13 جىل بويى لابوراتوريالىق تەكسەرۋدە اعاتتىق جىبەرمەگەن

لابوراتوريا تەكسەرۋشىسى ياڭ حۇڭنىڭ كاسىپتى قادىرلەۋ سۇيىسپەنشىلىگى

ٴوز ٴتىلشىمىز ۋاڭ جىحۋا، ەرىكتى ٴتىلشى ساي لوگاڭ

3 ـ ايدىڭ 13 ـ كۇنى سەبەزگى جاڭبىر جاۋىپ تۇر. ياڭ حۇڭ بۇرىنعىداي قىزمەت كيىمىن اۋىستىرىپ، لابوراتوريالىق تەكسەرۋگە قاجەتتى اسپاپتاردى ازىرلەپ، ىلە - شالا قىزمەتتەستەرىمەن بىرگە سۋ، كومىر، ماي ۇلگىلەرىنە لابوراتوريالىق تەكسەرۋدى باستاپ كەتتى. ياڭ حۇڭ جۇڭگو كومىر توبى ىلە ەنەرگيا اشۋ شەكتى سەرىكتەستىگىنە كەلىپ لابوراتوريالىق تەكسەرۋ قىزمەتىمەن شۇعىلدانعاننان قازىرگە دەيىن 13 جىلدى ٴبىر كۇنگىدەي وتكىزىپ، لابوراتوريالىق تەكسەرۋ ساندى مالىمەتىنەن ەشقانداي اعاتتىق جىبەرمەدى. ونىڭ سوزىمەن ايتقاندا، قاراپايىم ىستەردى قايتالاپ، قايتالامالى ىستەردى مۇقيات ىستەۋ كەرەك.

ياڭ حۇڭعا ەڭ تەرەڭ اسەر قالدىرعانى، ٴار كۇنى كومىر ۇلگىسىن ساراپتاۋ جانە جىلۋ مولشەرىن تاجىريبەدەن وتكىزۋ ٴۇشىن، وتتەگى كۇبىسىن ىستەتۋگە تۋرا كەلەتىن، وتتەگى كۇبىسى 3 كيلوگرام شاماسىندا بولىپ ٴبىرشاما اۋىر بولاتىن - دى، ەگەر ٴبىر كۇندە 10 رەت كومىر ۇلگىسىنە لابوراتوريالىق تەكسەرۋ جۇرگىزەتىن بولسا، ول كەمىندە 20 رەت وتتەگى كۇبىسىن كوتەرەتىندىكتەن، بىلەگى تالىپ اۋىراتىن. ٴبىراق ول ۇنەمى مۇنى ازىلگە بۇرىپ: ”جاقسى بولدى، ٴار كۇنى اقشا جۇمساماي - اق دەنە شىنىقتىراتىن بولدىم“ دەيتىن.

تەك 2023 - جىلدىڭ وزىندە ياڭ حۇڭ قىزمەتتەستەرىمەن بىرگە كومىردى 32279 رەت لابوراتوريالىق تەكسەرۋدەن وتكىزىپ، ٴتۇرلى مايعا 1010 رەت تەكسەرۋ جۇرگىزىپ، 1011 رەت ورتانى قورعاۋ تاجىريبەسىن جاساپ، 4500 رەت سۋ ساپاسىن ساراپتاۋدان وتكىزىپ، 60 ٴتۇرلى تاجىريبە ٴدارىسىن ازىرلەپ، سەرىكتىك ٴۇشىن كومىر، مۇناي سياقتىلارعا نەگىزدىك لابوراتوريالىق تەكسەرۋ جۇرگىزۋمەن بىرگە، اگراگاتتاردىڭ قالىپتى اينالىم قىزمەتىن سەنىمدى نەگىزبەن قامدادى.

ادىستە جاڭالىق اشىپ كۇرمەۋى كوپ كۇردەلى ماسەلەنى شەشتى

ياڭ حۇڭ تۇرعان لابوراتوريالىق تەكسەرۋ گرۋپپاسىندا ٴبىر ەر قىزمەتكەردەن باسقاسى تۇگەلدەي ايەل ەدى، ولار ٴار جىلى سەرىكتەستىكتىڭ 2 ميلليون توننادان اساتىن، قۇنى نەشە ٴجۇز ميلليون يۋان كەلەتىن كومىر ساپاسىن تەكسەرۋدەي جاۋاپكەرشىلىگى كۇشتى، اۋىر مىندەتتى ارقالاپ كەلەدى.

