يگى ىستەردى، ناقتى ىستەردى بۇقارا رازى بولاتىنداي ەتىپ ىستەۋىمىز كەرەك

ۋاڭ يىڭدي

بيلىك جۇرگىزۋدىڭ نەگىزى حالىق ٴۇشىن ىستەۋدە. باس شۋجي شي جينپيڭ 2022 - جىلعى كوكتەمگى وقۋ ماۋسىمىنداعى ورتالىق پارتيا مەكتەبىنىڭ (مەملەكەتتىك اكىمشىلىك شۋەيۋانى) ورتا جاس، جاس كادرلار كۋرسىنىڭ وقۋ باستاۋ سالتىندا بىلاي دەپ باسا دارىپتەدى: «كوممۋنيستەر حالىقتى باقىتقا كەنەلتۋ ەڭ ۇلكەن ناتيجە ەكەندىگىن، ٴسوز جوق، ەستە بەرىك ساقتاۋى كەرەك». «حالىقتىڭ قاجەتى قاي جەردە بولسا، سول جەردە يگى ٴىس، ناقتى ٴىس تىندىرۋعا، سول جەردە ناتيجە جاراتۋعا بولادى». پارتيانىڭ نەگىزى حالىقتا، جان تامىرى حالىقتا، كۇشى حالىقتا، حالىق پارتيانىڭ بيلىك جۇرگىزىپ، ەلدى كوركەيتۋىندەگى ەڭ زور تانىم. قالىڭ پارتيالى كادرلار دۇرىس ناتيجە كوزقاراسىن ورناتىپ جانە امالياتتا ايگىلەپ، بۇقارا ويلاعاندى ويلاپ، بۇقارا اسىققانعا اسىعىپ، بۇقارانىڭ قيىنشىلىعىن شەشىپ، يگى ىستەردى، ناقتى ىستەردى بۇقارا رازى بولاتىنداي ەتىپ ىستەپ، حالىق بۇقاراسىنىڭ تابىس سەزىمىن، باقىت سەزىمىن، حاۋىپسىزدىك سەزىمىن ۇزدىكسىز كۇشەيتۋى كەرەك. 

«ۇيدەن تامشى وتكەنىن ٴۇي ىشىندەگىلەر ٴوزى بىلەر، جەتەكشى اعات باسقانىن ٴوزى بىلمەس، جۇرت بىلەر». حالىق رايىن تەكسەرۋ، حالىق  تىلەگىن ۇعىسۋ − بۇقارا ٴۇشىن جاقسى ٴىس، ناقتى ٴىس ىستەۋدىڭ ٴبىرىنشى قادامى. باس شۋجي شي جينپيڭ بىلاي دەپ اتاپ كورسەتكەن: «اۋداندىق پارتكومنىڭ شۋجيى، ٴسوز جوق، بارلىق قىستاقتى، قالالىق پارتكومنىڭ شۋجيى، ٴسوز جوق، بارلىق اۋىل - قالاشىقتى، ولكەلىك پارتكومنىڭ شۋجيى، ٴسوز جوق، بارلىق اۋدان، قالا، رايوندى ارالاپ شىعۋى كەرەك». تەكسەرۋ - زەرتتەۋدى نەگىزگى ونەر ەتىپ، نەگىزگى ساتىعا، بۇقاراعا، ٴىس جۇزىندىككە ىشكەرىلەي ارالاسۋ كەرەك. تەكسەرۋ - زەرتتەۋ نەعۇرلىم تەرەڭدەگەن سايىن، حالىق جاعدايىن يەلەۋ سولعۇرلىم ەگجەي - تەگجەيلى، جاسالعان ساياساتتىق شارالار سولعۇرلىم ناقتى، سولعۇرلىم شىنايى بولادى. پارتيانىڭ 18 - قۇرىلتايىنان بەرى باس شۋجي شي جينپيڭ كەدەيلەردى سۇيەمەلدەۋ قىزمەتىنە 50 نەشە رەت تەكسەرۋ - زەرتتەۋ جۇرگىزىپ، شوعىرلى، تۇتاسقان 14 ەرەكشە كەدەي رايوندى ارالاپ، كەدەيلىكتەن ارىلتۋدان قامال الۋدىڭ ٴىس جۇزىندىك جاعدايىن ۇعىسىپ، كەدەيلەردى سۇيەمەلدەۋ وي جەلىسى مەن كەدەيلەردى سۇيەمەلدەۋ شارالارىن ۇزدىكسىز كەمەلدەندىردى. پارتيالى كادرلار ۇنەمى نەگىزگى ساتىعا بارىپ، كىشى پەيىلدىكپەن، تەرەڭ ىقىلاسپەن، بۇقارانىڭ ارمان - تىلەگىنە قۇلاق اسىپ، ناقتى جاعدايدى ۇعىسىپ جانە يگەرىپ، بۇقارانىڭ ٴتول مۇددەسىن شىعار ٴتۇيىن ەتە وتىرىپ قىزمەت جوسپارلاۋى، اسىرەسە، حالىق بۇقاراسى نارازى بولعان ماسەلەلەردى كۇش سالا شەشىپ، قىسىلعاندا قارايلاساتىن ىستەردى كوبىرەك ىستەۋى كەرەك.

