باس بەتكە قايتۋ | 中文 ىلە اقپارات تورابىنا حوش كەلدىڭىزدەر!
”تۇلپار“ جۇيتكىدى، تۇرمىس شالقىدى
2021-06-02 17:13:13كەلۋ قاينارى:تيانشان تورى  جاۋاپتى رەداكتور:گۇلدەن ماقسات قىزى

  

 انار بۇلت / شينجياڭ گازەتىنىڭ ءتىلشىسى جاڭ شياۋفۋ

 

    ءسۇتتى شايدىڭ حوش ءيىسى اڭقىپ، قىزارا پىسقان باۋىرساق قازاننان شىقتى، ورىك قاعى، ءجۇزىم قاعى سياقتى قۇرعاق جەمىس - جيدەكتەر تاقسىعا رەتتى ءتىزىلدى. 5 - ايدىڭ 16 - كۇنى تاڭ سارىدە، موڭعۇلكۇرە اۋدانى قاراسۋ قالاشىعى اقشي قىستاعىنىڭ تۇرعىنى جازيرا ساياحاتشىلارعا تاڭعى اس دايىنداۋمەن قاربالاس بولدى، ول اق تىلەك حالىقتىق سالت - سانانى سەزىنۋ ءتۇيىنىنىڭ ايەل قوجايىنى.

    اتقا ءمىنىپ شىعىپ كەلە جاتقان كۇندى كوردى، سيىر ساۋىپ، ءسۇتتى شاي ازىرلەدى، بىرگە ءان ايتىپ، ءبي بيلەدى... ساياحاتشىلار اقشي قىستاعىنداعى كۇندەرىن وتە كوڭىلدى وتكىزدى. موڭعۇلكۇرە اۋدانىنداعى العاشقى حالىقتىق سالت - سانا ساياحات قىستاعى رەتىندە، اقشي قىستاعىنداعى 72 مالشى وتباسىنىڭ اراسىندا مالشىلار شاتتىعى ساياجايىن، حالىقتىق سالت - سانانى سەزىنۋ ءتۇيىنىن جانە حالىقتىق تۇسەلحانا اشقانداردان 31 وتباسى بار. موڭعۇلكۇرە تۇلپار حالىقارالىق ساياحات مەرەكەسىنىڭ تابىستى وتكىزىلۋىمەن بۇل قىستاق قىرۋار ساياحاتشىنى باۋرادى، وزىندىك ەرەكشەلىككە يە حالىقتىق سالت - سانا، ادەت - عۇرىپ جانە ىقىلاستى، قوناقۋار مالشىلار شاتتىعى ساياجايىنىڭ قوجايىندارى موڭعۇلكۇرە ساياحاتىنا ءار قوستى.

    وشاق باسىنان ساياحاتشىلاردىڭ قاسىنا دەيىن

    تاڭعى استان كەيىن، جازيرا حالىقتىق تۇسەلحانىڭ بولمەلەرىن رەتتەدى، كەستەلى داستارقان، تەرەزە ەدەنىنە قويىلعان گۇل، قابىرعا جيەگىندەگى اق تورعىنمەن تىستالعان كورپە - جاستىق، ءاربىر تۇستان قاراپايىمدىلىق پەن مەيىرىمدىلىك مەن مۇندالايدى. توسەككە توسەلگەن ويۋلى سىرماق ەرەكشە كوز تاراتادى.

    ”ءجۇن تۇتىپ، بوياپ، كيىز باسىپ، بىرتە - بىرتە كەستەلەدىك، وسى ءبىر كەستەلى سىرماقتى كەستەلەۋگە، كەمىندە، 2 جىل ۋاقىت جۇمسالدى. ىلگەرى ءوزىمىز كەستەلەيتىنبىز، قازىر اقشا جۇمساپ ساتىپ الامىز“. جازيرا وسى كەستەلى سىرماقتى نۇسقاپ تۇرىپ: ”بۇل كەستەلى سىرماقتى تاپقان اقشاممەن ساتىپ الدىم“، - دەدى ماقتانا.

