايى دا سەنىمدى بولاتىن. مەن تاعى دا سەناريا گرۋپپاسىنداعىلارمەن بىرگە بوشانداعى جياۋ يۇيلۋ ەسكەرتكىش سارايىنا، كەزىندە جياۋ يۇيلۋ لوياڭ مەن لانكاۋدا قىزمەت ىستەگەن، تۇرمىس كەشىرگەن جەرلەرگە بارىپ ناقتى تىلشىلىكتە بولدىم. بارا - بارا تاپقان ماتەريالدارىم دا كوبەيە بەردى، ٴتىپتى دە باي مازمۇندى جياۋ يۇيلۋ وبرازى ايقىندالىپ كەلە جاتتى، جياۋ يۇيلۋدىڭ رۋحاني ٴوسۋ بارىسى دا كوز الدىما تارتىلا بەردى. سونىمەن سەناريانى باستاۋدىڭ كەرەكتىگىن ٴبىلدىم.

«تۇتاس حالىقتى كوكەيىندە ساقتاپ، ٴوزىن مۇلدە ويلاماعان» حالىق قىزمەتشىسى ىقىلاسى، قانداي ٴىستىڭ بولسىن جاي - جاپسارىن بىلۋگە قۇلشىنۋ، «شايناپ بەرگەن اس بولمايدى» دەيتىن شىندىققا جۇگىنۋ ستيلى، «باتىلدىقپەن جاڭالىق اشۋ»، «توڭكەرىسشى قيىنشىلىق الدىندا باتىرلىق كورسەتۋى كەرەك» دەيتىن كۇرەسكەرلىك رۋح، قاجىرلى دا قاراپايىمدىلىق، ادال ٴارى قالتقىسىزدىق، «ەشقاشان دا ەرەكشەلەنبەيتىن» ٴمورالدىق قاسيەت، جياۋ يۇيلۋ رۋحىمەن بىتە قايناسىپ، كەڭ كوسىلىپ جاتقان بارىس، بۇل تەك ونىڭ لانكاۋدا قاۋىرت، جاپالى ىستەگەن 475 كۇندە عانا كورنەكتىلەنگەن ەمەس.

جياۋ يۇيلۋ شاندۇڭدىق، چيلۋ مادەنيەتى ونى سومداعان. ول شاندۇڭنىڭ بوشانىندا جاۋمەن شايقاسىپ، باسىن ٴباي تىگە باتىلدىق كورسەتكەن، سول كەزدە - اق ول ۇزدىك كوممۋنيست بولاتىن. وعان اناسىنىڭ ىقپالى زور بولدى. قۇددى فيلمدە اناسىنىڭ وعان: «اسپاندا جۇلدىز، جەردە ادام بار، ەگەر جاقسى ادام بولساڭ، اسپانداعى سول جۇلدىز جارقىراي تۇسەدى» - دەگەنى سياقتى.

سودان كەيىن جياۋ يۇيلۋ لوياڭداعى كەن - تاۋعا بارىپ ماشينا زاۆودىنىڭ مەڭگەرۋشىسى بولادى. لوياڭداعى كەندەگى كەزىندە جياۋ يۇيلۋ رۋح، مىنەز جاعىنان ىسىلا تۇسەدى. ٴبىز سەحتا تىلشىلىك ىستەگەنىمىزدە ٴبىر جۇمىسشى: «جياۋ يۇيلۋ ايتۋلى ۇستاز» دەدى. شىندىعىنا كەلگەندە، كوپتەگەن ادامدار جياۋ يۇيلۋدىڭ بۇل جاعىن بىلە بەرمەيدى. ول حاربين ونەركاسىپ داشۋەسىندە ٴبىلىم اسىرعان، داليان ٴىرى تۇرپاتتى ماشينالار زاۆودىندا پراكتيكا سەحىنىڭ مەڭگەرۋشىسى بولعان. جابدىقتارى مەشەۋ، تاجىريبە كەمشىل بولۋ سياقتى قيىنشىلىققا ٴدوپ كەلگەندە، جياۋ يۇيلۋ لوياڭ كەنىندەگى جۇمىسشىلاردى باستاپ جاڭا جۇڭگونىڭ تۇڭعىش 2.5 مەترلىك قوس تۇتىكتى كوتەرگىش ماشيناسىن ٴساتتى جاساپ شىققان. زەرتتەۋ - جاساۋ مەزگىلىندە ول ۇنەمى سەحتاعى ۇزىن ورىندىقتا ۇيىقتايدى ەكەن. ساقا جۇمىسشىلار بىزگە : «جياۋ يۇيلۋ نەگە توسەككە جاتىپ ۇيىقتامايدى دەسەڭ؟ ول كوپ ۇيىقتاپ قالسا، جۇمىستىڭ اياق الىسىنا ىقپال ەتەدى دەپ الاڭدايتىن» - دەدى. ال مىنا ۇزىن ورىندىق قانشاما تار دەڭىزشى؟ تەك ٴبىر قىرىنان جاتۋعا بولادى ەكەن. اۋنادى بولدى قۇلاپ ٴتۇسىپ ويانىپ كەتەدى، ويانىپ كەتكەن سوڭ جۇمىسىن جالعاستىرا بەرەدى ەكەن.

