كۇن سۋىتقانىمەن، ٴار سالانىڭ قاجىرلى ەڭبەگى قالانى جىلۋعا بولەدى 

مىڭ شيا، لي يافىڭ، ۋاڭ ليلي، سۇن ي - نان، دۋ لەي (ٴوز تىلشىلەرىمىز)

بىرنەشە كۇننەن بەرى ىلە وبلىسىندا تەمپەراتۋرا كۇرت تومەندەپ، قار جاۋدى، بۇل قاتىناس - تاسىمالعا، قالا ىشىندەگى قاتىناۋ مەن بۇقارانىڭ تۇرمىسىنا ىقپال جاسادى. ىلە وبلىسىنداعى قوعام حاۋىپسىزدىگى، قاتىناس، قالا اكىمشىلىگى سياقتى قاتىستى تاراۋلار جەدەل اتتانىسقا كەلىپ، قار - مۇزدى ەرىتىپ، قاتىناسقا قولباسشىلىق ەتتى؛ ەلەكتر قۋاتى، جىلۋ سەرىكتەستىكتەرى جەدەل جوندەۋ قوسىنىن ۇيىمداستىرىپ، توسىن جاعدايعا توتەپ بەردى؛ قالا باسقارۋ، ورتا تازالىعى، الەۋمەتتىك اۋماق قىزمەتكەرلەردى قار ـ مۇزدى تازالاۋعا بار كۇشپەن ۇيىمداستىرىپ، حاۋىپسىز ٴجۇرىپ - تۇرۋعا كەپىلدىك ەتتى. وسى رەتكى قارلى بوراندا وبلىس بويىنشا جوعارىدان تومەنگە دەيىن جابال اتتانىسقا كەلىپ، بۇقارانىڭ قالىپتى ٴوندىرىس، تۇرمىسىن قامتاماسىزداندىرۋ ٴۇشىن ۇيقى مەن دەمالىستان كەشىپ، ٴبىرىنشى شەپتەن تاپجىلمادى.

 6000 نان استام ورتا تازالىقشىسى  قارمەن شايقاس جاسادى

 12 ـ ايدىڭ 9 - كۇنىنەن 12 - كۇنىنە دەيىن قۇلجا قالاسىندا تەمپەراتۋرا كۇرت تومەندەپ، قار جاۋدى.  قار تازالاۋ قىزمەتىن اناعۇرلىم جاقسى ىستەپ، قالىڭ بۇقارانىڭ حاۋىپسىز ٴجۇرىپ - تۇرۋىنا كەپىلدىك ەتۋ ٴۇشىن، قۇلجا قالالىق قالا باسقارۋ مەكەمەسى «قاردىڭ جاۋۋىن بۇيرىق دەپ ٴبىلۋ، جاۋاعانىن تازالاۋ، قار توقتاعاندا جول تازا بولۋ» تالابىنا ساي، «قۇلجا قالاسىنىڭ 2023 - جىلعى قىس ماۋسىمىندا قار - مۇز تازالاۋ قىزمەتىنىڭ اتقارۋ جوباسىن» جاسادى.

قازىرگە دەيىن قۇلجا قالاسى جيىنى 6 مىڭ 246 ادام ـ رەت ورتا تازالىقشىسىن، ٴتۇرلى قار تازالاۋ اۆتوموبيلىنەن 857 رەت شىعارىپ، 215 نەگىزگى كوشەنى، 556 قالتارىس كوشەنى تازالادى. 

قاتىناس ساقشى تاراۋلارى قاتىناس  حاۋىپسىزدىگىن بار كۇشپەن قامتاماسىز ەتتى 

اۋا رايى تاراۋلارىنىڭ كۇشتى سۋىق اعىستان ساقتانۋ ينفورماتسياسىن تاپسىرىپ العاننان كەيىن ىلە وبلىستىق قوعام حاۋىپسىزدىگى مەكەمەسىنىڭ قاتىناس ساقشى تارماق اترەتى 12 - ايدىڭ 11 -، 12 - كۇندەرى ناشار اۋا رايىنا شۇعىل توتەپ بەرۋ جوباسىن ىسكە قوسىپ، ساقشى ورنالاستىرۋ، جول بويىن شارلاۋ، ۇگىتتەۋ، ەسكەرتۋ بەرۋ سياقتى جاقتاردان ارناۋلى ورنالاستىرۋ جاسادى. قازىرگە دەيىن وبلىسقا توتە قاراستى اۋدان، قالالاردىڭ نەگىزگى جولدارىندا، جوعارى قارقىندى تاس جولدىڭ كەڭساي جول بولەگىندەگى ىلەدەن شىعاتىن ۇلكەن جۇك اۆتوموبيلدەرىنىڭ قاتىناۋى ۋاقىتتىق شەكتەلۋدەن تىس، قالعان جولداردىڭ قاتىناسى تۇگەلدەي قالىپتى بولدى. قازىرگە دەيىن وبلىسقا توتە قاراستى قاتىناس ساقشى تاراۋلارى كۇنىنە ورتا ەسەپپەن 940 ادام ـ رەت ساقشى كۇشىن، 270 رەت ساقشى اۆتوموبيلىن شىعاردى.

