تىلشىلەرىمىز لۋ جۇڭ، ۋاڭ ليلي حابارلايدى. جاڭا جىلدا جاڭا لەپ ەستى، جاڭا جىلدا جاڭا ىسكەرلىك كورسەتتى. كوكتەم مەرەكەسى دەمالىسى وتىسىمەن ىلە وبلىسىنا توتە قاراستى ورىندارداعى ٴار سالا، ٴار كاسىپ جاڭا تىلەك، جاڭا ارمان ارقالاپ، «دەمالىس ۇلگىسىنەن» دەرەۋ «قىزمەت ۇلگىسىنە» اۋىسىپ، زەيىندى شوعىرلاندىرىپ، رۋحتى سەرپىلتىپ، تاماشا رۋحاني بەينەمەن جاڭا ٴبىر جىلداعى قىزمەتكە كىرىستى، كوپتەگەن كاسىپورىن بار كۇشپەن ٴوندىرىستى باستاپ، جاڭا جىلدا جاقسى باستاما اشۋعا قول جەتكىزدى.

1 - ايدىڭ 31 ـ كۇنى ٴتىلشى ىلە زىسۋليرىن بيو عىلىم ـ تەحنيكا شەكتى سەرىكتەستىگىنىڭ ٴوندىرىس سەحىنا كىرگەندە، جۇمىسشىلار قاربالاستىققا ٴتۇسىپ، ٴوندىرىس جەلىسى توقتاۋسىز جۇمىسقا كىرىسكەن دۋماندى ەڭبەك ناۋقانىن كوردى.

«بيىل جىل باسىندا كاسىپورىن ٴبىرتالاي تاپسىرىس قابىلدادى، تەك وسى تاپسىرىستاردىڭ ٴوندىرىسىنىڭ ٴوزى 3 - ايدىڭ  سوڭىنا دەيىن جالعاسادى. سوندىقتان كوكتەم مەرەكەسىنەن كەيىن كاسىپورىندار وندىرىسكە دەرەۋ قوسىلدى» دەدى ىلە زىسۋليرىن بيو عىلىم ـ تەحنيكا شەكتى سەرىكتەستىگى ٴوندىرىس زاۆودىنىڭ باستىعى ۋ جيانچياڭ تىلشىگە.

ىلەنىڭ جۇپار ٴشوپ كاسىبىندەگى باستاماشى كاسىپورىن بولعان ىلە زىسۋليرىن بيو عىلىم ـ تەحنيكا شەكتى سەرىكتەستىگى جاڭا دامۋ ۇستانىمىن بەرىك ورناتىپ، «كاسىپورىن + شارۋا وتباسى + عىلمي زەرتتەۋ» ۇلگىسىنە تاباندى بولىپ، ونىمدەردى جىنتىكتەي مانەرلەۋ، ساياحات، ەلەكتروندىق ساۋدا جانە جاڭا ساتۋ ۇلگىسىن ۇزدىكسىز كەڭەيتتى. كاسىپورىن شينجياڭنىڭ جەرگىلىكتى ەرەكشە وسىمدىك بايلىعىن ىشكەرىلەي اشۋدى جانە پايدالانۋدى توڭىرەكتەي وتىرىپ زەرتتەپ جاساعان جەلىلەس جاڭا ونىمدەردى بازارعا شىعارعاننان كەيىن، تۇتىنۋشىلاردىڭ قولداۋىنا يە بولدى.

«قازىر كاسىپورىندا 40 نەشە ٴتۇرلى ٴونىم بار، مۇنىڭ ىشىندە جۇپار ٴشوپ جۋىنۋ - قورعانۋ بۇيىمدارىن، جۇپار ٴشوپ جانە روزا گۇلى سىندى 2 ٴتۇرلى بەت جاپسىرماسىن، جۇپار ٴشوپ جانە روزا گۇلى بەت دىمقىلداندىرۋ مايىن تۇتىنۋشىلار ەرەكشە ۇناتادى. بيىلعى كاسىپورىننىڭ ٴتۇيىندى مىندەتى − ونىمدەردىڭ ساپاسىن جاقسارتىپ، دارەجەسىن جوعارىلاتۋ، 4 - ايدىڭ باسىندا ساپاسىن جاقسارتىپ، دارەجەسى جوعارىلاتىلعان ونىمدەردى بازارعا شىعارۋ» دەدى ۋ جيانچياڭ.

