汉文 ىلە اقپارات تورابىنا حوش كەلدىڭىزدەر!
قۇلجا - موڭعۇلكۇرە تاس جولىندا اۆتوموبيل قاتىناۋ 6 ـ ايدىڭ 25 ـ كۇنى قالپىنا كەلتىرىلدى
2022-06-27 16:49:50     كورىلىم:رەت كەلۋ قاينارى:ىلە گازەتى  جاۋاپتى رەداكتور:گۇلدەن ماقسات قىزى

تىلشىلەرىمىز حان شاشا، ٴپاتيما، ليۋ چىڭگاڭ، ەرىكتى ٴتىلشى جاڭ لۋ حابارلايدى. جول بارلاۋ، اداقتاۋ سياقتى قىزمەتتەردى ورىنداپ بولعاننان كەيىن، 8 ايدان استام جىم ـ جىرت تۇرعان قۇلجا - موڭعۇلكۇرە تاس جولى جاڭا ٴبىر جىلدىق ساياحاتتىڭ قاۋىرت مەزگىلىن قارسى الدى. 6 ـ ايدىڭ 25 ـ كۇنى چاپچال سىبە اۆتونوميالى اۋدانى نۇراقىن حۇڭچي مۋيە بازاسى اۆتوكولىككە لىق تولىپ، ەرەكشە دۋمانعا بولەندى، موتوتسيكل، ۇيشە اۆتوكولىك، دالالىق اۆتوكولىك سياقتى تۇرلىشە تيپتەگى جەكە كولىكپەن جۇرەتىن شارشى توپ ساقاداي سايلانىپ جاتتى.

ساعات 11 دە بۇيرىق بەرىلىسىمەن تۇتاس الاڭداعى اۆتوكولىكتەر سيگىنال شالىپ، ٴوز اۆتوكولىگىمەن ساياحاتتاۋشىلار موڭعۇلكۇرەگە قاراي اعىلىپ، ولكە تاس جولى 237 ـ لەنياسىنىڭ قۇلجا - موڭعۇلكۇرە تاس جولىندا تۇتاس لەنيا بويىنشا اۆتوموبيل قاتىناۋ قالپىنا كەلتىرىلدى. سالت الاڭىندا ادەبيەت ـ كوركەمونەر اۋەسكەرلەرى ويناقى ٴبي بيلەپ، الىستان كەلگەن قوناقتاردى قارسى الدى. وسى ارالىقتا ىلە توراپ جاسامپازدىق وداعىنىڭ 9 - رەتكى ماتەريال جيناقتاۋ بازاسى «حۇڭچي مۋيە بازاسىنا» ماڭدايشالىق بەرۋ سالتى وتكىزىلدى.

گۋاڭشي اۆتوموبيلمەن ساياحاتتاۋ توبىنداعى 9 ادام شينجياڭعا ساياحاتتاي كەلىپ، قۇلجا - موڭعۇلكۇرە تاس جولىندا اۆتوكولىك قاتىناۋدىڭ قالپىنا كەلگەنىن بىلگەننەن كەيىن، ولار تۇندەلەتىپ قاشقاردان ىلەگە كەلگەن. ساياحاتتاۋ توبىنىڭ مۇشەسى زىڭ حانىم تەبىرەنە: «قۇلجا - موڭعۇلكۇرە تاس جولىنىڭ بويىنداعى كورىنىستەر، بەينە، سۋرەتتەي كوركەم ەكەنىن، <ٴبىر كۇندە ٴتورت ماۋسىمدى، جول بويى تۇرلىشە اۋا رايىن كورەسىز> دەپ سۋرەتتەلگەندەي كورىكتى كورىنىستەردى تاماشالاۋعا بولاتىنىن، مايتاۋ - كۇشار تاس جولىنىڭ سىڭارى دەپ اتالاتىنىن ەستىگەنمىن. بۇل جولدى كورۋدى كوپتەن ارمانداپ ٴجۇر ەدىم، بۇگىن اقىرى كوردىم!» دەدى.

قۇلجا - موڭعۇلكۇرە تاس جولىنىڭ S237 لەنياسىنىڭ K83-K47  (نۇراقىن - موڭعۇلكۇرە) جول بولەگىندە قىس ماۋسىمىندا قار قالىڭ تۇسەدى، كوشكىن تۇسەتىن، بۇرقاسىندى جول بولەگى ٴبىرشاما كوپ، ونىڭ ۇستىنە جول بويى اينالمالار كوپ بولعاندىقتان، قىس مەزگىلىندە اۆتوموبيلدەردىڭ قالىپتى قاتىناۋىنا كەپىلدىك ەتۋ قيىن، سوندىقتان، ٴار جىلى 10 - ايدىڭ ورتا شەنىنەن كەلەسى جىلى 5 - ايدىڭ سوڭى مەن 6 - ايدىڭ باسىنا دەيىن قاتىناۋعا تيىم سالىنادى.

