汉文 ىلە اقپارات تورابىنا حوش كەلدىڭىزدەر!
قۇربان ايت مەرەكەسى كەزىندە موڭعۇلكۇرەدەگى ٴار قايسى كورىنىس رايوندارى مەن كورىنىس تۇيىندەرىندە ساياحاتشىلار قاۋىرت كوبەيدى
2022-07-15 11:16:05     كورىلىم:رەت كەلۋ قاينارى:ىلە گازەتى  جاۋاپتى رەداكتور:جازيرا بولاتباي قىزى

ٴتىلشىمىز لي يافىڭ، ەرىكتى تىلشىلەر ۋاڭ دۇڭشۇي، ارداق حابارلايدى. جازدىڭ شىجىعان ىستىعى ادامداردى بەيمازا قىلدى. 7 - ايدىڭ 11 - كۇنى ٴتىلشىنىڭ موڭعۇلكۇرە اۋدانىنان ۇعىسۋىنشا، جاقىنعى كۇندەردەن بەرى موڭعۇلكۇرە اۋدانىنىڭ ٴار قايسى كورىنىس رايوندارى مەن كورىنىس تۇيىندەرىندە ساياحاتشىلاردىڭ سانى قاۋىرت كوبەيىپ، ساياحاتشىلار قۇربان ايت مەرەكەسىنىڭ شاعىن دەمالىسىنان پايدالانىپ وسى اراداعى كورىنىس تۇيىندەرىنە كەلىپ سالقىن اۋامەن تىنىستاپ، ايبىندى تابيعات كورىنىسىن تاماشالاعان.

ٴار جىلدىڭ 7 - ايى − موڭعۇلكۇرە اۋدانىندا قىشى گۇلىنىڭ جايقالا گۇل اشاتىن مەزگىلى. اۋدان اياسىنا كىرگەننەن كەيىن تاس جولدىڭ ەكى جاعاسىنىڭ كەز كەلگەن جەرىنەن قىشى گۇلىن كەزدەستىرە الاسىز، التىن رەڭدى قىشى گۇلىنە تولعان گۇلدى الاپ بەينە التىنمەن اپتالعان كىلەمدەي، قيىرداعى اسەم تيانشان تاۋىمەن تۇتاسىپ، كورگەن ٴتۇستەي اسەم كورىنىس قالىپتاستىرىپ، ساياحاتشىلاردى ايىرىقشا ٴتانتى ەتتى.

قىشى گۇلى اتىزىندا حۋبەيدىڭ ۋحانىنان كەلگەن ساياحاتشى يۋان گوشىڭ وتباسىنداعىلارمەن بىرگە سۋرەتكە ٴتۇسىپ ەستەلىك قالدىردى. «اسەم تابيعات كورىنىسىنەن ٴلاززاتتانۋمەن بىرگە، سالقىن دا جانعا جايلى كليمات ەرەكشەلىگىن سەزىنىپ، تازا اۋامەن تىنىستاپ راحاتتانىپ قالدىق» دەدى يۋان گوشىڭ ٴسۇيىنىشىن ٴبىلدىرىپ. «ەكىنشى رەت ساياحاتتاي كەلسەم دە بۇل ارانىڭ اسەم تابيعاتى مەنى بۇرىنعىسىنداي راحات سەزىمگە بولەدى» دەدى ول.

