ەكولوگيالىق ورتا قورعالىپ، سۋدىڭ تۇنىق بولۋى جۇزەگە استى
- ىلە وبلىسى ادام مەن تابيعات جاراسىمدى قاتار ٴومىر سۇرەتىن كورىكتى مەكەن قۇردى
ٴتىلشىمىز شى شۋەحۇڭ
ىلە وزەنى الابىنداعى نەشە ٴجۇز كيلومەترلىك ەكولوگيالىق كاريدور بەينە جاسىل تورعىنداي ىلە وزەنىنىڭ ەكى جاعالاۋىن بويلاي كەڭ كوسىلىپ، ىلە وبلىسىنىڭ ەكولوگيالىق وبلىس قۇرۋداعى دامۋ ستراتەگياسىنىڭ ونىمدىلىگىن ايگىلەپ، ىلەدەگى ٴار ۇلت بۇقاراسىنىڭ باقىتتى، تاماشا تۇرمىس جاراتۋداعى ىقشام كورىنىسىنە اينالدى.
ىلە وزەنى الابىنىڭ سۋ ساپاسى ۇزدىكسىز جاقسارىپ، سۋ ساپاسى جونىنەن ەرەكشە كىرپياز اققۋلار دا ىلە وزەنى الابىنداعى سازدىقتاردى مەكەندەپ، وسى جەردە ٴوسىپ - ٴوربىپ، ادام مەن تابيعات جاراسىمدى قاتار ٴومىر سۇرگەن كوركەم كارتينانى ايگىلەدى.
قۇلجا قالاسىنىڭ چيساي الاڭىن سەيىلدەسەڭىز ىلە وزەنىنىڭ ەكى جاعالاۋىنداعى سازدىقتان دا تۇنىق سۋ مەن جاسىل جامىلعىنى، جابايى حايۋاناتتار مەن ادامداردىڭ جاراسىمدى قاتار ٴومىر سۇرگەن كوركەم كورىنىسىن كورە الاسىز. تازارتىلعان سۋ قۇبىرى ارقىلى ىلە وزەنى الابىنداعى سازدىقتارعا قويا بەرىلىپ، كورىنىس رايونىنىڭ سۋىن مولايتىپ، قالانى جاسىلداندىرىپ، سازدىقتى نارلەندىردى.
قازىر قۇلجا قالاسىنىڭ سۋ ىعىستىرۋ قۇبىر تورابى تولىق جالپىلاسىپ، لاس سۋدى ٴبىر جاقتى ەتۋ مولشەرى %100 كە جەتتى. زاۆودتا ٴبىر جاقتى ەتىلىپ، تازارتىلعان سۋ مەملەكەتتىك ٴبىرىنشى A دارەجەلى ىعىستىرۋ ولشەمىنە جەتتى.
قۇلجا قالالىق قالا باسقارۋ مەكەمەسى قالالىق ۇكىمەت الەۋمەتتىك ىستەرى ٴبولىمىنىڭ باستىعى جاڭ شين بىلاي دەدى: ”قۇلجا قالاسىنىڭ تازارتىلعان سۋى نەگىزىنەن كورىنىس رايونىنىڭ ەكولوگيالىق ورتاسىن سۋارۋعا جانە جاسىلداندىرۋعا جۇمسالادى. قازىر قۇلجا قالاسىنا قاراستى ىلە وزەنى الابىنداعى سازدىق كورىنىس رايونى، وڭتۇستىك اينالما جولى جانە قۇلجا شەكارالىق ەكونوميكالىق سەلبەستىك رايونىنىڭ ٴىشىنارا جول بولەكتەرىن جاسىلداندىرۋعا، سۋارۋعا نەگىزىنەن تازارتىلعان سۋ ىستەتىلەدى. بيىل قۇلجا قالاسى تاعى دا تازارتىلعان سۋدىڭ پايدالانىلۋ مولشەرىن %40 تەن اسىرۋعا كۇش سالۋدا“.
پارتيا 20 - قۇرىلتايىنىڭ بايانداماسىندا بىلاي دەپ اتاپ كورسەتىلدى: ”تابيعات پەن ەكولوگيالىق ورتانى كوز قاراشىعىمىزداي قورعاپ، ٴوندىرىسى دامىعان، تۇرمىسى باي، ەكولوگياسى تاماشا وركەنيەتتى دامۋ جولىمەن تاباندىلىقپەن ٴجۇرىپ، جۇڭحۋا ۇلتىنىڭ ماڭگى جالعاسىپ دامۋىن جۇزەگە اسىرۋىمىز كەرەك“.
ىلە وبلىسى لاس سۋدى كورىنىس ٴوڭىرىنىڭ سۋىن مولايتۋعا جانە قالانى جاسىلداندىرۋعا، سۋارۋعا پايدالانىپ لاس سۋدى قايتالاي پايدالانۋ مولشەرىن جوعارىلاتىپ قالماستان، ەكولوگيانى قورعاۋعا جاسىل قالتقى قالىپتاستىردى.
ىلە وبلىستىق ورمان شارۋاشىلىعى جانە جايىلىم مەكەمەسى تابيعي قورعالاتىن جەرلەردى قورعاۋ - باسقارۋ باسقارماسىنىڭ باستىعى نۇرمات جايىرباي ۇلى بىلاي دەدى: ”ىلە وزەنى الابىندا مەملەكەتتىك 1 - دارەجەلى قورعالاتىن حايۋاناتتار جىل سايىن كوبەيدى. جابايى حايۋاناتتار مەن وسىمدىكتەردى قورعاۋ تەبىنىن ارتتىرىپ، جابايى حايۋاناتتار بايلىعىن تەكسەرۋدى ويداعىداي ورىستەتۋ ٴۇشىن ىلە وبلىسى جۇڭگو عىلىم اكادەمياسى شينجياڭ ەكولوگيا جانە جاعراپيا زەرتتەۋ ورنىنىڭ ماماندارىن ۇسىنىس ەتىپ، وبلىسقا توتە قاراستى اۋدان، قالالاردىڭ قاتىستى قىزمەتكەرلەرىنە ارناۋلى كۋرس اشتى“.
نۇرمات جايىرباي ۇلى بىلاي دەدى: ”ىلە وزەنى الابىنداعى سازدىق ەكولوگياسىنىڭ ۇزدىكسىز قالپىنا كەلۋىنە بايلانىستى، كەيبىر سيرەك كەزدەسەتىن جابايى حايۋاناتتار سازدىققا كەلىپ مەكەندەدى. بيىل مەملەكەتتىك 1 - دارەجەلى قورعالاتىن حايۋانات ٴتۇستى قۇتان دا ىلە وزەنى الابىنداعى نارات سازدىعىندا بوي كورسەتتى، بۇل ىلە وبلىسىنىڭ ەكولوگيالىق ورتاسىنىڭ ۇزدىكسىز جاقسارعاندىعىن ٴبىر قىرىنان دالەلدەۋمەن بىرگە، ادام مەن تابيعاتتىڭ جاراسىمدى قاتار ٴومىر ٴسۇرۋىنىڭ جاندى ايعاعى بولدى“.
شاتى كورىنىس رايونى. جاڭ چيڭحۋا فوتوسى
شاشى كورىنىس رايونى. جاڭ چيڭحۋا فوتوسى
ىلە وزەنى ۇلكەن كوپىرىنىڭ كۇن باتارداعى كورىنىسى. ۋاڭ ليلي فوتوسى