وسى ۇزىن ورىندىق ٴالى ساقتاۋلى ەكەن. وسى ورىندىقتى كورگەندە كوزىمە ەرىكسىز جاس ىركىلە بەردى. سول جىلدارى جياۋ يۇيلۋ جانى قينالا ٴجۇرىپ، كوپشىلىكتى باستاپ شەتەلدىكتەر جۇڭگولىقتار جاساي المايدى دەگەن ماشينالاردى جاساپ شىقتى.

بوشاندا جاۋمەن شايقاسىپ، لوياڭ كەنىندە ٴىرى تۇرپاتتى ماشينا جابدىقتارىن جاساعاننان، لانكاۋعا بارىپ «ٴۇش زياندىنى جويعانعا» دەيىن، جياۋ يۇيلۋدىڭ باتىلدىقپەن اۋىر مىندەت ارقالاپ، قاتەرگە قارسى اتتانىپ، باتىلدىقپەن ىسكە كىرىسكەنى تامىرلاسىپ جاتتى. وسىلاردى تانىپ جەتكەن سوڭ، جياۋ يۇيلۋدى قايتا جازىپ، جياۋ يۇيلۋ رۋحى سومدالعان بارىستى اناعۇرلىم كەمەلدى بەينەلەپ بەرۋ جونىندە وزىندىك ويعا كەلدىم.

جازۋشى لي جۇن: «ماعان 100 وقيعا جەلىسىن بەرگەنشە ەكى ەپيزوت بەرگەنىڭ ٴتاۋىر» دەگەن ەكەن. جاسامپازدىق بارىسىندا مەن دە وسى ٴادىستى ۇستانعانمىن. كەيدە تىلشىلىك وبيەكتىڭنىڭ ٴبىر اۋىز سوزگە جيناقتاعان مازمۇنىن ەگەر ٴسىز ومىرگە تەرەڭ شوگىپ، تاريحي ماتەريالداردىڭ اراسىنان بەينە شاڭ قاققانداي قاعىپ - سىلكىپ الساڭىز، ونىڭ التىنداي جارقىراعانىن بايقايسىز. وسى جولعى سەناريانى جازۋ بارسىندا جياۋ يۇيلۋدىڭ ٴۇش اۋىز ٴسوزى مەنى قاتتى اسەرلەندىردى. ٴبىرى، ايماقتىق پارتكومنىڭ شۋجيى جياۋ يۇيلۋمەن اڭگىمەلەسىپ، ونى لانكاۋعا جوتكەۋدى ايتادى. ايماقتىق پارتكوم شۋجيى: «لانكاۋدا 360 مىڭ جان سانى بار، ونىڭ 200 مىڭى تەنتىرەپ كەتكەن» دەگەندە. جياۋ يۇيلۋ: «مەن بارامىن» دەيدى. جاقسى كادر دەگەن كىم؟ مىنە وسىنداي ادام. قانشالىق قيىنشىلىق بولسا دا ول تايساقتامايدى. ەندى ٴبىرى، جياۋ يۇيلۋ: «اۋداندىق پارتكوم شۋجيى دەگەن نە؟ اۋداندىق پارتكوم شۋجيى دەگەنىمىز اسكەر، قانداي ىستە بولسا دا العا، بىرىنشىلىككە ۇمتىلادى!» دەگەن جەرى. تاعى ٴبىرى، فيلمنىڭ ەڭ سوڭىندا جياۋ يۇيلۋ اقتىق ساپارعا اتتانار الدىندا بالا - شاعاسىنا: «سەندەر ەرجەتكەندە جاقسى ادام بولىڭدار، قيىنشىلىقتا قالعانداردىڭ كوز جاسىن كورەتىن بولىڭدار» دەگەن وسيەت ايتادى. سونىمەن مەنى اسەرلەندىرگەن نارسە، كورەرمەندەردى دە اسەرلەندىرە الادى دەگەن ويعا كەلدىم.

