لاي يۇينيڭ، جاڭ چيڭحۋا (ٴوز تىلشىلەرىمىز)
جۋىقتان بەرى ٴار كۇنى كەشتە قىرۋار قالا تۇرعىنى مەن ساياحاتشى قۇلجا قالاسى وڭتۇستىك جاعالاۋ جاڭا رايونىنداعى ىلە وزەنى كورىنىس جولىنا بارىپ، سالقىندايتىن جانە ساياحاتتايتىن بولدى. ساياحاتشى سانىنىڭ ارتۋىمەن، ٴتۇرلى قوقىر - قوقسىق تا كوبەيىپ، تازالىق جۇمىسشىلارىنىڭ جۇمىسىن كوبەيتتى. ورتا تازالىعىنا كەپىلدىك ەتۋ ٴۇشىن، تازالىق جۇمىسشىلارى ۇنەمى ۇستەمەلەپ جۇمىس ىستەپ، قوقىر - قوقسىقتى تازالايتىن بولدى.
وڭتۇستىك جاعالاۋ جاڭا رايونىنىڭ ورتا تازالىعى اترەتىندە جالپى 25 ادام بار، ولار 100 شارشى كيلومەتر ٴوڭىردىڭ ورتا تازالىعىنا جاۋاپتى، بۇل قالا كوشەلەرىن قامتىپ قانا قالماستان، اۋىل - قىستاق ماڭىنداعى الەۋمەتتىك اۋماقتى، ٴتىپتى 60 كيلومەتر شالعايداعى ٴۇيسىن تاۋى باۋرايىنداعى مال شارۋاشىلىق قىستاعىن دا قامتيدى.
وڭتۇستىك جاعالاۋ ورتا تازالىعى اترەتىندەگىلەردىڭ كوبى جۇمىسقا شوگەل ٴارى جۇمىسقا ىسىلعاندار، ولار ورتا تازالىعى اترەتىنىڭ ٴتۇرلى ماشينالارىن جۇرگىزۋ، سۋ شاشۋ، جەر سىپىرۋ، قوقىر - قوقسىق تاسۋدان تىس، جول شىراقتارىن رەمونتتاۋ، جەر استى قۇبىر جولىن ىركىلىسسىزدەندىرۋ، توعان تازالاۋ، ورتتەن ساقتانۋ، ٴورت ٴوشىرۋ سياقتى جۇمىستارعا دا شەبەر، سول ٴۇشىن وڭتۇستىك جاعالاۋ جاڭا رايونىنداعى تۇرعىندار ولاردى «ەرەكشە اترەت» دەپ اتايدى.
تۇرعىنداردىڭ اۋلاسىنىڭ الدى - ارتى مۇنتازداي تازالانىپ جاسىلداندىرىلىپ، ٴار الۋان گۇلدەر جايقالا اشىلىپ، اينالانىڭ كورىكتەنگەنىن كورگەن ي - شۇي الەۋمەتتىك اۋماعىنىڭ 65 جاستاعى تۇرعىنى ايگۇل روزى تازالىق جۇمىسشىلارىنىڭ قۇلشىنۋىندا الەۋمەتتىك اۋماق ورتاسىنىڭ كۇننەن كۇنگە جاقسارعانىن قۋانا اڭگىمەلەدى. «قاراستىلىعىمىزدا ٴبىر مىڭ 600 گە جۋىق تۇرعىن بار، تازالىق جۇمىسشىلارى ٴار كۇنى كوشەلەردى تازالاپ، قوقىر - قوقسىقتاردى تاسىپ، ورتانى كورىكتەندىرەدى، ولاردىڭ جاپالى ەڭبەگىنە العىس ايتامىز» دەدى وڭتۇستىك جاعالاۋ جاڭا رايونى ي - شۇي الەۋمەتتىك اۋماعىنا تۇسكەن «ۇعىسۋ، تيىمدىلىك جاساۋ، توعىستىرۋ» قىزمەت اترەتىنىڭ 1 - شۋجيى حۋاڭ گۇيتيڭ.
ٴۇيسىن تاۋى باۋرايىنداعى ۇگىرشى قىستاعى ٴبىرشاما الىس بولعاندىقتان، تازالىق قىزمەتكەرلەرى بۇل اراداعى قوقىر - قوقسىقتى تاسۋعا بارعاندا، تاماعىن الا بارىپ، تۇستە جول بويىنداعى كوگالدا تاماقتانادى. ورتا تازالىعى اترەتى 6 ۇلتتان قۇرام تاپقان، ادەتتە ولار بىرگە جۇمىس ىستەپ، بىرگە تاماقتانىپ ٴبىر وتباسىنىڭ ادامدارىنداي قويۋ دوستىق ورناتقان، كىم قيىنشىلىققا تاپ بولسا، كوپشىلىك شاماسىنىڭ جەتىسىنشە كومەكتەسەدى.
«بۇل جەردە جۇمىس اۋىر بولسا دا، ساياحاتشىلاردىڭ، تۇرعىنداردىڭ تازا ورتادا ساياحاتتاپ، دەنە شىنىقتىرىپ جۇرگەنىن كورگەندە، ەڭبەگىمىزدىڭ جانعانىنا قۋانامىز» دەدى ورتا تازالىعى اترەتىنىڭ مۇشەسى ۋاڭ جيانشين بارلىق كاسىپتەستەرىنىڭ جۇرەك ٴسوزىن بايانداپ.
«وڭتۇستىك جاعالاۋ جاڭا رايونىن قۇلجا قالاسىنداعى ورتاسى ەڭ كوركەم رايون ەتىپ قۇرۋ ٴۇشىن ٴبىز ٴتۇرلى قيىنشىلىقتاردى جەڭىپ، شارشاۋدان، لاس زاتتاردى تازالاۋ، تاسۋدان باس تارتپاي، جۇمىس ورنىمىزدا تابىلجىماي، ٴىس جۇزىندىك ارەكەتىمىز ارقىلى قالانىڭ تازالىعىن، رەتتىلىگىن قورعايمىز» دەدى وڭتۇستىك جاعالاۋ جاڭا رايونى ورتا تازالىعى اترەتىنىڭ باستىعى ساۋ پيڭ.
جەر سىپىرۋ ماشيناسى كورىنىس رايونىنداعى جولدى تازالاۋدا
سۋ بەتىندەگى قوقىر - قوقسىقتاردىٴسۇزۋ
قوقىر - قوقسىقتى شوعىرلاندىرىپ جوتكەۋ
وزەن ارناسىنداعى قوقىر - قوقسىقتى تازالاۋ
جەر استى قۇبىر جولىن ىركىلىسسىزدەندىرۋ
توعان ارشۋ
سۋ شاشىپ، تەمپەراتۋرانى تومەندەتىپ، شاڭ - توزاڭدى باسۋ