伊犁新闻网

سۋرەتتەرىن ٴتۇسىرىپ، ماقالاسىن جازعان مىڭ شيا، جاڭ چيڭحۋا، لاي يۇينيڭ، ياڭ جيڭ - ي (ٴوز تىلشىلەرىمىز)

قورعاس اۋدانى لۋساۋگۋ قالاشىعى سىگۇڭ قىستاعى كەزىندە تاستاقتى، كەدەي قىستاق بولاتىن، حوش ٴيىستى كاسىپ سالاسىن دامىتىپ، جۇپار ٴشوپتى كەڭ كولەمدە ەگۋ ارقىلى قازىر شار تاراپتىڭ ساياحاتشىلارىن باۋرايتىن ىرىستى مەكەنگە اينالدى.

”كۇلگىن ەكونوميكا“ بايۋعا جول اشتى

6 - ايدا قورعاس اۋدانىنداعى 56 مىڭ مۋ جەردەگى جۇپار ٴشوپ بىرتىندەپ گۇلدەدى. جۇپار ٴشوپ شوعىرلى ەگىلگەن لۋساۋگۋ قالاشىعى سىگۇڭ قىستاعىنا بارعانىمىزدا، اتىز كۇلگىن تۇسكە بولەنىپ، سامال جەلمەن حوش ٴيىس اڭقىپ تۇردى، اتىزدا ەڭبەك ىستەپ جۇرگەن جەرگىلىكتى ەگىنشىلەردەن سىرت، بۇكىل ەلدىڭ جەر - جەرىنەن كەلگەن ساياحاتشىلار مەن توراپ جۇلدىزدارى توپ - توبىمەن كەزىگەدى.

6 - ايدىڭ 26 - كۇنى ٴتىلشىنىڭ سۇحپاتىن قابىلداعان سىگۇڭ قىستاعىنىڭ تۇرعىنى ما جۇڭلياڭ بىلاي دەدى: ”جاس كەزىمدە جاپا تارتىپ ىستەسەم دە، ماندىمدى اقشا تابا الماۋشى ەدىم، قازىر قارتايسام دا، ۇيدە وتىرىپ - اق قوماقتى كىرىس ەنگىزە الاتىن بولدىم. جۇپار ٴشوپ قىستاق تۇرعىندارىنا بايۋدىڭ داڭعىل جولىن سالىپ بەرەتىنىن ويلاماعان ەدىم“.

بۇرىن سىگۇڭ قىستاعى اتى شىققان تاستاقتى قىستاق بولاتىن، ەگىستىك جەرىنىڭ توپىراق قاباتى جۇقا، تاستاقتى بولعاندىقتان، ەگىس داقىلدارىنىڭ ٴونىم مولشەرى توڭىرەكتەگى قىستاقتاردىڭ جارىمىنداي عانا ەدى. 2009 -

جىلى جەرگىلىكتى ۇكىمەتتىڭ جەبەۋىندە، از ساندى قىستاق تۇرعىندارى جۇپار ٴشوپ ەگۋدى سىناق رەتىندە باستادى.

سىگۇڭ قىستاعى پارتيا ياچەيكاسىنىڭ شۋجيى پان لين بىلاي دەدى: ”قىستاق تۇرعىندارى جۇپار ٴشوپ ەگىپ، گۇلىن كەپتىرىپ، ەفير مايىن ايىردى، ٴبىر جىلداعى كىرىسى بۇرىنعى بىرنەشە جىلداعى كىرىسىمەن بارابار بولدى. وسىدان كەيىنگى 10 نەشە جىلدا سىگۇڭ قىستاعىنداعى جۇپار ٴشوپ ەگىلگەن جەر اۋدانى 12 مىڭ مۋعا جەتتى، قىستاقتا 445 تۇرعىلىقتى وتباسى بار، ولاردىڭ %95 ى جۇپار ٴشوپ ەگۋدە“.

”كۇلگىن ەكونوميكا“ تۇتاس كاسىپ تىزبەگىنىڭ دامۋىن جەبەدى

بىرنەشە جىلدىڭ الدىندا جۇپار ٴشوپ كاسىبىن قىستاق كوللەكتيۆى مەن قىستاق تۇرعىندارىنىڭ كىرىسىن ارتتىراتىن تىرەكتى كاسىپ سالاسى ەتۋ ٴۇشىن، سىگۇڭ قىستاعى جەردى اماناتتاپ باسقارۋ، اينالىمعا سالۋ، جارنا قوسۋ سياقتى تاسىلدەرمەن ەگىمشىلىك كولەمىن كەڭەيتتى. سونىمەن بىرگە، بوياڭ رۇيليان شەكتى سەرىكتەستىگىمەن سەلبەسىپ، جۇپار ٴشوپ ونىمدەرى كاسىپ تىزبەگىن ۇزارتىپ، جۇپار ٴشوپ ونىمدەرىنىڭ قوسىمشا قۇنىن جوعارىلاتتى؛ جيەيوۋ حانىشا جۇپار ٴشوپ سەرىكتەستىگىمەن سەلبەسىپ، مەملەكەتتىك A 4 دارەجەلى كورىنىس ٴوڭىرى − جيەيوۋ حانىشا جۇپار ٴشوپ باقشاسىن قۇرىپ، جۇپار ٴشوپ ەگۋ، مانەرلەۋ، ساتۋ، اۋىل شارۋاشىلىعى سەيىل - سەرۋەنى مەن ساياحاتتى ٴبىر تۇلعالاندىرعان تۇتاس كاسىپ تىزبەگىنىڭ دامۋىن جۇزەگە اسىرىپ، ”سەلبەستىك كووپەراتيۆى + كاسىپورىن + شارۋالار وتباسى + ەلەكتروندى ساۋدا“ سىندى اينالىم ۇلگىسىن باستادى.

