汉文 ىلە اقپارات تورابىنا حوش كەلدىڭىزدەر!
قولونەرشى ەرقاناتتىڭ كاسىپ اشۋ ارمانى
2022-06-21 10:57:46     كورىلىم:رەت كەلۋ قاينارى:ىلە گازەتى  جاۋاپتى رەداكتور:جازيرا بولاتباي قىزى

حابارىن جازىپ، سۋرەتىن تۇسىرگەن ۋاڭ جىحۋا (ٴوز ٴتىلشىمىز)


قۇلجا قالاسىنىڭ التىشۋار ٴمالىسى كورىنىس رايونىندا ەرقانات ەرلىبەك ۇلى قولمەن تىگىلگەن اياق كيىم دۇكەنىن اشتى، ول نازىك جۇمىستاردى مۇقيات ىستەپ، قاجىماس تاباندىلىعى مەن بەرىك سەنىمى ارقىلى قولونەر شەبەرلەرىنىڭ اۋەلگى ماقساتى مەن ونەرىن ايگىلەپ، ٴوزىنىڭ كاسىپ اشۋ ارمانىنا قۇلاش سەرمەدى. 

6 ـ ايدىڭ 14 ـ كۇنى اق تاڭنان ەرقانات قولونەر دۇكەنىنە كەلىپ تازالىعىن ىستەپ، قۇرال ـ سايماندارىن رەتتەپ، ماتەريالدارىن دايىنداۋمەن ابىگەر بولدى، بۇل ونىڭ كۇندەلىكتى داعدىلى تۇرمىسىنا اينالعان، تاپسىرىس ارقىلى قولمەن جاسالعان بىلعارى اياق كيىم، تەرى ويما سۋرەت، تەرى بىلەزىك، تەرى قولونەر بۇيىمدارى سياقتى ونىمدەر − ول ساتاتىن نەگىزگى تاۋارلار. كوپتەگەن ساياحاتشى وسى ارادان ەستەلىك بۇيىمدار ساتىپ الادى.

ۇرىمجىدەن كەلگەن تاڭ چۇن تاجىريبەلى ساياحات اۋەسكەرى، سول كۇنى ول ەرقاناتتىڭ دۇكەنىنەن ويىنداعىداي قولونەر تەرى ويما سۋرەت ساتىپ الدى. «دۇكەندەگى ٴاربىر بۇيىمدى ەگجەي ـ تەگجەيلى كورىپ، كوپ ساندىسىن ۇناتتىم، دۇكەن قوجايىنى جاسامپازدىق رۋحقا باي ەكەن. مىنا تەرى سۋرەت بىردەن كوڭىلىمنەن شىقتى، دۇكەن قوجايىنى دا اشىق - جارقىن جان ەكەن، ماعان ٴتيىمدى باعامەن ساتىپ بەردى. كوپتەگەن بۇيىمنىڭ ٴمانى ونىڭ وزىندىك قۇنىندا ەمەس، قايتا ونىڭ كەلىپ شىعۋ حيكاياسى مەن وعان سىڭدىرىلگەن مەيىر - ماحاباتتا». تاڭ چۇن اتتانار الدىندا تەرى سۋرەتتى قولىنا الىپ، ەرقاناتتى تەرى سۋرەتتىڭ تەرىس بەتىنە ٴوزى مەن ەرقاناتتىڭ ەسىمىن، ۋاقىتىن تاڭبالاتىپ، ونى وسى رەتكى ساياحاتىنىڭ ەستەن كەتپەس ەستەلىگى ەتتى.

