جاڭ لياڭ (ٴوز ٴتىلشىمىز)

7 - ايدىڭ 30 - كۇنى ٴتىلشى توعىزتاراۋ اۋدانى اعارسىن قالاشىعى ٴدارتى قىستاعىندا تىلشىلىك ىستەۋ بارىسىندا قىستاق تۇرعىندار كوميتەتىنىڭ اۋلاسىنان ٴبىر ٴتۇپ «تىلەك اعاشىن» كوردى، 26 جىلدىق بۇل شەگىرشىن اعاشىنا قىزىل جانە جاسىل ٴتۇستى كارتوچكالار سامسىتا ىلىنگەن. قىستاق كادرلارىنىڭ تانىستىرۋىنشا، جاسىل ٴتۇستى كارتوچكاداعى مازمۇندار قىستاق تۇرعىندارى ورتاعا قويعان شەشىمىن تاپپاعان تالاپ - تىلەكتەرى ەكەن، ال قىزىل كارتوچكاداعى مازمۇندار شەشىلىپ بولعان تالاپ - تىلەكتەر ەكەن.

ٴدارتى قىستاعى − ەگىمشىلىكتى نەگىز ەتەتىن قىستاق، «مەن بۇقارا ٴۇشىن ناقتى ٴىس ىستەيمىن» امالياتتىق قيمىلىن ورىستەتكەننەن بەرى قىستاق پارتيا ياچەيكاسى تىلەك كارتوچكاسىن تاراتۋ ارقىلى قىستاق تۇرعىندارىنا قيىنشىلىقتارى مەن تالاپ - تىلەكتەرىن ورتاعا قويعىزدى. قىستاق تۇرعىندارى ورتاعا قويعان ماسەلەلەرگە جاۋاپ قايتارىلدى ما، جوق، ورتاعا قويعان ماسەلەلەرى شەشىلدى مە، جوق؟ مۇنىڭ ٴبارىن «تىلەك اعاشىنان»ٴبىر قاراپ بىلۋگە بولادى.

ٴدارتى قىستاعى 4 - گرۋپپاسىنىڭ سۋ ىعىستىرۋ توعانى ۇزاق ۋاقىت تازالانباعاندىقتان ەگىستىكتى سۋارۋعا ىقپال جەتكىزىپ كەلگەن بولاتىن، قىستاق تۇرعىندارى داستارقان ۇستىندە قىستاقتا «تىلەك اعاشى» بار ەكەنىن ايتىسىپ وتىرىپ، كوپشىلىك اقىلداسا كەلە وسى تالاپتارىن تىلەك ايتۋ كارتوچكاسىنا جازىپ سىناپ كورۋ ويىنا كەلەدى. ويلاماعان جەردەن ەكىنشى كۇنى «ۇعىسۋ، تيىمدىلىك جاساۋ، توعىستىرۋ» بويىنشا قىستاقتا تۇراتىن قىزمەت اترەتىنىڭ تايانىش ورنى ماشينا ورنالاستىرىپ 5.3 كيلومەترلىك سۋ ىعىستىرۋ توعانىن ٴبىر رەت تازالاپ شىعادى، توعان سۋىنىڭ ەگىستىك اتىزىنا ىركىلىسسىز اعىپ كىرىپ جاتقانىن كورگەن قىستاق تۇرعىندارى قۋانىشقا بولەندى.

«تىلەك اعاشى» − قىستاق تۇرعىندارىنىڭ قىستاق «ەكى كوميتەتىنە» بولعان سەنىمىن بارعان سايىن ارتتىرىپ، ولاردىڭ اعىنان اقتارىلعان لەبىزدەرى دە مولايا ٴتۇستى. ٴتىلشى «تىلەك اعاشىنا» ٴىلۋلى تۇرعان جاسىل ٴتۇستى كارتوچكادان «اۋلاما كوكونىس ەگەيىن دەپ ەدىم»، «تۋىلعان كۇنىمدە تىلەك تىلەپ شام ۇرلەپ، بالگۇلشە جەگىم كەلەدى»، «ٴبىر دانا شينحۋا سوزدىگىم بولسا دەيمىن» ... سياقتى الۋان مازمۇنداعى، ٴتىپتى، كىسى ويىنا كەلمەيتىن تىلەكتەردى كوردى، ٴبىراق بۇعان قاراتا قىستاق كوميتەتى ايقىن پوزيتسيا ۇستانىپ، تەك ورىندى، زاڭ - ەرەجە، تۇزىمگە ۇيلەسەتىن تالاپ - تىلەكتەردى عانا امالداپ شەشىم ەتىپتى.

7 - ايدىڭ سوڭىندا قىستاق تۇرعىنى ارزىگۇل ٴابدىحالىق قىزى «تىلەك اعاشىنداعى» كارتوچكاعا: «ساياحاتتاعىم كەلەدى» دەپ جازادى، مۇنى كورگەن كەيبىر قىستاق تۇرعىندارى بۇعان كۇلەدى، الايدا قىستاق كادرلارى بۇعان بايسالدى مامىلەدە بولادى، ولار ارزىگۇلدىڭ وتباسى ايەلى ەكەنىن، ٴۇي جۇمىستارىمەن قاربالاس بولىپ، سىرتقا كوپ شىعا المايتىنىن بىلەتىن. قىستاق كادرى جاۋ چياڭ بۇل مىندەتتى تاپسىرىپ الىپ، ەكىنشى كۇنى تاڭەرتەڭ ٴوز كولىگىمەن ارزىگۇل مەن ونىڭ ەكى بالاسىن كوبەلەك كولى، شاشى جانە كولدەنەڭ سياقتى كورىنىس رايوندارىنا اپارىپ ساياحاتتاتىپ، ونىڭ ساياحاتتاۋ ارمانىن ورىندايدى.

قىستاق پارتيا ياچەيكاسىنىڭ ورىنباسار شۋجيى جىڭ يانلۇڭ تىلشىگە بىلاي دەدى: «قىستاق <ەكى كوميتەتى> <مەن بۇقارا ٴۇشىن ناقتى ٴىس ىستەيمىن> امالياتتىق قيمىلىنىڭ تالابى بويىنشا قيىنشىلىعى ەڭ اۋىر بۇقارادان باستاپ ىسكە كىرىسىپ، ەڭ كورنەكتى ماسەلەلەردەن باستاپ مىقتى يگەرىپ، ەڭ شىنايى يگىلىكتى كوزدەپ، بار ىنتا - پەيىلىمەن، بار كۇشپەن، بار سۇيىسپەنشىلىكپەن نەگىزگى ساتىنىڭ قيىن، كۇردەلى ماسەلەلەرىن، بۇقارانىڭ كوكەيتەستى ىستەرىن شەشىپ، بۇقارانىڭ تابىس سەزىمىن، باقىت سەزىمىن جانە حاۋىپسىزدىك سەزىمىن ارتتىردىق».

كەزەكتە ٴدارتى قىستاعى «تىلەك اعاشى» ارقىلى 120 قىستاق تۇرعىنىنىڭ تىلەگىن ورىنداعان. ٴبىر قىستاق كادرى: «<تىلەك اعاشىنا> سامىستا ىلىنگەن كارتوچكالار قىستاق تۇرعىندارىنىڭ قىستاق <ەكى كوميتەتىنە> بولعان شىنايى القاۋىن بەينەلەيدى» دەدى.