1 - ايدىڭ 31 - كۇنى شينجياڭ دىلييۋان ازىق - تۇلىك شەكتى جاۋاپكەرشىلىك سەرىكتەستىگى مەرەكەدەن كەيىن جۇمىس باستاعان العاشقى كۇن، پراندىك ٴوندىرىس جەلىسىندە ماشينانىڭ داۋىسى گۇرىلدەپ، جۇمىسشىلار جۇمىس ورىندارىندا قاربالاس جۇمىس ىستەپ، كۇنجىت پراندىگىن ٴوندىرۋدى مىقتاپ يگەرۋدە.

قورعاس ەكونوميكالىق اشۋ رايونىنىڭ قۇلجا باقشا رايونىنا ورنالاسقان شينجياڭ دىلييۋان ازىق - تۇلىك شەكتى جاۋاپكەرشىلىك سەرىكتەستىگى 100 ميلليون يۋان قارجى قوسىپ، وسىزاماندانعان 9 ازىق - تۇلىك ٴوندىرىس جەلىسىن قۇردى، نەگىزىنەن پراندىك،  بالكۇلشە سياقتى ازىق - تۇلىكتەردى مانەرلەپ وندىرەدى، سەرىكتەستىك 2016 - جىلى قازاننان باستاپ رەسمي وندىرىسكە قوسىلعان.

«كاسىپورىننىڭ جالپى 50 نەشە ٴتۇرلى ٴونىمى نەگىزىنەن شينجياڭنىڭ جەر - جەرىنە ساتىلادى. مەرەكەدەن كەيىن كاسىپورىن دەرەۋ وندىرىسكە كىرىسىپ، ٴونىمدى جەتكىلىكتى دايىندادىق» دەدى كاسىپورىن جاۋاپتىسى حۋاڭ جيڭلياڭ تىلشىگە.

قورعاس ەكونوميكالىق اشۋ رايونىنىڭ قۇلجا باقشا رايونىنا ورنالاسقان شينجياڭ سۋيۋان بيو ينجەنەريا شەكتى سەرىكتەستىگى نەگىزىنەن L - فەنيل الانين، اسپارگان سياقتى ونىمدەردى وندىرۋمەن جانە ساتۋمەن شۇعىلدانادى، 2020 - جىلى كاسىپورىننىڭ ٴونىم قۇنى 530 ميلليون يۋانعا جەتىپ، وتكەن جىلدىڭ ۇقساس مەزگىلىندەگىدەن %40 ارتقان.

سول كۇنى ٴتىلشى كاسىپورىننىڭ ٴارقايسى ٴوندىرىس سەحتارىنان ماشينالاردىڭ گۇرىلدەپ توقتاۋسىز جۇمىس ىستەپ، كاسىپورىنداردىڭ ٴوندىرىسى ٴتارتىپتى جۇرگىزىلىپ، قىزمەتكەرلەردىڭ ٴوز قىزمەت ورىندارىندا قاربالاس جۇمىس ىستەپ جاتقانىن كوردى.

«كوكتەم مەرەكەسى كەزىندە كاسىپورىن قالىپتى ٴوندىرىس جۇرگىزدى، مەرەكەدەن كەيىن جاڭا جىلدا جاقسى باستاما اشۋعا قۇلشىنامىز. قازىر امين قىشقىلى مەن اسپارگان ٴوندىرىس جەلىسى تۇگەلدەي ٴوندىرىستى قالپىنا كەلتىردى. بيىل كاسىپورىننىڭ باستى نىساناسى عىلمي زەرتتەۋ ۇسىنىلىمىن ارتتىرۋ ارقىلى امين قىشقىلى ٴوندىرىسىنىڭ تەحنولوگيالىق دەڭگەيىن جوعارىلاتىپ، ٴونىمنىڭ كىرىس شاماسى مەن وزگەرتۋ شاماسىن جوعارىلاتۋ. ورتا، ۇزاق مەرزىمدىك نىسانا − سىرت جەرلەردەن ساتىپ الىنعان ونىمدەردى جەرگىلىكتەندىرىپ ٴوندىرۋ، ۇقساس تۇردەگى امين قىشقىلىن زەرتتەپ اشۋدى تياناقتاندىرىپ، ٴونىم مولشەرىن ارتتىرىپ، كاسىپورىنداردىڭ ٴوندىرىس قۋاتىن ونان ارى تولىق پايدالانىپ، كاسىپورىننىڭ باسەكەلىك قۋاتىن جوعارىلاتۋ. بيىل كاسىپورىنىمىزدىڭ ٴونىم قۇنى بىلتىرعى نەگىزدە %20 شاماسىندا ارتاتىندىعى مەجەلەنىپ وتىر» دەدى شينجياڭ سۋيۋان بيو ينجەنەريا شەكتى سەرىكتەستىگىنىڭ ورىنباسار باس ديرەكتورى ي شياڭليڭ تىلشىگە.