ياڭ حۇڭ ٴوزىنىڭ قىزمەت جاۋاپكەرشىلىگىنىڭ توتەنشە اۋىر ەكەندىگىن انىق بىلەتىن، ولاردىڭ لابوراتوريالىق تەكسەرۋدەن وتكىزگەن ساندى مالىمەتتەرى سەرىكتىكتىڭ سىرتقى ەسەپ جابۋ بارىسىنداعى ماڭىزدى نەگىزى بولىپ قالماستان، سەرىكتىكتىڭ حاۋىپسىز وندىرىسىندە دە ماڭىزدى رول اتقارادى، ٴبىر وندىق بولشەك نۇكتەسىنىڭ پارقى سەرىكتىككە اۋىر ەكونوميكالىق زيان جەتكىزۋى مۇمكىن. ول ۇنەمى وزىنە: ”تيتتەي دە شالاعايلىق ىستەۋگە  بولمايدى“ دەپ ەسكەرتىپ وتىراتىن.

قىزمەت ىستەگەن 13 جىلدان بەرى، ياڭ حۇڭ ۇستازدارىنان تەحنيكا، ٴادىس جانە كاسىپتىك ٴبىلىم ۇيرەنۋ ورايىن ەرەكشە قاستەرلەپ، تەحنيكالىق قابىلەتىن ۇزدىكسىز شىڭداپ، ٴار رەتكى لابوراتوريالىق تەكسەرۋ ساندى مالىمەتىنىڭ دالدىگى مەن سەنىمدىلىگىنە كەپىلدىك ەتىپ كەلەدى.

قىزمەتتەسى ۋي جيڭ: ياڭ حۇڭ ۇيرەنۋگە ىنتالى بولىپ قانا قويماي، وي جۇگىرتىپ، لابوراتوريالىق تەكسەرۋ ادىسىندە جاڭالىق اشىپ، كوپشىلىكتىڭ نازارىن اۋداردى - دەدى.

كرەمني قوس توتىعى − سۋ ساپاسىن ساراپتاپ تەكسەرۋدەگى ماڭىزدى كورسەتكىش، وعان اناليز جاساپ، ساراپتاۋ جۇرگىزۋ ارقىلى اينالىم بارىسىنداعى قالىپسىز جۇمىس جاعدايىن دەر كەزىندە ٴبىر جاقتى ەتىپ، شىرعالاڭنىڭ تۋىلۋىنان ساقتانۋعا ٴارى پار قازاننىڭ پايدالانىلۋ عۇمىرىن ۇزارتۋعا بولادى. الايدا، كرەمني قوس توتىعى تاجىريبەسىنە قولدانىلاتىن ٴدارىنىڭ 1 - 2 - 4 قىشقىلى تۇراقسىز بولاتىندىقتان ۇنەمى تاجىريبە ناتيجەسىنىڭ دالدىگىنە ىقپال ەتەتىن ەدى، سوندىقتان سۋداعى كرەمني قۇرامىن تىزگىندەۋ اگراگاتتاردىڭ حاۋىپسىز اينالىمىندا توتەنشە ماڭىزدى رول اتقارادى. بۇدان سىرت، ٴار جىلى جازدا تەمپەراتۋرانىڭ جوعارىلاۋى ٴدارىنىڭ تۇراقتىلىعىنا اسەر ەتەتىندىكتەن كرەمني قۇرامى ساندى مالىمەتتىڭ دالدىگىنە ونان ارى ىقپال جاسايتىن.

