تىلشىلەرىمىز جاڭ جينفىڭ، جاۋ يان، ەرىكتى ٴتىلشى جاۋھاربۇبى تەكەستەن حابارلايدى. تەكەستىڭ ٴدامدى تاعامدارىنان قوي قابىرعاسى قوسىلعان نان قۋىرداقتان سىرت، تاعى ماقسارى ٴدامدى قازىسى بار. قازانعا سالىپ ٴبىر جارىم ساعات باياۋ وتتا پىسىرعاننان كەيىن دايىن بولاتىن قازىنىڭ حوش ٴيىسى مۇرىن جارىپ، سىلەكەيىڭىزدى شۇبىرتادى. ٴبىر ماي، ٴبىر ەت قازىنى ٴبىر ٴتىلىپ اۋىزىڭىزعا سالساڭىز ٴدامى تاڭدايىڭىزدا قالادى.

تەكەس اۋدانىنىڭ ماقسارى ٴدامدى قازىسى ەلەكتروندىق ساۋدا، ٴۇنحات، دوۋيىن تەكشەلەرى ارقىلى  ٴۇرىمجى، قۇمىل سياقتى جەرلەرگە جانە شينجياڭنان سىرت جەرلەرگە ساتىلدى.

12 - ايدىڭ 17 - كۇنى تىلشىلەر تەكەس اۋدانىنىڭ كوكتەرەك اۋىلىندا ساۋدا دۇكەندەرىنىڭ، تۇرعىن ۇيلەردىڭ قابىرعاسىنا ماقسارى ٴدامدى قازى ساتۋ جارنامالارى شىعارىلعانىن كوردى، ماقسارى ٴدامدى قازى كوپتەگەن قىستاق تۇرعىندارىنىڭ بايۋ جولىنا تۇسۋدەگى جاقسى تالعامىنا اينالعان. كوپتەگەن قىستاق تۇرعىنى جىلقى باعۋ، جىلقى ەتى ونىمدەرىن مانەرلەۋ ارقىلى كىرىستى ارتتىرىپ وتىر ەكەن.

يۇسۇپجان سىلامجان − كوكتەرەك قىستاعىنىڭ تۇرعىنى، جىلقى باعۋ، ماقسارى ٴدامدى قازى اينالدىرۋ ارقىلى جىلدىق تازا كىرىسىن 80 مىڭ يۋاننان اسىرعان. ٴتىلشى 100 شارشى مەترلىك بولمەگە قازى مەن ىستالعان ەتتىڭ سامسىتا ىلىنگەنىن كوردى.

يۇسۇپجاننىڭ مانەرلەۋ ٴۇيى − قازى اينالدىرۋ بولمەسى، دايىن ونىمدەر كورمە رايونى، سۇرلەۋ بولمەسى سياقتىلارعا بولىنگەن. قىس كىرىسىمەن قازى اينالدىرۋ، ەت سۇرلەۋدى باستايدى. ول 6 جۇمىسشىمەن بىرگە قاربالاس جۇمىس ىستەي ٴجۇرىپ، ساۋعا قورابىن نۇسقاپ: «قازى دايىن بولعاننان كەيىن، الۋشىلار دەرەۋ تاپسىرىس بەرىپ ساتىپ الادى، بۇل − سىچۋان ولكەسىنىڭ چىڭدۋ قالاسىنداعىلار بەرگەن 50 تاپسىرىس، زاتتى تەز ارادا جونەلتەمىز» دەدى.

«سالەمەتسىزدەر مە؟ مەنىڭ اتىم بەكجان، تىكە تاراتۋ بولمەسىنە كەلگەندەرىڭىزدى قارسى الامىن، تەكەس اۋدانىنىڭ ماقسارى ٴدامدى قازىسىنىڭ ٴدامى ٴتىل ۇيىرەدى، قازىر تاپسىرىس بەرسەڭىزدەر، بۇكىل ەل كولەمىنە جەتكىزىپ بەرەمىز...» 12 - ايدىڭ 15 - كۇنى كوكتەرەك اۋىلى شاعانساي قىستاعىنىڭ تۇرعىنى بەكجان ىرىسكەلدى ۇلى تىكە تاراتۋ جەلىسىنە شىعىپ ۇگىت جۇرگىزىپ، جەر - جەردەگى توراپتاستاردىڭ القاۋىنا بولەندى.

2 جىلدىڭ الدىندا بەكجان ٴۇرىمجى قالاسىندا قورا - جاي سەرىكتەستىگىندە ساتۋشى بولىپ ىستەگەن، كەيىن تۋعان جەرىنىڭ ٴدامى ٴتىل ۇيىرەتىن قازىسىنىڭ، جىلقى ەتىنىڭ الارمانداردى باۋراپ جاتقانىن ۇعىپ، اۋىلىنا قايتىپ ماقسارى ٴدامدى قازى كاسىبىمەن شۇعىلدانادى. بەكجان بىلاي دەدى : «قازى − شينجياڭنىڭ ەرەكشە ٴدامدى تاعامى، ال ماقسارى ٴدامدى قازىعا جابايى ماقسارى ٴدانى قوسىلعاندىقتان وسىلاي اتالعان، مۇنداي ٴدامدى تاعامدى تەكەستەن سىرتقا شىعارۋ كەرەك».

2019 - جىلى بەكجان ٴۇنحات، كۋايشۋ، دوۋيىن سياقتى ينتەرنەت تۇعىرلارىندا ماقسارى  ٴدامدى قازى ساتا باستادى. تىكە تاراتۋ جەلىسىنەن پايدالانىپ ساتقاننان كەيىن جەرگىلىكتى ورىنداعى الارمانداردى باۋراپ قانا قالماستان، بەيجيڭ، شاڭحاي، سىچۋان سياقتى جەرلەردەگى تۇتىنۋشىلار توراپ ارقىلى تاپسىرىس بەرەدى. قازىر ونىڭ 8 مىڭنان استام قولداۋشىسى بار.

تەكەس اۋدانى لۇييۋان مال باعىمشىلىعى شارۋالار كاسىپتىك سەلبەستىك كووپەراتيۆى «كاسىپتىك سەلبەستىك كووپەراتيۆى + كاسىپ بازاسى + شارۋالار وتباسى» سىندى تيجارات ۇلگىسىمەن ەرەكشەلىككە يە جىلقى ەتى ونىمدەرىن مانەرلەۋدى دامىتتى. سەلبەستىك كووپەراتيۆى سەكى ماقسارى ٴدامدى قازى ٴوندىرىس بازاسىن قۇرعاننان بەرى ايلىق كىرىسى 60 مىڭ يۋاننان استى. قازىر سەلبەستىك كووپەراتيۆى باعىمشىلىق فەرماسىندا 70 جىلقى بار، الدا تاعى بازار قاجەتىنە ساي توڭىرەكتەگى مالشىلاردان جىلقى ساتىپ الىپ، سۇرلەنگەن جىلقى ەتىنىڭ، ماقسارى ٴدامدى قازىنىڭ بازار اياسىن اناعۇرلىم كەڭەيتپەك.