كوپ تەر اعىزعان سايىن، قايراتىمىز سونشالىق كۇشەيەدى
انار بۇلت / شينجياڭ گازەتىنىڭ ءتىلشىسى جيڭ بو
”12 - ايدىڭ 24 - كۇنى ءۇي تازالايدى“. 2 - ايدىڭ 5 - كۇنى ەسكىشە كالەندار بويىنشا 12 - ايدىڭ 24 - كۇنى كوپ ساندى ادامدار كوكتەم مەرەكەسىن وتكىزۋگە قامدانىپ جاتقان كەزدە سپورتشىلار ءالى دە جاتتىعۋ الاڭىندا اشتى تەر توگىپ، سايىسقا ساقاداي سايلانىپ، جاتتىعۋ جاساپ جاتتى.
ءار كۇنى تۇستەن بۇرىن جانە تۇستەن كەيىن 2 ساعاتتىق جاتتىعۋ جاسايدى، كەشتە دەنساۋلىقتى قالپىنا كەلتىرۋگە فيزيكالىق ەم قابىلدايدى نەمەسە ۇستەمە جاتتىعۋ جاسايدى، شينجياڭ بوكس سپورتىن باسقارۋ ورتالىعىنىڭ سپورتشىسى توقتاربەك تاڭاتقاننىڭ جاتتىعۋ ۋاقىت كەستەسى تولتىرىپ ءتىزىپ تاستالعان. بىلتىرعى توكيو وليمپيادا سپورت جينالىسىنىڭ بوكس تۇرىنەن ازيا - وكەانيا رايونى تولىمدىلىق جارىسىندا توقتاربەك ۇدايى 4 كەزەك قارسىلاسىن جەڭىپ شىعىپ، ەڭ اقىرىندا جۇڭگو بوكس ءتۇرى 75 كيلوگرامدىق سالماق دارەجەسى بويىنشا وليمپيادا سپورت جينالىسىنا قاتىناسۋ تولىمدىلىعىنا يە بولدى.
”تەك جايشىلىقتاعى ۋاقىتتا كوبىرەك تەر اعىزساق، جارىس كەزىندە قايراتىمىز سونشالىق كۇشەيەدى“. وليمپيادا سپورت جارىسىنا ساقاداي سايلانىپ جاتقان توقتاربەك ءوزىن وسىلاي جىگەرلەندىردى.
”وتاننىڭ داڭقى بارىنەن جوعارى“ دەگەن ءسوز شينجياڭ بوكس قۇراماسىنىڭ قوسىن ۇستانىمى. 2011 - جىلى 14 جاستاعى توقتاربەك قۇراماعا قوسىلعاننان باستاپ وسى قوسىن ۇستانىمى ونىڭ جۇرەگىنەن تەرەڭ ورىن العان، ”ەڭ جوعارى سيلىق ساحناسىنا شىعۋ مەنىڭ نىسانام جانە العا باسۋ بەتالىسىم“.
مەملەكەتتىك بوكس قۇراماسىنىڭ جاتتىقتىرۋشىسى، شينجياڭ بوكس سپورتىن باسقارۋ ورتالىعىنىڭ مەڭگەرۋشىسى ابدۇشۇكۇر مىجيتتىڭ قاراۋىنشا، توقتاربەك جاتتىعۋدا مۇقيات، جاپاعا شىدامدى، ۇڭىلە زەرتتەگەندى جاقسى كورەدى، اعا جۇلدەگەرلىكتى الۋ ارمانى كۇشتى.
2017 - جىلعى مەملەكەتتىك 13 - كەزەكتى سپورت جينالىسىندا، توقتاربەك 75 كيلوگرام سالماق دارەجەسى بويىنشا كۇمىس مەدال ەنشىلەدى. سول كەزدەن باستاپ توقتاربەك وسى سالماق دارەجەسىندە ەل ىشىندە تالاي رەت اعا جۇلدەگەر بولدى ءارى حالىقارالىق جارىس مايدانىندا بوي كورسەتە باستادى.
بوكس سپورتىنىڭ سپورتشىلاردىڭ جالپىلىق ساپاسىنا قوياتىن تالابى، ياعني قادام قوزعالىسى، ارەكەت شيراقىلىعى، قارقىن قايراتى، دەنەنىڭ توزىمدىلىگى سياقتىلارعا قوياتىن تالابى وتە جوعارى. 2 - ايدىڭ 5 - كۇنى تۇستەن بۇرىنعى جاتتىعۋ ساباعىندا الدىمەن ءبىر مايدان باسكەتبول جارىسى وتكىزىلدى. اتويشى مىندەتىن اتقارىپ جۇرگەن توقتاربەك تۇتقيىل شابۋىلداۋعا دا، دوپ سالۋعا دا شەبەر ەكەن، قايتپا دوپقا تالاسۋدا، سىزىق سىرتىنان 3 نومىرلىك دوپ سالۋدا ەرەكشە كوزگە ءتۇستى.
