شينجياڭ گازەتىنىڭ حابارى. (ٴتىلشى ياۋ گاڭ). 6 - ايدىڭ 27 - كۇنى شينجياڭ ساياحاتىن جوعارى ساپالى دامىتۋ تالقى مىنبەرى قۇلجا قالاسىندا وتكىزىلدى، ەلىمىزگە ايگىلى 5 مامان - وقىمىستى شينجياڭنىڭ مادەنيەت جانە ساياحات كاسىبىنىڭ قازىرگى دامۋ جاعدايىمەن ۇشتاستىرا وتىرىپ، شينجياڭ ساياحاتىن دامىتۋدىڭ جاڭا ارناسى، جاڭا جاعدايىنداعى مادەنيەت - ساياحاتتىڭ دامۋى، دەنساۋلىقتى كۇتىمدەۋ ساياحاتى، قار - مۇز ساياحاتى، ٴجۇزىم شارابى كاسىبىن دامىتۋ سياقتى نەگىزگى تاقىرىپتاردى توڭىرەكتەي وتىرىپ، ىشكەرىلەي تالداۋ جاسادى.

جۇڭگو حالىق داشۋەسى تاپقىرلىق سالاسى تەحنيكاسىن زەرتتەۋ اكادەمياسىنىڭ ورىنباسار باستىعى سۇڭ ياڭياڭ مىنانى ٴبىلدىردى: شينجياڭنىڭ ساياحات بايلىق قاينارى مول، تابيعات كورىنىسى ەرەكشە كوركەم ٴارى الۋان ٴتۇرلى تاريحقا، ۇلتتىق سالت - ساناعا يە مادەنيەتى بار، شينجياڭ مادەنيەت جانە ساياحاتتى ىشكەرىلەي توعىستىرۋدىڭ، بىرگە دامىتۋدىڭ تىڭ ورايىن قارسى الىپ وتىر. حۋاچياۋچىڭ توبى ساياحاتتى زەرتتەۋ اكادەمياسىنىڭ باستىعى، ساياحات باسقارۋ ورتالىعىنىڭ باس ديرەكتورى جاڭ شۋمين مادەنيەت - ساياحات كاسىبىنىڭ ٴمانى جانە قاعيداسى جونىندەگى سونداي - اق جاڭا جاعدايداعى مادەنيەت - ساياحات كاسىبىن دامىتۋ بەتالىسى جونىندەگى پىكىرىن ورتاعا سالدى.

جۇڭگو قوعامدىق عىلىمدار اكادەمياسى جاعراپيا عىلىمى جانە بايلىق قاينارىن زەرتتەۋ ورنى جۇڭگو قار - مۇز كاسىبىن زەرتتەۋ ورتالىعىنىڭ مەڭگەرۋشىسى لي يۇي الەمدىك قار - مۇز بازارىنىڭ ەرەكشەلىگى جانە اۋقىمى، ەلىمىز ٴىشى - سىرتىنداعى قاردان سىرعاناۋ كاسىبىنىڭ دامۋى سياقتى جاقتاردان، قار - مۇز ساياحاتىنىڭ دامۋ بولاشاعىن ەگجەي - تەگجەيلى باياندادى. بەيجيڭ جۇڭگوشا دارىگەرلىك، ٴدارى - دارمەك داشۋەسى باسقارۋ شۋەيۋانىنىڭ پروفەسسورى، مەملەكەتتىك جۇڭگوشا دارىگەرلىك، ٴدارى - دارمەكتى دامىتۋ جانە ستراتەگيالىق زەرتتەۋ اكادەمياسى اقاۋسىزدىق كاسىبىن زەرتتەۋ ورتالىعىنىڭ مەڭگەرۋشىسى حوۋ شىڭتيان شينجياڭنىڭ دەنساۋلىق كۇتىمدەۋ ساياحاتىن جوعارى ساپالى دامىتۋدان جاڭالىق اشۋدىڭ جولى جونىندەگى كەڭەسىن العا قويدى. بەيجيڭ اۋىل شارۋاشىلىعى شۋەيۋانى ازىق - تۇلىك عىلىمى جانە ينجەنەريا شۋەيۋانى اراق اشىتۋ ينجەنەرياسى فاكۋلتەتىنىڭ مەڭگەرۋشىسى لي دىمەي حالىقارالىق ٴجۇزىم شارابى ساياحاتى جونىندەگى تابىستى مىسالداردى تىلگە تيەك ەتە وتىرىپ تالقى جۇرگىزدى ٴارى شينجياڭدا ۇيلەسىمدى دامىتۋ جونىندەگى ۇسىنىسىن العا قويدى.

اۆتونوميالى رايوندىق مادەنيەت جانە ساياحات مەڭگەرمەسىنىڭ قاتىستى جاۋاپتىسى مىنانى ٴبىلدىردى: شينجياڭ ساياحاتىنىڭ دامۋ ورەسى مول بايلىق قاينارى باسىمدىعىمەن ٴالى دە سايكەس كەلمەيدى، ساياحات كاسىبى دامىعان ولكەلەرمەن سالىستىرعاندا دا پارىق ٴالى دە ٴبىرشاما زور، كوپ پاراساتىن ساۋلەلەندىرىپ، قيىن ماسەلەلەردى شەشىپ، ولقىلىقتاردى تولىقتاپ، السىزدىكتەردى كۇشەيتىپ، شينجياڭ ساياحات كاسىبىنىڭ جوعارى ساپالى دامۋىن ىلگەرىلەتۋ قاجەت بولىپ وتىر. بۇل رەتكى تالقى مىنبەرىنىڭ وتكىزىلۋى شينجياڭنىڭ ساياحات كاسىبىن دامىتۋعا ۇيرەنۋ، پىكىر اۋىستىرۋ، وي - سانانى كەڭەيتۋ تۇعىرىن ازىرلەپ بەردى. 

«وسى رەتكى تالقى مىنبەرى رايونىمىزدىڭ مادەنيەت جانە ساياحات كاسىبىن دامىتۋعا تىڭ تانىم، تىڭ وي جەلىسىن ازىرلەپ بەردى، ٴبىزدىڭ رەفورما، دامۋ وي جەلىسىن اناعۇرلىم كەڭەيتۋىمىزگە، ساياحات كاسىبىن جوعارى ساپالى دامىتۋ قوزعاۋشى كۇشىن ارتتىرۋىمىزعا ٴتيىمدى بولدى» دەدى ٴۇرىمجى قالالىق مادەنيەت جانە ساياحات مەكەمەسىنىڭ (قالالىق مادەني مۇرا مەكەمەسى) باستىعى جۋ شينرۇڭ.