ەرىكتى تىلشىلەر لي يۇڭ، شۋاق قورعاستان حابارلايدى. التىن كۇز 9 - ايدا قورعاس قالاسى يىشىعاشان سىبە ۇلتتىق اۋىلىنىڭ گۇل - قالامشا ٴوسىرۋ بازا قۇرىلىسى نىسانىنىڭ ناق مايدانىندا اۋىل شارۋاشىلىق عىلىم - تەحنيكا جىلىجايىنىڭ، كورمە زالىنىڭ بولات قوندىرعىسى ورناتىلىپ، جۇمىسشىلار جىلىجاي ٴىشىنىڭ قۇرىلعىلارىن ورناتتى.

بۇل نىسان جارسۋ قىستاعىندا بولىپ، مەملەكەت تاس جولى 312 - لەنياسىمەن ىرگەلەس، قاتىناسى قولايلى، جاعراپيالىق ورنى وزگەشە بولىپ، قورعاس قالاسىنىڭ اۋىل - قىستاقتى گۇلدەندىرۋدەگى ماڭىزدى نىساندارىنىڭ ٴبىرى سانالادى، يەلەگەن جەر اۋماعى 200 مۋلىق وسى نىسانعا ورتالىقتىڭ 5 ميلليون 370 مىڭ يۋان كەدەيلىكتەن ارىلتۋ مەن اۋىل - قىستاقتى گۇلدەندىرۋدى ۇشتاستىرۋ قارجىسى قوسىلعان.

قالالىق پارتكوم مەن ۇكىمەتتىڭ قولداۋىندا بۇل قىستاق اۋىل شارۋاشىلىق كاسىپ سالاسى قۇرىلىمىنا رەتتەۋ جۇرگىزىپ، جەرگىلىكتى ورىننىڭ ەكولوگيالىق ورتا ابزالدىعىن تياناق ەتىپ، گۇل - قالامشا ٴوسىرۋ بازاسىن قۇرىپ، «ٴبىر قىستاقتا ٴبىر ٴونىم بولۋ» ەرەكشە دامۋ ارناسىن قالىپتاستىردى.

قورعاس قالالىق پارتكوم ۇيىمداستىرۋ ٴبولىمىنىڭ وسى قىستاقتا تۇراتىن 1 - شۋجيى، «ۇعىسۋ، تيىمدىلىك جاساۋ، توعىستىرۋ» قىزمەت اترەتىنىڭ باستىعى لي جىچياڭ بىلاي دەدى: «قىستاعىمىزدىڭ قاتىناسى قولايلى، كليماتى ۇيلەسىمدى، توپىراعى قۇنارلى، جامىلعى بايلىعى مول، گۇل -قالامشا كاسىبىن دامىتۋ نەگىزى جاقسى. گۇل - قالامشا كاسىپ سالاسىنىڭ دامۋ دەڭگەيىن جوعارىلاتۋ ٴۇشىن، جوعارى دارەجەلى تاراۋلاردىڭ بار كۇشپەن قولداۋىندا، ٴبىز <پارتيا ياچەيكاسى + كاسىپورىن + سەلبەستىك كووپەراتيۆى + شارۋا وتباسى> ۇلگىسى ارقىلى ٴداستۇرلى جىلىجايدى گۇل - قالامشا، كوكونىس ٴوسىرۋ كاسىپ سالاسىنا ويىستىردىق».

نىساندى تيجارات ەتۋشى جاق − قورعاس اۋدانى يۇيلۇڭ گۇل ٴوسىرۋ - جەتىلدىرۋگە تەحنيكالىق كەڭەس بەرۋ، قىزمەت وتەۋ ورنىنىڭ جاۋاپتىسى جاڭ جۇنجۋ − جارسۋ قىستاعىنىڭ ادامى، ول اسكەري قوسىندا باۋ - باقشا تەحنيكاسىن ۇيرەنگەن، كاسىپ اۋىستىرعاننان كەيىن بەيجيڭ، جىڭجوۋ، شي - ان سياقتى جەرلەرگە بارىپ، كاسىپتىك كۋرستارعا قاتىناسىپ، باۋ - باقشا كاسىبى بويىنشا اعا تەحنيك تولىمدىلىق كۋالىگىن العان، گۇل ٴوسىرۋ، جاسىلداندىرۋ، باعىپ - باپتاۋ سياقتى جۇمىستارمەن شۇعىلدانعانىنا 30 جىلدان اسقان، تاجىريبەسى مول ادام ەدى.

جاڭ جۇنجۋ بىلاي دەدى: «قازىر بازامىز نەگىزىنەن راۋشان گۇلى، تۇبەكتە وسىرىلگەن تۇڭعيىق گۇلى، مۋدان گۇلى سياقتى ٴونىم تۇرلەرىن وسىرەدى، يۇننان ولكەسىنەن ٴيت اعاشى، پانار جەمىسى، نورۆەگيا ۇيەڭكىسى سياقتىلاردى قامتىعان نەشە 10 مىڭ ٴتۇپ جاڭا وسىمدىك ٴتۇرىن ەنگىزدىك. ٴبىز قورعاس، قۇلجا، كوكدالا قالاسى سياقتى ماڭايداعى اۋدان - قالالارمەن 6 ميلليون يۋاندىق تاپسىرىس توقتامىنا قول قويدىق».

يشىعاشان اۋىلىنىڭ گۇل - قالامشا ٴوسىرۋ بازا قۇرىلىسى نىسانى سالىنىپ بولعاننان كەيىن، گۇل - قالامشا ٴوسىرۋ، كوكونىس ەگۋ، گۇل تاماشالاۋ - گۇل تەرۋ، وسىمدىك ساۋداسى، عىلىم - تەحنيكا جالپىلاستىرۋ تاربيەسى ٴبىر تۇلعالانعان گۇل  - قالامشا كاسىبى بازاسىن قۇرۋ مەن شارۋالار ساياجايى، حالىقتىق تۇسەلحانا سياقتى سەيىل - سەرۋەن مادەنيەت - ساياحات كاسپتەرىن سايكەستىرىپ، قورعاستىڭ وسى زامانعى اۋىل شارۋاشىلىعىنىڭ ساپاسىن جوعارىلاتىپ، كىرىسىن ارتتىرۋعا دەم بەرەدى.