موڭعۇلكۇرەنىڭ سالقىن كيلماتى مەن كۇن نۇرى تولىق تۇسەتىن ەرەكشەلىگى قىشى داقىلىنىڭ ٴوسىپ - ونۋىنە باپ كەلەدى. موڭعۇلكۇرە اۋدانى اۋارايى مەكەمەسىنىڭ باستىعى ۋاڭ يۋان بىلاي دەدى:«موڭعۇلكۇرەنىڭ قىشى گۇلى مەملەكەت بويىنشا گۇل اشاتىن ۋاقىتى ەڭ جاي، گۇل اشۋ مەزگىلى ەڭ ۇزاق، قازىر قىشىنىڭ ٴدال قۇلپىرا گۇل اشقان مەزگىلى.  قىشى داقىلىن ەرتە ەككەن ىشىنارا رايونداردىڭ قىشىسى جەتىلۋ مەزگىلىنە ٴوتتى. جەر - جەردەگى ساياحاتشىلاردىڭ <جۇڭگو قىشى مەكەنىنىڭ> تارتىمدى كورىنىسىن سەزىنىپ، اسەم گۇل تەڭىزىن تاماشالاۋى ٴۇشىن جاقىنعى كۇندەردەن بەرى قىشى گۇلىنىڭ اشىلۋ ۋاقىتى جونىندە كوپ رەت الدىن - الا مالىمەت بەردىك».

«مالىمەتكە نەگىزدەلگەندە، 2022 - جىلى موڭعۇلكۇرەدەگى قىشى گۇلىنىڭ اشىلۋ مەزگىلى بۇرىنعى جىلداردان ٴسال كەشىرەك بولعان، كولەمى ەڭ ۇلكەن كوكتەمگى قىشى ەگىمشىلىك رايونىندا قىشىنىڭ گۇل اشۋ مەزگىلى 7 - ايدىڭ 10 - كۇنىنەن 20 - كۇنىنە دەيىن، قۇلپىرا گۇل اشۋ مەزگىلى 7 - ايدىڭ 21 - كۇنىنەن 29 - كۇنىنە دەيىن جالعاسادى» دەدى ۋاڭ يۋان.

ميلليون مۋلىق قىشى گۇلىن تاماشالاۋدان تىس، موڭعۇلكۇرەنىڭ  شاتى كورىنىس رايونىندا نۋ ورمان، اسەم گۇل تەڭىزى بەينە سىزعان سۋرەتتەي كوز تارتىپ، قادام سايىن كورىنىس قالىپتاستىرىپ، ادەمى تاۋ - وزەن كارتيناسىن قالىپتاستىرىپ، كوپتەگەن ساياحاتشىلاردى باۋرادى.

ٴتىلشى قارلى تاۋ ەتەگىندە ساياحاتشىلاردىڭ اتقا ٴمىنىپ سۋرەتكە ٴتۇسىپ ەستەلىك قالدىرعانىن، كەيبىرەۋلەرىنىڭ وزەن جاعاسىندا سايران سالعانىن، ال كەيبىرەۋلەرىنىڭ شاتىر تىگىپ اسەم تابيعات كورىنىسىن تاماشالاپ جاتقاندىعىن كوردى.

موڭعۇلكۇرە اۋدانى ساحارا ساياحاتقا قىزمەت وتەۋ سەرىكتەستىگىنىڭ جاۋاپتىسى باي تيانميڭ بىلاي دەدى: «شاتى كورىنىس رايونى − مەملەكەتتىكA 4 دارەجەلى كورىنىس رايونى، كۇنىنە قابىلدايتىن ساياحاتشى سانى 4 مىڭ ادام اينالاسىندا بولدى، ٴبىز ساياحاتشى سانىنىڭ قاۋىرت ارتۋىنا بايلانىستى ساياحات دارەتحانالارى مەن جول بويىنىڭ تازالىعىنا رەتتەۋ - وڭاۋ جۇرگىزىپ، ساياحات رايونى ىشىندەگى ساياحات كولىگى سانىن، كورىنىس رايونىنداعى ٴتۇسىندىرۋشى مەن جول باستاۋشىلاردىڭ سانىن مولايتىپ، ساياحاتشىلاردىڭ رازى بولۋ سالىستىرماسىن جوعارىلاتتىق».

ساناققا نەگىزدەلگەندە، موڭعۇلكۇرە اۋدانىندا A دارەجەلى 19 كورىنىس رايونى بار ەكەن، مۇنىڭ ىشىندە 4A دارەجەلى بەس كورىنىس رايونى بار بولىپ، شينجياڭ بويىنشا اشۋ كومەسكى قۋاتى ەڭ مىعىم ساياحات كوزەۋلى جەرىنە اينالعان.

