ٴبىر تۇتاس سايكەستىرىپ، ەتەنە قىزمەت وتەدى

ىلە وبلىسى شينجياڭنان سىرت جەرلەردەن كەلگەن جولاۋشىلاردى ىلەدەن اتتاندىرۋ قىزمەتىن ۇزدىكسىز جاقسى ىستەدى

ما چىڭلۋ، لي يافىڭ (ٴوز تىلشىلەرىمىز)، دۋان شينجيان، چاي جيان (ەرىكتى تىلشىلەر)

«ول اۆتوموبيلدەن نان الىپ بەردى، نەگە ٴتانتى بولماسقا». 10 - ايدىڭ 7 - كۇنى ساعات 11 مولشەرىندە بەيجيڭدىك جولاۋشى حان ليفىڭ اۆتوموبيلىن جۇرگىزىپ تەكەس اۋدانىنان اتتانباقشى بولعاندا، جەرگىلىكتى ورىنداعى ٴبىر ەرىكتى وعان انتەك توسا تۇرۋعا يشارات جاساپ، جۇگىرىپ بارىپ ٴوز اۆتوموبيلىنەن ىستىق نان الىپ كەلىپ حان ليفىڭنىڭ قولىنا ۇستاتىپ: «تاڭەرتەڭ ۇيدەن اكەلدىم، ٴالى سۋي قويعان جوق، جولدا جەڭىزدەر!» دەيدى.

«كوپ راقىمەت، العىستان باسقا ايتار جوق!» دەگەن حان ليفىڭ ٴالسىن - ٴالى بورىشتىلىق ٴبىلدىرىپ، قول تەلەفونىمەن شينجياڭنان سىرت جەرلەردەن كەلىپ بوگەلىپ قالعان 142 جولاۋشىنىڭ تەكەس اۋدانىنداعى ارناۋلى ادامداردىڭ ارناۋلى اۆتوموبيلمەن جەتەكشىلىك ەتۋىندە 2 توپقا ٴبولىنىپ رەتىمەن قايتىپ بارا جاتقان كورىنىسىن ٴتۇسىرىپ الدى.

حان ليفىڭ بەيجيڭنەن كەلگەن، مەملەكەت مەرەكەسى دەمالىسىندا ول دوستارىمەن بىرگە ٴوز كولىگىمەن ساياحاتتاپ شىققان، ٴاسىلى تەكەستىڭ كۇزگى كورىنىسىن كورمەكشى بولعان ول قورعاس قالاسىندا تۋىلعان ىندەت سەبەبىنەن ىلەدە بوگەلىپ قالادى. وسى مەزگىلدە جەرگىلىكتى ۇكىمەت ولارعا دەر كەزىندە تاماق، جاتىن ورىن ازىرلەدى، سونداي - اق ارناۋلى ادام ورنالاستىرىپ شىعارىپ سالدى، بۇعان ولار ايرىقشا اسەرلەندى.

سول كۇنى ساعات 21 مولشەرىندە حان ليفىڭمەن تەلەفوندا سويلەستىك، ول اۆتوموبيلىمەن ٴۇرىمجى - كۇيتۇن جوعارى قارقىندىق تاس جولىندا كەتىپ بارادى ەكەن. «تەكەس اۋدانىنان اتتانعانىمىزعا بىرنەشە ساعات بولدى، سول اراداعى جىگىت بەرگەن ناندى ٴالى جەپ كەلەمىز، وتە ٴدامدى، ولاردىڭ مەيىرىن سەزىپ وتىرمىز. مەن شاعىن كەسكىندى دوۋيىنعا شىعارىپ قويدىم، توراپتاستار ۇزدىكسىز بارماق باسۋدا. ىلەگە تاعى كەلىپ، وسى جولى اياقتاماعان ساپارىمدى جالعاستىرامىن» دەدى حان ليفىڭ.

شينجياڭنان سىرت جەرلەردەن كەلىپ بوگەلىپ قالعان جولاۋشىلاردى ورنالاستىرۋ، قايتارۋ قىزمەتىن جاقسى ىستەۋ ٴۇشىن، 10 - ايدىڭ 7 - كۇنىنەن بەرى ىلە وبلىسى حالىقتىق اۆياتسيا، تاس جول سياقتى تاراۋلاردى بەلسەنە سايكەستىرىپ، ۇتىمدى شارالار قولدانىپ، جولاۋشىلاردى ىلەدەن ىركەس - تىركەس اتتاندىرۋ قىزمەتىن تارتىپپەن ۇيىمداستىردى. ساناققا قاراعاندا، 10 - ايدىڭ 7 - كۇنى جيىنى مىڭنان استام جولاۋشى ىلەدەن اتتانعان.

