伊犁新闻网

تىلشىلەرىمىز ليۋ چۇنشيڭ، ۋ جىجيان

《九曲十八弯》.JPG

كوكسۋدىڭ يرەگى

شينجياڭداعى ساياحاتتىڭ ەڭ تاماشا مەزگىلى - جاز ايلارى ٴارى توڭىرەكتىڭ ٴتورت بۇرىشىنان كەلەتىن ساياحاتشىلاردىڭ اياعى ۇزىلمەيتىن مەزگىل. شىلدە، تامىز ايلارىندا ىلەنىڭ جەر - جەرىندە ساياحاتشىلار ٴتىپتى دە مولايا تۇسەدى. نارات، قاراجون، شاتى، تاڭبالىدان تارتىپ، مايتاۋ - كۇشار تاس جولى، قۇلجا - موڭعۇلكۇرە تاس جولى، شوڭقۇشتاي، كەڭساي سياقتى جەكە اۆتوكولىكپەن ساياحاتتايتىن ورىندارى ەرەكشە قاربالاستىققا تۇسەدى. بيىل 1 - ايدان 6 - ايعا دەيىن وبلىسقا توتە قاراستى ورىنداردىڭ ەل ىشىنەن قابىلداعان ساياحاتشى سانى 34 ميلليون 315 مىڭ ادام رەت بولىپ، سايكەس مەزگىلدەگىدەن %16.39 ارتقان؛ ساياحات كىرىسى 24 ميلليارد 836 ميلليون يۋانعا جەتىپ، سايكەس مەزگىلدەگىدەن %11.54 ارتقان.

اۆتونوميالى وبلىس ساياحات شارۋاشىلىعىندا «وڭىرلەندىرۋ، تەرەڭدەتۋ، زەردەلىلەندىرۋگە» باعىت تۇزەپ، وڭىرلىك ەرەكشەلىكتى كورنەكتىلەندىرىپ، جاسىل جانە جوعارى ساپالى دامۋ تالابىن مىقتى يگەرىپ، دۇنيە ٴجۇزى ارماندايتىن ساياحات ورنىن قۇرىپ شىعۋ نىساناسىنا قاراي ارشىنداي العا باسۋدان جازبادى. ٴبىر جاقتان، جەر - جەر باي مازمۇندى ساياحات مەرەكەلەرىن وتكىزىپ جاتتى. ايتالىق، قورعاس جۇپار ٴشوپ ساياحات مەرەكەسى، موڭعۇلكۇرە تۇلپار حالىقارالىق ساياحات مەرەكەسى سياقتىلار ارقىلى شينجياڭنىڭ ٴىشى-سىرتىنداعى سانسىز ساياحاتشىنى ىلەنىڭ كوركەم كەلبەتىنەن كوزايىم بولىپ، ىلەنى ۇگىتتەۋگە باۋراپ، ىلەنىڭ داڭقىن شىعارسا، تاعى ٴبىر جاقتان، جەر- جەر جەكە كولىكپەن ساياحاتتاۋ، اۋىل - قىستاق ساياحاتى، قىزىل ساياحات، حالىقتىق تۇسەلحانا ساياحاتى سياقتىلاردى العا قويىپ، جەرگىلىكتى ورىننىڭ ساياحات بازارىنىڭ دامۋىن بارىنشا ىلگەرىلەتتى. شينجياڭعا كومەكتەسەتىن ولكە، قالالاردىڭ كۇش سالا تانىستىرۋىمەن ساياحاتشىلار مايعا العان ۇشاقتار، ارناۋلى پويەزدەر شينجياڭعا كەلىپ، «شينجياڭعا ساياحاتشى جەتكىزۋ» تەبىنى ارتىپ، شينجياڭنىڭ ساياحات شارۋاشىلىعىنىڭ دامۋىن ايتارلىقتاي جەبەدى. جەكە مەديا داۋىرىندە توراپ تانىمالىلارىنىڭ ارقاسىندا، اسىرەسە، «شينجياڭدىق توراپتا تانىمال مەكەمە باستىعى» اتانعان ىلە وبلىستىق مادەنيەت - ساياحات مەكەمەسىنىڭ ورىنباسار باستىعى حى جياۋلۇڭنىڭ ۇگىتتەۋىندە ىلە ساياحاتى قوعامدىق قارىم - قاتىناس تەكشەلەرىنىڭ قىزعىندى تەمەسىنە اينالىپ، ىلەنىڭ ساياحات شارۋاشىلىعى دا بارعان سايىن گۇلدەنۋدە.

ىلە ساياحات شارۋاشىلىعىنىڭ دامۋى تەك كورىنىس رايوندارىنداعى ادام سانىنىڭ كوبەيۋىنە عانا ەمەس، «گۇل ەكونوميكاسى»، «ٴتۇن ەكونوميكاسى»، حالىقتىق تۇسەلحانا، شارۋالار ساياجايى، جاساندى كورىنىس رايونى سياقتى ٴتۇرلى كاسىپتەردىڭ دە دامۋىنا قوزعاۋشىلىق ەتىپ، ساياحاتشىلاردىڭ اس - سۋ، قونالقى، سەيىل - سەرۋەن، زات ساتىپ الۋ، كوڭىل كوتەرۋ جۇمىستارى تۇلەپ، تۇرلەنىپ، ساياحات شارۋاشىلىعىنىڭ دامۋ كومەسكى كۇشى ايتارلىقتاي ٴونىم بەرىپ، ىلە ساياحاتى «دامۋدىڭ التىن كەزەڭىنە» قادام تاستادى.