ياڭ حۇڭ قىزمەتتەستەرىمەن بىرگە كۇرمەۋى كوپ وسى ٴتۇيىندى شەشۋدىڭ شاراسىن قاراستىرادى. جابدىق وندىرەتىن زاۆودتارمەن بەلسەنە بايلانىس جاساۋ، كوپ رەتكى سىناق جاساۋ جانە تاجىريبەدەن وتكىزۋ ارقىلى ەڭ سوڭىندا بۇرىنعى تاجىريبەدەگى ٴدارىنىڭ 1 - 2 - 4 قىشقىلىن كۇكىرت قىشقىل تەمىر اممونيعا اۋىستىرىپ، ساندى مالىمەتتىڭ ورنىقتىلىعىن بارىنشا جوعارىلاتۋمەن بىرگە، ٴدارىنىڭ دەنساۋلىققا زيانىن  ازايتاتىن تىڭ تاجىريبە ٴادسىن تاپتى.

بۇل رەتكى لابوراتوريالىق تەكسەرۋ ادىسىندە جاڭالىق جاراتۋ گرۋپپاداعىلار جونىنەن العاندا توتەنشە ماڭىزدى جاڭالىق سانالىپ، اگراگاتتاردىڭ قالىپتى اينالىمىن ٴتىپتى دە جاقسى قامتاماسىزداندىردى. وسىدان كەيىن ياڭ حۇڭ بۇل ٴادىستى QC عىلمي تاقىرىپقا اينالدىرىپ، گرۋپپا اتىنان سەرىكتىكتىڭ جىلدىق QC جاريالاۋ قيمىلىنا قاتىناسىپ، 1 - دارەجەلى سيلىقتى ەنشىلەيدى.

قيىندىقتان تايسالماي العا ۇمتىلىپ، ”ۋاقىتتىق بانجاڭ“ بولدى

بانجاڭ جاڭ جۋجياۋدى اۋىزعا العاندا، ياڭ حۇڭ ەرەكشە سۇيىنەتىن. ول بىلاي دەدى: بانجاڭ جۇمىستا ەلپەك، قىزمەت تاجىريبەسى دە توتەنشە مول. ياڭ حۇڭ ۇنەمى بانجاڭ سياقتى بولعىسى كەلەتىن. ٴبىر جولى جاڭ جۋجياۋ دەمالىستا جاتقاندا شينجياڭ ەلەكتر قۋاتى تەحنيكاسىن باقىلاۋ ورتالىعى جولداعان 20 تاجىريبەحانانىڭ ماي ساپاسىنا حروماتوگرافيالىق تەكسەرۋ جۇرگىزۋ قابىلەتىن دالەلدەۋ قىزمەتىن ورىستەتۋگە ۇيىمداستىرۋ جونىندەگى ۇقتىرۋىن تاپسىرىپ الادى. جاڭ جۋجياۋ وسى باسەكەلى مىندەتتى ياڭ حۇڭعا تاپسىرادى ٴارى وعان: ”سەن قازىر ’ۋاقىتتىق بانجاڭسىڭ‘، بۇل رەتكى تاجىريبە ساندى مالىمەتتىڭ دالدىگى شينجياڭ ەلەكتر قۋاتى تەحنيكاسىن باقىلاۋ ورتالىعىنىڭ ماي ساپاسىنا حروماتوگرافيالىق تەكسەرۋ جۇرگىزۋ قابىلەتىمىزدى دالەلدەپ بەرە الۋ - الماۋىمىزبەن، سونداي ـ اق كاسىپورىننىڭ تەحنيكالىق اتاق ـ ابىرويىمەن دە قاتىستى“ دەپ قاداعالايدى. 

قىزمەت باسىمى اۋىر بولعانىمەن، ياڭ حۇڭ سىناپ كورىپ، ٴوز قابىلەتىن دالەلدەمەكشى بولادى.

شينجياڭ ەلەكتر قۋاتى تەحنيكاسىن باقىلاۋ ورتالىعى جىبەرگەن ماي ۇلگىسىن تاپسىرىپ العاننان كەيىن، ياڭ حۇڭ ولشەمدى گاز ازىرلەۋ، ۇلگى الۋ، شايقاۋ، اۋاسىن سورعىزۋ، لابوراتوريالىق تەكسەرۋدەن وتكىزۋ سىندى ٴاربىر باسقىشتى، ٴاربىر ارەكەتتى دەن قويا ىستەپ، تۇسىنبەگەن جەرى بولسا جاڭ جۋجياۋعا تەلەفون سوعىپ، اقىل سۇرايتىن، ياڭ حۇڭ بۇلاي ىستەگەندە تاجىريبە ناتيجەسىنە بارىنشا كەپىلدىك ەتۋگە بولادى دەپ قارايتىن.