وسى سەناريادا مەن تاعى دا جياۋ يۇيلۋدىڭ ۇلان - قايىر رۋحاني جان الەمىن بەينەلەۋدى ويلادىم. جياۋ يۇيلۋ ادەبيەت - كوركەمونەرگە قاتتى قىزىعادى، وپەرادا باس كەيىپكەردىڭ رولىن سومداعان، اۋەلى ىرحۋ، سىرناي تارتىپ، بيلەي دە بىلەدى. وسى اسەرلى تۇستارىن دا سەنارياعا كىرگىزىپ جىبەردىم.

تاعى دا كوپتەگەن «جياۋ يۇيلۋلار» ٴبىزدىڭ جازۋىمىزدى كۇتىپ تۇر

مەن وزىمنەن ۇنەمى جارتى عاسىر وتسە دە جياۋ يۇيلۋداي وسى كەيىپكەردىڭ وبرازى ادامداردىڭ جۇرەگىنەن نەلىكتەن تەرەڭ ورىن الىپ وتىر؟ دەگەندى سۇرايمىن.

مەن بوشانداعى جياۋ يۇيلۋ ەسكەرتكىش سارايىندا سۇحپاتتا بولعاندا، كوپتەگەن جاستاردىڭ مۇقيات كورىپ، ىجداعاتپەن تىڭداۋ بارىسىندا جانارلارىنا جاس ىركىلگەنىن بايقادىم. لوياڭداعى كەن سەحىندا، لانكاۋدا بولسىن، سەناريا گرۋپپاسىنداعىلار قايدا بارسىن، جياۋ يۇيلۋدى تىلگە العاندا ادامدار جانارلارىنا جاس ىركۋمەن بولدى. ولار شىنىمەن وسى ٴبىر وتكەن ىستەردىڭ كۋاگەرى بولماسا دا، نەلىكتەن اۋەلگىدەي اسەرگە بولەنەدى؟

بۇگىنگى لانكاۋدا جياۋ يۇيلۋ سول جىلدارى ٴوز قولىمەن ەككەن جۇمساق تۇڭ قالامشاسى اسپانمەن تىلدەسكەن ٴزاۋلىم داراق بولدى. ادامدار ىقىلاستى تۇردە وسى اعاشتى «جياۋتۇڭ» اعاشى دەپ اتاپ كەتتى. ونىڭ قاسىنان وتكەن ٴاربىر ادام وعان سۇيىسپەنشىلىكپەن قارايدى. ادامداردىڭ نازارىندا بۇل اعاش جياۋ يۇيلۋعا ۋاكىلدىك ەتەدى ەكەن. جياۋ يۇيلۋ رۋحىنىڭ وتكىرلىگى نەلىكتەن وسىنشالىق قۇدىرەتتى، نەلىكتەن كۇنى بۇگىنگە دەيىن شۇعىلا شاشىپ جارقىراپ تۇرادى؟

مەنشە، بۇل − جياۋ يۇيلۋدىڭ پارتيانىڭ بار ىنتا - پەيىلىمەن حالىق ٴۇشىن قىزمەت ىستەۋ تۇپكى ماقساتىنا ۋاكىلدىك ەتكەندىگىنەن. «بۇقارا كىم بولسا دا جاقسى باسشىنى ۇناتادى»؟ بۇقارانىڭ پارتيا جونىندەگى تانىمى ەڭ الدىمەن قاسىنداعى پارتيا مۇشەلەرىنەن كەلەدى. جياۋ يۇيلۋ سياقتى ۇزدىك پارتيا مۇشەلەرى بولعاندىقتان دا، ادامداردا پارتيانىڭ سيپاتى، پارتيانىڭ تۇپكىلىكتى ماقساتى جونىندە ناقتى وبىرازدى تانىم قالىپتاستى. ول ٴوز ٴومىرى ارقىلى ادامدارعا كوممۋنيستەردىڭ تاماشا ستيلىنىڭ نە ەكەنىن، حالىق كۇتكەن كوممۋنيستەردىڭ قالاي بولۋى كەرەكتىگىن، جۇڭگو كوممۋنيستىك پارتياسى حالىقتى قالاي ىنتىماقتاستىرا باستاعاندا جاقسى تۇرمىس كەشىرە الادى دەگەندى ايتىپ بەردى. مىنە، بۇل ٴبىر ۇلگىلى تۇلعانىڭ يلاندىرۋ قۋاتى بولىپ تابىلادى!

