باس بەتكە قايتۋ | 中文 ىلە اقپارات تورابىنا حوش كەلدىڭىزدەر!
ساياحات شاعىن قىستاقتىڭ تۇرمىسىن وزگەرتتى
2021-05-09 18:06:39كەلۋ قاينارى:تيانشان تورى  جاۋاپتى رەداكتور:گۇلدەن ماقسات قىزى

 

    انار بۇلت / شينجياڭ گازەتىنىڭ ءتىلشىسى دۋ جيانحۇي

 

    5 - ايدىڭ 6 - كۇنى باعراش اۋدانى ۇلانجەكسىن اۋىلى ۇلانجەكسىن قىستاعىنىڭ تۇرعىنى جاڭ شياۋچيڭ ”گۇل تەڭىزى الەمى“ كورىنىس تۇيىنىندەگى جەمىس ءۇزۋ باعىنا شيە قىزاناعىنىڭ قالامشاسىن ەگىپ جاتتى. قازىر الىسقا بارىپ جۇمىس ىستەمەيتىن بولعان ول كۇنىنە 160 يۋان ەڭبەكاقى الىپ، ءبىر ءۇيلى جان الاڭسىز تۇرمىس كەشىرۋدە.

    ۇلانجەكسىن قىستاعى باعراش كولى كورىنىس اۋماعىنان 3 كيلومەتر قاشىقتا، مەملەكەت تاس جولىنىڭ 218 - جەلىسىمەن ىرگەلەس. ساياحات كاسىبىنىڭ وركەندەۋىنە وراي، قىستاقتاعى شارۋا ۇيلەرى حالىقتىق تۇسەلحاناعا وزگەرىپ، جەرگىلىكتى ەرەكشە ونىمدەر ساياحات تاۋارلارىنا اينالىپ، شارۋالار شاتتىعى ساياجايىنىڭ ساۋداسى بىرتىندەپ شاڭىراق كوتەرىپ، ساياحات شاعىن قىستاقتىڭ تۇرمىسىن وزگەرتتى.

    ءۇي ماڭىندا جۇمىستاندى، باقىت سەزىمى اناعۇرلىم كۇشەيدى

    ”گۇل تەڭىزى الەمى“ كورىنىس تۇيىنىندە جاڭ شياۋچيڭ سياقتى ەڭبەك ەتىپ جۇرگەن قىستاق تۇرعىندارى از ەمەس، كوپشىلىك بىرگە گۇل ەگىپ، ءشوپ ءوسىرىپ، كورىنىستەردى ورنالاستىرادى...

    ”ءار ءتۇرلى گۇل - بايشەشەكتەر مەجەمەن 6 - ايدىڭ 10 - كۇنى تولىق اشىلادى، گۇل اشۋ مەزگىلى 10 - ايعا دەيىن جالعاسادى، وسىعان بايلانىستى قىستاق تۇرعىندارىنىڭ جۇمىس ىستەۋ ۋاقىتى ۇزارىپ، تابىستارى دا اناعۇرلىم جوعارى بولادى“، - دەيدى ”گۇل تەڭىزى الەمى“ كورىنىس ءتۇيىنىنىڭ جاۋاپتىسى گو شۇي.

    اۋىل - قىستاق ساياحاتىن ارقاۋ ەتكەن ۇلانجەكسىن اۋىلى مەملەكەت تاس جولى 218 - جەلىسىنىڭ بويىنان ۇزىندىعى 3 كيلومەتر، كەڭدىگى 300 مەتر كەلەتىن ”گۇل تەڭىزى الەمى“ كورىنىس ءتۇيىنىن جانە جەمىس ءۇزۋ باعىن قۇردى. گۇل اشقان مەزگىلدە مۇندا ساياحاتشىلار ءيىن تىرەسەدى. جەمىس - جيدەك پىسقان مەزگىلدە ساياحاتشىلار باقشاعا كىرىپ جەمىس ءۇزىپ، كورىنىس تاماشالاپ، جەمىس - جيدەكتەردەن ءدام تاتادى. مىڭ مۋلىق گۇل تەڭىزى، ەگىنجاي كورىنىسى جەرگىلىكتى بۇقارا ءۇشىن ساياحات ارقىلى بايۋدىڭ جاڭا جولىن اشتى.

