ٴتىلشىمىز حۋاڭ يان حابارلايدى. 5 - ايدىڭ 20 - كۇنى وبلىستىق حالىق قۇرىلتايى تۇراقتى كوميتەتى جەكە ـ جەكە ىلە شىفان داشۋەسى زاڭ شۋەيۋانىندا، قۇلجا قالاسى ٴدوڭمالى ٴمالى باسقارماسى ٴدوڭمالى الەۋمەتتىك اۋماعىندا نەگىزگى ساتى زاڭ شىعارۋ بايلانىس تۇيىنىنە ماڭدايشالىق بەرۋ سالتىن وتكىزدى. وسى رەتكى ماڭدايشالىق بەرۋ اۆتونوميالى وبلىستىڭ نەگىزگى ساتى زاڭ شىعارۋ بايلانىس ٴتۇيىنى قىزمەتىندە تىڭ قادام تاستاعاندىعىن اڭعارتادى. نەگىزگى ساتى زاڭ شىعارۋ بايلانىس ٴتۇيىنى بولعان ورىندار  ٴار سالا، ٴار كاسىپتىڭ، سونداي - اق نەگىزگى ساتى بۇقاراسىنىڭ زاڭ - ەرەجە جوباسى جونىندەگى پىكىر - ۇسىنىستارىن بەلسەنە اڭىس ەتىپ، «حالىق تىلەگىن تىكە جەتكىزۋ» رولىن ساۋلەلەندىرىپ، ىلەنى زاڭمەن باسقارۋ قۇرىلىسىن ىلگەرىلەتۋگە اناعۇرلىم كوپ نەگىزگى ساتىنىڭ اقىل - پاراساتى مەن كاسىپتىك كۇشىن قوسادى.

وبلىستىق حالىق قۇرىلتايى تۇراقتى كوميتەتى پارتيا باسشىلىق گرۋپپاسىنىڭ شۋجيى جاۋ تيانجيە، وبلىستىق حالىق قۇرىلتايى تۇراقتى كوميتەتىنىڭ مەڭگەرۋشىسى نياز اشىم ماڭدايشالىق بەرۋ سالتىنا قاتىناستى.

بيىل 4 - ايدىڭ 12 - كۇنى اۆتونوميالى وبلىستىق 15 - كەزەكتى حالىق قۇرىلتايى تۇراقتى كوميتەتىنىڭ 3 - رەتكى مەڭگەرۋشىلەر ٴماجىلىسى تۇڭعىش توپتاعى نەگىزگى ساتى زاڭ شىعارۋ بايلانىس تۇيىندەرىنىڭ ەسىمدىگىن قاراپ ماقۇلدادى، وبلىستىق حالىق قۇرىلتايى تۇراقتى كوميتەتى بەلگىلەگەن 7 نەگىزگى ساتى زاڭ شىعارۋ بايلانىس ٴتۇيىنى مىنالار: ىلە شىفان داشۋەسىنىڭ زاڭ شۋەيۋانى، قۇلجا قالاسى ٴدوڭمالى ٴمالى باسقارماسىنىڭ ٴدوڭمالى الەۋمەتتىك اۋماعى، اۆتونوميالى وبلىستىق ادۆوكاتتار قوعامى، قۇلجا اۋدانى جەلىجۇزى قالاشىعى باتىس 1 - الەۋمەتتىك اۋماعىنىڭ حالىق قۇرىلتايى ۋاكىلدەرىمەن بايلانىس جاساۋ پۋنكتى، كۇنەس اۋدانىنىڭ تۇرگەن اۋىلى، شيحۋ ونەركاسىپ باقشا رايونى، قابا اۋدانىنىڭ كولباي قالاشىعى.