«كەشىرىڭىز، توسەك ورنى قالمادى، بارلىعىنا الدىن - الا تاپسىرىس بەرىلىپ كەتتى». موڭعۇلكۇرە اۋدانى تۇلپار ۇيشە كولىكپەن تۇزدە تۇنەۋ اڭعارىندا 40 تان استام ۇيشە كولىك كەڭ جايلاۋدا قاز - قاتار ٴتىزىلىپ تۇر. شينجياڭ ۋىنپۋ مادەنيەت - ساياحات دامىتۋ شەكتى سەرىكتەستىگىنىڭ باس ديرەكتورى ۋ نيانجاڭ ساياحاتشىلاردىڭ كەڭەس سۇراۋ تەلەفونىن قابىلداۋمەن قاربالاس بولدى. «قىشى گۇلى اشىلعاننان بەرى موڭعۇلكۇرەگە ساياحاتتاي كەلەتىن ساياحاتشىلاردىڭ سانى دا مولايدى. قۇربان ايت مەزگىلىندە اۋارايى جاقسى بولعاندىقتان ساياحاتتاي كەلگەندەردىڭ سانى ٴتىپتى دە كوبەيدى. تۇلپار ۇيشە كولىك بازاسى 7 - ايدىڭ 9 - كۇنى جۇمىس باستاعاننان بەرى 40 ۇيشە كولىكتىڭ بوس قالعانى بولمادى» دەدى ۋ نيانجاڭ ماقتانىشپەن.

ۇعىسۋعا قاراعاندا، موڭعۇلكۇرە اۋدانىندا 91 حالىقتىق تۇسەلحانا، 52 قوناقجاي، 15 مىڭ توسەك ورنى بار بولىپ، جاقىنعى كۇندەردەن بەرى ٴارقايسى كورىنىس رايوندارى قابىلداعان ساياحاتشىلار سانىنىڭ قاۋىرت كوبەيۋىنە بايلانىستى تۇتاس اۋداندا «توسەك ورنى جەتىسپەۋ» جاعدايى جارىققا شىققان. مۇندا 7 - ايدىڭ 9 - كۇنى موڭعۇلكۇرەدەگى كورىنىس رايوندارىنىڭ قابىلداعان ساياحاتشى سانى رەت - سانى بويىنشا 11 مىڭ 700 ادامعا جەتسە، 7 - ايدىڭ 10 - كۇنى 15 مىڭ 400 ادامعا مولايعان....

موڭعۇلكۇرە اۋداندىق مادەنيەت، دەنە تاربيە، ساياحات، راديو - تەلەۆيزيا جانە ساياحات مەكەمەسىنىڭ ورىنباسار باستىعى حالينا قاپار قىزى بىلاي دەدى: «30 - كەزەكتى جۇڭگو شينجياڭ ىلە تۇلپار حالىقارالىق ساياحات مەرەكەسىنىڭ جاقىنداۋىنا ىلەسە 30 ٴتۇرلى قيمىل - شينجياڭداعى ساحارا سالتاناتىنىڭ سيگنالىن تاراتىپ، بيىل جازعى ساياحاتشى قابىلداۋدىڭ ەڭ قاۋىرت مەزگىلىن قارسى الدى. قازىرگى ساياحاتشى مولشەرىنە نەگىزدەلە وتىرىپ، ساياحاتقا قاتىستى نەگىزدىك قۇرىلعىلاردى سەپتەۋدى بەلسەنە ورىستەتىپ، ساياحاتتىڭ ساپاسى مەن ورەسىن كۇش سالا جوعارىلاتىپ، ساياحاتشىلارعا كوڭىلدى ويناپ قايتاتىن، بۇل جەردەن اتتانعاندا ساعىناتىن تاماشا ەستەمە قالدىرۋعا قۇلشىنىپ، موڭعۇلكۇرە اۋدانىنىڭ ەكونوميكاسى مەن قوعامىنىڭ جوعارى ساپالى دامۋىن ويداعىداي جەبەيمىز».