بۇقارا ٴۇشىن جاقسى ٴىس، ناقتى ٴىس ىستەۋ ٴۇشىن، باتىلدىقپەن جاۋاپكەرشىلىك ارقالاپ، ىسكەرلىك كورسەتۋگە شەبەر بولىپ، شىنايى يگەرىپ، ناقتى ىستەپ، بار پەيىلىن سالا قاجىرلىلىقپەن ىستەۋ كەرەك. «باسشى بولا تۇرا ٴىس ىستەۋدەن جالتارۋ ۇلكەن نامىس». ٴىس ىستەۋ، ٴىستى ۇستىنە الۋ − پارتيالى كادرلاردىڭ مىندەت جاۋاپكەرشىلىگىنىڭ تياناعى ٴارى قۇن تياناعى. ناتيجە ەڭبەكپەن كەلەدى، شىنايى ىستەگەندە عانا، ناعىز ناتيجە جاراتۋعا، ناتيجەنى ناعىز جاراتۋعا بولادى. قىزمەتتى جوسپارلاۋدا حالىق بۇقاراسىنىڭ ٴتۇبىرلى مۇددەسى مەن ۇزاق بولاشاقتىق مۇددەسىن شىعار ٴتۇيىن ەتىپ، قازىر ەڭبەك ەتىپ، پايداسىن بولاشاقتا كورەتىن ىستەردى كوبىرەك ىستەۋ كەرەك. كەزەك كۇتتىرمەيتىن ٴىس جونىندە ايتقانىن تاباندا ورىنداپ، ۋاقىتتى مىقتى ۇستاپ جەدەل ٴبىتىرۋ كەرەك، سىلبىر، سالاق بولۋعا بولمايدى. ۇزاق ۋاقىتتىق مىندەت جونىندە ستراتەگيالىق تاباندىلىق پەن ۇستامدىلىقتى ساقتاپ، ەڭبەك ماعان جازىلماسا دا بولادى، ەڭبەك سىڭىرۋدە مەن بولماسام بولمايدى دەيتىن رۋحپەن تاريحي جاۋاپكەرشىلىك ارقالاپ، ورىنداۋعا تاباندى بولىپ، قاجىماس تاباندىلىق كورسەتۋ، ۇزبەي قۇلشىنۋ كەرەك. سانشيدىڭ يوۋيۇي اۋدانىندا كەزىندە قۇمدى بوران سوعىپ، تاۋ - وزەن قۇنارسىز بولعان. جاڭا جۇڭگو قۇرىلعان العاشقى مەزگىلدە اۋداندىق پارتكومنىڭ ٴبىرىنشى شۋجيى بۇكىل اۋدان حالقىن باستاپ قۇمدى تىزگىندەپ، ورمان وسىرە باستايدى. 70 نەشە جىلدان بەرى اۋداندىق پارتكومنىڭ ٴار كەزەك  باسشىلارى، تۇتاس اۋدانداعى كادرلار مەن بۇقارانى باستاپ، قاجىماي ـ تالماي ىستەپ، «قىلتانسىز جەردى» «جاسىل القاپقا» اينالدىرىپ، باتىلدىقپەن جاۋاپكەرشىلىك ارقالاۋ، قاجىرلىلىقپەن ىستەۋ تاڭداۋلى ستيلىن ايگىلەدى.

بۇقارا ٴۇشىن يگى ٴىس، ناقتى ٴىس ىستەۋدە ناتيجەنى تابان تىرەر تياناق ەتۋ كەرەك. ناتيجە بار ما، جوق پا؟ ناتيجەسى جوعارى ما، تومەن بە؟ بۇندا بۇقارانىڭ ٴىس جۇزىندىك سەزىنۋىنە قاراۋ كەرەك، ونى بۇقارا باعالاۋ كەرەك. جياۋ يۇيلۋ جولداس لانكاۋدا ٴبىر جىلدان استام ۋاقىت قىزمەت ىستەگەنىمەن، بۇقارانىڭ كوڭىلىندە ماڭگىلىك ەسكەرتكىش بولىپ ورنادى. فۋجيان ولكەسى دۇڭشان اۋداندىق پارتكومنىڭ شۋجيى گۋ ۋىنچاڭ بار ىنتاسىمەن بۇقارا ٴۇشىن ٴىس ىستەدى، جەرگىلىكتى بۇقارا مەرەكە - مەيرامداردا «الدىمەن گۋ ۋىنچاڭعا ازا ٴبىلدىرىپ، ونان سوڭ اتا ـ باباسىنا تاۋاپ ەتەدى». كوممۋنيستىك پارتيا حالىق ٴۇشىن قىزمەت ىستەيدى، بۇقارا ٴۇشىن ٴىس تىندىرادى، بۇقارانى اناعۇرلىم باقىتتى تۇرمىسقا كەنەلتۋ كوممۋنيستىك پارتيانىڭ ٴىسى. پارتيالى كادرلار حالىقتى وزەك ەتكەن دامۋ يدەياسىن جەتە ٴتۇسىنىپ، دۇرىس ساياسي ناتيجە كوزقاراسىن ورناتىپ جانە ٴامالياتتا ايگىلەپ، حالىق بۇقاراسىنىڭ رازى بولۋ - بولماۋىن، قۇپتاۋ - قۇپتاماۋىن، قۋانعان - قۋانباعانىن قىزمەت ناتيجەسىن ولشەيتىن ەڭ جوعارى ولشەم ەتىپ، حالىقتىڭ تاماشا تۇرمىسقا دەگەن تالپىنىسىن ۇزدىكسىز جۇزەگە اسىرىپ، پارتيانىڭ، حالىقتىڭ، ٴداۋىردىڭ كۇتكەن ۇمىتىنەن، تالابىنان شىعاتىن ادال ناتيجە جاراتۋ كەرەك.

حانزۋشادان اۋدارعان نۇركەلدى نۇراقىن ۇلى