جياڭسۋ ولكەسىنىڭ شينجياڭعا باعىتتامالى كومەگى سۋ ونىمدەرى باعىمشىلىعىنا دەم بەردى

56 ميلليون قىسقىش شاباعى چاپچال اۋدانىنا كومەككە بەرىلدى

تىلشىلەرىمىز دۋ لەي، لي تاۋ حابارلايدى. 5 - ايدىڭ 10 - كۇنى تاڭعى ساعات 3 مولشەرىندە چاپچال سىبە اۆتونوميالى اۋدانى كەن اۋىلىنىڭ قولتىقشي قىستاعىنداعى ىلە يۋەران ەكولوگيالىق اۋىل شارۋاشىلىعى شەكتى سەرىكتەستىگىنىڭ باعىمشىلىق بازاسىندا جياڭسۋ ولكەلىك اۋىل شارۋاشىلىعى، اۋىل - قىستاق مەڭگەرمەسى كومەككە اتاعان 56 ميلليوننان استام بادىراق كوز قىسقىش شاباعىن سەرىكتەستىك قىزمەتكەرلەرى قابىلداپ الىسىمەن دەرەۋ كولشىككە قويا بەردى. 

«بۇل قىسقىش شاباعى دەر كەزىندە جەتكىزىلدى، ايتپەگەندە سەرىكتىگىمىزدىڭ الداعى 2 جىلداعى ٴوندىرىسى ايتارلىقتاي بولماس ەدى. ٴبىز جياڭسۋ ولكەسىنەن قىسقىش شاباعىن ەنگىزىپ، ٴبىر جىل باعۋ ارقىلى ودان تاعى قىسقىش شاباعىن جەتىلدىرەمىز. بۇل رەت جياڭسۋ ولكەلىك اۋىل شارۋاشىلىعى، اۋىل - قىستاق مەڭگەرمەسى قاتىستى تاراۋلاردى ارناۋلى سايكەستىرىپ، اۋە جولى جاسىل ارناسىن اشىپ، قىسقىش شاباعىن بىرگە تابىس ەتتى» دەدى ىلە يۋەران ەكولوگيالىق اۋىل شارۋاشىلىعى شەكتى سەرىكتەستىگىنىڭ جاۋاپتىسى گۋان شياۋپيڭ.

2016 - جىلدان بەرى جياڭسۋ ولكەلىك اۋىل شارۋاشىلىعى، اۋىل - قىستاق مەڭگەرمەسى، جياڭسۋ ولكەلىك بالىق شارۋاشىلىعى تەحنيكاسىن جالپىلاستىرۋ ورتالىعى، جياڭسۋ ولكەلىك تۇششى سۋ بايلىعىن زەرتتەۋ ورنى سياقتى ورىندار مەن تاراۋلار تەحنيكا، زات، قارجى جاقتاردان كومەك بەرۋ تاسىلىمەن ىلە وبلىسىنا توتە قاراستى ورىنداردىڭ سۋ ونىمدەرى باعىمشىلىعىن كولەمدەندىرۋىنە كومەكتەسىپ، شارۋالاردىڭ كىرىسىن ارتتىرىپ، اۋقاتتانۋىنا باستاماشى بولدى. 2017 - جىلدان 2019 - جىلعا دەيىن جياڭسۋ ولكەلىك اۋىل شارۋاشىلىعى، اۋىل - قىستاق مەڭگەرمەسى ٴار جىلى ىلە وبلىسىنا قۇنى 50 مىڭ يۋاندىق چاڭجياڭ 1 -، 2 -ٴنومىرلى بادىراق كوز قىسقىش شاباعىن كومەككە اتاسا، 2020 - جىلى قۇنى 200 مىڭ يۋاندىق چاڭجياڭ 1 -، 2 -ٴنومىرلى بادىراق كوز قىسقىش شاباعىن كومەككە اتاعان.   بۇدان تىس، جياڭسۋ ولكەلىك اۋىل شارۋاشىلىعى، اۋىل - قىستاق مەڭگەرمەسى تاعى ىلە وبلىسىنا توتە قاراستى ورىندارعا كريت قىسقىشتىڭ  اتالىعىن، التىن سازان شاباعىن، وڭتۇستىك امەريكا شايان شاباعىن، بلۋشاك بالىعىن، تەڭىز شايانى شاباعىن كومەككە بەرگەن.

