ٴتىلشىمىز لي يافىڭ حابارلايدى. 10 - اي كىرىسىمەن تەمپەراتۋرا ٴبىرشاما تەز تومەندەدى، قيىنشىلىعى بار بۇقارانىڭ قىستان قىسىلماي وتۋىنە كەپىلدىك ەتۋ ٴۇشىن، ىلە وبلىسىنا توتە قاراستى اۋدان، قالالار جىلۋمەن قامداۋ جاعىنداعى قۇتقارۋ - كومەكتەسۋ قىزمەتىن بەلسەنە ورىستەتىپ، قيىنشىلىعى بار بۇقارانىڭ كومىر جاعۋداعى قيىنشىلىعىن شەشتى.

10 - ايدىڭ 10 - كۇنى «مەيىر باعىشتاۋ كومىرى» تولتىرا تيەلگەن ۇلكەن اۆتوموبيل موڭعۇلكۇرە اۋدانى قوناقاي قالاشىعى تۇعىلشىن قىستاعىنا جەتتى، وسىدان كەيىن اتالعان قىستاق ەڭ تومەنگى تۇرمىسى قامتاماسىزداندىرىلاتىن 30 وتباسىنا، ەكونوميكالىق قيىنشىلىعى بار وتباسىلارىنا «مەيىر باعىشتاۋ كومىرىن» تاراتتى. كومىر الۋعا كەلگەن قىستاق تۇرعىندارى سانالى تۇردە قاتارعا تۇرىپ، قىزمەتكەرلەردىڭ جەتەكشىلىگى بويىنشا رەسمياتتارىن وتەدى.

«مەيىر باعىشتاۋ كومىرى» ۇيلەردى جىلىتىپ قانا قالماستان، بۇقارانىڭ كوڭىلىن دە جادىراتتى. «بيىل كۇن تەز سۋىدى، جىلىنۋ ماسەلەسى باسىمىزدى قاتىرعان ەدى، پارتيا مەن ۇكىمەت <مەيىر باعىشتاۋ كومىرىن> جەتكىزىپ بەردى، ٴبىز، ٴسوز جوق، پارتيانىڭ مەيىرىن ەستە بەرىك ساقتايمىز» دەدى قىستاق تۇرعىنى ٴىليار مامەت «مەيىر باعىشتاۋ كومىرىن» العاننان كەيىن اسەرلەنە.

سول كۇنى قۇلجا قالاسى بايانداي قالاشىعى تيەچاڭگوۋ قىستاعىنداعى ٴبىر بوس جەرگە قىستاق تۇرعىندار كوميتەتى الدىن الا ساتىپ العان 124 توننا كومىر ٴتۇسىرىلدى. كومىر الۋعا كەلگەن قىستاق تۇرعىندارى قاتارعا تۇرىپ تارتىپپەن قولدارىن قويىپ، كومىردى قالتالاپ، تاسىپ اكەتىپ جاتتى. كومىر الۋعا كەلگەن قىستاق تۇرعىندارى تارتىپپەن قاتارعا تۇردى.

تەكەس اۋدانى الدىن الا 6 مىڭ 500 توننا «مەيىر باعىشتاۋ كومىرىن» ساتىپ الىپ، تۇتاس اۋدانداعى 76 قىستاققا (الەۋمەتتىك اۋماق) ىركەس - تىركەس جەتكىزىپ، قيىنشىلىعى بار بۇقارانىڭ وتباسىلارىنا جىلۋلىق جەتكىزدى.

موڭعۇلكۇرە اۋداندىق حالىق ىستەرى مەكەمەسى قالا - قالاشىقتاعى ەڭ تومەنگى تۇرمىستى قامتاماسىز ەتۋ ورتالىعىنىڭ مەڭگەرۋشىسى زايتۇنا شايمۇرات بىلاي دەپ تانىستىردى: قازىرگە دەيىن اۋدانىمىز 10 اۋىل - قالاشىقتاعى ٴبىر مىڭ 940 وتباسىنا ٴبىر مىڭ 512 توننا «مەيىر باعىشتاۋ كومىرىن» تاراتتى.

ىلە وبلىستىق حالىق ىستەرى مەكەمەسىنىڭ قاتىستى جاۋاپتىسى مىنانى ٴبىلدىردى: بۇقارا ٴۇشىن قىزمەت ىستەۋدە، بۇقارا ەڭ كوڭىل ٴبولىپ وتىرعان ماسەلەلەردى شەشۋ كەرەك. 10 - ايدىڭ 10 - كۇنىنە دەيىن وبلىسقا توتە قاراستى اۋدان، قالالار ەڭ تومەنگى تۇرمىسى قامتاماسىزداندىرىلاتىن وتباسىلارىنا، ەكونوميكالىق قيىنشىلىعى بار وتباسىلارىنا 2 ميلليون 561 مىڭ يۋان جىلۋ قوسىمشا قاراجاتىن، قۇنى 8 ميلليون 175 مىڭ يۋان تۇراتىن 21 مىڭ 778 توننا «مەيىر باعىشتاۋ كومىرىن» تاراتىپ، قيىنشىلىعى بار 28 مىڭ 995 وتباسىنا جىلۋ سيلادى. قازىر وبلىسقا توتە قاراستى اۋدان، قالالاردىڭ جىلۋمەن قامداۋ جاعىنداعى كومەكتەسۋ قىزمەتى ٴالى دە جۇرگىزىلۋدە.

سۋرەتتە: موڭعۇلكۇرە اۋدانى قوناقاي قالاشىعى تۇعىلشىن قىستاعى قيىنشىلىعى بار بۇقاراعا كومىر تاراتۋدا.  ياڭ چىن فوتوسى