قيىن ٴىس جوق جاھاندا، ىقىلاس قويعان ادامعا دەگەندەي، اقىرى ياڭ حۇڭنىڭ لابوراتوريالىق تەكسەرۋ ناتيجەسى شينجياڭ ەلەكتر قۋاتى تەحنيكاسىن باقىلاۋ ورتالىعىنىڭ ماي حروماتوگرافياسىن تەكسەرۋ قابىلەتىن دالەلدەۋىنەن ٴوتىپ، شينجياڭداعى 7 تولىمدى لابوراتوريالىق تەكسەرۋ تاجىريبەحاناسىنىڭ بىرىنە اينالادى. ويتكەنى مۇنداي ساراپتايتىن تاجىريبەحانانىڭ جالپى سانى 20 بولعانىمەن، مۇنىڭ ىشىندە دالەلدەۋدەن ٴوتۋ مولشەرى تەك %35 عانا بولعان جاعدايدا، بۇل وڭاي ناتيجە ەمەس - تى.

جاڭ جۋجياۋ ٴۇنحاتتا ياڭ حۇڭدى قۇتتىقتاعاندا، ياڭ حۇڭ كوڭىلدەنىپ قالادى. ول بۇل ناتيجە ٴوزىنىڭ تەحنيكالىق ناقتى كۇشىن دالەلدەپ قالماستان، لابوراتوريالىق تەكسەرۋ قىزمەتكەرىنىڭ كاسىپتىك رۋحىن دا ايگىلەگەندىگى دەپ ٴبىلدى.

”ياڭ حۇڭ، مىنا تەرمومەتر قالايشا سۋ قايتارمايدى، تەزدەن تەكسەرىپ كورشى“. ”ۋاقىتتىق بانجاڭ“ كەزىندە ياڭ حۇڭ وسى سەكىلدى كومەك سۇراعاندارعا ٴجيى جولىعاتىن، ول ٴارى - ٴسارى بولماستان دەرەۋ تەكسەرۋگە كىرىسىپ، ازىراق جوندەگەننەن كەيىن، ماسەلەنى شەشەتىن.

ماۋەلى جەمىس بەرىپ، سالاۋاتتى ساقا ۇستازعا اينالدى

2019 ـ جىلى ياڭ حۇڭ مەملەكەتتىك ەلەكتر قۋاتى كاسىبى بويىنشا جانار زات لابورانتتارىنىڭ تەحنيكالىق شەبەرلىك جارىسىنا قاتىناسۋعا تىزىمدەلىپ، ٴوزىنىڭ ىسىلعان تەحنيكالىق قۋاتىمەن قات ـ قابات وتكەلدەن ٴوتىپ، 99 ادامنىڭ اراسىنان الدىڭعى 6 - ورىندى يەلەپ، جارىس ٴتۇزىمى بويىنشا شەشۋشى جارىسقا جولداما الىپ، ەڭ سوڭىندا ۇزدىكتەر سيلىعىنا يە بولىپ، گرۋپپاسىنداعى ”تەحنيكا مايتالمانى“ اتانادى. 2023 - جىلى ول ورتا دارەجەلى حاۋىپسىزدىك ينجەنەرى كۋالىگىن الىپ، گرۋپپاسىنداعى، ٴتىپتى، سەرىكتىكتەگى بىردەن - ٴبىر وسى كۋالىكتى العان ايەل قىزمەتكەرگە اينالادى.

جاڭ جۋجياۋدىڭ سوزىمەن ايتقاندا، ياڭ حۇڭ سول كەزدەگى ”بىلەرى از بالا شاكىرتتەن“ ”لابوراتوريالىق تەكسەرۋدىڭ مايتالمانىنا“ اينالىپ، قىزمەتتەستەر ونى ”ياڭ ۇستاز“ دەپ اتايدى.