بوگەلىپ قالعان جولاۋشىلاردىڭ حاۋىپسىز قايتۋىنا كەپىلدىك ەتۋ ٴۇشىن، تەكەس اۋدانى ادام ۇيىمداستىرىپ، جولدى شارلاپ، جولدىڭ حاۋىپسىز، بوگەتسىز بولۋىنا كەپىلدىك ەتىپ، جان - جاقتى، مۇقيات كومەكتەسىپ جانە ىقىلاسپەن قىزمەت وتەپ جولاۋشىلارعا مەيىر باعىشتادى.

10 - ايدىڭ 7 - كۇنى تەكەس اسۋى قاتىناس تەكسەرۋ پۋنكتىنەن جەرگىلىكتى ورىننىڭ ٴوز كولىگىمەن ساياحاتتاپ كەلگەن 34 اۆتوموبيلدەگى 120 جولاۋشىعا نان، ورىك قاعى، الما، مينەرال سۋ سياقتى تۇرمىستىق قاجەتتى بۇيىمداردى بەرگەنىن كوردىك.

قورعاس قالاسىندا توسىننان تۋىلعان ىندەت مەملەكەت مەرەكەسى دەمالىسىندا ىلەگە ساياحاتتاي كەلگەن جولاۋشىلارعا ىقپال جاسادى. بوگەلىپ قالعان جولاۋشىلاردى قايتارۋ قىزمەتىن بار كۇشپەن جاقسى ىستەۋمەن بىرگە، وبلىستىق مادەنيەت جانە ساياحات مەكەمەسى ساياحاتشىلارعا العىس حات جولدادى ٴارى 10 - ايدىڭ 7 - كۇنى ىلەدەن قايتقاننان كەلەر جىلدىڭ سوڭىنا دەيىن وبلىستىق مادەنيەت جانە ساياحات مەكەمەسىنىڭ وسى رەت ىلەگە كەلگەن ساياحاتشىلارعا كورىنىس رايونىنىڭ ەسىك بەلەتىن ٴبىر رەت كەشىرىم ەتەتىنىن ٴبىلدىردى.

جەكە كولىكپەن ساياحاتتاۋ ۇيىرمەسىندە 60 - 70 جاس ارالىعىنداعى شاڭحايدان كەلگەن 8 جولاۋشى بار. قورعاس قالاسىندا ىندەت تۋىلعاننان كەيىن ولار تياناقتار جەر تابا الماي قالۋدان الاڭداعان كەزدە ىلە وبلىسى ولارعا قوناق ٴۇي ورنالاستىرىپ بەردى ٴارى ازىق ـ تۇلىك جانە تۇرمىستىق قاجەتتى بۇيىمدارمەن قامدادى. جولاۋشى دۇڭ جۇيمەي تەبىرەنە بىلاي دەدى: «ىلەنىڭ كورىنىسى كوركەم، ادامدارى دا جاقسى، كوڭىلى دارقان ەكەن، مۇنداعى كادرلار مەن حالىق توتەنشە ىستىق ىقىلاستى ەكەن. بۇگىن بىزگە ازىق - تۇلىك ازىرلەپ، ارناۋلى اۆتوكولىكپەن جەتكىزىپ سالعانىنا ەرەكشە العىس ايتامىز، وراي بولىپ جاتسا بۇدان كەيىن ىلەگە تاعى دا كەلەمىن».

10 ـ ايدىڭ 7 ـ كۇنى سايرام - كەڭساي جوعارى قارقىندىق تاس جولىنىڭ كەڭساي اقى الۋ پۋنكتىنەن جانە چيڭشۇيحى - قۇلجا جوعارى قارقىندىق تاس جولىنىڭ كۇرە شىعىسى اقى الۋ پۋنكتىنەن جەرگىلىكتى كوپ تاراۋدىڭ بىرگە قۇلشىنۋىندا، ىلەدە بوگەلىپ قالعان شينجياڭنان سىرت جەرلەردەن جەكە اۆتوكولىگىمەن كەلىپ ساياحاتتاۋشىلاردىڭ ىلەدەن تارتىپپەن اتتانىپ جاتقانىن كوردىك. جولاۋشى پان يۋە بىلاي دەدى: «وسى رەت ساياحاتقا شىققاندا ىندەت تۋىلارىن قايدان بىلەمىز، دەسە دە، جەرگىلىكتى ۇكىمەتتىڭ قۇلشىنۋىندا، قىزمەت ورنىما ٴساتتى ورالاتىن بولدىم، ٴدان ريزامىن».

