ٴتىلشىمىز مىڭ شيا، ەرىكتى ٴتىلشى ليۋ ي - لۇڭ حابارلايدى. 6 - ايدىڭ 13 - كۇنى ٴتىلشىنىڭ ىلە وبلىستىق ايەلدەر مەن بالالار دەنساۋلىعىن قورعاۋ شيپاحاناسىنان ۇعىسۋىنشا، مەملەكەتتىڭ سىناق ٴتۇيىنى ساياساتى نەگىزىندە قازىردەن باستاپ تۇتاس وبلىستاعى جۇكتى ايەلدەردىڭ جۇكتىلىكتىڭ ورتا مەزگىلىندەگى دوۆن (唐氏) سارالاپ تەكسەرۋى بۇكىلدەي تەگىن جۇرگىزىلەدى، جاسى ۇلكەن نەمەسە ۋلترا دىبىستى دولقىن اسپابىمەن تەكسەرىلۋ ناتيجەسى قالىپسىز بولىپ، بوسانۋدان بۇرىن دياگنوزىن ايىرۋ قاجەت بولعان جۇكتى ايەلدەردىڭ كەيبىر تەكسەرىلۋ تۇرلەرى اقىسىز جۇرگىزىلەدى ەكەن.

دوۆن سارالاپ تەكسەرۋى ٴبىر ٴتۇرلى توتەنشە ماڭىزدى تەكسەرۋ بولىپ، قان الۋ ارقىلى دوۆن كۇردەلى بەلگىلەرىن (تۋما ەسالاڭدىق دەپ تە اتالادى) ايىرۋعا بولادى. قۇلجا قالاسىنىڭ تۇرعىنى ۋاڭ چيڭنىڭ جۇكتى بولعانىنا 4 اي بولعان، جۇكتىلىكتىڭ ورتا مەزگىلىندەگى دوۆن سارالاپ تەكسەرۋىن جاساتۋعا الدىن الا كەلىسۋ جـونىندەگى جاقسى حابار ونى قاباعات قۋاندىردى. ۋاڭ چيڭ: ”بۇل جاقسى ساياسات 374 يۋان اقشامدى ۇنەمدەدى، توتەنشە ٴتيىمدى بولدى“ دەدى.

6 - ايدىڭ 13 - كۇنى جۇكتى ايەل شۇي ايحۋا الدىن الا كەلىسۋ بويىنشا بوساناردان بۇرىنعى قاعاناق سۋىن الىپ تەكسەرۋ ٴتۇرى بويىنشا اقىسىز تەكسەرتۋ ساياساتىنان يگىلىكتەندى. ”ٴبىر جولدا 1200 يۋان قاراجات ۇنەمدەلدى، شىنىمەن قۋانىشتىمىن“ دەدى شۇي ايحۋا.

شۇي ايحۋا جاسى ۇلعايعان جۇكتى ايەل، الدىڭعى مەزگىلدەگى جۇكتىلىكتى تەكسەرتۋ كورسەتكىشتەرى ويداعىداي بولماعان، بالانىڭ دەنساۋلىعى جانە ٴوزىن الاڭسىز ەتۋ ٴۇشىن شيپاگەردىڭ تاپسىرۋىمەن وسى تۇردەگى سارالاپ تەكسەرۋگە ۋادەلەسكەن بولاتىن، الدىڭعى ايدا اقشامەن  تەكسەرىلەتىن بۇل ٴتۇردىڭ بۇل ايدا اقىسىز بولارىن ويلاماعان ەدى.

ۇعىسۋعا قاراعاندا 2023 - جىلى مەملەكەتتىك دەنساۋلىق ساقتاۋ اقاۋسىزدىق كوميتەتى شينجياڭ، ىشكى موڭعۇل، حۋبەي، يۇننان سياقتى 4 ولكە، رايوندا  تۋىتتان بۇرىنعى سارالاپ تەكسەرۋ مەن تۋىتتان بۇرىنعى دياگنوز قويۋ سىناق ٴتۇيىنى تولىقتاما قاراجاتىن بەرۋ نىسانىن ورىستەتكەن. نىسان قارجىسى ورتالىقتىڭ ارناۋلى سيلىقتى بەلەت الەۋمەتتىك يگىلىك قورىنان كەلەدى. تۇتاس رايونداعى 19 اۋدان، قالاداعى 43 ەمدەۋ قۇرىلىمى نىساننىڭ سىناق ٴتۇيىنى قۇرىلىمى ەتىپ قۇرىلدى، ىلە وبلىسى 6 - ايدىڭ 6 - كۇنى قاراستىلىعىنداعى بارلىق جۇكتى ايەلدەرگە جۇكتىلىكتىڭ ورتا مەزگىلىندەگى دوۆن سارالاپ تەكسەرۋىن تەگىن ورىستەتتى، سونىمەن بىرگە جۇكتىلىكتىڭ ورتا مەزگىلىندەگى تۋىتتان بۇرىن قاعاناق سۋىن الىپ تەكسەرۋ، حروموسومانىڭ وزەكتى تيبىن تەكسەرۋ تۇرلەرىنىڭ ٴبىر ٴبولىمىن اقىسىز ىستەدى.

”وسى ەكى ٴتۇرلى تەكسەرۋ جاڭا تۋىلعان نارەستەلەردىڭ تۋما كەمىستىگىنىڭ تۋىلۋىن تومەندەتۋ ٴۇشىن جۇرگىزىلىپ وتىر، ٴتيىمدى ساياساتتىڭ اتقارىلۋى سارالاپ تەكسەرۋدىڭ جالپىلاسۋ مولشەرىن اناعۇرلىم جوعارىلاتادى“ دەدى ىلە وبلىستىق انالار مەن بالالار دەنساۋلىعىن قورعاۋ شيپاحاناسىنىڭ بوسانۋدان بۇرىنعى دياگنوز قويۋ ورتالىعىنىڭ مەڭگەرۋشىسى جاڭ شين. ول تاعى: تەگىن تەكسەرىلۋ ٴتۇرىن ٴوتىنىش ەتۋ ٴتارتىبى وتە قاراپايىم، جۇكتى ايەلدەر ەرىكتى قابىلداۋ العى شارتىندا نىسان ٴوتىنىش قاعازىن تولتىرىپ، ٴۇنحات شاعىن باعدارلاماسى ارقىلى ٴوتىنىش ەتۋگە بولادى، - دەدى.

ىلە وبلىستىق ايەلدەر مەن بالالار دەنساۋلىعىن قورعاۋ شيپاحاناسىنىڭ ساندى مالىمەتىنە نەگىزدەلگەندە، 6 - ايدىڭ 6 - كۇنى ەكى ٴتۇرلى حالىققا ٴتيىمدى ساياسات جولعا قويىلعالى بەرى 50 ادام اقىسىز دوۆن سارالاپ تەكسەرۋىنەن يگىلىكتەندى، 4 ادام تۋىتتان ىلگەرگى اقىسىز دياگنوز قويۋ، قاعاناق سۋىن الىپ تەكسەرۋدەن يگىلىكتەنگەن.

سۋرەتتە: وبلىستىق ايەلدەر مەن بالالار دەنساۋلىعىن قورعاۋ شيپاحاناسىندا جۇكتىلىك تەكسەرتۋىن جاساتىپ جاتقان ايەل.

مىڭ شيا فوتوسى