بيىل 26 جاستاعى ەرقانات قۇلجا قالاسى بايانداي قالاشىعى سۋلى الماتى قىستاعىنداعى مالشى وتباسىندا دۇنيەگە كەلگەن، ورتا مەكتەپتى بىتىرگەننەن كەيىن قورعاس وتكەلىندە جۇمىس ىستەگەن. ول ارەدىكتە دوۋيىن دەتالىنان اياق كيىم جاسايتىن كەسكىندى كورىپ، وعان قىزىعادى، 2 مىڭ يۋاننان استام قاراجات جۇمساپ اياق كيىم جاساۋ قۇرال - سايماندارىن ساتىپ الىپ، توراپتاعى ۇستازدان اياق كيىم جاساۋدى ۇيرەنەدى. ۇزدىكسىز ۇيرەنۋ بارىسىندا، ول ٴوزى قىزىعاتىن ٴىسى مەن ٴومىر بەتالىسىن شىن مانىندە تاپقانداي بولادى، 2019 ـ جىلى 10 ـ ايدا ول جۇمىستان باس تارتىپ، انحۇيعا ارنايى بارىپ ونەر ۇيرەنەدى. 

ەرقاناتتىڭ ۇستازىنىڭ اتى جاڭ لەيلەي، انحۇيدىڭ فۋياڭ قالاسىندا اياق كيىم تىگۋمەن شۇعىلدانادى، بۇكىل ەلدىڭ جەر - جەرىنەن وعان تامسانا كەلىپ ونەر ۇيرەنەتىندەر بارشىلىق. «مەن انحۇيدا بىرنەشە اي تۇردىم، ۇستازىمنىڭ جەتەكشىلىگىندە، تەرى يلەۋ، اياق كيىم جاساۋ، اياق كيىم ولشەۋ، جوبالاۋ، بوياۋ سياقتى جۇمىس تارتىپتەرىن قامتىعان اياق كيىم تەحنولوگياسىن ۇيرەندىم. ۇستازىم ماعان ٴوز بالاسىنداي مامىلە جاسادى، انحۇيدا ونەر ۇيرەنىپ قانا قويماي، ونان دا ماڭىزدىسى، قىمباتتى سۇيىسپەنشىلىككە يە بولدىم» دەدى ەرقانات.

ونەر ۇيرەنىپ قايتىپ كەلگەننەن كەيىن، ەرقانات بايانداي قالاشىعىندا اياق كيىم تىگۋ شەبەرحاناسىن اشادى، ٴبىر جىل تيجارات جۇرگىزگەننەن كەيىن، ول التىشۋار ٴمالىسى كورىنىس رايونىنىڭ ساياحاتتى دامىتۋ ساۋدا ورايىن يگەرىپ، قازىرگى دۇكەندى مايعا الىپ، سەرىكتەستىگىن تىركەۋگە الدىرادى. «وسىنداي اياق كيىم دۇكەنى جىلىنا 100 پار اياق كيىم تىگىلگەندە قالىپتى ساۋدا اينالىمىن جۇرگىزە الادى، ٴبىز 2 جىلدا 400 نەشە پار اياق كيىم تىگەمىز، بايانداي قالاشىعىنان 5 جۇمىسشى جالدادىم، ولاردىڭ ايلىق ەڭبەكاقىسى از بولعاندا 2 - 3 مىڭ يۋان، جوعارى بولعاندا 6 - 7 مىڭ يۋان. قولمەن جاسالعان اياق كيىمنىڭ باعاسى ٴبىرشاما قىمبات بولعانىمەن، اياققا جايلى بولىپ، بازاردا بارعان سايىن مويىندالىپ كەلەدى، مەن ٴتىپتى دە كوپ اۋىلداستارىمدى ونەرگە سۇيەنىپ، قاجىرلىلىقپەن اۋقاتتانۋعا باستاۋدى ويلاستىرۋدامىن» دەدى ول. 

ەرقاناتتىڭ كىشى اكەسى مىرزاتبەك مۋسا ۇلى بۇرىن ۇساق ـ تۇيەك جۇمىس ىستەيتىن، تۇراقتى كىرىسى جوق بولاتىن. كاسىپ اشقاننان باستاپ ەرقانات ونى كومەكتەسۋگە شاقىردى، قازىر ونىڭ اعايى ونەر ۇيرەنىپ قانا قويماي، دوۋيىندا تىكە تاراتۋدى ۇيرەنىپ، كىرىسى بۇرىنعىدان ٴبىر ەسە ارتقان. 

