- كۇيتۇن قالالىق شينجياڭ چۇنحى قورا - جاي اشۋ شەكتى سەرىكتەستىگىنىڭ دانەكەرلەۋشىسى حى تاۋ جونىندە
جاڭ لياڭ (ٴوز ٴتىلشىمىز)
ٴسال عانا ەڭكەيىپ، سول قولىمەن بەت قالقانى، وڭ قولىمەن دانەكەرلەگىشتى ۇستاپ، دەن قويا دانەكەرلەۋدە ... بۇل كۇيتۇن قالالىق شينجياڭ چۇنحى قورا - جاي اشۋ شەكتى سەرىكتەستىگىنىڭ دانەكەرلەۋشىسى حى تاۋدىڭ كۇندەلىكتى قىزمەتى. ول وتىز جىلدىق ٴبىر سىدىرعى جۇمىس بارىسىندا ٴوزىنىڭ وزگەشە كاسىپتىك ٴومىر كارتيناسىن سالدى. ول 2021 - جىلى «اۆتونوميالى وبلىستىق ەڭبەك وزاتى» دەگەن داڭقپەن ماراپاتتالسا؛ 2022 - جىلى شينجياڭدى اشۋ، قۇرۋ سيلىعىنا يە بولدى.
ول قاراپايىم ٴبىر شاكىرتتەن تەحنيكاعا شەبەر، بەتكە ۇستار جۇمىسشىعا اينالدى، بۇندا حى تاۋدىڭ دانەكەرلەۋ قىزمەتىنە دەگەن تاباندىلىعى ايگىلەنگەن، ول اسا ۇقىپتى قىزمەت پوزيتسياسى ارقىلى سەرىكتەستىكپەن بىرگە جەتىلدى ٴارى قىزمەتتەستەرىنىڭ ۇلگىسىنە اينالدى.
حى تاۋ دانەكەرلەگىش ۇستاعان كۇننەن باستاپ، ۇزدىك دانەكەرلەۋشى بولۋ بەكىمىنە كەلگەن. ول وسى نىسانانى جۇزەگە اسىرۋ ٴۇشىن، باسقالارعا قاراعاندا كوبىرەك قۇلشىندى. جاڭادان شاكىرت بولىپ جۇرگەندە دانەكەرلەگىشتىڭ ٴوزىن ورنىقتى ۇستاي المايتىن ەدى، سوندا ۇستازى وعان بىلاي دەيتىن: «تولىمدى دانەكەرلەۋشى بولۋ ٴۇشىن، نەگىزگى شەبەرلىككە جەتىلۋ كەرەك». تەحنيكانى تەزىرەك يگەرۋ ٴۇشىن ول ۇنەمى ەرتە كەلىپ، كەش قايتاتىن، كىشىپەيىلدىلىكپەن ۇيرەنەتىن، دانەكەر تاياقشاسىن قولدانۋ بۇرىشى، دانەكەرلەگىشتىڭ ەلەكتر اعىسى كۇشەمەلىلىگى، دانەكەرلەۋ ٴادىسى سياقتىلاردى مۇقيات باقىلايتىن، قىزمەتتەستەرى دەمالعان كەزدە جۇمىس باسىندا ٴۇن - ٴتۇنسىز قايتالاي ىستەپ، بار زەيىنىمەن وي جۇگىرتەتىن، اقىرى ول دانەكەرلەۋ تەحنيكاسىن جەتىك يگەرىپ الدى. سەرىكتىككە كىرگەننەن بەرى دانەكەرلەۋ قىزمەتى ورنىندا قاجىرلىلىقپەن ۇيرەنىپ، توقتاۋسىز ماشىقتانىپ، كاسىپتە ۇزدىك، تەحنيكادا شەبەر قىزمەتكەر بولىپ جەتىلدى.
