بەيجيڭ قىسقى وليمپيادا سپورت جارىسىنىڭ اشىلۋ سالتىندا

ىلەنىڭ ٴتورت كوركەم كورىنىسى «24 امال بويىنشا ۋاقىتتى شەگەرىپ ساناۋدا» قاتاردان كورىندى

كۇنەس اۋدانى تۇرگەن ورىك گۇلى سايى (ماتەريال سۋرەت) 

ٴتىلشىمىز ليۋ چۇنشيڭ حابارلايدى. ىلە قانشالىق كوركەم؟ بەيجيڭ قىسقى وليمپيادا سپورت جارىسىنىڭ اشىلۋ سالتىنداعى «24 امال بويىنشا ۋاقىتتى شەگەرىپ ساناۋدان» كورىپ - اق بىلۋگە بولادى. دەن قويعان توراپتاستار ىلە  اڭعارىنداعى 4 كوركەم كورىنىستىڭ قاتاردان ورىن الىپ، جالپى جۇرت كوز تىككەن وسى ساتتە بۇكىل جەر شارىنداعى كورەرمەندەردى تاڭعالدىرعانىن بايقاعان. 

 2 - ايدىڭ 4 - كۇنى كەشتە بەيجيڭ قىسقى وليمپيادا سپورت جارىسىنىڭ اشىلۋ سالتىندا «24 امال بويىنشا ۋاقىتتى شەگەرىپ ساناۋ» - قويۋ جۇڭگو ستيلىن ايگىلەپ، ٴتورت ماۋسىمنىڭ الماسۋىنداعى كوركەم تاۋ - سۋ كورىنىسى جاڭا ٴارى رومانتيكالى بولىپ، كورەرمەندەردى كوز ايىم ەتكەن، توراپتاستار «وتە كوركەم، ەرەكشە جۇڭگولىق دارالىققا يە !» دەپ القادى، مۇنىڭ ىشىندە 9 ورىندا شينجياڭنىڭ كوركەم كورىنىسى بار، ولار مىنالار: ۇركەردىڭ جەرگە ٴتۇسۋى - كۇنەس اۋدانى تۇرگەن ورىك گۇلى سايى؛ ساراتان زاۋزا - حىجيڭ اۋدانى بايىنبۇلاق كورىنىس رايونىنداعى توعىز يرەك، ون سەگىز ٴمۇيىس؛ وراق كەزى - موڭعۇلكۇرە اۋدانىنىڭ ٴبيداي اتىزىنداعى كەمپىرقوساق؛ ىستىق قايتۋ - موڭعۇلكۇرە اۋدانىنىڭ كۇزگى ٴبيداي اتىزى؛ كۇزگى تەڭەلۋ - بۋىرشىن اۋدانىنداعى ٴتۇستى قايراڭ؛ ىزعار شىق - موڭعۇلكۇرە اۋدانىنىڭ شۇرات باقشاسى؛ قىس باسى - قاناس كورىنىس رايونى قوم قىستاعىنىڭ قىسقى كورىنىسى؛ قىسقى توقىراۋ - شينجياڭ جۇڭعار ويپاتى قارامايلى قورعاۋ رايونى؛ سارى اياز - سايرام كولىندەگى مۇز سەڭى سياقتىلار. 

ۇعىسۋعا قاراعاندا، وسى 9 كوركەم كورىنىستىڭ 6 كورىنىسىن شينجياڭ ياسى مادەنيەتتى دامىتۋ شەكتى سەرىكتەستىگى تۇسىرگەن، قالعان 3 كورىنىستى ىلە ازاماتى ۋ حۇڭكۇن ٴتۇسىرىپتى. «مەن  تۇسىرگەن 3 كورىنىس قىسقى وليمپيادا سپورت جارىسىنىڭ اشىلۋ سالتىنا ىستەتىلدى، ەرەكشە تەبىرەندىم»، 2 ـ ايدىڭ 4 ـ كۇنى كەشتە ۋ حۇڭكۇننىڭ ٴۇنحاتتاعى دوستار شەڭبەرىنە  قالدىرعان ٴسوزى، توراپتاستاردىڭ القاۋىنا بولەنىپتى.