ەرقانات ۇيرەنگەن اياق كيىم تىگۋ ونەرى «سەرچارلز گۋدەر اياق كيىم تەحنولوگياسى» دەپ اتالادى، ول اياق كيىم تىگۋدىڭ ەرەكشە جاساۋ ونەرى. ول تانىستىرىپ بىلاي دەدى: «اياق كيىم تىككەندە، ىشكى جيەك پەن سرتقى جيەكتى بويلاي، قوس قابات تىگۋ تاسىلىمەن اياق كيىمنىڭ بەتى مەن تابانىن مىقتاپ ٴبىر تۇلعالاندىرىپ، سوعىلۋ مەن بۇكتەلۋگە توزىمدىلىگىن ارتتىرادى، سونىمەن بىرگە اياق كيىمنىڭ تابانىندا بوس قۋىس قالدىرىلىپ، ىلعالدىقتان اۋاشالايدى، تاعى ٴبىر قابات جۇمساق اعاش توسەپ، سول ارقىلى اياق كيىمنىڭ اۋا وتكىزگىشتىگىنە كەپىلدىك ەتىلەدى. تەر ىعىستىرۋ يقۋاتىنا كەپىلدىك ەتۋدەن سىرت، اياق كيىمنىڭ تابانىندا دا تابيعي اياق ٴىزى قالىپتاسادى، بۇل اياق كيىمدى قاريدارلار 15 كۇن اينالاسىندا كيگەندە، اياق كيىمنىڭ تابانى اياققا قاراي بەيىمدەلىپ، جانعا جايلى بولا تۇسەدى». 

ەرقانات دوۋيىن تەكشەسىندە اياق كيىم تىگۋدىڭ جۇمىس ٴتارتىبى، شەبەرحانانىڭ كۇندەلىكتى جۇمىستارى سياقتىلاردى بەينە - كەسكىن ارقىلى تاراتقاننان كەيىن، كوپتەگەن ادامداردىڭ القاۋىنا يە بولدى، قازىرگە دەيىن جانكۇيەرى 40 مىڭنان اسقان، تاپسىرىستىڭ %60 تەن استامى دوۋيىن تەكشەسىنەن كەلەدى، الارماندارى ەلدىڭ جەر ـ جەرىندە بار، ولار تاپسىرىپ العان اياق كيىمدەرىنە ٴدان ريزا ەكەن.

ەرقانات بايىرعى جارتاس سۋرەتتەرىن وتە ۇناتادى، اياق كيىم تىككەندە ول وسى ورنەكتەردى اياق كيىمنىڭ بەتىنە باسىپ، وزگەشە جوبالاۋ ونەرىن ايشىقتايدى. جۇمىستان سىرت، ەرقانات كوركەمونەر كاسىبى ساباعىن وزدىگىنەن ۇيرەنۋگە تاباندى بولىپ، ٴوزىن ساپا جانە ەستەتيكا جاعىنان ونان ارى دامىتىپ، قارسى الۋعا بولەنەتىن ٴتىپتى دە كوپ اياق كيىم ۇلگىسى مەن ساياحات ەستەلىك بۇيىمدارىن جوبالاۋدى ويلاۋدا. ٴوزىنىڭ جاسامپازدىق جوباسىنان سىرت، الارماندار قامداعان اياق كيىم ۇلگىسىن ول نەگىزىنەن %90 تەن جوعارى قالپىنا كەلتىرە الادى.

شەبەرحاناداعى ەرقاناتتىڭ جيناعان كونە بۇيىمدارى دا ساياحاتشىلاردى باۋرادى. كونە ماي شام، القا ـ مونشاق قوبديشاسى، ساماۋىرىن، مىس تەگەنە ... ٴاربىر كونە زاتتىڭ استارىندا ايتىپ تاۋىسقىسىز حيكايالار جاتىر. «مەن ٴاربىر قاريدارعا جايلى اياق كيىم تىگىپ بەرۋمەن بىرگە، ولارعا ىلەنىڭ حيكاياسى مەن مادەنيەتىن كوبىرەك ۇعىندىرعىم كەلەدى». تۋعان جەردىڭ داڭقىن اسپانداتاتىن ۇكىلى ٴۇمىت ەرقاناتتىڭ جانارىنان ۇشقىن مەنمۇندالاتتى.