سۋرەتتە: قىزمەتكەرلەر شينحۋا باتىس جولى باس بەكەتىندەگى گازبەن قامداۋ قۇرىلعىلارىن شارلاپ تەكسەرۋدە. لي يافىڭ فوتوسى

ٴتىلشىمىز لي يافىڭ، پراكتيكانت ٴتىلشى جاڭ حان حابارلايدى. 2 - ايدىڭ 3 - كۇنى قۇلجا شەكارالىق ەكونوميكالىق سەلبەستىك رايونىنداعى شينجياڭ شىڭكاڭ حۇڭشين (توبى) شەكتى سەرىكتەستىگىندە ٴوندىرىس قۇرىلعىلارىنىڭ كۋرىلدەگەن داۋىسى ٴالسىن - ٴالسىن ەستىلىپ، جۇمىسشىلار وندىرىلگەن ٴونىمدى قالتالاپ، اۋزىن بەكىتىپ جاتتى.

جۇڭگو مۇناي تابيعي گاز ساتۋ شينجياڭ ىلە شينجيە تابيعي گاز شەكتى سەرىكتەستىگىنىڭ شارلاۋشىسى شيوڭ رۇي كاسپورىننىڭ تابيعي گاز قۇرىلعى جابدىقتارىن شارلاۋ، تەكسەرۋ تەبىنى مەن ريتىمىن ارتتىرىپ، تابيعي گازبەن حاۋىپسىز، ورنىقتى قامداۋدى قامتاماسىزداندىرىپ، كاسىپورىنداردىڭ وندىرىسكە پايدالانىلاتىن تابيعي گاز قاجەتىن بار كۇشپەن قاناعاتتاندىرىپ، كاسىپورىنداردىڭ ٴوندىرىس اياق الىسىن جەدەلدەتۋىنە، ٴوندىرىستى مىقتى يگەرۋىنە، ٴبىرىنشى توقساندا ويداعىداي باستاما اشۋعا ۇمتىلۋىنا كۇش سالا دەم بەردى.

شينجياڭ شىڭكاڭ حۇڭشين (توبى) شەكتى سەرىكتەستىگى شينجياڭ كولەمىندە بازا قۇرىلىسى، تەحنيكا زەرتتەۋ - اشۋ، ٴوندىرۋ، ساتۋ ٴبىر تۇلعالانعان مانەرلەۋ جابدىعى وزىق ٴىرى تيپتەگى استىق، ازىق - تۇلىك مانەرلەۋ شوعىرلانعان توپ ۇلگىسىندەگى كاسىپورىن. كاسىپ سالاسى نەگىزىنەن ۇن، ازىق - تۇلىك، اۋىل شارۋاشىلىعى، فينانستىق قارجى قوسۋ، حالىقارالىق ساۋدا سياقتىلاردى قامتىپ، العاشقى ادىمدا وسىزامانعى ٴبيداي كاسىپ سالاسى تىزبەگى ولشەمىن قالىپتاستىردى.

«كاسىپورنىمىز جونىنەن العاندا تابيعي گاز زاوۆدتى جىلۋمەن قامداۋعا جانە كەسپەنى قۇرعاتۋعا پايدالانىلادى... 1 - ايدىڭ 29 - كۇنى ٴوندىرىس قالپىنا كەلگەننەن بەرى ٴونىم مولشەرى بىرتىندەپ جوعارىلاۋدا، تابيعي گازدىڭ حاۋىپسىز، ورنىقتى قامدالۋى كاسىپورىننىڭ ٴوندىرىستى ورنىقتىرۋى، ٴونىمدى ارتتىرۋى جونىنەن توتەنشە ماڭىزدى» دەدى وسى سەرىكتەستىكتىڭ وندىرىسكە جاۋاپتى ديرەكتورى لي شىگۇي.