وبلىستىق حالىق قۇرىلتايى تۇراقتى كوميتەتىنىڭ نەگىزگى ساتى زاڭ شىعارۋ بايلانىس تۇيىندەرىن تۇيىندە سىناق ەتۋ ٴتۇزىمىن ورناتۋى - ىلەنى زاڭمەن باسقارۋ قۇرىلىسىن جەدەل ىلگەرىلەتىپ، عىلمي، دەموكراتيالى، زاڭ بويىنشا زاڭ شىعارۋدى امالياتتا ايگىلەۋدەگى ماڭىزدى شاراسى، سونداي - اق حالىقتى وزەك ەتكەن دامۋ يدەياسىنا تاباندى بولىپ، ٴار سالا، ٴار كاسىپ پەن نەگىزگى ساتى بۇقاراسىنىڭ زاڭ شىعارۋ جونىندەگى تىلەگىن اناعۇرلىم ويداعىداي اڭىس ەتىپ، وبلىستىق حالىق قۇرىلتايىنىڭ زاڭ شىعارۋ قىزمەت جاۋاپكەرلىگىن ويداعىداي ادا ەتۋىنىڭ ماڭىزدى جولى. نەگىزگى ساتىنىڭ زاڭ شىعارۋ بايلانىس ٴتۇيىنىنىڭ ٴبىر جاعى زاڭ شىعارۋ ورگاندارىمەن، ەندى ٴبىر جاعى بۇقارامەن بايلانىسىپ جاتادى، ول جالپى بارىستىق دەموكراتيانى دامىتۋدىڭ ىقشام بەينەسى بولىپ، بۇقارانىڭ زاڭ شىعارۋعا قاتىناسۋىن بارىنشا جەبەپ، زاڭ شىعارۋدىڭ حالىق جاعدايىن، حالىق رايىن، حالىق پاراساتىن، حالىق تىلەگىن تىكەلەي بەينەلەۋىن جانە ايگىلەۋىن قامتاماسىزداندىرىپ، زاڭ شىعارۋدىڭ ٴتىپتى دە جاناسىمدى، ٴونىمدى بولۋىنا مۇمكىندىك جاسايدى.

ىلە شىفان داشۋەسىنىڭ زاڭ شۋەيۋانى وبلىستىق حالىق قۇرىلتايى تۇراقتى كوميتەتىنىڭ نەگىزگى ساتى زاڭ شىعارۋ بايلانىس ٴتۇيىنى رەتىندە، كوپ جاقتى زاڭ عىلىمى پاندەرى بايلىعىنا يە، وندا زاڭ عىلىمى نازاريالىق بىلىمدەرىن جەتىك يگەرگەن كوپتەگەن مامان - وقىمىستىلار بار بولىپ، جەرگىلىكتى ورىننىڭ زاڭ شىعارۋى جاعىنداعى نازاريالىق زەرتتەۋگە جانە ٴتۇرلى زاڭ شىعارۋ امالياتتىق قيمىلدارىنا قاتىناسۋ جاعىندا وزگەشە ابزالدىلىققا يە.

ٴدوڭمالى الەۋمەتتىك اۋماعى 2018 - جىلى ٴادىليا مينيسترلىگى، حالىق ىستەرى مينيسترلىگى جاعىنان «7 - توپتاعى مەملەكەت بويىنشا دەموكراتيالى زاڭمەن باسقارۋدان ۇلگى كورسەتۋ الەۋمەتتىك اۋماعى» اتاعىنا يە بولعان، قاراستى اۋماقتا «زاڭمەن باسقارۋ مادەنيەت باقشاسى» جانە «زاڭمەن باسقارۋ كوشەسى» قۇرىلعان، ٴبىرشاما قويۋ زاڭمەن باسقارۋ اۋانىنا جانە زاڭمەن باسقارۋ نەگىزىنە يە، جەرگىلىكتى زاڭ شىعارۋ قيمىلدارىنا قاتىناسۋ بارىسىندا ەڭ شىنايى حالىق تىلەگىن يەلەۋ جاعىندا بەلسەندى رول اتقارا الادى.