”باسكەتبول ويناۋدى قاتتى جاقسى كورەمىن، بۇل ءبىزدىڭ اياق الىسىمىزدى جانە دەنەنىڭ شيراقىلىعىن شىڭدايدى، دوپ سالۋ بولسا دالمە - دالدىككە جاتتىقتىرادى“. باسكەتبول جايلى ايتقاندا، توقتاربەك جىگەرلەنىپ كەتتى.
ىلە - شالا، توقتاربەك ەكى قولىمەن جەكە - جەكە ءبىر كيلوگرامدىق كوتەرگىنى ۇستاپ، اۋادا جۇدىرىق سىلتەۋ جاتتىعۋىن جاسادى. ”قيالىڭدا قارسىلاسىڭنىڭ جۇدىرىق جۇمساۋى مەن قوزعالىسىن ەلەستەتىپ، سوعان قاراي قورعاناسىڭ جانە وعان قارسى جۇدىرىق جۇمساپ، شابۋىلدايسىڭ“، - دەدى توقتاربەك ءتۇسىندىرىپ.
مۇنداي جاتتىعۋ ويلاۋ قۋاتىن قاجەت ەتەدى، ءمۇلت كەتىرسەڭ ارامتەر بولاسىڭ، الايدا، ءتىلشى نەشە قايتالاي ايقاستان كەيىن، توقتاربەكتىڭ ماڭدايىنىڭ تەرشىپ، ەنتىگى كۇشەيە تۇسكەندىگىن بايقادى.
ابدۇشۇكۇر تىلشىگە كۇندەلىكتى جاتتىعۋدان سىرت، قۇراما ىشىندە ۇقساماعان دارەجەدەگى ارىپتەستەردى دايىنداپ، توقتاربەكتى ۇقساماعان ستيلدەگى ارىپتەستەرگە ۇيلەسۋگە دايىنداپ جاتقاندىعىن ايتتى. سونىمەن بىرگە، قورعانۋ مەن شابۋىلداپ قورعانۋدى وزگەرتۋ جاعىندا ءتۇيىندى جاتتىعۋ جاسايدى ەكەن.
جارىس كەسكىندەرىنە تالداۋ جۇرگىزىپ، ولقىلىقتارىن تەكسەرىپ، جەتەرسىزدىگىن تولىقتاۋ دا توقتاربەكتىڭ كۇندەلىكتى ەڭ كوپ شۇعىلداناتىن ساباعى ەكەن. ونىڭ تاقتا كومپيۋتەرىنە كوپ مولشەردەگى ءوزىنىڭ جارىس كەسكىندەرى مەن نەگىزگى ارىپتەستەرىنىڭ جارىس كەسكىندەرى ساقتالعان، ”ءار جولعى جارىس اياقتالعان سوڭ، كەشىندە مەن دەسكانى قايتالاي كورىپ، ءوزىمنىڭ تەحنيكالىق ارەكەتىم مەن اياق الىسىمدا قانداي ماسەلەلەر بولعاندىعىن تەكسەرىپ، جاتتىعۋ كەزىندە تۇزەتەمىن“.
جارىستىڭ جاي - جاپسارىنا شۇقشيۋ وزىنە تالاپ قويعاندىق بولۋمەن بىرگە، ارىپتەسىن زەرتتەۋدى دە قاعىس قالدىرمايدى. ساپتاستارى ۇنەمى توقتاربەكپەن بىرگە تالقى جۇرگىزەدى، الايدا، ول ۋاقىتى شىعا قالسا بولعانى، ءوزى تاعى ءبىر رەت قايتالاي كورىپ، ويىندا ارىپتەسىنە جولىققانداعى جارىس كورىنىسىن كوز الدىنان وتكىزەدى.
”مەن ءار كۇنگى جاتتىعۋلارىمدى ويىمدا قايتالاي وتكىزىپ شىعامىن، كورگەن جارىس كەسكىندەرىن قايتا - قايتا وي ەلەگىمنەن وتكىزەمىن. بۇل ءبىر ءتۇرلى جىگەر كۇشى مەن رۋحاني قۋاتتى شىڭداۋ، ءوزىمدى ءتىپتى دە الۋەتتەندىرسەم دەيمىن“، - دەدى توقتاربەك.
ابدۇشۇكۇر تانىستىرىپ، بوكس قۇراماسىنىڭ كوكتەم مەرەكەسىنە قاراعان كۇنى تۇسكە دەيىن جاتتىعۋ جاساپ، ءبىر كۇن دەمالعاننان كەيىن، كوكتەم مەرەكەسىنىڭ ەكىنشى كۇنى جاتتىعۋدى جالعاستىراتىندىعىن ايتتى.
”كوكتەم مەرەكەسىندە ۇيگە قايتا المايمىن، ءبىراق اكە - شەشەم مەنى تۇسىنەدى ءارى مەنى توتەنشە قولدايدى“. توقتاربەك كۇلە سويلەپ: ”اكە - شەشەم ماعان كوپ تەلەفون سوقپايدى، مەنىڭ جاتتىعۋىما ىقپال تيگىزۋدەن الاڭدايدى، ىلعي دا ماعان ءسوز قالدىرىپ، ماعان جىگەر بەرەدى جانە جاقسى تىلەك تىلەيدى، مەنى وتانعا داڭق اپەرۋگە شابىتتاندىرادى“، - دەدى.