انار بۇلت \ شينجياڭ گازەتىنىڭ ءتىلشىسى ءابيبا 3 - ايدىڭ 18 - كۇنى گۋاڭجوۋدان حابارلايدى. ”شينجياڭ جاقسى جەر“ مادەنيەت - ساياحات تانىستىرۋ قيمىلى جانە ميلليون گۋاڭدۇڭدىقتىڭ شينجياڭدى ساياحاتتاۋىنىڭ باستالۋ سالتى 3 - ايدىڭ 17 - كۇنى گۋاڭجوۋ قالاسىندا وتكىزىلدى، شينجياڭنىڭ جانە گۋاڭدۇڭ ولكەسىنىڭ قاتىستى مادەنيەت - ساياحات كاسىپورىندارى مەن ساياحات كووپەراتيۆتەرىنەن كەلگەن 200 نەشە ادام باستالۋ سالتىنا قاتىناستى.

مۇزدى القاپ، قارلى شىڭدار مەن ۇشى - قيىرسىز قۇبا ءتۇز بىرگە جاساسقان جاراتىلىستىق بايلىق، قوڭىراۋلى كەرۋەن ءۇنى جاڭعىرعان چى - شى بايىرعى جولى سياقتى وركەنيەت تاريحى، كورىنىسى شەكسىز كوركەم مايتاۋ − كۇشار تاس جولى سياقتى سارا ساياحات جەلىسى، لاۋلاعان ءورت پەن توگىلگەن قاننىڭ كۋاسى بولعان قىزىل ساياحات ونىمدەرى... تانىستىرۋ ءماجىلىسى الدىمەن شينجياڭنىڭ ساياحات بايلىعىنا جالپى تۇلعالىق جاقتان تانىستىرۋ جاسادى، كورىنىسى مەن تابيعاتى كەرەمەت شينجياڭ ماجىلىسكە قاتىناسۋشىلاردى قاتتى قىزىقتىردى. قاشقار ايماعى، التاي ايماعى، بۇراتالا موڭعۇل اۆتونوميالى وبلىسى، ىلە قازاق اۆتونوميالى وبلىسى، سانجى حۇيزۋ اۆتونوميالى وبلىسى، تۇرپان قالاسى دا جەكە - جەكە وزدەرىنىڭ ساپالى مادەنيەت - ساياحات بايلىقتارىن توڭىرەكتەي وتىرىپ تانىستىرۋ جاسادى.

”شينجياڭ مەنىڭ ەكىنشى مەكەنىم بولادى“. تانىستىرۋ ءماجىلىسىنىڭ الاڭىندا گۋاڭدۇڭ ولكەسى جۇڭگو جاستار ساياحات كووپەراتيۆى شەكتى سەرىكتەستىگى حالىقارالىق ءبولىمىنىڭ ديرەكتورى وۋياڭ ياڭ دوستىق شەڭبەرىنە وسىلاي دەپ جازدى. بيىل 2 - ايدا ول شينجياڭعا كەلىپ ساياحات جەلىلەرىن شولىپ قايتقان بولاتىن، ”شينجياڭ بۇگىنگى تاڭدا ساياحات سالاسىنىڭ ’ەركەسىنە‘ اينالدى، ۇزدىكسىز اشۋعا بولاتىن كوپتەگەن ساياحات جەلىلەرى بار، اسىرەسە، شينجياڭ ورتا ازيا ساياحات بازارىنىڭ ماڭىزدى اۋىسۋ ورنى رەتىندە، كوپتەگەن جوعارى دەڭگەيلى قاريدارلاردىڭ العاشقى تاڭداۋىنا اينالدى. ءبىز جەرگىلىكتى ساياحات كووپەراتيۆتەرىمەن بايلانىس جاساپ، جەر - جەردەن كەلگەن ساياحاتشىلارعا ۇيلەسەتىن ساياحات جەلىلەرىن ۇزدىكسىز اشىپ، اناعۇرلىم كوپ ادامنىڭ شينجياڭدى ۇناتىپ قالۋىنا مۇمكىندىك جاسايمىز“.

سوڭعى جىلدارى شينجياڭ مادەنيەت پەن ساياحاتتىڭ تەرەڭدەي توعىسۋىن زور كۇشپەن ىلگەرىلەتىپ، ساياحاتتىڭ مادەنيەت ءمانى ۇزدىكسىز كۇشەيىپ، مادەنيەتتى سەزىنۋ اناعۇرلىم بايىپ، قاتىستى كاسىپ سالالارى تىزبەگى بىرتىندەپ ۇزارىپ، كاسىپ سالاسىنىڭ كولەمى ۇزدىكسىز كەڭەيدى. ”شينجياڭ مەن گۋاڭدۇڭ ولكەسى جاراتىلىستىق ەكولوگيا جانە ۇلتتىق مادەنيەت جاعىندا پارىقتى، بازار سەلبەستىگىنىڭ كومەسكى كۇشى وراسان زور. وسى رەت گۋاڭجوۋ قالاسىن تانىستىرۋ ءماجىلىسىنىڭ العاشقى بەكەتى ەتۋىمىز شينجياڭنىڭ ەرەكشە سارا ساياحات جەلىسى مەن جاڭادان تۇلعالانعان مادەنيەت - ساياحات ونىمدەرىن جاقسىلاپ تانىستىرىپ، ’شينجياڭ جاقسى جەر‘ سىندى التىن ءارىپتى بەلگىنى ۇزدىكسىز جارقىراتۋ“، - دەدى اۆتونوميالى رايوندىق مادەنيەت جانە ساياحات مەڭگەرمەسى پارتيا باسشىلىق گرۋپپاسىنىڭ ورىنباسار شۋجيى، مەڭگەرمە باستىعى گۇلي ابىلەلىم.

قيمىل ورنىندا شينجياڭ مادەنيەت - ساياحات قارجى قوسۋ توبى شەكتى سەرىكتەستىگى گۋاڭدۇڭ ولكەسى جارنامەن تىزگىندەلەتىن ساياحات توبى شەكتى سەرىكتەستىگى سياقتى 3 مادەنيەت - ساياحات كاسىپورىنىمەن، ساياحات كووپەراتيۆتەرىمەن ستراتەگيالىق سەلبەستىك كەلىسىمىنە قول قويىستى.

سول كۇنى ”ميلليون گۋاڭدۇڭدىقتىڭ شينجياڭدى ساياحاتتاۋى“ قيمىلى باستالدى، ساياساتتىق بىرلەسىپ قيمىلداۋدى كۇشەيتۋ، ”يكاتۇڭ شينجياڭ ساياحات كارتچكاسىن“ جانە ساياحات قوسىمشا قاراجاتىن تاراتۋ، ساپالى مادەنيەت - ساياحات كاسىپ سالاسى نىساندارىن تانىستىرۋ سياقتى شارالار ارقىلى ەكى جەردىڭ ساپالى بايلىعىن تەرەڭ اشىپ، ساياحاتتىق تۇتىنۋ ومىرشەڭدىگىن قاۋلاتادى.

ەندىگى جەردە ”شينجياڭ جاقسى جەر“ مادەنيەت - ساياحات تانىستىرۋ قيمىلى تاعى شيامىن، حاڭجوۋ، نانجيڭ، شاڭحاي قالالارىندا وتكىزىلىپ، اناعۇرلىم كوپ ادامنىڭ شينجياڭنىڭ تارتىمدىلىعىن سەزىنۋىنە مۇمكىندىك جاسايدى.