    2 جىلدىڭ الدىندا جاڭ شياۋچيڭ 20 مۋ جەرىن اۋىلدىڭ گۇل - ءشوپ ەگۋى ءۇشىن اينالىمعا بەرىپ، ءوزى ”گۇل تەڭىزى الەمى“ كورىنىس تۇيىنىندە قىزمەتشى بولدى. جەردى اينالىمعا سالۋدىڭ الدى - ارتىنداعى وزگەرىس جايلى، جاڭ شياۋچيڭ ەكونوميكالىق ەسەپ جاساپ بىلاي دەدى: ”جەردى اينالىمعا سالۋ اقىسىنىڭ ءار مۋى 700 يۋان، كورىنىس تۇيىنىندە جۇمىس ىستەسەم ايىنا ورتاشا ەسەپپەن 3000 يۋان ەڭبەكاقى الامىن، وسىلايشا ءبىر جىلدا 50 نەشە مىڭ يۋان تابىس تابامىن“.

    ”ءار جىلى گۇل تاماشالاۋعا كەلەتىن ساياحاتشىلار 20 مىڭنان اسادى، مەن جانە اۋىلداستار، ءسويتىپ، ءۇيدىڭ جانىندا جۇمىستانىپ، ۇيگە دە قارايلاسىپ، كىرىس تە تاپتىق“، - دەيدى جاڭ شياۋچيڭ سوزدەرىنەن باقىت لەبى ەسىپ.

    جول بويىنداعى ەكونوميكانىڭ دۋمانى قىزىپ، تابىس جىل سايىن جوعارىلادى

    ”ماعان كەپتەردىڭ ەڭ ۇلكەنىنەن 10ىن تاڭداپ بەرىڭىز“. سول كۇنى تۇستەن كەيىن كورلالىق ساياحاتشى گۋ فىڭ كورىنىس وڭىرىنەن قايتار جولدا قىستاق تۇرعىنى بارات مۇسانىڭ ءۇيىنىڭ جانىنان ءوتىپ بارا جاتىپ، جول - جونەكەي ودان كەپتەر ساتىپ الدى.

    ەگىستىك جەرى از، ايەلى ۇزاق جىلدان بەرى مۇگەدەك بالاسىنا قارايلاساتىن باراتتىڭ ءۇيىنىڭ كۇن كورىسى ءبىر مەزەت تارشىلىق كۇيدە قالعان ەدى. قىستاق وعان كەدەيلەردى سۇيەمەلدەۋگە ارنالعان تاۋىق بەرگەن سوڭ، ونىڭ جىلىنا تاۋىق باعۋدان تاباتىن تابىسى 6000 يۋاننان استامعا جەتتى. مۇنىڭ پايداسىن كورگەن بارات بىلتىردان بەرى كەپتەر مەن سويىس سيىر باعىپ، جىلدىق تابىسىن 50 مىڭ يۋانعا جەتكىزدى. ”مەن باققان جەرگىلىكتى تاۋىقتار، كەپتەرلەر ساتىلماي قالادى - اۋ دەپ ۋايىمدامايمىن، جولدان ءوتىپ جاتقان ساياحاتشىلار مەن قىستاقتاعى شارۋالار شاتتىعى ساياجايىنىڭ يەلەرى وزدەرى ىزدەپ كەلىپ ساتىپ الادى“، - دەيدى بارات ماساتتانا.

    ۇلانجەكسىن قىستاعىنداعى شارۋالار شاتتىعى ساياجايلارىنىڭ بارلىعى ەسىكتەرىنىڭ الدىنا ”جەرگىلىكتى ەرەكشە ونىمدەردى ۋاكىلدىك ساتۋ ورنى“ دەگەن تاقتاي ءىلىپ، ساياحاتشىلاردىڭ ساتىپ الۋىنا قولايلى بولۋ ءۇشىن، وعان جەرگىلىكتى تاۋىق، جاسىل ورگانيكالى كوكونىس سياقتى اۋىل شارۋاشىلىعى ونىمدەرىنىڭ باعاسىن جازىپ قويدى.

    جول بويىنداعى ۇلان ءدامدى تاعامدار كوشەسىندە قاريدار شاقىرىپ جار سالعان ۇندەر تولاس تاپپايدى. قىستاق تۇرعىنى مۇقادداس ايسا قاريدارلارعا قوي ەتىنەن كاۋاپ پىسىرىپ جاتىر ەكەن.

    2019 - جىلى بۇرىن تەك قاقتاما تاعام جاساۋدى عانا بىلەتىن مۇقادداس قىستاقتاعى اسپازدىق ونەر كۋرسىنا قاتىناسىپ، لياڭپي جاساۋدى ۇيرەنىپ، بىلتىردان بەرى ءدامدى تاعامدار كوشەسىندە جايما اشىپ لياڭپي جانە قاقتاما تاعامدار ساتتى.

