ٴتىلشىمىز حۋاڭ يان حابارلايدى. 1 - ايدىڭ 18 - كۇنى وبلىستىق حالىق ىستەرى مەكەمەسى ىلە وبلىستىق قوعامدىق يگىلىك ورنىندا «كوكتەم مەرەكەسىن مەيىرگە بولەپ، بولاشاققا بىرگە قانات قاعايىق» اتىنداعى 2023 ـ جىلعى قيىنشىلىق قىسپاعىندا قالعان بالالارعا قامقورلىق جاساۋ، قىزمەت وتەۋ قيمىلىن ورىستەتىپ، ولارعا سۇيىسپەنشىلىك باعىشتاپ، مەيىر جەتكىزدى.

وسى رەتكى قيمىلدا وبلىستىق حالىق ىستەرى مەكەمەسى بەلسەنە جەتەكشىلىك ەتىپ، جان - جاقتىلى قارجى توپتادى، 27 سەلبەستىك قوعام، ساۋدا قوعامى ىلە قايىر - ساحابات باس قوعامى ارقىلى 111 مىڭ يۋاندىق ناق اقشا جانە تۇرمىستىق، ۇيرەنۋ بۇيىمدارىن وبلىستىق قوعامدىق يگىلىك ورنى شوعىرلى باعاتىن 60 تان استام جەتىم بالا مەن وبلىسقا توتە قاراستى ورىندارداعى قيىنشىلىق قىسپاعىندا قالعان بالاعا تاراتىپ بەردى.

«راقىمەت اپاي، كوكتەم مەرەكەسىندە جاڭا كيىم كيگەنىمە قۋانىپ تۇرمىن! جاڭا كيىم وتە ادەمى، جىلى دا ۇنامدى ەكەن»، قۇلجا قالاسى قارا ٴدوڭ اۋىلى حۋاگوشان الەۋمەتتىك اۋماعىنداعى وقۋشىلار مەيىر ـ شاپاعات ساۋعاسىن تاپسىرىپ الىپ، قاباعات قۋاندى.

«كاسىپورىنشىلاردىڭ، مەيىربان قايراتكەرلەردىڭ سۇيىسپەنشىلىگى بالالارعا قوعامدىق ۇلكەن شاڭىراقتىڭ مەيىرىن سەزىندىردى». وبلىستىق جەكە كاسىپورىنشىلار قوعامىنىڭ باستىعى شىن شياۋجۇن بىلاي دەدى: قوعامدىق الەۋمەتتىك يگىلىك جانە قايىر - ساحابات ىستەرىنە بەلسەنە ات سالىسۋ قوعامدىق ۇيىمداردىڭ وتەۋگە ٴتيىستى بورىشى، تۇتاس قوعامنىڭ بالالارعا كوبىرەك نازار اۋدارىپ، قامقورلىق جاساپ، كومەكتەسىپ، ولاردىڭ ارمان - مۇراتىنا سۇيىسپەنشىلىكپەن دەم بەرۋىن ٴۇمىت ەتەمىن.

وبلىستىق حالىق ىستەرى مەكەمەسىنىڭ 2 - دارەجەلى تەكسەرىپ - زەرتتەۋشىسى، ىلە قايىر - ساحابات باس قوعامىنىڭ باستىعى فىڭ جيانبو بىلاي دەدى: قوعامدىق ۇيىمداردىڭ دوستىق سۇيىسپەنشىلىك قولىن سوزىپ، قيىنشىلىق قىسپاعىندا قالعان بالالاردىڭ قىستان وتۋىنە، مەرەكەنى كوڭىلدى وتكىزۋىنە كومەكتەسكەندىگىنە العىس ايتامىن، ٴتىپتى دە كوپ مەيىر باعىشتاۋشىلاردىڭ قيىنشىلىعى بار قاۋىمعا نازار اۋدارىپ، ىلەنىڭ قايىر - ساحابات ىستەرىنىڭ دامۋىنا ۇلەس قوسۋىن ٴۇمىت ەتەمىن.

كەلەسى قادامدا وبلىستىق حالىق ىستەرى مەكەمەسى بۇكىل وبلىستاعى جەتىم - جەسىر، مۇگەدەك بالالارعا، قيىنشىلىق قىسپاعىندا قالعان بالالارعا كوڭىل ٴبولۋدى ۇزدىكسىز ارتتىرىپ، الەۋمەتتىك يگىلىك قايىر - ساحابات تەكشەسىنىڭ رولىن ساۋلەلەندىرۋ ارقىلى كەڭ كولەمدە كۇش توپتاپ، « اۋىل - قىستاقتى گۇلدەندىرۋدە قايىر - ساحابات ىستەرىن باستى ورىنعا قويۋ»، قاقاعان ايازدا مەيىر باعىشتاۋ، قيىنشىلىق قىسپاعىندا قالعان بالالارعا پسيحيكالىق قامقورلىق جاساۋ جانە ولاردى جەتەكتەۋ سياقتى ٴبىر توپ قامقورلىق جاساۋ، سۇيەمەلدەۋ نىساندارىن اتقارۋعا ۇيىمداستىرىپ، قامقورلىق جاساۋ، قۇتقارۋ قيمىلىن كوپ ٴتۇرلى فورمامەن، كوپ ارنامەن ورىستەتىپ، بۇكىل قوعامنىڭ بالالاردىڭ اقاۋسىز ەسەيىپ - ەرجەتۋىنە كوڭىل بولۋىنە دەم بەرۋدى ىلگەرىلەتەدى.