12 - ايدىڭ 3 - كۇنى ساياحاتشىلار سانجى قالاسىنداعى باتىس ءوڭىر نۇرجا قار شاڭعى الاڭىندا قار شاڭعى تەبۋدە. وسى ايدان باستاپ سانجى حۇيزۋ اۆتونوميالى وبلىسى ىركەس - تىركەس 50 نەشە ءتۇرلى قار - مۇز ساياحاتى قيمىلىن وتكىزىپ، ساياحاتشىلاردى قار - مۇز ءلاززاتىنا بولەيدى. □ سۋرەتتى حى لۇڭ تۇسىرگەن

انار بۇلت / شينجياڭ گازەتىنىڭ ءتىلشىسى ۋاڭ جيڭجيڭ 12 - ايدىڭ 7 - كۇنى ۇرىمجىدەن حابارلايدى. اۆتونوميالى رايوندىق مادەنيەت جانە ساياحات مەڭگەرمەسىنەن ۇعىسۋعا قاراعاندا، بيىل الدىڭعى 10 ايدا بۇكىل رايوندا جالپى 170 ميلليون ادام - رەت ساياحاتشى قابىلدانىپ، ساياحات كىرىسى 129 ميلليارد 440 ميلليون يۋان بولىپ، بىلتىرعى سايكەس مەزگىلدەگىدەن ％16.83ارتقان. ”مول دا ساپالى ساياحات ونىمدەرىمەن قامداۋ جانە حالىقتىق تۇسەلحانا سياقتى جاڭا كاسىپ كۇيى قارىشتاي دامىپ، ساياحات تۇتىنۋىن ءونىمدى جەبەدى، بۇكىل رايوننىڭ ساياحات كاسىبى سالاسىنىڭ جوعارى ساپالى دامۋ اۋقىمى ۇزدىكسىز جاقسارۋدا“، - دەدى اۆتونوميالى رايوندىق مادەنيەت جانە ساياحات مەڭگەرمەسىنىڭ ورىنباسار باستىعى ليۋ چۋان.

بيىل شينجياڭنىڭ ساياحات كاسىبىندە جاڭا ەرەكشەلىك، جاڭا اۋقىم جارىققا شىقتى، كورىنىس وڭىرلەرىندە جاڭا كاسىپ كۇيىن جەتىلدىرۋ العاشقى ونىمدىلىككە جەتىپ، ءبىر توپ مادەنيەت نەگىزگى تاقىرىپتىق تۇسەلحاناسى، جۇلدىزدى اسپان تۇسەلحاناسى، ءوز كولىگىمەن ساياحاتتاۋ، ۇيشە كولىك بازالارى ساياحاتشىلار ءسوزسىز باراتىن تىڭ جەرگە اينالدى؛ ساياحاتتىق كونسەرت، بەيزاتتىق مادەنيەت مۇرالار بازارى سياقتى مادەنيەت پەن ساياحات توعىسقان جاڭا ونىمدەر جامىراي جارىققا شىقتى.

قارلى ماۋسىمنىڭ كەلۋىنە ىلەسە، ءۇرىمجى اۋدانى شۇيشيگوۋ قالاشىعى پيڭشيلياڭ قىستاعىنداعى حالىقتىق تۇسەلحانالارعا بۇكىل ەلدىڭ جەر - جەرىنەن كەلگەن ساياحاتشىلار ات باسىن تىرەدى. ”2020 - جىلى بىزدە نە بارى 138 حالىقتىق تۇسەلحانا بار ەدى، قازىر 187گە جەتتى“. ءۇرىمجى اۋداندىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى ساياحات كەڭسەسىنىڭ مەڭگەرۋشىسى ياڭ چاۋ بىلاي دەدى: حالىقتىق تۇسەلحانالاردىڭ سانى كوپ بولىپ قانا قويماي، ساپاسى مەن قىزمەت وتەۋى دە بارىنشا جوعارىلاپ، ساياحاتشىلاردىڭ ايالداۋ ۋاقىتىن ونان ارى ۇزارتىپ، اس - سۋ جانە اۋىل شارۋاشىلىعى ونىمدەرىنىڭ ساتىلۋىن ءونىمدى جەبەدى. بيىل الدىڭعى 10 ايدا ءۇرىمجى اۋدانى جالپى 21 ميلليون 643 مىڭ ادام - رەت ساياحاتشى قابىلدادى، بۇل سايكەس مەزگىلدەگىدەن ％112.14 ارتتى.