جۇڭگو مۇناي تابيعي گاز ساتۋ شينجياڭ ىلە شينجيە تابيعي گاز شەكتى سەرىكتەستىگى ىلە وبلىسىنا توتە قاراستى ورىنداردىڭ تابيعي گاز بازارىنىڭ نەگىزگى گاز قاينارى. تۇرمىسقا پايدالانىلاتىن، ونەركاسىپ - ساۋداعا پايدالانىلاتىن، قىزمەت وتەۋ كاسىبىنە پايدالانىلاتىن گازبەن قامداۋ مىندەتىن ۇستىنە الىپ وتىر. ەنەرگيا بايلىعى كاسىپورىنى رەتىندە تاياۋ جىلداردان بەرى بۇل كاسىپورىن ورايدى مىقتى يگەرىپ، نازاردى تۇتىنۋشىلاردىڭ كوپ نەگىزدى  گاز ىستەتۋ قاجەتىنە اناعۇرلىم شوعىرلاندىرىپ، جابدىق، قۇرىلعىلاردى قورعاۋدى، كۇتىمدەۋدى كۇشەيتىپ، شۇعىل جاعدايعا توتەپ بەرۋ قامتاماسىزداندىرۋ شاراسىن  تياناقتاندىرىپ، حالىق تۇرمىسىنا پايدالانىلاتىن گازدى قامتاماسىزداندىرۋمەن بىرگە «حاۋىپسىزدىكتى قامتاماسىزداندىرۋ، قامداۋدى قامتاماسىزداندىرۋ، تۇرعىنداردى قامتاماسىزداندىرۋ» پرينسيبى بويىنشا شۇعىل جاعدايدا گازبەن قامداۋ شاراسىن بەلگىلەپ، كاسىپورىن قۇرىلىسى ٴۇشىن ٴتىپتى دە دالمە - ٴدال،  ٴتىپتى دە دەر كەزىندىك، ٴتىپتى دە ٴونىمدى حاۋىپسىز گازبەن قامداۋدى قامتاماسىزداندىرۋ كەرەك.

جۇڭگو مۇناي تابيعي گاز ساتۋ شينجياڭ ىلە شينجيە تابيعي گاز شەكتى سەرىكتەستىگى شينحۋا باتىس جولى باس بەكەتىنىڭ باستىعى ۋاڭ شياۋلۋ تىلشىگە بىلاي دەدى: بيىل كوكتەم مەرەكەسى كەزىندە كۇندىك قامداۋ مولشەرى 735 مىڭ تەكشەمەترگە جەتتى، 2 - ايدان بەرى  تۇتىنۋشىلاردىڭ تابيعي گازدان پايدالانۋ سۇرانىسى ارتىپ، تابيعي گازبەن ۇزدىكسىز قامداۋعا، قىزمەت وتەۋدىڭ ىركىلىسسىز بولۋىنا كەپىلدىك ەتۋ ٴۇشىن، سەرىكتەستىك جەتكىزۋ ـ ۇلەستىرۋ جۇيەسىنىڭ گازبەن قامداۋ قازىرگى جاعدايىنا، تۇتىنۋشىلاردىڭ گازدان پايدالانۋ سۇرانىسىنا جانە  توقتامعا قول قويىلعان گاز مولشەرىنىڭ جاعدايىنا  جانە تۇتىنۋشىلاردىڭ گاز ىستەتۋ مولشەرىنە الدىن الا تالداۋ جاساۋدى كۇشەيتتى، سونىمەن بىرگە گاز قاينارى ورىندارىن بەلسەنە سايكەستىرىپ، ىركىلىسسىز بايلانىس جاساۋ، سايكەستىرۋ مەحانيزمىن ورناتىپ، گازدان پايدالانۋدىڭ قاۋىرت مەزگىلىندەگى  حاۋىپسىزدىكتى، ورنىقتىلىقتى بار كۇشپەن قامتاماسىز ەتتى.

بۇدان سىرت، ورتا، شاعىن ونەركاسىپ - ساۋدا كاسىپ سالاسىنداعى تۇتىنۋشىلاردى سايكەستىرىپ، جۇمىس باستاۋ مولشەرى مەن ۋاقىتىنا ساي قىزمەتكەرلەردى جۇمىس ورنىنا بارىپ حاۋىپسىزدىك تەكسەرۋ جۇرگىزۋگە ورنالاستىردى؛ ٴالى جۇمىس باستاماعان ونەركاسىپ - ساۋدا كاسىپ سالاسىنداعى تۇتىنۋشىلارعا قاراتا ولاردىڭ ٴوندىرىس جاعدايىن ۇزدىكسىز ۇعىسىپ، قول تەلەفون، ٴۇنحات سياقتى تاسىلدەرمەن جۇمىس باستاۋ ۋاقىتىن تۇراقتاندىرىپ، جۇمىس باستاۋدان بۇرىن تابيعي گازبەن قامتاماسىزداندىرۋ قىزمەتىن ويداعىداي سايكەستىرىپ ىستەپ، جالپى گاز قاينارىن قامتاماسىزداندىرۋدىڭ جەتكىلىكتى، ورنىقتى كۇيىن ساقتاپ، بيىلعى ەكونوميكانىڭ جاقسى باستاما اشۋىنا بارىنشا ۇلەس قوسادى.