− جىلدىق ساۋدا سوماسى 10 ميلليارد يۋاننان اساتىن مال بازارىنىڭ اتاعى اسپاندادى

دامۋى جاڭاشا، تابىسى تاماشا حۋاڭگۇڭ مال بازارى

تىلشىلەرىمىز نيحات كارىم ۇلى، حۋاڭ جيڭ، ليۋ چۇنشيڭ 

ٴبىر جاعى، قاقاعان اياز قۇرساپ، اق قار قىمتاعان اپپاق دالا؛ ەندى ٴبىر جاعى، قامداۋى دا، ساۋداسى دا بىردەي شالقىعان مال بازار. جاڭا جىل قارساڭىندا تىلشىلەر قۇلجا اۋدانى ٴۇشون حۇيزۋ اۋىلىنداعى شينجياڭ چۋاڭجين حۋاڭگۇڭ اۋىل شارۋاشىلىق ونىمدەرى ساۋدا بازارىنا (تومەندە قىسقاشا حۋاڭگۇڭ بازارى دەلىنەدى) ارنايى ات باسىن بۇرىپ، مۇنداعى سەڭدەي سوعىلىسقان ادامدار لەگىن، ساۋداسى كۇسەت بازار جايىن، دۋماندى ورتانى كورىپ قايتتى.

ۇزاقتان بەرى حۋاڭگۇڭ بازارى ىلەنىڭ  مال ساۋداسىنداعى جيناۋ - جونەلتۋ ورتالىعى بولىپ كەلگەن - دى، قازىر كۇندەلىك بۇيىمدار، مال، اس - سۋ، سۋ ونىمدەرى، جەمىس - جيدەك، كوكونىس، كيىم - كەشەك ساۋداسى سياقتىلار ٴبىر تۇلعالانعان اۋىل شارۋاشىلىق ونىمدەرى بازارىنا اينالىپ، يەلەگەن جەر اۋماعى مەن ساۋدا كولەمى جاعىنان شينجياڭداعى ەگەيلەر قاتارىنان بوي كورسەتكەن، ومىرشەڭدىككە تولى جالىندى دا جاندى مال ساۋدا رايونى سانالۋدا. ٴار اپتانىڭ دۇيسەنبى، سارسەنبى، جۇما كۇندەرى اشىلاتىن مال بازارىنا شينجياڭنىڭ ٴىشى - سىرتىنان جانە ىلە اڭعارىنان كەلگەن باعىمشىلار، ساۋداگەرلەر، دەلدالدار، شارۋالار جانە كوتەرمە ساۋداگەرلەر بولىپ، قالىڭ ٴنوپىر ادام ەرتەمەن وسىندا اعىلادى. بۇل ورتادان ۇشتەن، تورتتەن توپتاسىپ مال تاڭداپ تۇرعانداردى، جانىن سالىپ باعا تالاسىپ جاتقانداردى، ماشيناعا مال تيەپ ابىگەرلەنىپ جۇرگەندەردى، جىلجىمالى ەسەپ جاساپ جاتقانداردى كورەسىز. بۇل بازار مال ساۋداسىن بارىنشا جانداندىرىپ، بۇكىل شينجياڭنىڭ مال ساۋداسىنا كۇش قوسىپ قانا قويماي، شينجياڭ سىرتىنداعى بازارلاردى دا مالمەن قامداۋ ارناسىن قالىپتاستىرىپ، كولەمدەندىرىپ، جىلدىق ساۋدا سوماسىن ۇزدىكسىز ورلەتىپ كەلەدى. 