ەگىس داقىلدارى مەن مالدىڭ قىستان  امان وتۋىنە كەپىلدىك ەتتى

”قالتقى ٴىشىنىڭ تەمپەراتۋراسىن جوعارىلاتقاندا، ٴسوز جوق، حاۋىپسىزدىككە كوڭىل ٴبولۋ، قالتقىنىڭ كوتەرىمدىلىك جاعدايىن تەكسەرۋ، جاۋعان قاردى دەر كەزىندە تازالاۋ، قالتقى ىشىندە كەمىندە ەكى ادام ٴبىر - بىرىنە سەرىك بولىپ، ٴوزارا قارايلاسۋ كەرەك، اقشا تابۋ ماڭىزدى بولعانمەن، حاۋىپسىزدىك ونان دا ماڭىزدى!“ 12 ـ ايدىڭ 12 ـ كۇنى قىستاق كادرلارى، اۋىل شارۋاشىلىق تەحنيكتەرى قارلى بورانعا قاراماي قۇلجا قالاسى ۋاڭدا كوكونىس بازاسىندا كوكونىس ەگەتىن ديقان جانيا وتباسىنىڭ كوكونىس قالتقىسىنا كەلىپ ىقىلاستى ەسكەرتۋ بەردى.

كونە تۇرعىندار رايونىنىڭ سۋمەن قامداۋ  قۇرىلعىلارىن سۋىقتان ساقتاۋ قىزمەتىن  ويداعىداي ىستەدى

12 ـ ايدىڭ 12 ـ كۇنى كۇشتى سۋىق اعىستى اۋا رايىنا بايلانىستى قۇلجا قالالىق قۇبىر سۋ شەكتى سەرىكتەستىگى سۋمەن قامداۋ قۇرىلعىلارىن جاپپاي تەكسەرۋگە ارناۋلى ادام ۇيىمداستىردى ٴارى 20 نەشە كونە تۇرعىندار رايونىنىڭ سۋمەن قامداۋ قۇرىلعىلارىنا سۋىقتان ساقتانۋ شاراسىن قولدانىپ، تۇرعىنداردىڭ قىستا سۋدان حاۋىپسىز، ورنىقتى پايدالانۋىنا كەپىلدىك ەتتى.

13 - كۇنى ىلە وزەنى اڭعارىنىڭ ەڭ تومەنگى تەمپەراتۋراسى نولدەن تومەن 25 سەلتسي گرادۋسقا ٴتۇستى. بۇل رەتكى كۇشتى سۋىق اعىستى اۋا رايىنا توتەپ بەرۋ ٴۇشىن قۇلجا قالالىق قۇبىر سۋ شەكتى سەرىكتەستىگى قاتۋدان ساقتانۋ، جىلۋلىق ساقتاۋعا كەپىلدىك ەتۋ ارناۋلى قىزمەت جيىنىن اشىپ، قاتۋدان ساقتانۋ، جىلۋلىق ساقتاۋعا كەپىلدىك ەتۋ شارالارىن كۇنى بۇرىن ورنالاستىرىپ، قىزمەتكەرلەردى سۋمەن قامداۋ قۇبىر تورابىن، كلاپاندى، سۋ ساعات قۇدىعىن ارالاپ تەكسەرۋ قىزمەتىن كۇشەيتۋگە قۋزادى. ەگەر قالا تۇرعىندارى سۋدان پايدالانۋدا ماسەلەگە تاپ بولسا، تاۋلىك بويى قىزمەت وتەۋ ىستىق لەنياسى 8227269 - 0999 عا تەلەفون جالعاپ كومەك سۇراۋىنا بولادى.

كۇن سۋىق بولعانىمەن ٴۇي ٴىشى  تەمپەراتۋراسى تومەندەمەدى 

وسى رەتكى تومەن تەمپەراتۋرالى، قارلى اۋا رايىنا توتەپ بەرۋ ٴۇشىن، قالاداعى ٴارقايسى جىلۋمەن قامداۋ كاسىپورىندارى تۇتاس تۇلعالىق جىلۋمەن قامداۋ كوتەرىمدىلىگىن دەر كەزىندە جوعارىلاتىپ،  ٴۇي ٴىشىنىڭ جىلۋلىق مولشەرىن جوعارىلاتتى، قازىر جىلۋمەن قامداۋ جالپى تۇلعالىق جاقتان ورنىقتى، ٴتارتىپتى جۇرىلۋدە.

