2023 - جىلعى ” جاڭا انمەن شينجياڭدى جىرلاۋ“ − تاڭداۋلى ٴتول شىعارما ٴان كونسەرتىنىڭ ىلە وبلىسىنداعى ارالاۋ قويىلىمى دابىرالى باستالدى

جاراسىمدى ىلەدە شاتتىق ٴانى شارىقتادى

تىلشىلەرىمىز ۋاڭ جىحۋا، ليۋ چىڭگاڭ، سۋ مين، حان شاشا، ۋاڭ ليلي، سۇن ي - نان حابارلايدى. جاراسىمدى ىلەنىڭ بايتاق الابىندا شاتتىق ٴانى شارىقتادى. 6 - ايدىڭ 9 - كۇنى كەشتە 2023 - جىلعى ” جاڭا انمەن شينجياڭدى جىرلاۋ“ − تاڭداۋلى ٴتول شىعارما ٴان كونسەرتىنىڭ شينجياڭدى جانە بيڭتۋاندى ارالاۋ قويىلىمى 3 - بەكەت ىلەگە كەلىپ، ىلە ۇلكەن تەاترحاناسىندا دابىرالى باستالدى، تۇتاس كونسەرت شينجياڭنىڭ بيلەرىمەن جانە شينجياڭنىڭ حالىقتىق مۋزيكا كوركەمونەرىنىڭ جاۋھارىمەن توعىسىپ، كورەرمەندەرگە شىت جاڭا كوركەمونەرلىك ٴلاززات سيلادى.

جۇڭگو ادەبيەت - كوركەمونەرشىلەر بىرلەستىگىنىڭ ورىنباسار ٴتوراعاسى، جۇڭگو ٴبي قوعامىنىڭ ورىنباسار ٴتوراعاسى ٴدىلنار ابىلا، جۇڭگو مۋزيكانتتار قوعامىنىڭ ورىنباسار باس حاتشىسى، جۇڭگو ادەبيەت - كوركەمونەرشىلەر بىرلەستىگى مۋزيكا - كوركەمونەر ورتالىعىنىڭ مەڭگەرۋشىسى شيۇڭ ۋي، اۆتونوميالى رايوندىق ادەبيەت - كوركەمونەرشىلەر بىرلەستىگى پارتيا باسشىلىق گرۋپپاسىنىڭ شۋجيى، ورىنباسار ٴتوراعاسى دىڭ شۋانبين، اۆتونوميالى رايوندىق ادەبيەت - كوركەمونەرشىلەر بىرلەستىگى پارتيا باسشىلىق گرۋپپاسىنىڭ مۇشەسى، ورىنباسار ٴتوراعاسى قادىلبەك قاقان ۇلى قاتارلى باسشىلار جانە ياڭ شيۋلي، سەرجان ۇعىباي ۇلى، كۇلان سەيپىلقان قىزى، جاۋ چيڭحۇڭ، مامەتجان داۋىت، لي رۇڭنيان، جاۋ سۇيفاڭ، ياڭ شينپيڭ، قايرات اشىك ۇلى قاتارلى وبلىس باسشىلارى كونسەرتتى تاماشالادى.

كونسەرت بەتاشار ٴان - ٴبي «تيانشاندا شىرقالادى انىمەن» شىمىلدىعىن اشتى، ارتيستەر الۋان ٴتۇستى ۇلتتىق كيىم كيىپ، قولدارىنا شينجياڭنىڭ بالداي ٴتاتتى جەمىس - جيدەگىن ۇستاپ، ويناقى اۋەنمەن ٴان ايتىپ، بيگە باسىپ، شينجياڭداعى ٴار ۇلت پەرزەنتتەرىنىڭ جاڭا داۋىردەگى باقىتتى تۇرمىس كارتيناسىن كەسكىندەدى.

كونسەرت كەشىندە ۋاڭ حۇڭۋي، ليۋ يۋانيۋان، شياڭياڭ جوما، تاسقىن، ۇلانتۇيا، ەرعالي زاقان ۇلى، كامران كامىل قاتارلى ايگىلى انشىلەر شينجياڭ كوركەمونەر شۋەيۋانىنىڭ ٴبي شۋەيۋانى، ىلە وبلىستىق ٴان - ٴبي تەاترحاناسى، ىلە شىفان داشۋەسى جانە حىتيانشان حور ۇيىرمەسى، قۇلجا قالالىق 15 - باستاۋىش مەكتەپ كوركەمونەر ۇيىرمەسى سياقتى ورىندارمەن بىرگە ونەر كورسەتىپ، كورەرمەندەرگە «شينجياڭدى قۇشا ٴسۇيۋ»، «تيانشان الابىندا»، «قىران پاميردەن ۇشىپ ٴوتتى»، «قارعالداق»، «كورىكتى شينجياڭ» سياقتى شينجياڭ ەرەكشەلىگى مول، تاقىرىبى، ستيلى ٴار الۋان تاڭداۋلى ٴتول شىعارما اندەردى ورىنداپ، ىنتىماقتى، جاراسىمدى، گۇلدەنگەن، باي، وركەنيەتتى، العا باسقان، تىنىش ٴومىر، شات - شادىمان تىرشىلىك كەشىرگەن، ەكولوگياسى تاماشا كوركەم شينجياڭ وبرازىن جاندى ايگىلەدى.

