جاڭ جينفىڭ (ٴوز ٴتىلشىمىز)، زەينەپ گۋ جۇنۋاڭ (ەرىكتى ٴتىلشى)

سۋرەتتە: باقىتگۇل ٴوز وتباسىندا ىندەتتەن ساقتانۋ بىلىمدەرىن دومبىرا اۋەنىنە قوسىپ ۇگىت جۇرگىزۋدە.

زەينەپ گۋ جۇنۋاڭ فوتوسى 

جاقىنعى كۇندەردەن بەرى ٴۇنحات دوستىق شەڭبەرىندە ٴبىر كەسكىن قىزۋ اڭىس قوزعادى.

«ۇرەيلى ەمەس بۇل ۆيرۋس، بىرلىكتە الدىن الايىق.

ماسكا تاعىپ، توپتاسپاي، حالىققا ۇلگى بولايىق.

قىستاقتى ساناپ ۇيىڭە، تازالاپ ۇستاپ تۇرايىق، 

تازالىققا ٴمان بەرىپ، ۇنەمى قولدى جۋايىق.

الماستىرىپ ٴۇيدىڭ اۋاسىن، ۆيروستى اۋلاق قۋايىق ...»

كەسكىندە دومبىرا شەرتىپ وتىرعان چاپچال سىبە اۆتونوميالى اۋدانى قاينۇق قالاشىعى توپاعاش قىستاعىنىڭ تۇرعىنى باقىتگۇل ٴبيسۇلتان قىزى ەدى. ول دومبىراسىن قولىنا الىپ، ىندەتتەن ساقتانۋ - تىزگىندەۋ بىلىمدەرىن جاعىمدى اۋەنمەن،  قاراپايىم دا ۇعىنىقتى تىلمەن، جاندى دا ويناقى ورىنداپ، كوپشىلىكتى ەل بىرلىگىنەن قۇرىش قورعان ورناتىپ، ىندەتكە بىرگە قارسى اتتانۋعا جىگەرلەندىردى.

باقىتگۇل بيىل 35 جاستا، وتباسىندا 4 جان بار. پارتيانىڭ ابزال ساياساتىنىڭ دەمەۋىمەن جانە وزدەرىنىڭ قۇلشىنىسىمەن ٴبىر وتباسى ادامدارى باقىتتى تۇرمىس كەشىرۋدە. ول قىستاقتىڭ مادەنيەت - كوركەمونەر ۇگىت - لەكسيا اترەتىنىڭ مۇشەسى. ۇنەمى ٴان ايتۋ، تەرمە ورىنداۋ فورماسى ارقىلى پارتيانىڭ ابزال ساياساتى مەن ۇلتتار ىنتىماعىن ۇگىتتەپ، بۇقارانىڭ قىزۋ القاۋىنا بولەنىپ كەلەدى. 2014 - جىلى 7 - ايدا ول اۆتونوميالى وبلىس قۇرىلعاندىعىنىڭ 60 جىلدىعىن قۇتتىقتاۋ جانە 5 - كەزەكتى اقىندار ايتىسى مادەنيەت - ساياحات مەرەكەسىندە «جەكە تەرمە ورىنداۋ» بويىنشا 3 - دارەجەلى سيلىق العان بولاتىن.

توپاعاش قىستاعىنىڭ ٴبىرىنشى شۋجيى، وبلىستىق تۇرعىن ٴۇي الەۋمەتتىك قورىن باسقارۋ ورتالىعىنىڭ وسى قىستاقتا تۇراتىن «ۇعىسۋ، تيىمدىلىك جاساۋ، توعىستىرۋ» قىزمەت اترەتىنىڭ باستىعى سۋ ۋىنپيڭ بىلاي دەدى: «بۇدان كەيىن ٴبىز كادرلاردىڭ سوبيەكتيۆ بەلسەندىلىگىن ۇزدىكسىز ساۋلەلەندىرىپ، ىقپال قۋاتقا يە حالىق اراسىنداعى ونەرپازداردىڭ ٴوز دارىنىن ايگىلەۋىنە كوپتەپ وراي جاراتىپ، فەلياتون، ٴان، تەرمە ورىنداۋ سياقتى بۇقارا ۇناتاتىن ادەبيەت - كوركەمونەر تاسىلدەرى ارقىلى ىندەتتەن ساقتانۋ  - تىزگىندەۋ بىلىمدەرىن ۇگىتتەپ جانە جالپىلاستىرىپ، قىستاق تۇرعىندارىن ساقتانۋ - قورعانۋ شارالارىن سانالى قولدانۋعا باستايمىز».