حى تاۋ كوپ جىلدىق قىزمەت امالياتى بارىسىندا دانەكەرلەگىشتىڭ داۋىسىن تىڭداۋ ارقىلى دانەكەرلەۋ ەلەكتر اعىسى مەن ەلەكتر كەرنەۋىنىڭ سايكەسكەن - سايكەسپەگەندىگىن تۇجىرىمداي الاتىن؛ دانەكەرلەنگەن ورىندى كورۋ ارقىلى دانەكەرلەۋشىنىڭ قانداي ادىستەن پايدالانعانىن جانە تۇزەتۋگە ٴتيىستى جەرلەرىن بىلەتىن ونەردى يگەرگەن. ول ىسىلعان دانەكەرلەۋ ونەرى ارقىلى قىزمەتتەستەرى اراسىنان قارا ٴۇزىپ شىعىپ، سەرىكتەستىك ۇيىمداستىرعان دانەكەرلەۋ شەبەرلىگى جارىستارىندا كوپ رەت سيلىق ساحناسىنان بوي كورسەتىپ، ىلگەرىندى - كەيىندى 8 رەت بىرىنشىلىكتى يەلەپ، سودان باستاپ سەرىكتەستىكتىڭ ەڭ قيىن دانەكەرلەۋ ينجەنەرياسىنىڭ قامال الۋشىسىنا اينالعان.
حى تاۋ زەرتتەۋگە، باتىلدىقپەن جاڭالىق اشۋعا شەبەر بولدى. كوپ جىلدىق قىزمەت تاجىريبەسى ارقىلى ول جەر استى قۇبىرى، باسپالداق سۇيەنىشى سياقتى ينجەنەريالىق دانەكەرلەۋدە قىزمەت ونىمدىلىگىن زور دارەجەدە جوعارىلاتۋعا بولاتىن 11 ٴتۇرلى دانەكەرلەۋ ٴادىسىن جاراتادى. ونىڭ بۇل ادىستەرى دانەكەرلەۋ قىزمەتىن ۇيىمداستىرۋدان دانەكەرلەۋ تەحنيكاسىنا دەيىنگى بارلىق بۋىنىندا جاڭالىق اشىپ، سول ارقىلى قىزمەت ونىمدىلىگى مەن قىزمەت قارقىنىن ەسەلەپ ارتتىرادى. كۇيتۇن قالاسى جۇيشينيۋان تۇرعىندار رايونىنىڭ جەر استى اۆتوكولىك الاڭىنا كۇن نۇرىن توساتىن قالتقى سالۋ بارىسىندا، جوبا چەرتوجى، وسىعان ۇقساس ينجەنەريا، تەحنيكالىق سىرتقى كومەك بولماعاندىقتان، قۇرىلىس جۇرگىزۋ قيىندىعى زور بولادى، حى تاۋ يگەرگەن بىلىمدەرىنەن پايدالانىپ، قىرۋار ماتەريال كورىپ، كوپتىڭ ارتىقشىلىعىن قابىلداپ، جوبانى ٴوزى جاساپ، اتتامالىلىعى ۇلكەن، ايلانۋى شۇعىل، ٴمۇيىسى كوپ بولۋ سياقتى ينجەنەريا جۇمىستارىنىڭ قيىن تۇيىندەرىن، تەحنيكالىق ماسەلەلەرىن تاماشا شەشىپ، كۇن نۇرىن توساتىن قالتقىنى كوركەم، بەرىك، شىدامدى ەتىپ جاساپ شىعادى ٴارى بۇل تۇرعىندار رايوننىڭ كوركەم كورىنىسىنە اينالادى، سونىمەن بىرگە، سەرىكتىك ٴۇشىن 300 مىڭ يۋاننان استام وزىندىك قۇندى ۇنەمدەيدى.
حى تاۋ سەرىكتەستىكتىڭ دانەكەرلەۋ ٴبولىمىنىڭ باستىعى، ول قاي ـ قاشان دا وزىنە قاتاڭ تالاپ قويىپ، قىزمەتتە اتويلاپ الدا ٴجۇرىپ، باستاماشىلدىقپەن ۇلگى كورسەتىپ، لات، اۋىر، جاپالى، قاتەرلى جۇمىستاردا الدا ٴجۇرىپ، جەكە باسىنىڭ پايدا ـ زيانمەن ەسەپتەسپەيدى.