ٴار رەتكى بازارعا 10 مىڭنان استام ادام كەلەدى

12 - ايدىڭ 20 - كۇنى حۋاڭگۇڭ بازارىنىڭ اپتالىق دۋماندى بازار كۇندەرىنىڭ ٴبىرى ەدى. تۇستەن بۇرىن ساعات 11 دەن اسا بۇل ارانى دابىرلاسقان ادامداردىڭ داۋىستارى مەن شۇرقىراعان مال ٴۇنى كەرنەيتىن، مالىن جەتەكتەپ ٴيىن تىرەسە قايشالىسقان ادامداردىڭ جۇزىنەن ٴۇمىتتى بايقايسىز. حوش ٴيىستى تاعامدار، كوز جاۋىن الاتىن تاۋارلار، دۋماندى كورىنىس ادامدى وزىنە بىردەن باۋراپ كەتە بەرەدى. 

حۋاڭگۇڭ بازارىندا جۇرت نازارىن بىردەن بۇراتىن مال ساۋداسى دەلدالدارى ەدى، ولار شەتىنەن شەشەن، ويىڭىزداعىنى ايتقىزباي تاباتىن مايتالماندار. ولاردىڭ ساۋداداعى بەت ميميكالارى، وزگەشە قول يشاراتتارى كىسىگە قىزىق سەزىلەدى. بايسالدى، داۋىستاپ سويلەسە، ساۋدالاسقان ەكى جاقتىڭ ايتقان باعا پارقىنىڭ تىم الشاق بولعانىن بىلدىرەدى، وندا دەلدال شاماسىنىڭ كەلىسىنشە ولاردى كەلىستىرۋگە قۇلشىنادى؛ ال ٴجۇزى جىلىپ، سىپايى سويلەر بولسا، ەكى جاقتىڭ باعاعا ريزا بولىپ، ساۋدانىڭ ساتىمەن بىتكەنىن، دەلدالدىڭ ”شايلىعىنىڭ“ قالتاعا تۇسكەنىن بىلدىرەدى.

سيمەنتال سيىر ساۋدالانىپ جاتقان جەردەن ٴتىلشى دەلدال وركەش تۇرعاننىڭ سول قولىمەن سيىر يەسىنىڭ، وڭ قولىمەن الارماننىڭ قولىن ۇستاپ ەكەۋىن كەلىستىرۋگە بارىن سالىپ جاتقانىن كوردى. سوڭىندا كوپشىلىكتىڭ كۋا بولۋىمەن وسى ٴبىتىمى كەسەك سيمەنتال سيىردىڭ باعاسى 27 مىڭ يۋانعا تۇراقتاپ، ساۋدالاسقان ەكى جاق ريزاشىلىعىن بىلدىرگەندە وركەش تۇرعاننىڭ قۋانىشى قوينىنا سيمادى، ويتكەنى بۇل ونىڭ ٴۇشىنشى ”شايلىعى“ ەدى. وركەش تۇرعان قۇلجا قالاسىنىڭ تۇرعىنى، ادەتتە سيىر ساۋداسىن دا ىستەيدى، حۋاڭگۇڭ بازارىنىڭ ارقاسىندا كىرىسى جىلدان - جىلعا ارتىپ كەلەدى.

قازىرگە دەيىن وسى حۋاڭگۇڭ بازارىندا قۇرىلعان قۇلجا اۋدانى مال، ٴۇي قۇستارى دەلدالدار قوعامىنا تىزىمگە الدىرعان مۇشە سانى 2 مىڭنان اسقان. وسى كۇنى 10 مىڭنان استام ادام بازارعا كەلىپ، جاڭا جىل قارساڭىندا مال بازارىن ٴتىپتى دە قىزدىرا تۇسكەن.