2024 - جىلى 1 - ايدا لابوراتوريالىق تەكسەرۋ گرۋپپاسىنا شيە مىڭ مەن سۇڭ پيڭپيڭ اتتى ەكى جاڭا قىزمەتكەر كەلىپ، تەحنيكالىق ونەر ۇيرەنبەكشى بولادى.

”ياڭ ۇستاز، ٴسىز ماعان وسى اسپاپتى قالاي تەڭشەۋدى ۇيرەتە الاسىز با؟“، ”ياڭ ۇستاز، بۇل رەتكى تاجىريبەدەگى ترانسفورماتور مايىنداعى سۋتەگى گازىنىڭ مولشەرى قالايشا جوعارى؟“ دەپ لابوراتوريالىق تەكسەرۋ بولمەسىندە ەكى جاڭا قىزمەتكەر ٴار كۇنى ياڭ حۇڭنان ەكى ەلى قالماي ىلەسىپ الادى.

ياڭ حۇڭ قاشاندا يگەرگەن تەحنيكالارى مەن تاجىريبەلەرىن ولارمەن بولىسەتىن. تاجىريبە جاساۋ بارىسىندا ولارعا جۇمىس باسقىشتارى مەن كوڭىل بولەتىن ىستەردى، سونداي - اق شۇعىل جاعدايعا توتەپ بەرۋ، ٴبىر جاقتى ەتۋ شارالارىن سابىرلىلىقپەن ٴتۇسىندىرەتىن. ولاردىڭ تەحنيكالىق قابىلەتىن تەز جوعارىلاتۋ ٴۇشىن، ياڭ حۇڭ تاربيەلەۋ جوباسىن جاساپ، شاعىن ساباق ٴوتۋ، تەحنيكاعا قاتىستى سۇراۋ - جاۋاپ ازىرلەۋ، تەحنيكاعا قاتىستى ەمتيحان الۋ سياقتىلاردى ورىستەتەدى. سونىمەن بىرگە، شاعىن گرۋپپالاردا الماسىپ ىستەۋ ٴادىسىن قولدانىپ، سۋ، كومىر، مۇناي، قورشاعان ورتانى قورعاۋعا ساياتىن شاعىن گرۋپپالارعا ٴبولىپ مۇقيات باسقارىپ، ”قايسى ورىندا ادام كەمشىل بولسا، سول ورىنعا باسقالاردى سەپتەي بەرەتىن“ بولدى.

ياڭ حۇڭ ۇيرەنە ٴجۇرىپ، ىزدەنىپ، قىزمەتتەستەرىمەن بىرگە تەحنيكانى كادەگە جاراتىپ تابىسقا جەتتى. سۋ ساپاسىنىڭ حيميالىق وتتەگىن سارىپ ەتۋ مولشەرىن ولشەۋ ٴادىسى جاعىندا، بۇرىنعى اۋىر حروم قىشقىل كالي ٴادىسىن COD جارىق دارەجەسىن تەز تەكسەرۋ ادىسىنە وزگەرتتى. بۇل ٴادىس قولدانىسقا تۇسكەننەن كەيىن، گرۋپپاداعىلاردىڭ حيميالىق ٴدارى ىستەتۋدەگى شىعىنى مەجە ەسەپتەگىدەن %20 ۇنەمدەلدى، سونىمەن بىرگە، تاجىريبە ونىمدىلىگى %50 جوعارىلادى، 2023 - جىلى ٴتۇرلى شىعىنى مەجە ەسەپتەگىدەن 10 مىڭ يۋانعا جۋىق ۇنەمدەلدى. 

”لابوراتوريالىق تەكسەرۋ گرۋپپامىز شاعىن كوللەكتيۆ، بارلىق ادام بىرگە ۇمتىلىپ، قابىلەتى بىركەلكى بولعاندا عانا، گرۋپپامىز ٴتۇرلى مىندەتتەردى جوعارى ٴونىممەن، وپ ـ وڭاي ورىنداي الادى“. ياڭ حۇڭ بىلاي دەدى: كاسىپتى ٴسۇيۋ، كاسىپتى قادىرلەۋ − لابوراتوريالىق تەكسەرۋ گرۋپپاسىنداعى بارلىق ادامنىڭ ورتاق تانىمى.