ٴبىزدىڭ ادەبيەت - كوركەمونەر قىزمەتكەرلەرىمىز وسىنداي تۇلعالاردىڭ اۋەلگى كىسىلىك كەلبەتى مەن رۋحاني كۇش - قۋاتىن جازۋى، كينوعا ٴتۇسىرۋى، سومداۋى كەرەك. بۇل قايتكەندە قولىمىزدان كەلەدى؟ ەڭ الدىمەن، كوركەمونەر جاسامپازدىعىمەن شۇعىلدانۋشىنىڭ وزىندە وسىنداي مادەنيەتتىك سانا بولۋى، ٴوزى بەينەلەمەكشى بولعان كەيىپكەر مەن ونىڭ رۋحى جونىندە تاسقىنداعان ىنتا جانە سەنىم بولۋى كەرەك، مىنە، بۇل تاماشا شىعارمانىڭ نەگىزى. ويتپەگەندە جاقسى شىعارما جازعاندى قويىپ، ومىردەگى وسى تۇلعالاردىڭ الدىندا ۇياتقا قالامىز. قالا بەردى، كوركەمونەردىڭ زاڭدىلىعىنا ۇيلەسۋى كەرەك. ادەبيەت - كوركەمونەر تۋىندىلارىندا «ٴمان ماعىنا» دا، «وي - پىكىر» دە بولۋى كەرەك، بىلايشا ايتقاندا، يدەياسى تەرەڭ، كوركەمدىگى كەمەلدى، شەبەرلىگىندە شەك جوق بولۋى كەرەك.

ٴبىر ۇلتتا رۋحاني تىرەك بولۋى قاجەت. جياۋ يۇيلۋ سياقتى رەسپۋبليكا ۇمىتپايتىن، تاريح ۇمىتپايتىن قاھارمان تۇلعالار از ەمەس، ٴبىز سولاردى بىلەمىز بە جوق؟ ٴبىزدىڭ بالالارىمىز، نەمەرەلەرىمىز ولاردى بىلە مە جوق؟ تاريحتى بۇرمالاۋعا، قۇندىلىقتى قارابايىرلاندىرۋعا بولمايدى، مىنە بۇل −  ادەبيەت - كوركەمونەر قىزمەتكەرلەرىمىزدىڭ ادەبيەت - كوركەمونەر جاسامپازدىعىنداعى ەڭ تومەنگى شەگى.

مەملەكەتىمىزدى گۇلدەندىرۋ پارتيانىڭ حالىقتى ىنتىماقتاستىرا باستاۋىنان، ۇزدىك كوممۋنيستەردىڭ ۇلگىلىك كۇش - قۋاتىنان ايىرىلا المايدى. قازىر، ٴبىزدىڭ كوپتەگەن پارتيالى كادرلارىمىز جياۋ يۇيلۋ رۋحىن امالياتتا ايگىلەۋدە، كوپتەگەن ۇزدىك كوممۋنيستەرىمىز ياڭ شانجوۋ، حۋاڭ دا - نيان، حۋاڭ ۋىنشيۋ قاتارلى قاھارمان ۇلگىلەرىمىزدىڭ اسقاق رۋحىن ساۋلەلەندىرۋدە، ادەبيەت - كوركەمونەر جاسامپازدىعىندا مۇنى قاعىس قالدىرماۋىمىز كەرەك. بيىل نەگىزگى اۋەندەگى شىعارماشىلىقتىڭ «مول ٴونىمدى جىلى»، وڭ ەنەرگيالى ادەبيەت - كوركەمونەر تۋىندىلارى شىعارماشىلىعىنا سەنىمىم كامىل.

«حالىق گازەتىنەن» اۋدارعان: شامشيگۇل الەش قىزى