بوگەلىپ قالعان جولاۋشىلاردىڭ ىلەدەن ٴتارتىپتى، حاۋىپسىز اتتانۋىنا كەپىلدىك ەتۋ ٴۇشىن، ىلە وبلىسىنداعى اۋدان، قالالار قىزمەت وتەۋدى قامتاماسىزداندىرۋ ارناۋلى قىزمەت گرۋپپاسىن قۇرىپ، بوگەلىپ قالعاندارعا قىزمەت وتەۋدى قامتاماسىز ەتتى. قىزمەت وتەۋدى قامتاماسىزداندىرۋ قىزمەت گرۋپپالارى قورعاس قالاسىندا، بيڭتۋان 4 ـ شىسىنىڭ 62 ـ تۋانىندا ايالداماعان شينجياڭنان سىرت جەرلەردەن كەلگەن جولاۋشىلاردى دەر كەزىندە ساناققا الدى. سونىمەن بىرگە، ىلەدەن اتتانۋدان بۇرىنعى 48 ساعات ىشىندە ەكى رەت حىسۋان تەكسەرۋگە ۇيىمداستىردى ٴارى تەكسەرۋ ناتيجەسىنىڭ بولىمسىز ەكەنىن انىقتاعان مالىمەتىن بەردى.

كەزەكشى ۇشاق ينفورماتسياسىن دەر كەزىندە جاريالاپ، ۇشاقپەن ىلەدەن اتتانۋعا ٴتيىستى جولاۋشىلاردىڭ بەلەت الۋ ينفورماتسياسىن ٴبىر تۇتاس جيناپ، ارناۋلى اۆتوكولىك جىبەرىپ، ولاردى اۋەجايعا ٴبىر تۇتاس جەتكىزدى. شينجياڭنىڭ سىرتىنان كەلگەن جولاۋشىلاردىڭ اۋەجايعا وزدەرى باراتىندارىن الەۋمەتتىك اۋماق كىرە اۆتوموبيلىن ورنالاستىرۋ نەمەسە الەۋمەتتىك اۋماقتاعى اۆتوكولىكتەر ارقىلى اۋەجايعا توتە جەتكىزدى. قۇلجا قالالىق قىزمەت وتەۋدى قامتاماسىزداندىرۋ گرۋپپاسى اۋەجايدا ىلەدەن اتتاناتىن ٴاربىر جولاۋشىعا شاعىن تارتۋ ـ تارالعى جانە العىس حات دايىندادى، سونداي ـ اق ۇشاق كۇتكەن جولاۋشىلاردى ازىق ـ تۇلىكپەن قامداپ، ولاردىڭ كوڭىلىن ورنىقتىرىپ، ۇشاققا ٴساتتى شىعۋىنا مۇمكىندىك جاسادى. ٴوز كولىگىمەن ىلەدەن اتتاناتىن جولاۋشىلار جونىنەن ٴبىر تۇتاس ورنالاستىرۋعا ساي، الەۋمەتتىك اۋماق توپقا ٴبولىپ، بەلگىلەنگەن ورىننان ارناۋلى اۆتوموبيلدى شوعىرلى ورنالاستىرىپ، كەڭساي جوعارى قارقىندىق تاس جولى ارقىلى ىلەدەن اتتانۋىنا جەتەكشىلىك ەتتى ٴارى ازىق - تۇلىك جانە مينەرال سۋ سياقتىلارمەن قامدادى.

10 - ايدىڭ 8 - كۇنى ىلە وبلىستىق ىندەتتەن ساقتانۋ - تىزگىندەۋ قىزمەتى قولباسشىلىق شتابى قۇلجا اۋەجايىنان چىڭدۋ، جىڭجوۋ، چۇڭچيڭ، شي ـ ان، لانجوۋ، بەيجيڭ سياقتى جەرلەرگە توتە ۇشاتىن 9 كەزەكشى ۇشاقتى تاعى دا سايكەستىردى. قازىر ىلەدەن اتتاناتىندار ٴۇشىن جوعارى قارقىندىق تاس جول جالعاستى ىركىلىسسىزدەندىرىلدى. سونىمەن بىرگە، تەمىر جول جاعىندا ىلەدەن اتتاناتىندار ٴۇشىن تەز ارادا كەزەكشى پويەز جۇرگىزۋ جۇمىسى بەلسەنە سايكەستىرىلۋدە. قۇلجا اۋەجايى شينجياڭنىڭ سىرتىنان كەلگەن بارلىق جولاۋشىلارعا بەيجيڭگە ۇشاتىن جولاۋشىلاردىڭ «بەيجيڭ سالاماتتىعى» جۇمساق دەتالىن ٴتۇسىرۋىن، ۇشاقپەن شي ـ انعا باراتىن جولاۋشىلاردىڭ سول جەردىڭ وزىندە اۋاشالانۋىن ەسكەرتەدى. ىلەدەن اتتانعىسى كەلەتىن شينجياڭنىڭ سىرتىنان كەلگەن جولاۋشىلار الدىن الا باراتىن جەرمەن حابارلاسىپ، ىندەتتەن ساقتانۋ ناقتى تالاپتارىن الدىن الا ۇعىسۋى كەرەك.