ەرىكتى تىلشىلەر چۇي حايشيا، فىڭ مىڭياۋ حابارلايدى. ەرەكشە ەگىمشىلىك − شارۋالاردىڭ كىرىسىن ارتتىرىپ، بايۋىنداعى ماڭىزدى ارنا. كۇنەس اۋدانى تۇرگەن اۋىلى ىلە جياڭجۇن اۋىل شارۋاشىلىق شەكتى سەرىكتەستىگى ازىقتىق ساڭىراۋقۇلاق ونىمدەرىن ٴوندىرۋ ارقىلى قىستاق تۇرعىندارىنىڭ كىرىسىن ۇزدىكسىز ارتتىرۋ تىلەگىن جۇزەگە اسىرىپ، اۋقاتتانۋدىڭ جاڭا جولىن اشتى.

4 ـ ايدىڭ 16 ـ كۇنى ٴتىلشى ىلە جياڭجۇن اۋىل شارۋاشىلىق شەكتى سەرىكتەستىگىنىڭ ساڭىراۋقۇلاق پارنيگىنە بارىپ، ازىقتىق ساڭىراۋقۇلاق قالتالارىنىڭ رەتتى تىزىلگەنىن، جاس ساڭىراۋقۇلاقتاردىڭ سۋلياۋ جارعاقتى جارىپ شىققانىن، قىزمەتكەرلەردىڭ ساڭىراۋقۇلاق بۋماسىن رەتتەپ، ساڭىراۋقۇلاقتى سۋارىپ جاتقانىن بايقادى.

ىلە جياڭجۇن اۋىل شارۋاشىلىعى شەكتى سەرىكتەستىگىنىڭ قىزمەتكەرى ارزىگۇل ابدۇرازاق بىلاي دەدى: ”مەن مۇندا 3 جىل قىزمەت ىستەدىم، ايىنا 3000 يۋاننان استام ەڭبەكاقى الامىن، كىرىسىم ورنىقتى، تۇرمىس شارت ـ جاعدايىم بارعان سايىن جاقسارىپ كەلەدى“.

كەلەسى قادامدا بۇل سەرىكتەستىك ەگىمشىلىك كولەمىن كەڭەيتىپ، عىلمي ەگۋ دەڭگەيىن اناعۇرلىم جوعارىلاتىپ، ساڭىراۋقۇلاقتىڭ ٴونىم ساپاسىن جوعارىلاتۋ، ساتۋ ارناسىن كەڭەيتۋ، كاسىپ تىزبەگىن ۇزارتۋ سياقتى جاقتارعا كۇش سالىپ، اناعۇرلىم كوپ قىستاق تۇرعىنىن ساڭىراۋقۇلاق ەگۋگە باستاپ، ٴاربىر ٴتۇپ ساڭىراۋقۇلاقتى قىستاق تۇرعىندارىنىڭ جۇمىستانىپ كىرىسىن ارتتىرۋىن جەبەيتىن دانەكەرگە اينالدىرماق.

وسى سەرىكتەستىكتىڭ تەحنيگى باۋ سىن بىلاي دەدى: ”ٴبىز قازىر نەگىزىنەن ساڭىراۋقۇلاقتىڭ 10 نەشە ٴتۇرىن ەگەمىز، سەرىكتەستىگىمىزدىڭ جىلدىق كىرىسى 20 ميلليون يۋاننان اسادى، توڭىرەكتەگى 200 دەن استام ەڭبەككۇشتى جۇمىستاندىرىپ وتىرمىز“.

سۋرەتتە: قىزمەتكەرلەر ساڭىراۋقۇلاق بۋماسىن رەتتەۋدە.

چۇي حايشيا فوتوسى