كۇيتۇن گازەتى مەكەمەسىنىڭ جىلۋ قۇبىرىن ورناتۋ بارىسىندا، ۋاقىت تىعىز، مىندەت اۋىر بولادى، قۇبىر جولى شىتىرمان، كۇردەلى، جۇمىس ورنى تار قۇدىقتا بولىپ، ەگەر شۇعىل ورىندالماسا، نەشە ٴجۇز وتباسىنىڭ قالىپتى جىلۋمەن قامدالۋىنا ىقپال جاسايتىن ەدى. حى تاۋ ٴۇرتىس 10 نەشە ساعات جۇمىس ىستەگەن جاعدايدا وسى ورىنعا جوتكەپ اكەلىنەدى، ول قۇبىرداعى توتەنشە كۇردەلى، نەشە جۇز دانەكەرلەۋ اۋىزىن كورىپ ٴارى - ٴسارى بولماستان، دانەكەرلەۋ جابدىعىن الىپ قۇدىققا سەكىرىپ تۇسەدى. ول دانەكەرلەۋ جۇمىستارىن ٴبىر - بىرلەپ بىتىرەدى، دانەكەرلەۋ اۋىزىنىڭ ورنى ۇقسامايتىن، كەيبىر دانەكەر اۋزىن جابدىقتار توسىپ تۇراتىن، كەيبىرى قۇبىرمەن وتە جاقىن، كەيبىرى قۇبىر تورىنىڭ ەڭ ىشىنە جاسىرىنعان... تۇرلىشە دانەكەرلەۋ تۇيىندەرىنە تۇرلىشە شەشۋ ٴادىسىن قولدانۋعا تۋرا كەلەتىن ەدى، بىردەن - ٴبىر وزگەرمەيتىنى ەكى ٴتۇرلى جۇمىس بەينەسى: جۇرەلەپ وتىرىپ نەمەسە شالقادان جاتىپ دانەكەرلەۋ. وسى قيىن ماسەلەنى كوزدە ۇستاعان حى تاۋ ٴبىر جاعىنان ىستەپ، ٴبىر جاعىنان شەشۋ ٴادىسىن قاراستىرىپ، دانەكەرلەۋ جۇمىسىن تىندىرىپ وتىرادى... حى تاۋدىڭ دانەكەرلەگىشى ٴتۇن بويى توقتاماي، ەرتەسى ساعات 12 گە دەيىن جالعاسادى، ول نەشە جۇزدەگەن كۇردەلى دانەكەرلەۋ اۋزىن جالعىز ٴوزى دانەكەرلەپ شىعادى. قىزمەتتەستەرىنىڭ كومەگىندە، قۇدىق اۋزىنان شىققان ول تەرەڭ تىنىس الىپ جەرگە قۇلاپ تۇسەدى، ەكى كوزى دانەكەرلەگىش نۇرىنان اۋىر دارەجەدە زاقىمدالىپ، كوزىنەن جاس توقتاماي اعادى. تەكسەرۋ بارىسىندا حى تاۋ دانەكەرلەگەن نەشە جۇزدەگەن قۇبىر اۋزىنىڭ تولىمدىلىعى % 100 كە جەتىپ، سەرىكتەستىكتىڭ باسشىلارى مەن جۇمىس تاپسىرۋشى جاق ۋاكىلدەرىنىڭ ماداعىنا يە بولادى.
ٴتۇرلى قيىندىق دارەجەسى جوعارى جۇمىستار حى تاۋ ٴۇشىن وڭاي جۇمىس سانالادى، ٴار جولى جاپالى مىندەت بولسا تەحنيكاعا ىسىلعان، ميى سەرگەك، ٴادىسى كوپ «ەكپىندى» حى تاۋ ەڭ الدا جۇرەدى.
حى تاۋ قاراپايىم دانەكەرلەۋشى بولعانىمەن، بارلىق جەردە وڭ ەنەرگيا تاراتىپ جۇرەدى، مۇنداي وڭ ەنەرگيا ونىڭ قيىندىعى، كۇشەمەلىلىگى جوعارى جانە جۇمىس مەرزىمى ۇزاق جۇمىستاردى تاباندىلىقپەن ىستەپ، جۇمىس مىندەتىن تابىسپەن ورىنداپ، سەرىكتەستىكتىڭ بەدەلىن ٴاردايىم قورعاعاندىعىنان ايگىلەنەدى. مەيلى قانشالىق شارشاسا دا، قانشالىق قيىن بولسا دا، حى تاۋ كۇلىمسىرەۋ ارقىلى ماڭايىنداعى ٴاربىر ادامدى اسەرلەندىرىپ، ٴاربىر قىزمەتتى ۇقىپتى ىستەۋ ارقىلى شەبەرلەر رۋحىن ايگىلەدى!