    ىلگەرى كۇيەۋى اق تىلەك اسەت سىرتتا مال باعاتىن، جازيرا ۇيدە تاماق جاساپ، بالاعا قاراپ، ءار كۇنى وشاق باسىنان شىقپايتىن.

    موڭعۇلكۇرە ءبىر توپ حالىقتىق سالت - سانا ساياحات قىستاعىن قۇرۋدى ۇيعارعاندا، اقشي قىستاعىنىڭ كورىنىسى كوركەم، قاتىناسى قولايلى بولعاندىقتان الدىمەن تاڭدالدى. جازيرا 1 - توپتا ”يگىلىككە كەنەلگەن“ مالشى بولدى، كۇيەۋىنە ەرىپ كوشىپ ءجۇرىپ تاۋدا مال باقپايتىن بولدى، جاز كۇندەرى، اسىرەسە، تۇلپار مەرەكەسى كەزىندە بۇكىل وتباسىنداعىلار ساياحاتشىلاردى كۇتىپ الۋمەن قاربالاستىققا تۇسەدى.

    ”اجەمنىڭ، شەشەمنىڭ قايناتقان ءسۇتتى شايى، جاساعان تاماعى وتە ءدامدى، الايدا مەن عانا تاماق جاساپ اقشا تاپتىم“. مالشىدان اسپازعا، ونان قوجايىن بولعانعا دەيىن جازيرا قازىرگى تۇرمىسىنا ءدان ريزا.

    مەرەكە - مەيرام قيمىلدارى اۋىل - قىستاق ساياحاتىن جەتەكتەدى

    لي ۋىن - ۋ قىزمەتتەستەرىمەن بيىلعى موڭعۇلكۇرە تۇلپار مەرەكەسىن وتكىزۋدىڭ دايىندىق قىزمەتىنە كىرىسىپ كەتتى. موڭعۇلكۇرە اۋداندىق پارتكوم ۇگىت ءبولىمىنىڭ ورىنباسار باستىعى بولعان ول تۇلپار مەرەكەسىنىڭ ۇيىمداستىرۋ قىزمەتىنە 5 جىل ات سالىستى. ول بىلاي دەدى: ”تۇلپار مەرەكەسىنىڭ جەرگىلىكتى ورىننىڭ ساياحاتىن جەتەكتەۋ رولى ەرەكشە زور. 2019 - جىلى تۇلپار مەرەكەسى كەزىندە ساياحات كىرىسى ءبىر ميلليارد 930 ميلليون يۋان بولىپ، 3 ميلليون 650 مىڭ ادام - رەت ساياحاتشى قابىلدادى، ساياحات كاسىپورىندارى، جەرگىلىكتى ورىنداعى مالشىلار سياقتىلار كوپ جاق يگىلىككە كەنەلدى“.

    قىستاق تۇرعىنى نۇربولات وماربەكتىڭ ءسۇت ونىمدەرىن ساتقانىنا 10 جىل بولدى، ءوزى ۇيىتقان ايران، اشىتقان قىمىز، جاساعان قۇرت ەرەكشە قارسى الۋعا بولەندى. ”قازىر ءار كۇنى 10 كيلوگرامدىق 2 شەلەك ايران ۇيىتامىن، تۇستە ساتىپ تاۋىسامىن“، - دەدى ول كۇلىمسىرەي.

    تۇلپار مەرەكەسىنىڭ اتى بارعان سايىن اسپانداپ، اقشي قىستاعىنا حالىقتىق سالت - سانا مادەنيەتىن سەزىنۋ ءۇشىن كەلەتىن ساياحاتشىلار دا بارعان سايىن كوبەيدى.