جىلدىق ساۋدا سوماسى ون ميلليارد يۋاننان اسادى

حۋاڭگۇڭ بازارىنىڭ يەلەگەن جەر اۋماعى 620 مۋ بولىپ، شينجياڭ چۋاڭجين حۋاڭگۇڭ اۋىل شارۋاشىلىق ونىمدەرى ساۋدا شەكتى سەرىكتەستىگى قارجى قوسىپ سالعان، بۇل بازاردىڭ ٴتۇرلى قىزمەت وتەۋ يقۋاتى تولىق، ساۋدا ٴتارتىپتى جۇرىلۋدە ەكەن. بازار كەڭسەسىنىڭ مەڭگەرۋشىسى ۋاڭ لەيدىڭ تىلشىگە ايتۋىنشا بازار فينانستىق قىزمەت وتەۋ ورنىن ەنگىزۋمەن قاتار، اۋداندىق حايۋاناتتاردى كارانتيندەۋدى باقىلاپ - باسقارۋ تاراۋلارى مەن اۋىلدىق مال شارۋاشىلىق، مال شيپاگەرلىك، جايىلىم قىزمەتى پۋنكىتىن وسى بازاردا قىزمەت وتەۋ ورنىن قۇرۋعا سايكەستىرىپ، مال ساۋداسىمەن اينالىساتىندارعا قولايلىلىق جاراتقان.  

ۋاڭ لەيدىڭ تانىستىرۋىنشا، بازارداعى بارلىق ساۋدا ۋيچات الەۋمەتتىك ٴنومىرى مەن شاعىن پروگراممادا ورىندالىپ، ساۋدانىڭ حاۋىپسىزدىگىنە كەپىلدىك ەتۋمەن بىرگە، جەلىدەگى ساۋدا سوماسى، ٴتۇرى، باعاسى سياقتى ساندىق مالىمەتتەردى تەڭ يەلەۋدى جۇزەگە اسىرعان. ساناققا قاراعاندا، حۋاڭگۇڭ بازارىنىڭ ورتاشا كۇندىك مال ساۋداسى ون مىڭ باستان (تۇياق)، جىلدىق ساۋدا مولشەرى ٴبىر ميلليون 200 مىڭ باستان (تۇياق)، جىلدىق ساۋدا سوماسى 10 ميلليارد يۋاننان اسادى ەكەن.

نيڭشيادان كەلگەن ياڭ شينيڭنىڭ مال ساۋداسىمەن اينالىسقانىنا كوپ جىل بولعان. ول ىلەلىك توراپتاسى، دەلدال لي شياۋلۇڭنىڭ تانىستىرۋىمەن ىلەنىڭ حۋاڭگۇڭ بازارىنا تۇڭعىش رەت سيىر الۋعا كەلگەن ەدى. ەكى ساعات ىشىندە - اق 50 باس شينجياڭ قوڭىر سيىرىن ساتىپ الىپ يۇننانعا جونەلتتى. ياڭ شينيڭ تىلشىگە ەگەر تاعى دا ويداعىداي جاقسى سيىرلار بولسا كوپتەپ ساتىپ الاتىندىعىن، يۇنناندا سيىر ەتىنە سۇرانىستىڭ جوعارى ەكەندىگىن ايتتى.

لي شياۋلۇڭ جەرگىلىكتى تۇرعىن، ونىڭ سيىر ساۋداسى دەلدالدىعىمەن شۇعىلدانعانىنا ۇزاق جىل بولعان، ول ۇنەمى مال ساۋداسىنا قاتىستى شاعىن كەسكىندەردى جەكە پاراقشاسىندا تاراتىپ وتىراتىندىقتان ەلىمىزدىڭ جەر - جەرىندەگى مال ساۋداگەرلەرمەن، توراپتاستارمەن تانىسقان ٴارى ولاردى وسىندا كەلۋگە باۋراعان. جۋىقتا ول ىستەس بولعان ەكى سەرىگىمەن بىرلەسىپ مال ساۋداسى سەرىكتەستىگىن قۇرىپ، ىلەنىڭ سيىر، قوي، جىلقى تۇلىگىن شينجياڭنىڭ ٴىشى - سىرتىنا اناعۇرلىم ويداعىداي تانىستىرۋدى جوسپارلاۋدا ەكەن. حۋاڭگۇڭ بازارىنىڭ ساۋداسى بارعان سايىن كۇسەت بولىپ، اتاعى اسپانداپ، ينتەرنەتتەگى تانىمالدىعى دا جوعارىلاپ، ەلىمىزدىڭ جەر - جەرىندەگى مال ساۋداسىمەن شۇعىلداناتىنداردى بارعان سايىن باۋراۋدا.

