كۇرىشتى دانەكەر ەتىپ، مەرەكەدە دوستاستى
كۇرىش مايساسىن وتىرعىزۋ ساياحات مەرەكەسى بۇقاراعا ەگىن ەگۋدىڭ شاتتىعىن سەزىندىردى
تىلشىلەرىمىز دۋ لەي، جاڭ چيڭحۋا حابارلايدى. 6 - ايدىڭ 10 - كۇنى كوك اسپاندى ارتقى كورىنىس، سۋلى اتىزدى ساحنا ەتكەن چاپچال سىبە اۆتونوميالى اۋدانى كەن اۋىلىنىڭ 10 مىڭ مۋلىق كۇرىش اتىزى وزەكتى رايونىندا ىسقىرىق شالىنىسىمەن نەشە جۇزدەگەن اتا ـ انا بالالارىمەن بىرگە بالاقتارىن ٴتۇرىنىپ، قولدارىنا كۇرىش مايساسىن الىپ، ەڭكەيىپ، مايسانى سۋلى اتىزعا وتىرعىزا باستادى، مىنە بۇل وسى اۋىلدىڭ كۇرىش مايساسىن وتىرعىزۋ ساياحات مەرەكەسى شىمىلدىعىنىڭ رەسمي اشىلۋى.
”چاپچال اۋدانىنىڭ شىعىس قاقپاسى“ اتالعان كەن اۋىلىنىڭ توپىراعى قۇنارلى، كليماتى جايلى، سۋ بايلىعى مول، كۇرىش ەگۋگە قولايلى. بيىل وسى اۋىلدىڭ كۇرىش ەگىلگەن جەر اۋماعى 11 مىڭ مۋعا جەتتى.
بىرنەشە جىلدان بەرى كەن اۋىلى كۇرىش ەگىمشىلىگىن، شايان باعىمشىلىعىن كولەمدەندىرۋگە، ولشەمدەندىرۋگە، ماركالاندىرۋعا تاباندى بولۋمەن بىرگە، بايلىق باسىمدىعىن ىشكەرىلەي اشىپ، اۋىل شارۋاشىلىعى مەن ساياحاتتى توعىستىرا دامىتۋدىڭ جاڭا جولىن قاراستىرىپ، اتىز ـ ارىق ساياحاتىنىڭ جاڭا كاسىپ كۇيىن جاڭالىق اشا دامىتىپ، شارۋالار كىرىسىنىڭ ارتۋىن، كاسىپورىنداردىڭ دامۋىن، قىستاق كوللەكتيۆىنىڭ يگىلىككە كەنەلۋىن جۇزەگە اسىردى.
اۋىل ـ قىستاقتىڭ گۇلدەنۋىنە دەم بەرۋ، ٴداستۇرلى ەگىنشىلىك مادەنيەتىن ساۋلەلەندىرۋ ٴۇشىن كەن اۋىلى ٴوز ابزالدىلىعىمەن ۇشتاستىرىپ، كۇرىشتى دانەكەر ەتىپ، مەرەكەدە دوستاسىپ، وسى رەتكى ”ەگىنشىلىك مادەنيەتىن ىشكەرىلەي اشىپ، ەڭبەكتىڭ باۋراعىشتىعىن سەزىنۋدى“ نەگىزگى تاقىرىپ ەتكەن كۇرىش مايساسىن وتىرعىزۋ ساياحات مەرەكەسى قيمىلىن ورىستەتتى.
قيمىل بارىسىندا اۋىل شارۋاشىلىق تەحنيكتەرىنىڭ ۇلگى كورسەتىپ، جەتەكشىلىك ەتۋىندە اتا - انالار بالالارىمەن بىرگە مايسا وتىرعىزۋدىڭ قىزىعىن سەزىنىپ، بالالارعا ەڭبەكتىڭ جاپالى ەكەنىن، استىقتىڭ وڭاي - وسپاق قولعا كەلمەيتىنىن سەزىندىرىپ، ”ٴار ٴتۇيىر ٴداننىڭ ماڭداي تەرمەن كەلەتىنىن“ شىنايى ۇعىندىردى. بۇدان سىرت، سۋ بەتىندە ۇيرەك ۇستاۋ، لاي سۋدا بالىق ۇستاۋ، باتپاقتى جەردە فۋتبول تەبۋ سياقتى قيمىلدار بالالاردى تابيعاتتان ٴلاززاتتاندىرىپ، ويىن قىزىعىنا باتىردى.
قۇلجا قالاسىنىڭ تۇرعىنى جاڭ ايحۋا بىلاي دەدى: ”بۇگىن بالامدى وسى قيمىلعا قاتىناسۋعا ەرتىپ كەلۋدەگى ماقساتىم − نەگىزىنەن بالاما ەگىنشىلىك تۇرمىستى سەزىندىرۋ، وسى ارقىلى ەڭبەكتى سۇيەتىن، استىقتى قاستەرلەيتىن تاماشا قاسيەت جەتىلدىرۋگە باۋلۋ“.
كەن اۋىلدىق پارتكومنىڭ ورىنباسار شۋجيى، اۋىل باستىعى وتكىر ٴومار بىلاي دەدى: ”وسى رەتكى قيمىلدىڭ ماقساتى اۋىل - قىستاقتى گۇلدەندىرۋدى كىرىسپە ٴتۇيىنى ەتىپ، ’اۋىل شارۋاشىلىعى + ساياحات + ەكولوگيا‘ ارقىلى 1 -، 2 -، 3 - كاسىپتىڭ توعىسا دامۋىن جەبەۋ ٴارى بالالاردىڭ قيمىل بارىسىندا اۋىل شارۋاشىلىعىن تۇسىنۋىنە، اۋىل شارۋاشىلىعىن قىزۋ سۇيۋىنە مۇمكىندىك جاساۋ. بۇدان بىلاي ٴبىز دامۋ وي جەلىسىن ونان ارى ايقىنداپ، ٴداستۇرلى اۋىل شارۋاشىلىعىنان وسى زامانعى اۋىل شارۋاشىلىعىنا قاراي دامىپ، قالىڭ ەگىنشى، مالشىلاردىڭ كىرىسىن ارتتىرىپ، اۋقاتتانۋىنا نەگىز قالايمىز“.
چاپچال سىبە اۆتونوميالى اۋدانى كەن اۋىلىنىڭ كۇرىش مايساسىن وتىرعىزۋ ساياحات مەرەكەسىندە اتا ـ انالار بالالارىمەن بىرگە مايسا وتىرعىزدى. دۋ لەي فوتوسى