汉文 ىلە اقپارات تورابىنا حوش كەلدىڭىزدەر!
چيڭميڭ قىسقا دەمالىسىندا جاقىن ماڭدا گۇل تاماشالاۋ ساياحاتى جانداندى
2022-04-08 11:23:48     كورىلىم:رەت كەلۋ قاينارى:ىلە گازەتى  جاۋاپتى رەداكتور:جازيرا بولاتباي قىزى

ٴتىلشىمىز لۋ جۇڭ حابارلايدى. كورىكتى 4 - اي − كوكتەمگى سەيىل - سەرۋەننىڭ ەڭ تاماشا مەزگىلى. چيڭميڭ قىسقا دەمالىسى كەزىندە ىلە وزەنى اڭعارىندا اۋا رايى وتە تاماشا بولعاندىقتان، كوپتەگەن قالا تۇرعىندارى كوكتەمگى سەيىلگە شىعىپ، گۇلدەن ٴلاززاتتانىپ، جەمىس تەرىپ دەمالدى.

4 - ايدىڭ 5 - كۇنى ات ارباعا وتىرىپ قۇلجا التىشۋار كورىنىس رايونىن سەرۋەندەگەن جياڭ ۋىنشيۋ  كوركەم كورىنىستى تاماشالاۋمەن بىرگە فوتو اپپاراتىمەن كورىكتى كوكتەم كورىنىسىنەن ەستەلىك قالدىردى.

بۇل قۇلجا قالاسىندا تۇراتىن جياڭ ۋىنشيۋدىڭ التىشۋار كوشەسىنە تۇڭعىش كەلۋى ەمەس ەدى، الايدا ول ٴار رەت كەلگەن سايىن جاڭا سەزىمگە بولەنەدى. «التىشۋار كوشەسىنىڭ مادەني جاسامپازدىق تۇرىندەگى ونىمدەرى بارعان سايىن كوبەيىپتى، قول بارابان شالۋ، جەكە ٴان ايتۋ سياقتى كوشە بويىندا ونەر كورسەتۋ قيمىلدارىنىڭ مازمۇنى دا بارعان سايىن كوبەيىپتى، كوشە بويىنداعى باي مازمۇندى ويىن نومىرلەرى دە مولايىپتى، مۇندا كەلگەن سايىن ۇقساماعان سەزىمگە بولەنەمىن» - دەيدى جياڭ ۋىنشيۋ.

چيڭميڭ قىسقا دەمالىسى كەزىندە، تەكەس اۋدانى جىبەك جاعا داڭعىلى كورىنىس رايونىنان ساياحاتشىلاردىڭ اياعى ۇزىلمەدى. قۇلجا قالاسىنان كەلگەن ساياحاتشى لي حانمەي وتباسىنداعىلارمەن بىرگە دەمالىس ورايىنان پايدالانىپ جىبەك جاعا داڭعىلىنا ات باسىن بۇرعان. ول بىلاي دەدى: «تەكەس اۋدانىنىڭ جىبەك جاعا داڭعىلى ەرەكشە تاماشا دەپ بۇرىننان ەستيتىنمىن، بۇگىن بۇل اراداعى ٴاربىر كوشەنىڭ ۇقساماعان ەرەكشەلىككە يە ەكەنىن كوردىم، ٴتىپتى، قايتقىڭ كەلمەيدى ەكەن».

چيڭميڭدا كوككە شىعۋ، گۇل كورۋ قالاي كەم بولسىن. ىلە وبلىستىق مادەنيەت جانە ساياحات مەكەمەسىنەن ۇعىسۋىمىزشا، چيڭميڭ قىسقا دەمالىسىندا جاقىن ماڭدا گۇل تاماشالاۋ ساياحاتى جانداندى.

ساياحاتشىلاردىڭ تاماشالاۋ قاجەتىن ٴتىپتى دە ويداعىداي قاناعاتتاندىرۋ ٴۇشىن، 3 - ايدىڭ سوڭىندا وبلىستىق مادەنيەت جانە ساياحات مەكەمەسى مەن ىلە اۋا رايىنان قىزمەت ەتۋ ورتالىعى ساياحاتشىلاردىڭ گۇلدەن ۋاعىندا ٴلاززاتتانۋى ٴۇشىن 2022 - جىلعى ىلە اڭعارىنداعى ورىك گۇلى اشىلاتىن مەزگىلدى الدىن الا حابارلاعان بولاتىن.

4 - ايدىڭ 2 - كۇنى كۇنەس اۋدانى نارات ورىك گۇلى سايى اشىلعاننان بەرى جەر - جەردەن كەلگەن ساياحاتشىلاردى باۋرادى، ساياحاتشىلار كورىنىس تاماشالاپ، ٴدامدى تاعامداردان عۇزىرلانىپ، ويىن تۇرلەرىنەن ٴلاززاتتاندى.

جاقىنعى جىلداردان بەرى قۇلپىرعان گۇلىمەن توراپتا ايگىلى بولعان قۇلجا قالاسىنداعى حايتاڭ جولى شەشەكتەي اشىلعان اقشا بۇلتتاي اسەم گۇلمەن قۇلپىرىپ، چيڭميڭ قىسقا دەمالىسى مەزگىلىندە كوپتەگەن ادامدى وزىنە باۋرادى. 4 - ايدىڭ 4 - كۇنى قالا تۇرعىنى دۇڭ ليجيە دوسىمەن بىرلىكتە حايتاڭ جولىنا كەلىپ ورىك گۇلىن فوتوعا ٴتۇسىردى. ول بىلاي دەدى: «وسى بىرنەشە كۇن ورىك گۇلىنىڭ ەڭ تاماشا اشىلاتىن مەزگىلى، وسىنداي تاماشا كوكتەم كورىنىسىنەن نەگە ەستەلىك قالدىرماسقا!»

ٴتىلشىنىڭ وبلىستىق مادەنيەت جانە ساياحات مەكەمەسىنەن ۇعىسۋىنشا، چيڭميڭ قىسقا دەمالىسى كەزىندە 3 - جاقتىڭ ساندى مالىمەت مەجە ەسەبىنە قاراعاندا، وبلىسقا توتە قاراستى ورىندار ەل ىشىنەن 452 مىڭ 600 (ادام - رەت) ساياحاتشى قابىلداپ، 218 ميلليون يۋان ساياحات كىرىسىن كىرگىزگەن. A دارەجەلى كورىنىس رايوندارى ساياحاتشىلاردىڭ باستى تالعامىنا اينالعاندىقتان، چيڭميڭ قىسقا دەمالىسى مەزگىلىندە وبلىسقا توتە قاراستى ورىندارداعى A دارەجەلى كورىنىس رايوندارى جالپى 116 مىڭ 800 (ادام - رەت) ساياحاتشى قابىلداعان، بۇل ۇقساس مەزگىلدەگىدەن %58.74 ارتقان، ناقتى ساياحات كىرىسى 19 ميلليون 79 مىڭ 400 يۋان بولعان، بۇل ۇقساس مەزگىلدەگىدەن %8.11 ارتقان.