دۋان - ۋ دەمالىسى كەزىندە

تۇتاس شينجياڭدا قابىلدانعان ساياحاتشى ”1 - مامىرمەن“ سالىستىرعاندا %20كە جۋىق ورلەدى

ساياحات كىرىسى %30كە جۋىق ورلەدى

انار بۇلت \ شينجياڭ گازەتىنىڭ ءتىلشىسى ياۋ گاڭ 6 - ايدىڭ 5 - كۇنى ۇرىمجىدەن حابارلايدى. اۆتونوميالى رايوندىق مادەنيەت جانە ساياحات مەڭگەرمەسىنەن ۇعىسۋعا قاراعاندا، دۋان - ۋ دەمالىسى كەزىندە تۇتاس رايون 3 ميلليون 239 مىڭ 800 ادام - رەت ساياحاتشى قابىلداپ، ”1 - مامىر“ دەمالىسى كەزىمەن سالىستىرعاندا ％18.51 ورلەگەن؛ ساياحات كىرىسى ءبىر ميلليارد 816 ميلليون يۋان بولىپ، ”1 - مامىر“ دەمالىسى كەزىمەن سالىستىرعاندا ％28.48 ورلەگەن. ءوز اۆتوكولىگىمەن ساياحاتتاۋ، تاياۋ ماڭدا ساياحاتتاۋ، شاعىن دەمالىس نەگىزگى كۇشكە اينالىپ، تۇتاس شينجياڭنىڭ جەر - جەرى الۋان ءتۇرلى قيمىل ارقىلى دۋان - ۋدى وتكىزىپ، ساياحاتشىلار جاسىل تاۋ، تۇنىق سۋدان ءلاززات الىپ، وتباسى - وتان سۇيىسپەنشىلىگىن جالعاستىردى.

مادەنيەتتىك ساياحات دۋمانداپ، سالت - سانا نەگىزگى تاقىرىبى قوشامەتتەۋگە يە بولدى. تۇتاس شينجياڭنىڭ جەر - جەرى ”ساياحات + مادەنيەت“، ”ساياحات + دەنە تاربيە“ سياقتى باي مازمۇندى قيمىلدار وتكىزىپ، جۇڭحۋانىڭ تاڭداۋلى ءداستۇرلى مادەنيەتىن جالعاستىرۋ دۋان - ۋ دەمالىسى كەزىندەگى ساياحات بازارىنىڭ ماڭىزدى ەرەكشەلىگىنە اينالىپ، كوپ جەر ايداعارشا قايىق، حانفۋ كيىپ باقشادا سەيىلدەۋ جانە قياق كۇرىش ءتۇيۋ، حوش ءيىس دورباسىن جاساۋ سياقتى سەزىنۋ تۇرىندەگى قيمىلداردى جولعا قويدى. كەريا اۋدانى ”قياق كۇرىشتىڭ ءدامىن تاتىپ، دۋان - ۋدى اڭگىمەلەپ، ايداعارشا قايىق جارىستىرىپ، مادەنيەتتى جالعاستىرۋ“ جەلىلەس مادەنيەت قيمىلىن وتكىزدى؛ يىڭسار اۋدانى ”دۋان - ۋدى شات - شادىمان وتكىزىپ، يىڭساردى ’جان - جاقتىلى‘ تاماشالاۋدى“ نەگىزگى تاقىرىپ ەتىپ، جاس وسپىرىمدەر مەن بالالاردى ۇيىمداستىرىپ، سۋ شاشۋ شاتتىعى، سۋدا ارقان تارتۋ سياقتى بالا اۋەسى مادەنيەت قيمىلىن ورىستەتتى؛ اۋات اۋدانى ”داۋلاڭ جاقسى قياق كۇرىشىن“ باعالاۋ، ”قۇرعاق جەردەگى تاقتاي ايداعارشا قايىق“ جارىسى، سالت - سانا كوركەمونەر ويىندارىن قويۋ جەلىلەس قيمىلىن ورىستەتتى؛ باعراش اۋدانى 15 - كەزەكتى كولدى اشىق ۇستاۋ جەلىلەس مادەنيەت قيمىلىن وتكىزدى؛ قارامايلى قالاسى ورقى رايونى اسپاندا ۇشۋ ونەرىن كورسەتۋ، ۇلكەن الاۋ كەشى سياقتى جەلىلەس مادەنيەت - ساياحات قيمىلىن وتكىزدى.

ءوز اۆتوكولىگىمەن ساياحاتتاۋ ءتۇرى قىزۋ القاۋعا بولەندى. قاناس كورىنىس رايونىنىڭ ءوز اۆتوكولىگىمەن ساياحاتتاۋ قيمىلى كوپتەگەن ساياحاتشىلاردى ات سالىسۋعا باۋرادى، تۇرپان قالاسى گاۋچاڭ رايونى، ءپىشان اۋدانى، توقسۇن اۋدانى جىبەك جولى بايىرعى جولىندا ءوز اۆتوكولىگىمەن ساياحاتتاۋ قيمىلىن جولعا قويدى.

دۋان - ۋ دەمالىسى كەزىندە تۇتاس شينجياڭنىڭ جەر - جەرى 52 ءتۇرلى ساياحات ارقىلى حالىققا تيىمدىلىك جەتكىزۋ ساياساتىن جولعا قويىپ، نەگىزىنەن كورىنىس رايوندارىنىڭ ەسىك بەلەتىن ارزانداتۋ، كەشىرىم ەتۋ، كاسىپورىندار شابىتتاندىرۋ، بازار سيلىق بەرۋ، قارتتارعا كومەكتەسۋ، بالالاردى ايالاۋ، مۇگەدەكتەرگە كومەكتەسۋ، اسكەردى جاقتاۋ سياقتىلارعا ساياتىن 5 ۇلكەن تۇردە ساياحات تۇتىنۋىن جان - جاقتى جەبەدى.