موڭعۇلكۇرە اۋدانىنان كەلگەن ەگىنشى ٴالىمجان ٴالي 10 باس سيىردىڭ باعاسىنا كەلىسىپ، موڭعۇلكۇرەگە جونەلتكەلى تۇرىپتى. ول تىلشىگە ٴوزىنىڭ سيىر، قوي ەتىن ساتۋمەن شۇعىلداناتىنىن، اپتا سايىن حۋاڭگۇڭ بازارىنان 10 باس توڭىرەگىندە سيىر ساتىپ الاتىندىعىن، ٴوزىنىڭ دە باعىمشىلىقپەن شۇعىلداناتىن ٴىرى وتباسى ەكەندىگىن، قوراسىندا 150 باستان استام سيىرى بار ەكەنىن ايتتى.

2020 - جىلى 9 - ايدا حۋاڭگۇڭ بازارى اۆتونوميالى وبلىس جاعىنان ۇلتتاردىڭ ارالاسۋ، ىشتەسۋ، توعىسۋىنان ۇلگى كورسەتۋ ٴتۇيىنى بولىپ باعالانىپ، ٴار ۇلت حالقى بۇل ارادان ٴبىر ورتاقتىق تاۋىپ، مال ساۋداسى بارىسىندا قول ۇستاسا تاماشا تۇرمىسقا تالپىنىپ، باقىت سەزىمىنە، تابىس سەزىمىنە، جاۋىپسىزدىك سەزىمىنە بولەندى.

باقىتتى اۋىل - قىستاقتىڭ اۋقاتتانۋ قۇپيا سيفرى

حۋاڭگۇڭ بازارى ساۋداسىنىڭ كۇسەت بولۋى ماڭىنداعى اۋىل - قىستاقتىڭ دامۋىن جەبەگەن. بازار ورنالاسقان قۇلجا اۋدانى ٴۇشون حۇيزۋ اۋىلى التۇي قىستاعى كونە بازاردىڭ ورنىن سەرىكتەستىككە جارنا رەتىندە قوسىپ، بازاردىڭ ٴار جىلعى كىرىسىنىڭ %3 ىنە يە بولىپ، بازاردىڭ تۇلعالىق ورنالاسۋىن كەمەلدەندىرۋمەن بىرگە، قىستاق كوللەكتيۆىنىڭ كىرىسىن ارتتىرعان. قىستاقتىڭ جۇمىس تىندىراتىن قازىنالىق قۋاتى جوعارىلاعاندىقتان تۇرعىندار كوميتەتىنىڭ دە بەدەلى ارتقان.