ۋ حۇڭكۇننىڭ  بۇل ٴۇش كورىنىسى جەكە - جەكە : سارى اياز - سايرام كولىندەگى مۇز سەڭى؛ ىستىق قايتۋ - موڭعۇلكۇرە اۋدانىنداعى كۇزگى ٴبيداي اتىزى؛ ساراتان زاۋزا - حىجيڭ اۋدانى بايىنبۇلاق كورىنىس رايونى توعىز يرەك، ون سەگىز ٴمۇيىس. «بىلتىر 11 ـ، 12 ـ ايلاردا شينجياڭ ياسى مادەنيەتتى دامىتۋ شەكتى سەرىكتەستىگىنىڭ فوتوگرابى جاڭ جىنيۋان (ينتەرنەتتەگى اتى: ۋان شىشى) ماعان بەيجيڭ قىسقى وليمپيادا سپورت جارىسىن ۇيىمداستىرۋ كوميتەتىنىڭ ٴبىز تۇسىرگەن شينجياڭنىڭ كوركەم كورىنىستەرىن تاڭداپ ىستەتەتىندىگىن، مەنىڭ ماتەريال دايىنداۋىمدى ايتتى. سول كەزدە مەن 100 دەن استام ماتەريالمەن قامدادىم، 5 ماتەريال سارالانىپ، سوڭىندا 3 كورىنىس تاڭداپ ىستەتىلدى»، دەدى ۋ حۇڭكۇن تىلشىگە، بۇل كورىنىستەردى ول 2017 ـ، 2018 ـ جىلدارى تۇسىرگەن ەكەن. «اشىلۋ سالتىندا مەن تۇسىرگەن كورىنىستەر بەرىلگەندە توتەنشە اسەرلەندىم،  كورىكتى شينجياڭدى ۇگىتتەۋ − باس تارتپايتىن بورشىمىز» دەدى ول. 

 1992 - جىلى تۋىلعان ۋ حۇڭكۇن بيڭتۋان 4 - ديۆيزياسى 61 - تۋانىنىڭ ادامى، ول قولى بوساي قالعاندا، ۇنەمى ىلەنىڭ، شينجياڭنىڭ كوركەم كورىنىسىن ٴتۇسىرىپ، دوۋيىن سياقتى تەكشەلەرگە قىسقا كەسكىن جۇكتەپ وتىرادى ەكەن، تۋىندىلارىنىڭ تالعامى وزگەشە، كورىنىسى كوركەم بولعاندىقتان، قىرۋار كورەرمەندەردى باۋراعان، تەك دوۋيىندەگى جانكۇيەرلەرىنىڭ ٴوزى 305 مىڭ ادامعا جەتكەن. ونىڭ 2018 ـ جىلى 8 ـ ايدا جاريالاعان  ٴبىر بەينە جازباسىنا ٴبىر ميلليون 866 مىڭ ادام ماداق ايتىپتى. 2018 ـ جىلى 1 ـ ايدا ول تۇسىرگەن سايرام كولىنىڭ «مۇز كوزى» اتتى سۋرەت توراپتا قىزۋ تۇيىنگە اينالىپ، اۋەلى، ورتالىق تەلەۆيزيا «نازار اۋدارىپ»، ارناۋلى كەسكىنگە الۋ گرۋپپاسىن كورىنىس الۋعا جىبەرگەن ەكەن. 

ىلە اڭعارىنان تاڭدالعان 4 كوركەم كورىنىستىڭ ىشىندە موڭعۇلكۇرە اۋدانى جەكە دارا 3 ورىندى يەلەگەن. «بەيجيڭ قىسقى وليمپيادا سپورت جارىسىنىڭ اشىلۋ سالتىندا، موڭعۇلكۇرەدەگى 3 ورىننىڭ كوركەم كورىنىسى  <24 امال بويىنشا ۋاقىتتى  شەگەرىپ ساناۋدا> كورسەتىلگەن. اسەرلەندىك، قۋاندىق، ماقتانىش ەتتىك، مۇنداي ٴساتتى ەسكە ساقتاۋعا تاتيدى» دەدى 2 ـ ايدىڭ 4 ـ كۇنى موڭعۇلكۇرە اۋداندىق پارتكوم ۇگىت ٴبولىمىنىڭ ۇنەمىلىك ىستەرگە جاۋاپتى ورىنباسار باستىعى لي ۋىن ـ ۋ ٴۇنحاتتاعى دوستار شەڭبەرىندە.

«ٴبىز وزگەشە ساياحات بايلىعى ابزالدىعىنا سۇيەنىپ، ساياحات كاسىبىنىڭ جەدەل دامۋىن ۇزدىكسىز ىلگەرىلەتىپ، كومەسكى كۇشتەردى اشىپ، جول قاراستىرىپ، جاڭالىق اشۋعا شەبەر بولىپ، ساياحات بايلىعىن كاسىپ ابزالدىعىنا، كوركەم كورىنىستى وندىرگىش كۇشكە اينالدىرىپ، ساياحاتتىڭ جالپىلىق باۋراۋ قۋاتىن ۇزدىكسىز جوعارىلاتامىز» دەدى لي ۋىن - ۋ ٴتىلشىنىڭ تەلەفونداعى سۇحپاتىن قابىلداعاندا.