شينجياڭ تەمىر جولىندا تۇڭعىش ءبىر بەكەتتىك توتە باراتىن قالا ارالىق پويەز قاتىنادى

　　　　ءۇرىمجىنى سەنتر ەتكەن 2 ساعاتتىق، 3 ساعاتتىق، 4 ساعاتتىق تەمىر جول قاتىناس شەڭبەرى قالىپتاستى

4 - ايدىڭ 1 - كۇنى جولاۋشىلار ءۇرىمجى ۆوگزالىندا C857 كەزەكشى جولاۋشىلار پويەزىنە شىعۋدا. سول كۇنى شينجياڭ تەمىر جولىندا تۇڭعىش ءبىر بەكەتتىك توتە باراتىن قالا ارالىق پويەز قاتىنادى.

□ سۋرەتتى انار بۇلت \ شينجياڭ گازەتىنىڭ ءتىلشىسى زوۋ ي تۇسىرگەن

انار بۇلت \ شينجياڭ گازەتىنىڭ ءتىلشىسى لۋ فىڭباۋ 4 - ايدىڭ 1 - كۇنى ۇرىمجىدەن حابارلايدى. 4 - ايدىڭ 1 - كۇنى شينجياڭ تەمىر جولىندا تۇڭعىش قاتىناعان ءبىر بەكەتتىك توتە باراتىن سارا ءونىم − ”گۇلدەنۋ اتتى“ قالا ارالىق جولاۋشىلار پويەزى ءۇرىمجى ۆوگزالىنان شىقتى، ءۇرىمجى مەن قارامايلى، قۇلجا، كورلا اراسىنداعى تەمىر جولدا ساپارلاۋ ۋاقىتى ەڭ كوپ بولعاندا 59 مينۋت قىسقاردى.

سول كۇنى تۇستەن بۇرىن، ءۇرىمجى ۆوگزالىنان كىرىپ - شىققان جولاۋشىلاردىڭ اياعى ۇزىلمەدى. ايالداما زالىندا، C857 كەزەكشى جولاۋشىلار پويەزىن كۇتىپ وتىرعان جولاۋشى جاڭ حۇڭلي بىلاي دەدى: ”قارامايلىعا ەكى جارىم ساعاتتا عانا جەتەتىن بولدىق، بۇرىنعىدان 50 مينۋت تەزدەدى، وتە قولايلى بولدى“.

”ءبىز جولاۋشىلاردىڭ ءجۇرىس - تۇرىس قاجەتىنە ساي، پويەزدىڭ قاتىناۋ كەستەسىن رەتتەپ، جولاۋشىلاردىڭ پويەزبەن قاتىناۋ ۋاقىتىن ونان ارى قىسقارتىپ، كوپشىلىكتىڭ مەجەلى جەرىنە قولايلى، تەز جەتۋىنە مۇمكىندىك جاسادىق“، - دەدى جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگى جولاۋشى تاسىمال ءبولىمى بازار اشۋ كەڭسەسىنىڭ مەڭگەرۋشىسى ياڭ لي.

شينجياڭ تەمىر جولىندا قاتىناعان وسى رەتكى ءبىر بەكەتتىك توتە باراتىن سارا ءونىم − ”گۇلدەنۋ اتتى“ قالا ارالىق جولاۋشىلار پويەزى تۇيىننەن تۇيىنگە تىكە جەتەدى، جول ورتادا توقتامايدى، ساپار ۋاقىتىنىڭ بارىنشا قىسقارۋى − ونىڭ ەڭ ۇلكەن ەرەكشەلىگى. رەتتەلگەننەن كەيىن ۇرىمجىدەن قارامايلىعا دەيىنگى ساپار ۋاقىتى 2 جارىم ساعات بولىپ، ۇقساس باعىتتاعى قالا ارالىق پويەزبەن سالىستىرعاندا ۋاقىت ەڭ كوپ بولعاندا 50 مينۋت قىسقاردى؛ ۇرىمجىدەن قۇلجاعا دەيىنگى ساپار ۋاقىتى 4 ساعات 50 مينۋت بولىپ، ۇقساس باعىتتاعى قالا ارالىق پويەزبەن سالىستىرعاندا ۋاقىت ەڭ كوپ بولعاندا 59 مينۋت قىسقاردى؛ ۇرىمجىدەن كورلاعا دەيىنگى ساپار ۋاقىتى 3 ساعات 30 مينۋت بولىپ، ۇقساس باعىتتاعى قالا ارالىق پويەزبەن سالىستىرعاندا ۋاقىت ەڭ كوپ بولعاندا 39 مينۋت قىسقاردى، ءۇرىمجىنى سەنتر ەتكەن، قارامايلىنى، كورلانى، قۇلجانى قامتىعان 2 ساعاتتىق، 3 ساعاتتىق، 4 ساعاتتىق تەمىر جول قاتىناس شەڭبەرى ونان ارى قالىپتاستى.

تاياۋ جىلداردان بەرى، تەمىر جول تاراۋلارى شينجياڭنىڭ قار - مۇز بايلىعى، ماۋسىمدىق گۇل اشاتىن مەزگىل، مادەنيەت بايىرعى قالاسى سياقتى ساياحات قىزۋ تۇيىندەرىن ارقاۋ ەتە وتىرىپ، ساياحات پويەزى ونىمدەرىن ىشكەرىلەي اشىپ، ىلگەرىندى - كەيىندى ”قاشقار اتتى“، ”جۇڭگو قار قالاسى· التاي اتتى“، ”ورىك گۇلى اتتى“ سياقتى جوعارى ساپالى ساياحات كەزەكشى پويەزدەرىن ورنالاستىردى. وسى رەتكى وڭتۇستىك، سولتۇستىك شينجياڭداعى 3 باعىتتاعى ءبىر بەكەتتىك توتە باراتىن سارا ءونىم − ”گۇلدەنۋ اتتى“ قالا ارالىق جولاۋشىلار پويەزىنىڭ تاعى كوبەيتىلۋى جولاۋشىلاردىڭ ءجۇرىس - تۇرىسىنا اناعۇرلىم كوپ تالعام ورايىن ازىرلەپ، پارمەندى قاتىناس نەگىزى ارقىلى شينجياڭنىڭ ساياحات كاسىبىنىڭ بارىنشا دامۋىنا تىرەك بولدى.