    ”ءدامدى تاعامدار كوشەسى جوق كەزدە مەن 3 دوڭگەلەكتى ارباعا ءمىنىپ كاۋاپ قاقتايتىن مەشىمدى سۇيرەپ، بازاردان بازارعا جۇگىرىپ كاۋاپ ساتاتىنمىن، قازىر ءۇيدىڭ جانىندا وتىرىپ - اق اقشا تاباتىن بولدىم“، - دەدى تىلشىگە مۇقادداس قۋانىشپەن، وتكەن كۇنى ول ءبىر كۇندە 600 يۋان اقشا تاۋىپتى.

    ۇلانجەكسىن قىستاعى كورىنىس وڭىرىندەگى تاس جولداردىڭ بويىمەن ءبىرتالاي جەرلەردى بەلگىلەپ، جەرگىلىكتى قىستاق تۇرعىندارىن ەرەكشەلىككە يە ۇساق - تۇيەك تاعامدار، ءۇي قۇستارى، ورگانيكالى كوكونىس سياقتىلاردى ساتۋعا جەتەكتەپ، قىستاق تۇرعىندارىنىڭ تابىستارى جىلدان - جىلعا ارتتى.

    شارۋا ۇيلەرى حالىقتىق تۇسەلحاناعا وزگەرىپ، شارۋالار قوجايىن بولدى

    ”گۇل تەڭىزى الەمىمەن“ اراسىن ءبىر جول ءبولىپ جاتقان شارۋالار شاتتىعى ساياجايلارىنىڭ، حالىقتىق تۇسەلحانا اۋلالارىنىڭ ءاربىرىنىڭ ءوز ەرەكشەلىگى بار.

    ”قاپيادا كەزدەسكەن جولاۋشىنى كەم كورمەيمىن ناعىز اندا - دوسىمنان، ءوز ۇيىڭە كەلگەندەي كولىگىڭدى دوعارىپ قونىپ قالعىن وسىندا“. قىستاق تۇرعىنى ۋي جيڭبو اشىپ وتىرعان حالىقتىق تۇسەلحانانىڭ قاقپاسىنىڭ ەكى جاعىنا ويىلعان بوساعالىق ايرىقشا كوز تارتىپ تۇر.

    بىلتىر ۋي جيڭبو اۋداننىڭ قولداۋىمەن ساياحاتتى دامىتۋ نىسانىنا بەرىلگەن 100 مىڭ يۋان قارجىمەن جانە ءوزىنىڭ جيعان - تەرگەن اقشاسىمەن ەسكى ءۇيىن بۇزىپ، ەكى قاباتتى حالىقتىق تۇسەلحانا سالدى. حالىقتىق تۇسەلحاناداعى 14 قوناق بولمەسىنە 30 ادام قونۋعا بولادى. ءار بولمەنى ۋي جيڭبو دەن قويا اشەكەيلەگەن. ”ءۇيدىڭ توبەسىندەگى اشىق الاڭدا تۇرىپ، اۋىل - قىستاقتىڭ كورىنىسىن تاماشالايسىز. تۇندە ءتۇرلى جاندىكتەردىڭ شىرىلداعان داۋىسىنا قۇلاق ءتۇرىپ، تۇنگى اسپانداعى جۇلدىزدارعا قارايسىز...“، - دەيدى ۋي جيڭبو.

    ساياحاتشىلار اتىنا ەلىتىپ ارنايى كەلەتىندىكتەن، ساۋداسى قاتتى قاربالاس بولعان ۋي جيڭبو شىن ليڭيۇيدى قامتىعان 6 قىستاق تۇرعىنىن كومەكتەسۋگە شاقىرىپتى، ول: ”كۇندىك ەڭبەكاقىم 120 يۋان، جەر ەگۋ مەن جۇمىس ىستەۋدىڭ ەكەۋىن دە اقساتپادىم“، - دەدى.

    ۇلانجەكسىن قىستاعى شارۋالار ءۇيىن حالىقتىق تۇسەلحاناعا وزگەرتۋ، ەگىنجايلاردى جەمىس ءۇزۋ باعىنا اينالدىرۋ، جەرگىلىكتى ەرەكشەلىككە يە ونىمدەردى ساياحات تاۋارلارىنا وزگەرتۋ سياقتى جەلىلەس ينجەنەريالاردى اتقارۋ ارقىلى بۇقارانىڭ ساياحات كاسىبىنە ات سالىسۋ بەلسەندىلىگىن جوعارىلاتتى. قازىر تۇتاس قىستاقتا 100دەن استام شارۋا وتباسى ساياحاتتىڭ يگىلىگىن كورىپ وتىر.