    گاۋھار ەسكەرمەس قىستاقتاعى ساياحات ءتۇسىندىرۋشىسى. ”العاش باستالعاندا كوپشىلىك ساياحاتشىلارعا ءسۇتتى شاي قايناتىپ، تاماق جاساپ، ءان ايتىپ، ءبي بيلەپ بەرەتىن. كەيىن كەلە ءبىز كوپتەگەن ساياحاتشىنىڭ بۇعان ايرىقشا قىزىققاندىعىن بايقادىق، قازىر حالىقتىق سالت - سانانى سەزىنۋ ءبىزدىڭ بەلگى ماركامىزعا اينالدى“. تاڭەرتەڭ تاڭعى تاماق ىستەۋدى ۇيرەنۋدەن كۇندىز ات ءمىنۋدى، قامشى ءورۋدى، كەستە تىگۋدى ۇيرەنۋگە، ونان تۇستەن كەيىن سيىر ساۋۋ، ءسۇتتى شاي قايناتۋدى ۇيرەنۋگە دەيىن... ساياحاتشىلار بۇل ارادا مالشىلاردىڭ تۇرمىسىن سەزىنە الادى.

    ءتىپتى دە كوپ قىستاق تۇرعىنى ”ساياحاتتىڭ يگىلىگىنە“ كەنەلدى

    2016 - جىلى سەزىنۋ ءتۇيىنى اشىلعان العاشقى جىلى جازيرا وتباسىنداعىلار ءبىر ايدا 400 نەشە ساياحاتشى قابىلدادى، ول وسىنشاما كوپ ادامنىڭ ونىڭ ۇيىنە كەلىپ تاماق جەيتىندىگىن ويلاماعان ەدى. وسى جىلدارى ول كولەمدى بىرتىندەپ كەڭەيتىپ، اس - سۋمەن قامداۋدان سىرت، 2019 - جىلى تاعى 4 بولمەلى حالىقتىق تۇسەلحانا اشتى. ساياحاتتىڭ قاۋىرت مەزگىلىندە تاماقتاناتىندار مەن قوناتىنداردى قوسقاندا ءبىر كۇندە 100دىڭ ۇستىندە ساياحاتشى قابىلدادى. قازىر جازيرا مەن كۇيەۋى اق تىلەك ساياحاتتىڭ قاۋىرت مەزگىلى كەلۋىن قارسى الۋعا تولىق دايىندىق جاساپ بولدى. ”بيىل قابىلدايتىن ساياحاتشىلار سانىنىڭ رەكورد جاڭالايتىندىعىنا سەنەمىن“، - دەدى جازيرا.

    ساياحاتشىلاردى ءتىپتى دە مولايتۋ، قىستاق تۇرعىندارىنىڭ قالتاسىن ءتىپتى دە قامپايتۋ ءۇشىن، تاياۋ جىلداردان بەرى قىستاق ”ەكى كوميتەتى“ جول جوندەپ، اۆتوكولىك توقتاتۋ الاڭىن جاساپ، اۋىل - قىستاقتى تازارتىپ، جاسىلداندىرىپ، كورىكتەندىرىپ، جارىقتاندىرىپ، قىستاقتىڭ بەت - بەينەسى اناعۇرلىم جاقسارا ءتۇستى. قازىر بۇل ارادا 300 مەتر ۇزىندىقتاعى باتبىراۋىق ءدالىزى، جارقىل وت دالادا تۇنەۋ الاڭى بار، سونداي - اق قاقتاما الاڭى سالىندى. قىستاقتاعى ءتىپتى دە كوپ ادام ساياحات كاسىبىنە ويىسىپ، ساياحات كاسىبىنىڭ دامۋى الا كەلگەن پايدادان يگىلىكتەندى.

    جازيرا: ”مەن تاماشا ۋاقىتقا كەز بولدىم، قازىر ساياسات جاقسى، ساياحاتشى كوپ، ءوزىمدى ەرەكشە باقىتتى سەزىنەمىن“، - دەدى.