«شاشۋ»، «قارا كوز» كونسەرتىنەن كورەرمەندەر شينجياڭنىڭ قويۋ ۇلتتىق سالت - ساناسىن سەزىندى؛ بالالار شىرقاعان «شاتتىققا قاراي اتتانايىق» كونسەرتىنەن كورەرمەندەر ىلەنىڭ كوركەم بولاشاعىنا تالپىنعان ورەندەرمەن تانىستى؛ «ساحارانى كۇزەتۋ»، «كىلكىپ اققان ىلە وزەنى»، «التايىم» اندەرىنەن كورەرمەندەر اتا مەكەننىڭ كوركەم كەلبەتىن سەزىندى...

تارتىمدى ٴتول شىعارما مۋزيكالارى شينجياڭنىڭ سالت - ساناسىن تولىق ايگىلەدى، اسقاق تا اسەم ٴان اۋەنى، ۇلتتىق مۋزيكا اسپاپتارىنىڭ سۇيەمەلدەۋى جانە بيشىلەردىڭ سان ۇلگىدەگى كيىمدەرى تەاترحانانى شاتتىق تەڭىزىنە اينالدىرىپ، قول شاپالاق ٴۇنى بۇكىل الاڭدى جاڭعىرتتى. اسەرلى ساتتە كورەرمەندەر تۇس - تۇستان ورىندارىنان تۇرىپ الاقايلاپ، قولدارىنداعى مەملەكەت تۋىمەن، سىڭعىرلاعان كۇلكىلەرىمەن، شىن ىقىلاستى القاۋ ۇنىمەن وسى تاماشا كونسەرتتى القادى.

ۇعىسۋعا قاراعاندا، جاقىنعى جىلداردان بەرى جۇڭگو ادەبيەت - كوركەمونەرشىلەر بىرلەستىگى، جۇڭگو مۋزيكا قوعامى ”تۇرمىسقا ىشكەرىلەي ارالاسىپ، حالىق اراسىنا تامىر تارتۋ“ نەگىزگى تاقىرىپتىق امالياتتىق قيمىلىن كەڭىنەن ورىستەتىپ، حالىقتى وزەك ەتكەن جاسامپازدىق بەتالىسىنا تاباندى بولىپ، بۇكىل ەلدەگى ايگىلى ٴان ٴماتىنىن جازۋشىلاردى شينجياڭعا بارىپ ماتەريال جيناۋعا تالاي رەت ۇيىمداستىرعان. ٴان ٴماتىنىن جازۋشىلار تيانشان تاۋىنىڭ تۇستىگى مەن تەرىستىگىن ەندەي ٴوتىپ، قاشقار، ىلە، قارامايلى، التاي سياقتى جەرلەرگە بارىپ، ۇلتتاردىڭ ارالاسۋىن، ىشتەسۋىن، توعىسۋىن تەرەڭ سەزىنىپ، جۇڭگو ارمانىن جىرلايتىن، جاڭا داۋىرگە ماداق ايتاتىن، ٴار ۇلت حالقىنىڭ تاماشا تۇرمىسىن ايگىلەيتىن ٴبىر توپ تاڭداۋلى شىعارمالارى ارقىلى وزدەرىنىڭ شاتتىعىن، اسەرىن جانە القاۋىن ەستەلىككە العان.

كونسەرتتە ٴان ٴماتىنىن جازۋشىلاردىڭ شينجياڭعا كەلىپ جازعان قىرۋار تۋىندىلارىنان 10 نەشە تاڭداۋلى تۋىندى تاڭداپ الىنىپ، بۇلار جەرگىلىكتى كوركەمونەرشىلەردىڭ ٴبىر ٴبولىم تاڭداۋلى تۋىندىلارىمەن بىرگە ورىندالىپ، ادامداردىڭ ٴتول شىعارما اندە بەينەلەنگەن كورىكتى شينجياڭنان ٴلاززات الۋىنا مۇمكىندىك جاساعان.

بۇل رەتكى كونسەرت كەشىن جۇڭگو ادەبيەت - كوركەمونەرشىلەر بىرلەستىگى، شينجياڭ ۇيعۇر اۆتونوميالى رايوندىق پارتكومنىڭ ۇگىت ٴبولىمى، شينجياڭ ٴوندىرىس - قۇرىلىس بيڭتۋانى پارتكومىنىڭ ۇگىت ٴبولىمى، جۇڭگو مۋزيكانتتار قوعامى باس بولىپ ۇيىمداستىردى، ىلە وبلىستىق پارتكومنىڭ ۇگىت ٴبولىمى، ىلە وبلىستىق ادەبيەت - كوركەمونەرشىلەر بىرلەستىگى، ىلە وبلىستىق مادەنيەت جانە ساياحات مەكەمەسى وتكىزۋدى ۇستىنە الدى، ىلە شىفان داشۋەسى، ىلە وبلىستىق ٴان - ٴبي تەاترحاناسى، قۇلجا قالالىق پارتكومنىڭ ۇگىت ٴبولىمى، قۇلجا اۋداندىق پارتكومنىڭ ۇگىت ٴبولىمى، چاپچال سىبە اۆتونوميالى اۋداندىق پارتكومنىڭ ۇگىت ٴبولىمى، قورعاس اۋداندىق پارتكومنىڭ ۇگىت ٴبولىمى، قۇلجا قالالىق وقۋ - اعارتۋ مەكەمەسى، قۇلجا قالالىق 15 - باستاۋىش مەكتەپ سەلبەسىپ وتكىزدى. 

سۋرەتتە: ايگىلى ٴانشى ۋاڭ حۇڭۋي اسقاقتاتا ٴان سالۋدا.

ليۋ چىڭگاڭ فوتوسى