بۋىرشىن اۋدانى قوم قاناس موڭعۇل اۋىلى قوم قىستاعى

قار كورىنىسىن تاماشالادى، حالىقتىق سالت - سانانى سەزىندى، مەرەيلى مەرەكەنى تويلادى

□ انار بۇلت \ شينجياڭ گازەتىنىڭ ءتىلشىسى جاڭ تيڭ

تۇمشالامالى ۇلكەن شام ءىلىپ، ءتۇستى تورعىندارمەن الەمىشتەپ، جاڭا جىلدى قارسى الدى. 1 - ايدىڭ 21 - كۇنى كوكتەم مەرەكەسىنە قاراعان كۇنى ”قار - مۇزداعى اسەرلى كۇي، قومدا كەزدەسۋ“ اتىنداعى ەجەلگى جىل جەلىلەس قيمىلدارى بۋىرشىن اۋدانى قوم قاناس موڭعۇل اۋىلىنىڭ قوم قىستاعىندا سالتاناتپەن باستالدى، بۇكىل ەلدىڭ جەر - جەرىنەن كەلگەن ساياحاتشىلار وسى ارادا باس قوسىپ، جاڭا جىلدى تويلاپ، قار كورىنىسىن تاماشالاپ، وزگەشە حالىقتىق سالت - سانانى سەزىندى.

قوم قىستاعى التاي تاۋى باۋرايىنداعى قاناس وزەنى مەن قوم وزەنىنىڭ قۇيعانىنداعى تاۋ اراسىنداعى ويپاتقا ورنالاسقان. سول كۇنى قوم قىستاعىندا ەڭ تومەنگى اۋا تەمپەراتۋراسى نولدەن تومەن 30 سەلتسي گرادۋسقا تۇسكەنىمەن، ساياحاتشىلاردىڭ قىزعىندىلىعىنا بوگەت بولا المادى، ولار قار اتىسىپ وينادى، قارلى تاۋعا شىقتى، كەسكىن ءتۇسىردى... تىلەك ءۇنى مەن الاقايلاعان داۋىستار تولاستامادى.

”وتباسىمداعىلاردىڭ جاڭا جىلدا امان - ەسەن، باقىتتى بولۋىن تىلەيمىن ءارى ۇلى وتانىمىزدىڭ اناعۇرلىم گۇلدەنىپ - كوركەيۋىن، قۇدىرەتتەنۋىن تىلەيمىن“، - دەدى شاڭحاي قالاسىنان كەلگەن ساياحاتشى حۋ شۋەفي.

گۋاڭجوۋدان كەلگەن ساياحاتشى لي شينحاۋ قار شاشۋدىڭ شاتتىعىن سەزىنگەننەن كەيىن بىلاي دەدى: ”قومنىڭ قىسى ايتسا ايتقانداي كەرەمەت ەكەن، قار ۇشقىندارى بەتىمدى قارىپ تۇرعانىمەن جۇرەگىم وتتاي ىستىق، ەرەكشە كوڭىلدىمىن“.

الىستان كەلگەن قوناقتاردى قارسى الۋ ءۇشىن قىستاق تۇرعىندارى مەرەكەلىك كيىم كيىپ، وزگەشە حالىقتىق سالت - سانا سپورت جارىسىنىڭ شىمىلدىعىن اشتى. قارلى دالاداعى ات بايگەسى، قىز قۋار، ساداق اتۋ... ات ۇستىندەگى تارتىمدى قيمىلدار كوپتەگەن ساياحاتشىلاردى تاماشالاۋعا باۋرادى.

”قوم قىستاعىندا جاڭا جىلدى وتكىزىپ، حالىقتىق سالت - سانا مادەنيەتىنىڭ تارتىمدىلىعىن سەزىنگەنىمە قاتتى قۋاندىم. بۇل ارانىڭ كورىنىسى كوركەم، قارى ادەمى، مەن دىبالاردىڭ تارتىمدى ءان - ءبي ويىنىن تاماشالاپ، قارلى دالاداعى ات بايگەسىن كورىپ، ات شانانىڭ قىزىعىنان ءلاززات الدىم، بۇل ارانىڭ مادەني تۇرمىسى وتە باي ەكەن“! - دەدى ءۇرىمجى قالاسىنان كەلگەن ساياحاتشى لي چاۋ.

الىستان كەلگەن ساياحاتشىلارمەن بىرگە جاڭا جىلدى قۇتتىقتاۋ ءۇشىن قىستاق تۇرعىندارى بۋى بۇرقىراعان، ءيىسى مۇرىن جاراتىن قوي ەتى، دىبالاردىڭ ەجەلگى ادىسپەن ۇيىتقان ايران، ءسۇت ونىمدەرى سياقتى ءدامدى تاعامداردى دايىندادى.

قوم قىستاعى پارتيا ياچەيكاسىنىڭ شۋجيى، قىستاق تۇرعىندار كوميتەتىنىڭ مەڭگەرۋشىسى سۇكا بىلاي دەپ تانىستىردى: ”قىس ماۋسىمىندا قومعا كەلىپ قار تاماشالاۋ“ جەرگىلىكتى ورىننىڭ ەرەكشە قار - مۇز ساياحاتىنىڭ تانىسقىسىنا اينالدى. سوڭعى جىلدارى قىستاق ساياحات ارقىلى قىستاق تۇرعىندارىن بايۋعا جەتەكتەپ، ساياحاتتى ەرەكشەلىك ەتكەن قوم بايىرعى قىستاعىن بەلسەنە قۇردى. بىلتىر قىستاق تۇرعىندارىنىڭ جان باسىندىق كىرىسى 44 مىڭ يۋانعا جەتتى.

”كەلەسى قادامدا ءبىز قىسقى قار - مۇز سپورتىن قوزعالتقىش، قار - مۇز سارا جەلىسىن نەگىزگى جەلى، قار - مۇز حالىقتىق سالت - سانا كوڭىل اشۋ قيمىلىن ءتۇيىن، قار - مۇز سپورتىن جالپىلاستىرۋدى تۇتقا ەتىپ، ساياحاتتىڭ ايگىلى ماركاسىن ونان ارى تۇلعالايمىز“، - دەدى سۇكا.