جيەيوۋ حانىشا جۇپار ٴشوپ سەرىكتەستىگىنىڭ باس ديرەكتورىنىڭ كومەكشىسى جاڭ جىچياڭ بىلاي دەدى: ”ٴبىز جەلىلەس 6 ۇلكەن تۇردەگى 300 نەشە جەكە ٴونىمدى زەرتتەپ وندىردىك، مىسالى، جۇپار ٴشوپ قۇرعاق گۇلى، ەفير مايى، گۇل قويمالجىڭى، تازا شىرىن، بال سياقتى ونىمدەر بار، 400 دەن استام تۇتىنۋ تەرمينالى بۇكىل ەلدىڭ جەر - جەرىنە تارالدى. ٴتىپتى دە كوپ ساياحاتشىنىڭ جۇپار ٴشوپ گۇل تەڭىزىن ۇزاق ۋاقىت تاماشالاۋىنا مۇمكىندىك جاساۋ ٴۇشىن، جۇپار ٴشوپتىڭ ماۋسىم سايىن گۇل اشۋىن ىسكە اسىردىق، 6 - ايدان 9 - ايعا دەيىن قورعاس اۋدانىندا جۇپار ٴشوپ گۇلىن تاماشالاۋعا بولادى“.

باستاماشى كاسىپورىنداردىڭ جەتەكتەۋىندە، ٴار جىلى 10 مىڭنان استام ادام - رەت جۇمىسشى ىستەتۋ ماسەلەسىن شەشىپ قانا قالماستان، جەرگىلىكتى ورىنعا 500 مىڭنان استام ادام - رەت ساياحاتشى اكەلىپ، توڭىرەكتەگى قىستاقتاردىڭ اس - سۋ، حالىقتىق تۇسەلحانا سياقتى قاتىستى كاسىپتەرىنىڭ قاۋىرت دامۋىن جەبەدى.

اۋىل شارۋاشىلىعى، مادەنيەت، ساياحات توعىسپالى دامىتىلدى

2009 - جىلى جەرگىلىكتى ۇكىمەتتىڭ جەبەۋىندە، سىگۇڭ قىستاعىنداعى شارۋالار جۇپار ٴشوپ ەگۋدىڭ داڭعىل جولىنا ٴتۇستى، 2019 - جىلى سىگۇڭ قىستاعى شىت جاڭا بەينەگە ەنىپ، ”ولەڭ - جىرلى باۋ - باقشا كورىنىسىن“ نەگىزگى تاقىرىپ ەتىپ، ەرەكشە حالىقتىق تۇسەلحانا، اس - سۋ جانە ۇلتتىق سالت - سانا ٴبىر تۇلعالانعان ساياحات سەيىل - سەرۋەنىن قالىپتاستىردى. قازىر 38 تۇرعىندار تۇسەلحاناسى سالىندى، وندا 300 توسەك بار، 5 - اي كىرگەننەن بەرى حالىقتىق تۇسەلحاناعا تۇسەتىندەردىڭ سالىستىرماسى %80 تەن اسىپ، ٴار جىلعى 6 - ايدان 10 - ايعا دەيىنگى ۋاقىت ساياحاتتاۋدىڭ قاۋىرت مەزگىلىنە اينالدى.

لۋساۋگۋ قالاشىعى پارتكومىنىڭ شۋجيى لي زىڭجيە بىلاي دەدى: ٴبىر سىدىرعى تۇرمىستىڭ قىستاق تۇرعىندارىنىڭ باقىتتى تۇرمىسىنا اينالارىن ويلاماپپىز. بۇكىل ەلدىڭ جەر - جەرىنەن كەلەتىن ساياحاتشىلار قىستاق تۇرعىندارىنىڭ تۇرمىسىن بايىتا ٴتۇستى.

ىلە وبلىسى − بۇكىل ەلدەگى جۇپار ٴشوپ ەگىمشىلىك كولەمى ەڭ زور، ەڭ شوعىرلى رايون، ساياحات بايلىعى جاعىندا وزىندىك ابزالدىققا يە، جيەيوۋ حانشا، زىسۋ - ليرىن سياقتى مەملەكەت دارەجەلى جوعارى، جاڭا تەحنيكا كاسىپورىندارى بار، جۇپار ٴشوپ كاسىبىنىڭ باسەكەلىك قۋاتى ەڭ كۇشتى جەر. قازىرگە دەيىن وبلىسقا توتە قاراستى ورىنداردا 110 مىڭ مۋ جەردەگى جۇپار ٴشوپتى مانەرلەيتىن 133 كاسىپورىن بار، مۇنىڭ ىشىندەگى كولەمدەنگەن 4 كاسىپورىن 249 جۇپار ٴشوپ ٴونىمى تاۋار ماركاسىن تىركەۋگە الدىرىپ، 700 دەن استام اجارلاندىرۋ، ەمدەۋ ونىمدەرىن وندىرۋدە.