وبلىستىق ايەلدەر بىرلەستىگىنىڭ سالاماتتىقتى نەگىزگى ساتىعا جەتكىزۋ قيمىلى باستالدى

شينجياڭعا كومەككە كەلگەن ماماندار تۇرعىنداردىڭ “ىرگەسىنە” كەلىپ ناۋقاس كوردى

ٴتىلشىمىز كاميلا حابارلايدى. 12 ـ ايدىڭ 8 ـ كۇنى قۇلجا قالاسى داۋلەتباق ٴمالى باسقارماسى جيدەلى الەۋمەتتىك اۋماعىنىڭ تۇرعىنى گۇلي قاسىم ٴمالى باسقارماسى دەنساۋلىق ساقتاۋعا قىزمەت وتەۋ ورتالىعىنىڭ اقىسىز دياگنوز قويۋ ورنىندا ناۋقاسى تۋرالى كەڭەس سۇراعاندا بىلاي دەدى: ”مەندە نەگىزدىك اۋرۋ بار، جىل بويى ٴدارى ىشەمىن، وسى جولى نانجيڭنەن كەلگەن مامان شيپاگەرلەر ’ىرگەمىزگە‘ كەلىپ دياگنوز قويىپ، ماعان ٴدارىنى دۇرىس قولدانۋ، ۇيلەسىمدى تاماقتانۋ جونىندە مۇقيات جەتەكشىلىك ەتتى، مەن قاتتى قۋاندىم، ولارعا العىس ايتامىن“. 

سول كۇنى ىلە وبلىستىق ايەلدەر بىرلەستىگى ىلە وبلىستىق جۇڭگوشا ەمدەۋ شيپاحاناسىمەن بىرلەسىپ، نەگىزگى ساتى دەنساۋلىق ساقتاۋعا قىزمەت وتەۋ ورتالىعىندا ”قىسقى مەيىر باعىشتاۋ قيمىلىن“ ورىستەتىپ، سالاماتتىقتى نەگىزگى ساتىعا جەتكىزۋ سالتىن وتكىزدى. قيمىلدىڭ ماقساتى ”سالاماتتى جۇڭگو، انالار ارەكەتىن“ ۇزدىكسىز تەرەڭدەتىپ، حالىق تۇرمىسىنا قاتىستى ناقتى ىستەردى ويداعىداي ىستەپ، بۇقارانىڭ ”ىرگەدەن“ ساپالى، قولايلى ەمدەۋ قىزمەت وتەۋىنەن يگىلىكتەنۋىنە مۇمكىندىك جاساپ، بۇقارانىڭ سالاماتتىق تانىمىن اناعۇرلىم جوعارىلاتۋ بولىپ تابىلادى.

قيمىل مايدانىندا تەكسەرىلە كەلگەن تۇرعىنداردىڭ اياعى ۇزىلمەدى، وبلىستىق جۇڭگوشا ەمدەۋ شيپاحاناسىنىڭ نەسەپ سىرتقى اۋرۋلار ٴبولىمى، كوز ٴبولىمى، رەۆماتيزم ٴبولىمى، سۇيەك ٴبولىمى سياقتى بولىمدەرىندەگى شينجياڭعا كومەككە كەلگەن ماماندار مەن شيپاگەرلەرى ناۋقاس كورسەتە كەلگەن تۇرعىنداردى ىستىق ىقىلاسپەن قابىلداپ، ناۋقاس جاعدايىنا ەگجەي ـ تەگجەيلى تالداۋ جاساپ، ۇنەمى كەزدەسەتىن سوزىلمالى اۋرۋلاردىڭ، ٴجيى تۋىلاتىن اۋرۋلاردىڭ الدىن الۋ جانە ونى ەمدەۋ جونىندە كاسىپتىك جاقتان جەتەكشىلىك ەتتى. سونىمەن بىرگە، تۇرعىنداردىڭ ناۋقاسى تۋرالى سۇراعىنا سابىرلىلىقپەن جاۋاپ بەرىپ، دەنساۋلىق بىلىمدەرىن جالپىلاستىرىپ، تۇرعىنداردىڭ عىلمي ەمدەلۋىنە جەتەكشىلىك ەتتى.

”بۇل رەتكى قيمىل تاماشا باستاما بولدى، بۇدان كەيىن ٴبىز ايەلدەر بىرلەستىگىمەن، نەگىزگى ساتى ەمحانالارىمەن قارىم ـ قاتىناستى، سەلبەستىكتى ۇزدىكسىز كۇشەيتىپ، ەمدەۋدى اۋىل ـ قىستاققا جەتكىزۋ، الەۋمەتتىك اۋماقتارعا بارىپ بۇقاراعا قىزمەت وتەۋ قيمىلىن ىشكەرىلەي ورىستەتەمىز ٴارى شينجياڭعا كومەككە كەلگەن مامانداردىڭ باسىمدىعىن تولىق ساۋلەلەندىرىپ، نەگىزگى ساتىداعى بۇقاراعا ساپالى ەمدەۋ جاعىنان قىزمەت وتەيمىز“، - دەدى وبلىستىق جۇڭگوشا ەمدەۋ شيپاحاناسى پارتكومىنىڭ ورىنباسار شۋجيى، شيپاحانا باستىعى مي يۇڭ.

ٴتىلشىنىڭ وبلىستىق ايەلدەر بىرلەستىگىنەن ۇعىسۋىنشا، ولار قاتىستى تاراۋلارمەن بەلسەنە بىرلەسىپ، قاتىستى بايلىقتاردى ۇشتاستىرىپ، بيىل قىس پەن كەلەر جىلى كوكتەمدەگى ەگىس جۇمىسىنىڭ سايابىر ۋاقىتىنان پايدالانىپ، سالاماتتىق جونىنەن اقىسىز دياگنوز قويۋ، اۋىل ـ قىستاق مادەنيەت، دەنە تاربيە قيمىلى، ەڭ تاماشا وتباسى حيكاياسىنان ورتاق يگىلىكتەنۋ ٴماجىلىسى، جەلەكتىلەردىڭ ميكرو ۇگىت ـ لەكسياسى سياقتى 10 ٴتۇرلى ”قىسقى مەيىر باعىشتاۋ قيمىلىن“ ورىستەتەدى ەكەن. مۇنىڭ ىشىندە دەنساۋلىققا اقىسىز دياگنوز قويۋ قيمىلى بويىنشا ىلە وبلىسىنداعى 4 شيپاحانامەن بىرلەسىپ، شينجياڭعا كومەككە كەلگەن مامانداردى ٴار اپتادا مەرزىم بويىنشا نەگىزگى ساتى دەنساۋلىق ساقتاۋعا قىزمەت وتەۋ ورتالىعىندا تۇرىپ دياگنوز قويۋعا تاڭداپ جىبەرىپ، نەگىزگى ساتىداعى ايەلدەرگە ”توركىنىندەي“ كوڭىل بولەدى ەكەن.

سۋرەتتە: اقىسىز دياگنوز قويۋ مايدانى.

كاميلا فوتوسى