گۋان شياۋپيڭ بىلاي دەدى: «وتكەن ٴبىرقانشا جىلدا جياڭسۋ ولكەسى تەحنيكالىق جاقتان قولداۋ كورسەتۋ، ارناۋلى قىزمەتكەرلەردى تاربيەلەۋ، ساپالى شاباق ەنگىزۋ سياقتى جاقتاردا سەرىكتىگىمىزگە وراسان زور كومەك كورسەتتى. بۇرىن سەرىكتەستىگىمىز ەنگىزگەن بادىراق كوز قىسقىش شاباعىنىڭ قاتارعا قوسىلۋ سالىستىرماسى نە ٴبارى %30 اينالاسىندا بولاتىن. جياڭسۋ ولكەلىك اۋىل شارۋاشىلىعى، اۋىل - قىستاق مەڭگەرمەسىنىڭ تەحنيكالىق جاقتان قولداۋ كورسەتىپ، كومەكتەسۋىندە بادىراق كوز قىسقىش شاباعىنىڭ قاتارعا قوسىلۋ سالىستىرماسى %60 كە جوعارىلادى. 2021 - جىلى سەرىكتىگىمىزدىڭ جىلدىق ٴونىم قۇنى 2 ميلليون يۋانعا جەتتى».

جياڭسۋ ولكەسىنىڭ ىلە وبلىسىنا باعىتتامالى كومەك بەرۋ الدىڭعى شەپ قولباسشىلىق شتابى كاسىپ جانە جۇمىستاندىرۋ گرۋپپاسىنىڭ ورىنباسار باستىعى، وبلىستىق اۋىل شارۋاشىلىعى، اۋىل - قىستاق مەكەمەسى پارتيا باسشىلىق گرۋپپاسىنىڭ مۇشەسى، ورىنباسار مەكەمە باستىعى چىن حۋا بىلاي دەپ تانىستىردى: «ىلە اڭعارىنىڭ جاراتىلىستىق شارت - جاعدايى ابزال، سۋ بايلىعى مول، سۋ ونىمدەرىن وسىرۋگە ۇيلەسەدى. جاقىنعى جىلداردان بەرى جياڭسۋ ولكەسىنىڭ شينجياڭعا باعىتتامالى كومەك بەرۋ ارناسى ارقىلى ىلە وبلىسىنا توتە قاراستى ورىندار جياڭسۋ ولكەسىنەن قىسقىش، تەڭىز شايانى سياقتى سۋ ونىمدەرى تۇقىمىن ەنگىزىپ، سىناق رەتىندە باقتى. ونىمدىلىگى جاعىنان الىپ ايتقاندا، وبلىسقا توتە قاراستى ورىندارداعى سۋ ونىمدەرى باعىمشىلىعى تابىسقا جەتتى دەۋگە بولادى. ونىڭ ۇستىنە ساپاسى دا ايتارلىقتاي جاقسى بولدى. سونىمەن بىرگە، جياڭسۋ ولكەلىك اۋىل شارۋاشىلىعى، اۋىل - قىستاق مەڭگەرمەسىندەگى قاتىستى مامانداردىڭ جەتەكشىلىگىندە ىلە وبلىسىنا توتە قاراستى ورىندارداعى سۋ ونىمدەرى باعىمشىلىعىنڭ تۇرلەرى ۇزدىكسىز مولايىپ، بۇرىنعى جاي داعدىلى بالىق باعىمشىلىعىنان دامىپ قازىرگى قىسقىش، تەڭىز شايانى، وڭتۇستىك امەريكا بوز شايانى، بارىس بلۋشاك بالىعى سياقتى كوپ تۇردەگى سۋ ونىمدەرى باعىمشىلىعىنا كەڭەيدى».

ٴتىلشىنىڭ وبلىستىق اۋىل شارۋاشىلىعى، اۋىل - قىستاق مەكەمەسىنەن ۇعىسۋىنشا، 2021 - جىلى وبلىسقا توتە قاراستى ورىنداردىڭ سۋ ونىمدەرى باعىمشىلىعى كولەمى 20 مىڭ مۋدان اسىپ، جالپى ٴونىم مولشەرى 19 مىڭ 200 تونناعا جەتكەن؛ مۇندا باستىسى سازان، ٴدوڭماڭداي بالىق، قازانباس بالىق سياقتى داعدىلى سۋ ونىمدەرىن باعۋ نەگىز ەتىلىپ، ٴونىم مولشەرى جالپى ٴونىم مولشەرىنىڭ %78 ىن يەلەپ، قالعان بەكىرە، شىبار كۇمجا بالىعى، قىسقىش، تەڭىز شايانى سياقتىلاردىڭ ٴونىم مولشەرى جالپى ٴونىم مولشەرىنىڭ %22 ىن يەلەگەن؛ سۋ ونىمدەرى باعىمشىلىعى سەلبەستىك كووپەراتيۆتەرىنىڭ سانى 38 گە، بالىق باعىمشىلىعىمەن شۇعىلداناتىن وتباسى 172 گە جەتىپ، نەگىزىنەن قۇلجا قالاسى، قۇلجا اۋدانى، چاپچال اۋدانى، نىلقى اۋدانى سياقتى اۋدان - قالالارعا شوعىرلانعان ەكەن.