حابارىن جازىپ، سۋرەتىن تۇسىرگەن ٴتىلشىمىز ليۋ چۇنشيڭ

ەت كوزىڭىزبەن كورمەسەڭىز، ىلەدەگى وت اراسانىنىڭ قانشالىق حيكىمەتتى ەكەندىگىن بىلمەيسىز.

12 - ايدىڭ 10 - كۇنى دوستارىمەن بىرگە كولىككە وتىرىپ، قۇلجا قالاسىنان جولعا شىققان ٴتىلشى مەملەكەت تاس جولى 218 - لەنياسىمەن ٴجۇرىپ، «جاڭاجەر قالاشىعى» دەگەن جازۋ جازىلعان عيماراتتىڭ الدىنان وڭعا بۇرىلىپ، شامامەن 2 كيلومەتردەي جول جۇرگەن سوڭ، جەرگىلىكتى ورىنداعى «وت اراسان ەمدەلۋ ورنىنا» كەلدى. دەسە دە ەمدەلۋ ورنىنىڭ قاقپاسى بەكىتۋلى بولعاندىقتان، دوسىنىڭ ايتۋى بويىنشا جەرگىلىكتى ورىنداعى ٴۇستى اشىق وت اراسانعا قاراي ٴجۇردى. بيىك تاۋدىڭ جوتاسىنداعى بۇل اراساننىڭ كەز كەلگەن جەرىنەن ٴار تۇستەگى تاستاردى كەزىكتىرۋگە بولادى، كەيبىر تاستار جەر استىنان شىققان ىستىقتىڭ اسەرىندە كۇيىپ قارايىپ كەتكەن، ويلى - شۇڭقىر تاستار اراسىنان بۋ بۋداقتايدى، جاقىن بارىپ قاراساڭىز، تاس اراسىنان تىسقا اتىلىپ شىعىپ جاتقان جالىندى كورىپ، تاڭ قالاسىز.

ۇعىسۋىمىزشا، وت اراسان جەر استىنداعى كومىر الابىنىڭ تابيعي ورتەنۋىنەن قالىپتاسقان جەر استى ىستىقتىق قاينارى ەكەن، جەر استىنداعى ىستىق جارىلعان تاس اراسىنان تىسقا شىعادى، ونىڭ قۇرامىندا مينەرالدى زات مول بولعاندىقتان، جەرگىلىكتى ورىنداعى حالىق ونى وت اراسان دەپ اتاعان. قۇلجا قالاسى جاڭاجەر قالاشىعىنىڭ نانتايزى، بايانداي قالاشىعىنىڭ تيەچاڭگوۋ جانە 4 - ديۆيزيا 66 - تۋانىنىڭ سولتۇستىگىندەگى ادىردىڭ بىرنەشە جەرىندە وت اراسان بار.

وت اراسان ادامعا سونداي سىرلى سەزىلەدى، عاجاپتانارلىعى ٴبىر توبەدەگى سىرتقا ىستىق جالىن شىعارىپ تۇرعان كەيبىر قۋىستىڭ تەمپەراتۋراسى 100 گرادۋستان اسادى، كەيبىرەۋىنەن بولماشى جىلۋ شىقسا، ال كەيبىرەۋىنەن كۇشتى ىستىق لەپ ەسەدى. وسىنداي ەرەكشەلىگىمەن وت اراسان «قۇمداعى پار مونشا» اتالعان، ويتكەنى ونىڭ جەل - قۇز جانە تەرى اۋرۋلارىن ەمدەۋ رولى مەن وزىندىك تابيعات كورىنىسى ەل ٴىشى - سىرتىنداعى ناۋقاستار مەن ساياحاتشىلاردى باۋراعان، ٴار جىلى بۇل اراعا كەلىپ ەمدەلەتىندەر مەن ساياحاتتايتىنداردىڭ اياعى ۇزىلمەيدى.

ٴۇستى اشىق وت اراساننىڭ ماڭىنان ىڭعايلى ورىن تاپقان سوڭ، ٴتىلشى مەن دوستارى ۇستەل، ورىندىعىن قويىپ، ٴتاتتى كارتوپ، بورمي، شۇجىق، كارتوپ، جۇمىرتقا، نان سياقتىلاردى تەمىر تالەڭكەگە سالىپ، تەمىر قىسقىشپەن قىسىپ، ونى ىستىق جالىن شىعىپ تۇرعان قۋىسقا قويدى، ارادان 15 مينۋت وتپەي جاتىپ، پىسقان استىڭ حوش ٴيىسى مۇرىندى جارىپ، كوپشىلىك جاپا - تارماعاي ۇستەلدى توڭىرەكتەي وتىرىپ، جەر استىنان شىققان ىستىقتا سونداي ٴدامدى پىسقان اسقا تاڭ قالىپ ٴارى وعان قىزىعىپ ٴدام تاتا باستادى. «وت اراساندا پىسىرعان تاماقتىڭ مۇنداي ٴدامدى بولارىن ويلاماعان ەكەنمىن، مىنا ٴتاتتى كارتوپتى قاراڭدارشى، تەمىر پەشتە پىسىرعاننان الدە قايدا ٴتاتتى ەكەن» دەدى ٴتىلشىنىڭ دوسى تاڭ قالىپ. وسىلايشا مارە - سارە بولىپ وتىرعاندا، بوكتەرگە بىرنەشە دالا اۆتوكولىگى كەلىپ توقتادى، ولاردىڭ الىپ كەلگەن جابدىقتارى مەن ازىق - تۇلىكتەرى الدە قايدا كوپ ەكەن، ولار قاۋىرت قامدانىپ، توبەگە قاراي تاسىنا باستادى. تاۋ جوتاسىنداعى ىزعارلى سۋىقتا كەيبىرەۋلەردىڭ بەتى قىزارىپ، قولدارى يكەمگە كەلمەي قالدى، دەسە دە بۇل كوپشىلىكتىڭ قىزعىندىلىعىنا ەشقانداي اسەر ەتە المادى، 10 نەشە ادامنىڭ كەيبىرەۋى اينالانى سۋرەتكە تارتسا، كەيبىرەۋى جاۋبۇيرەك پىسىرىپ، بىردەن - ەكىدەن توپتاسىپ، مىنا عاجايىپ كورىنىستى اڭگىمە ەتىسىپ جاتتى. ال، ٴتىلشى مەن دوستارى وت اراساندا پىسقان ٴدامدى تاعامدى جەي وتىرىپ، وت اراسان جونىندە بىلەتىندەرىن قىزىعا اڭگىمەلەپ، قىسقى كوركەم كورىنىستى تاماشالادى.

وت اراسانداعى ساياحاتشىلار

وت اراساندا تاعام پىسىرۋ

تاۋ قويناۋىنداعى ٴۇستى اشىق وت اراسان