حۋاڭگۇڭ بازارىنىڭ اقاۋسىز دامۋىنا جۇيەلى جەتەكشىلىك ەتىپ، باعىمشىلىق كاسىبىنىڭ شارۋالاردى اۋقاتتاندىرۋدىڭ، كىرىسىن ارتتىرۋدىڭ ”قوزعاۋشى كۇشىنە“ اينالۋىن جەدەل ىلگەرىلەتۋ ٴۇشىن، قۇلجا اۋدانى ”ۇكىمەت، كاسىپورىن، بانكە، كەپىلدىك سەرىكتەستىگى“ سەلبەسۋ مەحانيزمىن جولعا قويىپ، باعىمشىلىقپەن شۇعىلداناتىن وتباسىلاردىڭ قارىز اقشا ماسەلەسىن شەشكەن. اۋداندىق ۇكىمەت 30 ميلليون يۋان دامۋ حاۋىپسىزدىك ساقتاۋلى قورىن ازىرلەسە، بانكە مەن كەپىلدىك سەرىكتىگى حاۋىپ - قاتەر ساقتاۋلى قورىن 10 ەسە كوبەيتىپ، شارتقا تولاتىن قارىز الۋشىلارعا قارىز بەرگەن جانە كەپىل بولعان. بۇل مەحانيزم مال باعىمشىلىعىنا بەرىلەتىن قارىز اقشانىڭ مولشەرىن ارتتىرىپ قانا قويماي، باعىمشىلىقپەن شۇعىلداناتىن وتباسىلاردىڭ قارىز اقشاسىنىڭ ٴوسىمىن %8.24 تەن %4.9 كە تومەندەتىپ، باعىمشىلىقپەن شۇعىلداناتىن وتباسىلارىنىڭ قىزعىندىلىعى مەن سەنىمىن ارتتىرعان. كەزەكتە 15 ميلليون يۋان قارىز اقشا تاراتىلىپ، باعىمشىلىقپەن شۇعىلداناتىن ٴبىر توپ ٴار ۇلت بۇقاراسىنا كومەكتەسىپ، اۋىل - قىستاق كاسىبى نىعايا تۇسكەن.

كەزەكتە ٴۇشون حۇيزۋ اۋىلىنىڭ حۋاڭگۇڭ بازارى سيىرشىلىق كاسىبى ارقىلى قالاشىقتى الۋەتتەندىرۋدى پارمەندى ىلگەرىلەتىپ، اۋىل بويىنشا باعىمشىلىقپەن شۇعىلداناتىن وتباسى 5 مىڭنان اسىپ، مىڭ باستان استام سيىر باعىمشىلىق رايونى 4 كە، سيىرى 100 باستان اساتىن وتباسىلىق فەرما 28 گە جەتىپ، شاعىن كولەمدى باعىمشىلىقپەن شۇعىلداناتىن وتباسى 500 دەن اسىپ، باعىمشىلىق كاسىبىن دامىتۋ ۇردىسكە اينالىپ، ٴار ۇلت حالقىنىڭ وتباسىلىق كىرىسىنىڭ نەگىزگى قاينارى بولعان. سونىمەن بىرگە، باعىمشىلىق كاسىبىنىڭ جەبەۋىندە جەم - ٴشوپ مانەرلەۋ كاسىپورنىنان ون شاقتىسى قۇرىلىپ، جىلدىق ساتىلىمى 200 مىڭ توننادان اسقان؛ مال شارۋاشىلىق ونىمدەرىن مانەرلەيتىن 30 دان استام كاسىپورىن قۇرىلىپ، ٴتۇرلى بۇيىمدار، اس - سۋ، جاتىن ورىنعا ساياتىن جۇمىستانۋ ورىندارى جانە وسى كاسىپتەرمەن شۇعىلداناتىنداردىڭ سانى 10 مىڭنان اسقان. 

ٴتۇس اۋا ٴتورت تۇلىك مال تيەلگەن ۇلكەندى - كىشىلى جۇك اۆتوكولىكتەر حۋاڭگۇڭ بازارىنان ىرعالا شىعىپ كەلەدى. مال ساۋدالاعان جۇرتتىڭ جۇزدەرىنەن ريزاشىلىق پەن ۇمىتكە تولى سەنىمدى اڭعاراسىز. ويتكەنى ولار جاڭا ٴبىر جىلدا مال بازارىنىڭ جالعاستى جاندانا بەرەتىنىنە كامىل سەنەتىن ەدى.

دۋماندى جىلقى ساۋدالاۋ رايونى

ساۋداسى كۇسەت سيىر ساۋدالاۋ رايونى

قوي تاڭداۋ

”تۇلپارعا“ كەجىم جابۋ

دەلدالدار ساۋدا كەلىستىرۋدە

الارماندى كۇتكەن ساۋداگەر

حۋاڭگۇڭ بازارىنىڭ جالپى كورىنىسى