ٴتىلشىمىز لي جيانپيڭ، ەرىكتى ٴتىلشى ديڭ لەي حابارلايدى. مەجەمەن بيىل 10 - ايدا جولاۋشىلاردىڭ تەكەس - موڭعۇلكۇرە ارالىعىنا اۆتوكولىكپەن جول ٴجۇرۋى قولايلى بولادى. ٴتىلشى تەكەس اۋدانىنداعى قاتىستى تاراۋلاردان مەملەكەت تاس جولى 577 - لەنياسى تەكەس - موڭعۇلكۇرە ارالىعىنداعى جول بولەگىن جاڭالاپ جاساۋ ينجەنەرياسىندا 10 - ايدا جۇمىس اياقتالاتىنىن ۇعىستى.

7 - ايدىڭ 29 - كۇنى ٴتىلشى وسى جولعا بارعاندا جاڭالانىپ جاسالاتىن كوپتەگەن جول بولەگىنىڭ جاسالىپ بىتكەنىن، تەگىس ٴارى كەڭ بولعانىن ٴىشىنارا قۇرىلىس جۇرگىزۋ كولىكتەرى مەن قۇرىلىسشىلاردىڭ بىتۋگە تاياعان جول بولىكتەرىندە جۇمىس جۇرگىزىپ، جول تاعانىن مايدالاۋ، جول توسەمىن ازىرلەۋ، اسفالت جاتقىزۋ سياقتىلارمەن قاربالاس ەكەنىن، ينجەنەريا قۇرىلىسىنىڭ رەتتى جۇرگىزىلىپ جاتقانىن كوردى.

ٴبىرىنشى توقتامداعى جول بولەگىنىڭ ينجەنەريا قۇرىلىسىنا جاۋاپتى شينجياڭ جول - كوپىر قۇرىلىس توبى شەكتى سەرىكتىگى نىسان ٴبولىمىنىڭ ورىنباسار ديرەكتورى ۋاڭ رۇيدۇڭنىڭ تانىستىرۋىنشا، كەزەكتە توپىراق قازۋ جۇمىستارى تولىق ورىندالىپ، جولدىڭ وڭ جاق جارتىسىنىڭ %95 بولەگى اسفالتتانىپتى، مەجەمەن 5 كۇننەن سوڭ كولىك قاتىنايتىن كورىنەدى. سودان كەيىن كۇشتى سول جاق جارتىسىن اسفالتتاندىرۋعا شوعىرلاندىرىپ، 9 - ايدىڭ 30 - كۇنى جاساپ بولۋعا كەپىلدىك ەتەدى ەكەن. ٴتىلشىنىڭ ۇعىسۋىنشا، كوپىر قۇرىلىسىن قامتىعان باسقا دا قۇرىلىستاردى قاۋىرت جۇرگىزىپ، ٴتۇرلى قىزمەتتەردى ورنىقتى ىلگەرىلەتۋگە كەپىلدىك ەتپەكشى ەكەن.

مەملەكەت تاس جولى 577 - لەنياسىنىڭ تەكەستەن موڭعۇلكۇرەگە دەيىنگى جول بولەگىنىڭ جالپى ۇزىندىعى 62.867 كيلومەتر، جاڭالاپ جاساۋ ينجەنەرياسىنا 2 ميلليارد يۋان قارجى قوسىلعان. مۇندا ٴبىرىنشى توقتام بولەگىندەگى نىسان تەكەس اۋدانىنا ورنالاسقان، بۇل جولدىڭ جالپى ۇزىندىعى 26.7 كيلومەتر، بۇرىنعى ولكە تاس جولى 220 - لەنياسى وزگەرتىپ جاسالىپ، ٴبىر جاعى كەڭەيتىلگەننەن كەيىن قوس باعىتتا 4 كولىك قاتىنايتىن 1 - دارەجەلى جولعا وزگەرەدى، جول تاعانىنىڭ كەڭدىگى 24.5 مەتر، 80km/h جىلدامدىق بويىنشا جوبالانعان.

مەملەكەت تاس جولى 577 - لەنياسى اۆتونوميالى وبلىستىڭ «4 بويلاي وتەتىن، 9 ەندەي وتەتىن، 3 تۇتاسقان جول» قۇرىلىمدىق تاس جول تورابىنىڭ ماڭىزدى قۇرامداس بولەگى. نىسان سالىنىپ بىتكەننەن كەيىن وڭىرلىك جول تورابى قۇرىلىمىن ساپالىلاندىرىپ، مەملەكەت تاس جولى 577 - لەنياسىنىڭ تاسىمال قۋاتى مەن قىزمەت وتەۋ ساپاسىن ٴونىمدى جوعارىلاتىپ، تەكەس - موڭعۇلكۇرە ارالىعىنا قاتىناۋ ۋاقىتىن زور مولشەردە قىسقارتىپ، ەكى اۋداننىڭ ساياحات، اۋىل شارۋاشىلىق، مال شارۋاشىلىق سياقتى كاسىپتەردى دامىتۋىن اناعۇرلىم قولايلى قاتىناسپەن قامتاماسىزداندىرادى.