قۇلجا قالالىق جىلۋمەن قامداۋ شەكتى سەرىكتەستىگىنىڭ قاتىستى جاۋاپتىسى بىلاي دەدى: قازىر قاراستى رايوننىڭ جىلۋمەن قامداۋ قىزمەتى ورنىقتى، ٴتارتىپتى جۇرگىزىلۋدە، كۇشتى سۋىق اعىستى تەمپەراتۋراعا قاراتا، سەرىكتەستىگىمىز شۇعىل جاعدايعا توتەپ بەرۋ جوباسىن جاساپ، شۇعىل جاعدايعا توتەپ بەرۋ، جەدەل جوندەۋ قوسىنىن قۇرىپ، تاۋلىك بويى بۇيرىق كۇتىپ، توسىن ۋاقيعالارعا توتەپ بەرۋگە ساقاداي سايلانىپ، قۇبىر تورابى جابدىقتارىنىڭ حاۋىپسىز، قالىپتى اينالىمىنا جاپپاي كەپىلدىك ەتۋدە.  ەگەر جىلۋمەن قامداۋدا ماسەلەگە تاپ بولساڭىز،  تاۋلىك بويى قاريدارلارعا قىزمەت وتەۋ ىستىق لەنياسى 8141234 - 0999 كە تەلەفون جالعاپ كومەك سۇراۋعا بولادى.

ەلەكتر كۇشىن جەدەل جوندەۋ اترەتىنىڭ  بارلىق قىزمەتكەرلەرى ساقاداي سايلاندى

سۋىق اعىستى اۋا رايىنىڭ ەلەكتر تورابىنا جەتكىزەتىن زاردابىن ازايتۋ ٴۇشىن، مەملەكەت ەلەكتر تورابى يحى ەلەكترمەن قامداۋ سەرىكتەستىگى ناشار اۋا رايىنا شۇعىل توتەپ بەرۋ شارالارىن جەدەل ىسكە قوسىپ، شۇعىل جاعدايعا توتەپ بەرۋ، قاتەردەن قۇتقارۋ قوسىنى بۇيرىق كۇتۋ كۇيىنە ٴوتىپ، ەلەكتر تورابىنىڭ حاۋىپسىز، ورنىقتى اينالىمىنا جان - جاقتى كەپىلدىك ەتتى. 

مەملەكەتتىك ەلەكتر تورابى يحى ەلەكترمەن قامداۋ سەرىكتەستىگىنىڭ جابدىق باسقارۋ ٴبولىمىنىڭ تانىستىرۋىنشا، قىس ماۋسىمىنداعى سۋىق اعىس، قالىڭ قار سياقتى ەرەكشە اۋا رايىنا قاراتا، سەرىكتەستىك شۇعىل جاعدايعا توتەپ بەرۋ، سايكەسۋ جوباسىن الدىن الا جاساعان. قازىر ىلە وزەنى اڭعارىنداعى ەلەكتر تورابىنىڭ اينالىمى حاۋىپسىز، ورنىقتى بولىپ، 100 دەن استام ەلەكتر تورابى قىزمەتكەرى ەلەكتر تورابىنىڭ اينالىم جاعدايىن قاداعالاپ، قاتەردەن قۇتقارۋ قوسىنى ساقاداي سايلانىپ بۇيرىق كۇتۋدە ەكەن.

قاتىناس ساقشىلارى اۆتوكولىكتەردىڭ قاتىناۋىنا قولباسشىلىق ەتۋدە.       مىڭ شيا فوتوسى

ورتا تازالىعى جۇمىسشىلارى قار تازالاۋدا.    سۇن ي - نان فوتوسى

قار تازالاۋ ماشيناسى باقشا كوشەسىندە قار تازالاۋدا.     سۇن ي - نان فوتوسى

قارلى بوراندا قايشالىسقان اۆتوكولىكتەر.            سۇن ي - نان فوتوسى

جىلۋمەن قامداۋ كاسىپورىندارى پار قازانىن مازداتتى.  لي يافىڭ فوتوسى 

سۋ ساعاتىن قىمتاۋ.       لي يافىڭ فوتوسى 

قار تازالاۋ ماشيناسى قاردى تىنباي تازالاۋدا.          ليۋ چۇنشيڭ فوتوسى