اۆتوموبيل اترەتىنىڭ جولعا شىققانىن كورگەن «شينجياڭدا ساياحاتتاپ، اسقار تاۋلاردى سۋرەتكە ٴتۇسىرۋ» دەگەن توراپ اتى بار فوتوگراف ايرىقشا جەلپىندى، ول تىلشىگە بىلاي دەدى: «قۇلجا - موڭعۇلكۇرە تاس جولىنىڭ ەڭ كوركەم ماۋسىمى كەلدى، جول بويىندا 360 گرادۋستىق ۇلكەن بۇرىلىستى قامتىعان قاتەرلى تاۋ جولى، كورىنىسى كوز سۇرىندىرەتىن كوركەم كورىنىستىك داڭعىل جول بار، اقشا بۇلت كوز تارتادى، قارلى تاۋ، ورمان، جايىلىم، بۇلاق، ٴارقانداي تۇرعىدان قاراساڭىز كورىنىستى اڭعاراسىز، بۇل ارا فوتوگرافتاردىڭ اڭساعان جەرىنە اينالعان. مەن دە ىلەنىڭ كوركەم كورىنىسىن سۋرەتكە ٴتۇسىرىپ، كوپتەگەن قولداۋشى تاپتىم، بۇگىن كوركەم كورىنىستى كوبىرەك سۋرەتكە الىپ، بۇكىل ەلدىڭ جەر - جەرىندەگى ساياحاتشىلاردىڭ ىلەنىڭ تاماشا كورىنىسىن بىلۋىنە مۇمكىندىك جاسايمىن».

اۆتوكولىك قاتىناعاننان كەيىن قۇلجا - موڭعۇلكۇرە تاس جولىندا 7 ورىندىقتىدان (7 ورىندىقتىنى قامتىمايدى) جوعارى ٴتۇرلى اۆتوموبيلدەر، 5 ورىندىقتىدان (5 ورىندىقتىنى قامتيدى) جوعارى تيجارات سيپاتىنداعى اۆتوموبيلدەر، ٴىرى تۇرپاتتى جۇك اۆتوموبيلدەرى، جارتىلاي تىركەمەلى سۇيرەۋىش اۆتوموبيلدەر، تىركەمەلى اۆتوموبيلدەر، حاۋىپتى حيميالىق زاتتاردى تاسىمالدايتىن اۆتوموبيلدەر، ٴىرى، ورتاشا تۇرپاتتى قۇرىلىس ماشينالارى، اۋىل شارۋاشىلىق تراكتورلارى سياقتى اۆتوكولىكتەردىڭ قاتىناۋىنا تيىم سالىنادى. قۇلجا - موڭعۇلكۇرە تاس جولىنىڭ تاۋلى رايونىنداعى جول بولەكتەرىنىڭ اينالما جولى ٴبىرشاما كوپ بولعاندىقتان، جول بويى جىلدامدىق شەكتەۋ بەلگى تاقتالارى قويىلعان، تۇتاس لەنيادا جىلجىمالى جىلدامدىق ولشەگىش بار، ساعات 22 دەن كەلەسى كۇنى ساعات 9 عا دەيىن بارلىق اۆتوكولىكتەردىڭ قاتىناۋىنا تيىم سالىنادى.

تاياۋ جىلداردان بەرى ساياحاتشىلاردىڭ تاماشالاۋ، ساياحاتتاۋ قاجەتىن قاناعاتتاندىرۋ ٴۇشىن، جەرگىلىكتى قاتىستى تاراۋلار قۇلجا - موڭعۇلكۇرە تاس جول بويىنداعى كورىنىس تاماشالاۋ، ايالداۋ ٴتۇيىنى، بەلگى جۇيەسى، قىزمەت وتەۋ رايونى، اۆتوكولىك توقتاتۋ رايونى سياقتى سايكەستى قىزمەت وتەۋ قۇرىلعىلارىن ۇزدىكسىز كەمەلدەندىرىپ، بازانىڭ سەيىل  - سەرۋەن، كوڭىل اشۋ قىزمەت وتەۋ ساپاسىن جوعارىلاتىپ، جەكە كولىكپەن ساياحاتتاۋعا قىزمەت وتەۋ قۇرىلعىلارى قۇرىلىسىن كۇشەيتتى. قازىر جول بويىندا جيىنى 8 كورىنىس تاماشالاۋ تەكشەسى مەن كورىنىس ٴتۇيىنى بار، اۋليە شوقى كورىنىس تاماشالاۋ تەكشەسىندە بيىكتە تۇرىپ الىسقا كوز جىبەرىپ، الاڭسىز سۋرەتكە ٴتۇسىپ، كورىنىس تاماشالاۋعا بولادى.