11 - ايدىڭ 29 - كۇنى قاشقار بايىرعى قالاسى كورىنىس ءوڭىرى كەتمەنبازار تەمىرشىلىك گۇڭشىسى ايرىقشا دۋمانعا شومدى، بۇل اۋىل شارۋاشىلىعى سايماندارىن جاساۋ، ءوندىرۋ، ساتۋ مەن ساياحاتتىق سەزىنۋ ءبىر تۇلعالاندىرىلعان جاڭا نىسان. قاشقار بايىرعى قالاسى كورىنىس ءوڭىرى ساياحات كاسىپ كۇيىن ۇزدىكسىز بايىتۋ ارقىلى اناعۇرلىم كوپ ادامنىڭ ساياحات كاسىبىمەن شۇعىلدانۋىنا مۇمكىندىك جاسادى. 1 - ايدان 9 - ايعا دەيىن، قاشقار بايىرعى قالاسى كورىنىس ءوڭىرى 9 ميلليون 708 مىڭ 700 ادام - رەت ساياحاتشى قابىلداپ، سايكەس مەزگىلدەگىدەن ％290.66 ارتتى.

قاشقار بايىرعى قالاسى كورىنىس وڭىرىنەن سىرت، بيىل 1 - ايدان 6 - ايعا دەيىن، كوكتوعاي، نارات سياقتى شينجياڭنىڭ كوپتەگەن كورىنىس وڭىرلەرىنىڭ ساياحاتشى قابىلداۋ مولشەرى دە زور كولەمدە ارتتى، ونىڭ ۇستىنە شينجياڭ سىرتىنان كەلگەن ساياحاتشىلاردىڭ سالىستىرماسى جوعارىلاعان، مۇنىڭ ىشىندە قاناس كورىنىس وڭىرىنە شينجياڭ سىرتىنان كەلگەن ساياحاتشىلاردىڭ سالىستىرماسى ％93كە جەتسە، قاشقار بايىرعى قالاسى كورىنىس وڭىرىنە شينجياڭ سىرتىنان كەلگەن ساياحاتشىلاردىڭ سالىستىرماسى ％70تەن استى.

بيىل جىل باسىنان بەرى بۇكىل رايوندا ۇكىمەتتىك قارجى قوسىلعان مادەنيەت جانە ساياحات نەگىزدىك قۇرىلعىلار قۇرىلىسىندا جالعاپ سالىنعان، تىڭنان سالىنعان نىسانداردىڭ جالپى سانى 127، نىسانعا جالپى قوسىلعان قارجى مولشەرمەن 9 ميلليارد 702 ميلليون يۋان بولىپ، ”ءتورتتى جاقسارتۋدى“ تياناقتاندىرىپ، ”ءتورت رازى بولۋدى“ ورىنداپ، ساياحات كاسىبى سالاسىنىڭ قىزمەت وتەۋ ساپاسىن جوعارىلاتىپ، ساياحاتشىلاردىڭ رازىلىق دارەجەسىن جوعارىلاتتى. كەلەر جىلى رايونىمىز ساياحات ورتاسىن كۇش سالا جاقسارتىپ، ساياحات نەگىزدىك قۇرىلعىلار قۇرىلىسىنىڭ دەڭگەيىن جانە مادەني مازمۇنىن جوعارىلاتىپ، سارا كورىنىس ءوڭىرى جۇيەسىن قالىپتاستىرىپ، ءبىر توپ جىبەك جولى بايىرعى جولدارىن قالىپتاستىرىپ، شارلاۋ ساياحاتى، زەرتتەۋ، ۇيرەنۋ ساياحاتى سياقتى جاڭا ساياحات جەلىلەرى مەن ونىمدەرىن اشىپ، شينجياڭنىڭ مادەنيەت - ساياحات كاسىبى سالاسىنىڭ جوعارى ساپالى دامۋىن ونان ارى جاسامپازدىقپەن ىلگەرىلەتەدى.