ەرىكتى ٴتىلشى ما يۇيحۇي حابارلايدى. قازىر − دۇمبە ٴبيداي ەگۋدىڭ دەر شاعى، قورعاس اۋدانىنىڭ جەر - جەرىندەگى شارۋا وتباسىلارى كۇزگى ەگىس ۋاقىتىن مىقتى يگەرىپ، اتىزداعى ەگىس ماشينالارىنىڭ گۇرىلدەگەن داۋىسىمەن 120 مىڭ مۋ جەرگە دۇمبە ٴبيداي ەگۋدى باستاپ كەتتى.

9 - ايدىڭ 24 - كۇنى قورعاس اۋدانى لاڭگار قالاشىعى قوسارىق قىستاعىنىڭ دۇمبە ٴبيدايدان ۇلگى كورسەتۋ رايونىندا قىستاق تۇرعىنى حۋاڭ فۋلي تىڭايتقىش جانە تۇقىم جەتكىزۋمەن قاربالاس بولىپ، تۇقىم سەبۋ ماشينالارى اتىزدا ارلى - بەرلى قايشالىسىپ، جۇمىس باسىندا قاربالاس كورىنىس قالىپتاستى.

قورعاس اۋدانى لاڭگار قالاشىعى اۋىل شارۋاشىلىق ماشينالارىن الدىن الا تەكسەرىپ رەمونتتاپ، ەگىنشىلەردىڭ ساپالى تۇقىم تاڭداۋىنا، عىلمي جولمەن تىڭايتقىش بەرۋىنە جەتەكشىلىك ەتتى. اۋىل شارۋاشىلىق ٴوندىرىس ماتەريالدارى تاراۋلارى دا تۇقىم، سۋلياۋ جارعاق، حيميالىق تىڭايتقىش سياقتى زاتتاردى ەرتە دايىنداپ، دۇمبە ٴبيداي ەگۋ جۇمىسىنىڭ ٴساتتى جۇرىلۋىنە تاماشا نەگىز قالادى.

قورعاس اۋدانى لاڭگار قالاشىعى پارتكومىنىڭ ورىنباسار شۋجيى، قالاشىق باستىعى ٴىلشات ٴدىلمۇرات بىلاي دەدى: «ٴبىز كۇزگى جيىن - تەرىن جۇمىستارىمەن بىرگە، كۇزگى ەگىس جۇمىستارىن دا كەشەۋىلدەتپەي، كۇزگى ەگىس جۇمىسىنىڭ الدىنداعى ٴاربىر بۋىندى قاتاڭ يگەرىپ، ەرتە دايىندالۋ، ەرتە تولىقتاۋ، ەرتە ورىنداۋدى ىسكە اسىرامىز. سونىمەن بىرگە، ٴتۇرلى حالىققا ٴتيىمدى ساياساتتاردى مۇقيات دايەكتىلەندىرىپ، تياناقتاندىرىپ، لاڭگار قالاشىعىنىڭ بيىلعى 15 مىڭ مۋلىق كۇزگى ەگىس مىندەتىن ساپاعا، سانعا كەپىلدىك ەتە وتىرىپ ورىندايمىز».

قورعاس اۋدانى كەڭ كولەمدە ۇگىتتەۋ، جۇمىلدىرۋ ارقىلى ەگىمشىلىك جوسپارىن عىلمي رەتتەپ، ەگىن ەگۋ مۇمكىندىگى بار جەرلەردى تولىق اشىپ، دۇمبە ٴبيدايدى تولىق ٴارى ويداعىداي ەگىپ، دۇمبە ٴبيداي تۇقىمىن سىڭىرۋگە بولاتىن جەردىڭ بارىنە سىڭىرۋگە، ەگۋگە تيىستى جەردىڭ بارىنە ەگۋگە بار كۇشپەن كەپىلدىك ەتتى.

قورعاس اۋداندىق اۋىل شارۋاشىلىق تەحنيكاسىن جالپىلاستىرۋ پۋنكتىنىڭ اعا اگرونومى يوۋ چىڭيۇڭ مىنانى ٴبىلدىردى: بيىل قورعاس اۋدانىندا كۇزدىك ٴبيداي ەگىلەتىن جەر اۋدانى 120 مىڭ مۋ، ٴاربىر اۋىل - قالاشىقتىڭ ەگىس اۋماعى مەن ەگىس داعدىسىنا ساي، تۇتاس اۋدانداعى تەحنيكتەر اتىز باسىنا بارىپ، بۇقاراعا كۇزگى ەگىس جانە تىڭايتقىش بەرۋ تەحنيكاسى جاقتارىنان دەر كەزىندە جەتەكشىلىك ەتىپ، ەڭ تاماشا تۇقىم ٴسىڭىرۋ مەزگىلىندە تۇقىم سىڭىرۋگە كۇش سالدى.