ٴتىلشىمىز جاڭ جينفىڭ، ەرىكتى تىلشىلەر جاڭ جىڭبين، فاڭ شۋەنيڭ حابارلايدى. ٴتىلشىنىڭ تەكەس اۋداندىق اۋىل شارۋاشىلىعى، اۋىل - قىستاق مەكەمەسىنەن ۇعىسۋىنشا، جۋىقتا اۋىل شارۋاشىلىعى، اۋىل - قىستاق مينيسترلىگى كەڭسەسى «2022 - جىلعى جۇڭگونىڭ كورىكتى سەيىل - سەرۋەن اۋىل - قىستاقتارىنىڭ تىزىمدىگىن جاريالاۋ جونىندەگى حابارلاندىرۋدى» باسىپ تاراتقان، تەكەس اۋدانى شولاقتەرەك قالاشىعى اقتەرەك قىستاعى 2022 - جىلعى جۇڭگونىڭ كورىكتى سەيىل - سەرۋەن قىستاعى بولىپ تاڭدالعان. بۇل − اۆتونوميالى وبلىسىمىزدان تاڭدالعان بىردەن - ٴبىر قىستاق. 

اقتەرەك قىستاعى ىلە وزەنىنىڭ جوعارى اعارىنداعى تەكەس اڭعارىنىڭ شىعىس بولەگىنە ورنالاسقان، ونداعى وزگەشە كليمات زالالسىز، جاسىل، ورگانيكالىق جەمىس - جيدەك، كوكونىس ەگۋگە ابدەن ۇيلەسەدى. 

جاقىنعى جىلداردان بەرى بۇل قىستاق ٴبيداي، مايلى شەكىلدەۋىك جانە سارى بۇرشاق سياقتى ٴداستۇرلى ەگىس داقىلدارى ەگىمشىلىگىن جەمىس - ورمان ەگىمشىلىگىنە بىرتىندەپ ويىستىرعان. قازىر جەمىس - ورمان وتىرعىزىلعان جەر كولەمى 3 مىڭ 500 مۋ بولىپ، جىلىنا ٴبىر مىڭ 800 توننا الما، 300 توننا قارا ورىك، ٴبىر مىڭ 100 توننا ساباعىندا قۇرعايتىن ورىك وندىرەدى، جەمىس - ورمان كىرىسى قىستاق تۇرعىندارى كىرىسىنىڭ %70 تەن استامىن يەلەپ، الىس - جاقىنعا اتى ايگىلى، اتى زاتىنا ساي الما وندىرەتىن قىستاققا اينالدى.

اقتەرەك قىستاعى جول بويىنداعى ساياحات بايلىعىن تولىق اشىپ، ٴتىپتى دە كوپ جاستاردى اۋىلىنا قايتىپ شارۋاشىلىق قۇرۋعا باۋراپ، «اسقار تاۋ، تۇنىق سۋدان ٴلاززات الا الاتىن، اۋىلعا دەگەن ساعىنىشتى باساتىن» ٴبىر توپ جوعارى ورەدەگى سارا حالىقتىق تۇسەلحانالار اشىپ، ساياحاتشىلاردىڭ مۇندا تۇرۋىنا، ٴلاززات الۋىنا، سەيىلدەۋىنە مۇمكىندىك جاسادى. قازىر بۇل قىستاقتا 37 حالىقتىق تۇسەلحانا، 5 شارۋالار شاتتىعى ساياجايى، ٴبىر قوناق ٴۇي بولىپ، 87 قىستاق تۇرعىنىنىڭ جۇمىسقا ورنالاسۋىن جەبەدى.

 وسى قىستاقتاعى سىنتۋ شارۋالار شاتتىعى ساياجايىنىڭ جاۋاپتىسى فۋ دىيىن بىلاي دەدى: «قىستاعىمىز جۇڭگونىڭ كورىكتى سەيىل - سەرۋەن اۋىل - قىستاق اتاعىنا قول جەتكىزدى، مەن مۇنى ايرىقشا ماقتانىش سەزىنەمىن. مۇنان كەيىن مەن اس - سۋ ىستەرىن ۇزدىكسىز ويداعىداي ىستەپ، ٴتىپتى دە كوپ قىستاق تۇرعىنىنىڭ جۇمىستانۋىنا مۇمكىندىك جاراتامىن».

اقتەرەك قىستاعى تاعى قاراجون كورىنىس رايونىنداعى وتكەرمە بەكەت بولۋ وڭىرلىك باسىمدىعىنا سۇيەنىپ، قىستاقتىڭ قونىستانۋ ورتاسىن كورىكتەندىرىپ، نەگىزگى جولداردى، شاعىن كوشە جولدارىن وزگەرتىپ سالىپ، كورىنىس اعاشتارىن ەگىپ، الما باقشاسىنا ساياحات اينالما جولىن سالىپ، ازىقتانۋ، جاتىن ورىن، ساياحات ٴبىر تۇلعالانعان الما مادەنيەت - ساياحات باقشاسىن قۇردى.

2021 - جىلى اقتەرەك قىستاعىنىڭ جان باسىندىق ورتاشا تازا كىرىسى 19 مىڭ 750 يۋانعا جەتتى، 2022 - جىلى جان باسىندىق ورتاشا تازا كىرىسى 26 مىڭ يۋان بولاتىندىعى مەجەلەنۋدە.

اقتەرەك قىستاعى تۇرعىندار كوميتەتىنىڭ مەڭگەرۋشىسى جۋ جياڭفىڭ بىلاي دەدى: «الداعى جەردە ٴبىز جەمىس - ورمان كاسىپ سالاسىنىڭ باسىمدىعىنا سۇيەنىپ، قىستاق كوللەكتيۆى ەكونوميكاسىن زورايتىپ، ساياحات جەلىسى بويىنداعى كومەسكى كۇشتەردى اشىپ، الما گۇلى مەرەكەسى، باۋ - باقشادا جەمىس - جيدەك ٴۇزۋ، شارۋالار تاعامجايى، حالىقتىق تۇسەلحانا سياقتىلاردى اۋىل - قىستاق ەكولوگيالىق كاسىپ سالاسى تىزبەگى رەتىندە ساباقتاستىرىپ، كاسىپ سالاسىنىڭ دامۋىن جانداندىرىپ، جەمىس - ورمان كاسىپ سالاسىنىڭ دەڭگەيىن ٴوسىرىپ، دارەجەسىن جوعارىلاتۋدى جۇزەگە اسىرىپ، جەمىس - ورمان كاسىپ سالاسىن الۋەتتەندىرىپ، شارۋالاردى اۋقاتتاندىرۋ سىندى گۇلدەنۋ جولىن اشامىز».